Stqarrija
maħruġa mill-Kelliem għall-Iżvilupp Sostenibbli, l-Ambjent u t-Tibdil fil-Klima
Charlo Bonnici
Fil-ġranet
li ġejjin mill-pjazza ta’ Kastilja se jinqalgħu erbatax-il siġra tal-palm, tnax
tat-tip Phoenix Canariensis u tnejn Wasingtonia Filfera. Dan
sabiex ikun jista’ jitqiegħed u jingħata prominenza l-monument tal-eks Prim
Ministru Duminku Mintoff. Din id-deċiżjoni ġiet ikkonfermata fi tweġiba għal
Mistoqsija Parlamentari kemm mill-Ministru għat-Trasport u l-Infrastruttura Joe
Mizzi kif ukoll mill-Ministru għall-Iżvilupp Sostenibbli, Ambjent u Tibdil
fil-Klima Leo Brincat.
Għalkemm
il-MEPA ħarġet il-permessi meħtieġa biex isir dan ix-xogħol,
l-Oppożizzjoni tesprimi t-tħassib tagħha għal numru ta’ fatti marbuta miegħu:
1. Skont it-tweġiba mogħtija fil-Parlament,
ħamsa minn dawn is-siġar se jinqerdu minħabba li għandhom sintomi ta’
infezzjoni tal-Bumunqar l-Aħmar tal-Palm. Il-mistoqsija tqum waħedha: min
iddetermina li jeżistu dawn is-sintomi? Inħarġu ċertifikati biex juru dan? Jekk
iva, għaliex iż-żewġ Ministri naqsu milli jpoġġu dawn iċ-ċertifikati fuq
il-mejda tal-Kamra kif mitluba?
2. Xi rwol kellu l-Kumitat Konsultattiv dwar
is-Siġar li twaqqaf mill-Ministru Leo Brincat wara l-elezzjoni ġenerali f’dan
il-proġett? Il-Kumitat Konsultattiv ġie konsultat?
3. Huwa minnu li l-uffiċjali esperti f’dan
il-qasam ġew maqbuża u li l-ordnijiet ingħataw minn kwartieri politiċi?
4. Qabel ma jipproċedi bil-qlugħ tas-siġar,
il-Gvern se jagħmel analiżi dwar ir-rata ta’ suċċess fit-trasferiment minn post
għall-ieħor ta’ dawn it-tip ta’ siġar?
Il-Partit
Nazzjonalista jfakkar fil-wegħda 65 imniżżla fil-programm elettorali tal-Partit
Laburista li twiegħed li: “inħarsu kontinwament is-siġar eżistenti
fil-bliet u fl-irħula Maltin u ninċentivaw it-tħawwil ta’ aktar siġar,
partikolarment dawk indiġeni.” Din il-wegħda kif qed titwettaq f’dan il-każ?
--
Uffiċċju
Informazzjoni
Partit
Nazzjonalista
No comments:
Post a Comment