6637. L-ONOR. CARMELO MIFSUD BONNICI staqsa lill-
Ministru għall-Affarijiet Barranin u Promozzjoni tal-Kummerċ: Jista’ l-Ministru
jinforma lill-Kamra x’ħidma u x’inizjattivi ttieħdu mill-ambaxxata tagħna
għall-Greċja tul dawn l-aħħar tletin xahar?
25/06/2018
ONOR. CARMELO
ABELA: Ninforma lill-Onor. Interpellant li r-relazzjonijiet
bilaterali bejn Malta u l-Greċja huma ferm pożittivi u qegħdin ikomplu
jissaħħu. Għaldaqstant, f’dawn l-aħħar tletin xahar, l-Ambaxxata Maltija
fil-Greċja ħadmet bla waqfien sabiex dawn ir-relazzjonijiet ikomplu jiġu
approfondati permezz ta’ inizjattivi u ħidma li saħħew il-kooperazzjoni
politika, bilaterali, kummerċjali u kulturali bejn iż-żewg pajjiżi.
Ħidma Konsulari
L-Ambaxxata dejjem kienet
għad-disposizzjoni taċ-ċittadini Maltin li jgħixu fil-Greċja u dawk li
jivvjaġġaw lejn dan il-pajjiż, u ċittadini Griegi li jixtiequ jivvjaġġaw lejn
Malta li jeħtieġu xi għajnuna, kemm fuq temi konsulari, kif ukoll temi
turistiċi u kummerċjali. Fost l-oħrajn l-Ambaxxata assistiet f’informazzjoni
dwar iċ-ċittadinanza Maltija, tiġdid ta’ passaporti, informazzjoni dwar żjarat
f’Malta għal skopijiet kummerċjali u anki edukattivi u ħruġ ta’ dokumenti
urġenti tas-safar għal Maltin li tilfu jew ġew misruqa d-dokumenti tagħhom waqt
li kienu fil-Greċja.
Promozzjoni ta’ Malta
Wieħed mis-setturi li
l-Ambaxxata tagħti importanza speċjali huwa s-settur tal-promozzjoni ta’ Malta.
Għalhekk, l-Ambaxxatur attenda diversi avvenimenti u għamel diskors sabiex
jippromwovi lil pajjiżna, fosthom u b’mod partikulari fis-settur Marittimu u
oqsma kummerċjali oħra li kull ma jmur qegħdin jissaħħu bejn iż-żewġ
il-pajjiżi.
Matul is-snin, l-Ambaxxatur
kellu bosta intervisti ma’ ġurnalisti
b’konessjoni mar-relazzjonjiet ta’ Malta mal-Greċja. Dan sar b’mod
partikulari waqt il-Presidenza ta’ Malta tal-Kunsill tal-Unjoni Ewropea u matul
din is-sena, tal-Belt Valletta bħala l-Belt Kapitali Ewropea tal-Kultura.
Turiżmu
Is-settur tat-turiżmu ħa
spinta ’l quddiem f’dawn l-aħħar snin hekk kif żdiedu t-titjiriet diretti bejn
iż-żewġ pajjiżi minn tnejn fil-ġimgħa għal ħamsa. F’perjodi partikulari dawn
it-titjiriet kienu ta’ sitta u anki sebgħa fil-ġimgħa. Hemm ħafna aktar xi jsir
fejn tidħol konnetività bejn iż-żewġ pajjiżi speċjalment fejn tidħol
il-konnetività marittima. Mal-industrija diġà eżistenti tal-‘Cruise Liners’ hemm konsiderazzjoni
għal-konnetività diretta bejn iż-żewġ pajjiżi u dan biex jiġi ffacilitat aktar
il-kummerċ u t-turiżmu bejniethom.
L-Ambaxxata ħadet diversi inizjattivi sabiex
il-konnetività bejn iż-żewġ pajjiżi tissaħħaħ kif ukoll sabiex Malta tkun ta’
attrazzjoni turistika għall-poplu Grieg. Dan sar f’ħidma għal żieda ta’
titjiriet bejn iż-żewg pajjiżi.
Relazzjonijiet Kummerċjali
Fir-rigward ta’
relazzjonijiet kummerċjali, l-Ambaxxata Maltija fil-Greċja tieħu inizjattivi
biex tippromwovi u kif ukoll tirċievi diversi proposti ta’ interess kummerċjali
bejn iż-żewg pajjiżi. Il-kummerċ bejn iż-żewġ
pajjiżi f’dawn l-aħħar snin ħa spinta ’l quddiem u fis-snin li ġejjin
mistenni jkompli jikber.
