L-Oppożizzjoni
llum talbet lill-Ispeaker tal-Kamra tar-Rappreżentanti biex l-Ombudsman ikun
mitlub jinvestiga, bis-saħħa tal-Liġi li twaqqaf l-Ombudsman, ir-rapport
tal-allegati inġustizzji li suppost saru fl-Armata, liema rapport sar minn bord
maħtur mill-Ministru għall-Intern u s-Sigurtà Nazzjonali Emmanuel Mallia.
L-Oppożizzjoni
tirrispetta u taħdem favur it-tisħiħ tal-istituzzjonijiet ta' pajjiżna bil-fatti,
u mhux bil-kliem biss kif qed jagħmel il-Gvern Laburista. Meta l-Ministru
Mallia ħatar bord biex jinvestiga allegati inġustizzji fl-Armata, kien qiegħed
jimmina u jwarrab l-istituzzjoni Parlamentari tal-Ombudsman, istituzzjoni li
tgawdi l-fiduċja tal-Parlament u tal-poplu Malti kollu kemm hu. Dan sar
minħabba li l-istess Ombudsman fl-aħħar snin irrapporta b’mod pożittiv fuq
il-proċessi ta’ promozzjonijiet fl-Armata u kemm tali proċessi kienu saru
dejjem iktar trasparenti u ġusti tant li l-ilmenti kienu naqsu drastikament.
Fid-dawl ta’
dan, illum il-Kelliem tal-Oppożizzjoni għall-Intern Jason Azzopardi kiteb
lill-Ispeaker tal-Kamra biex fid-dawl tal-artiklu 13(4) tal-Liġi li twaqqaf
l-Ombudsman, il-Kumitat tax-Xogħol tal-Kamra jinkariga lill-Ombudsman biex
jinvestiga r-rapport li sar mill-bord maħtur mill-Ministru Mallia, inkluż
il-metodoloġija wżata u b’mod partikolari kemm u kif kien ġustifikat kull każ
li l-Bord qed jingħad li ddeċieda li kienet saret inġustizzja fih.
Minn issa
l-Oppożizzjoni tiddikjara li hi se tirrispetta u torbot il-ġudizzju tagħha
b’mod sħiħ mal-konklużjonijiet tal-Ombudsman.
--
Uffiċċju
Informazzjoni
Partit
Nazzjonalista
No comments:
Post a Comment