Attivitajiet imtella’
mill-Ambaxxata
L-Ambaxxata Maltija
fil-Greċja organizzat diversi attivitajiet b’konessjoni mal-Presidenza ta’ Malta tal-Kunsill Ewropew tal-Unjoni Ewropea
kif ukoll b’konessjoni mal-Belt Valletta bħala l-Belt Kapitali Ewropea tal-Kultura.
L-attivitajiet, il-ħidma u l-inizjattivi matul il-Presidenza tal-UE kienu vasti
u kien hemm apprezzament ġenerali mill-missjonjiet l-oħra tal-pajjiżi tal-UE
f’Ateni u Nikosija għall-programm intensiv li organizzat l-Ambaxxata
tagħna. L-istess jista’ jingħad
għall-attività u l-promozzjoni tal-Belt Valletta bħala Belt Ewropea tal-Kultura
matul din is-sena. Għal din l-okkażjoni ġiet mistiedna is-Socjetà Mużikali
tal-Karmnu, Balluta, li flimkien mal-Banda tal-Municipalità ta’ Ateni,
pparteċipat fi sfilata fiċ-Ċentru ta’ Ateni u madwar l-Akropolis kif ukoll
tellgħet Kunċert ta’ mużika Maltija u Griega quddiem il-bini tal-Municipalità
ta’ Ateni.
L-Ambaxxata torganizza wkoll
il-Malta Day kull sena u torganizza
attivitajiet oħra flimkien mar-Reġistru Marittimu ta’ Malta biex tkompli
tippromwovi u ssaħħaħ ir-rabtiet kummerċjali f’dan is-settur tant importanti u
vitali għal Malta.
Il-Presidenza Maltija
tal-Kunsill tal-Unjoni Ewropea.
F’dawn l-aħħar tletin xahar,
l-Ambaxxata fil-Greċja, bħal bosta Ambaxxati, Ministeri u entitajiet oħra
tal-Gvern, kienet iffukata fuq il-Presidenza Maltija tal-Kunsill tal-Unjoni
Ewropea.
Apparti x-xogħol relatat
mal-presidenza tal-laqgħat informattivi li jsiru kull xahar bil-kollaborazzjoni
mal-Ministeru tal-Affarrijiet Barranin tal-Greċja u diversi Ministeri oħra
(bħal pereżempju, ECOFIN, FAC, GAC, AGRIFISH u EPSCO), l-Ambaxxata assistiet
lill-Prim Ministru waqt iż-żjarat tiegħu bħala parti mit-Tour des Capitales,
lill-Ministru tat-Trasport u Infrastruttura, lill-Ministru tal-Affarijiet
Ewropej u lill-Ministru tal-Intern u Sigurtà Nazzjonali waqt żjarat uffiċjali
li dawn għamlu f’Ateni.
Matul il-Presidenza ġew
organizzati Konferenza tal-Aħbarijiet tal-ftuħ tal-Presidenza,Attività li
mmarkat il-Ftuħ, ħames Ikliet ta’ nofsinhar ta’ Uffiċjali Għolja, Attività
Kulturali, Tour tal-Ambaxxaturi
tal-UE, ġimgħa attivitajiet dwar l-immigrazzjoni, ipparteċipajna fil-Kunċert
ta’ Jum l-Ewropa f’Ateni, diversi laqgħat
tat-Trio u Attivitàtal-Għeluq. Apparti dawn l-attivitajiet l-Ambaxxatur ħa
sehem f’diversi konferenzi u attivitajiet oħraa.
Bi preparazzjoni
għall-Presidenza, il-bini tal-Ambaxxata ġie rinovat u dan bi spiża tassew
minima. Illum nistgħu ngħidu li għandna bini ta’ Ambaxxata preżentabbli li
jista’ jilqa’ fih lid-dinjatarji u nies oħra.
Żjarat Uffiċjali
Tajjeb ukoll li wieħed isemmi
l-assistenza li l-Ambaxxata pprovdiet lil diversi dinjitarji Maltin li żaru
l-Greċja f’dawn l-aħħar tletin xahar, fosthom: darbtejn il-Prim Ministru waqt
il-parteċipazzjoni ta’ Malta fis-Summit tal-Pajjizi tal-Unjoni Ewropea
tal-Meditteran u waqt il-parteċipazzjoni ta’ Malta fis-Summit bejn l-UE u
l-Pajjiżi Għarab. Żjarat oħra uffiċjali saru darbtejn mill-Ministru responsabbli
mis-Settur Marittimu għall-Fiera Posedonia
li ssir kull sentejn, mill-Ministru tas-Saħħa u mis-Segretarju Parlamentari
responsabbli mill-V18 u l-Protezzjoni tal-Konsumatur.
Seduta 139
02/10/2018
No comments:
Post a Comment