ĠNIEN IL-KOTTONERA - XOGĦLIJIET

21185. L-ONOR. CARMELO MIFSUD BONNICI  staqsa lill- Ministru għall-Ambjent, l-Enerġija u r-Riġenerazzjoni tal-Port il-Kbir: Tista’ l-Ministru tgħid x’xogħlijiet qegħdin isiru preżentement fi Ġnien il-Kottonera u meta dawn ix-xogħlijiet huma previsti li jkunu lesti?

 

06/09/2024

 

ONOR. MIRIAM DALLI:  Nirreferi lill-Onor. Interpellant għat-tweġiba tal-mistoqsija parlamentari 20367.

 

Seduta  264

16/10/2024

LESA - UFFIĊJALI GĦAŻ-ŻAMMA TAL-ORDNI FIT-TRAFFIKU

21184. L-ONOR. CARMELO MIFSUD BONNICI  staqsa lill- Ministru għall-Intern, is-Sigurtà u x-Xogħol: Jista’ l-Ministru jgħid kemm hemm uffiċjali fi ħdan il-LESA li huma inkarigati sabiex iżommu l-ordni fit-traffiku permezz tal-mobilità tal-muturi?

 

06/09/2024

 

ONOR. BYRON CAMILLERI:  Kif jaf l-Onor. Interpellant illum hija Transport Malta li ħadet r-responsabbiltà ewlenija ta’ immaniġjar tat-traffiku, anke permezz tal-uffiċjali tagħha. Ninsab infurmat ukoll li l-Uffiċjali tal-Komunita fi ħdan l-Aġenzija LESA, jużaw kemm vetturi, kif ukoll muturi, sabiex jgħinu fiż-żamma tal-ordni fit-traffiku. Dawn jikkumplimentaw dawk il-persuni li jkunu assenjati doveri bil-pass. 

 

B’mod ġenerali, l-awtorità għandha 30 uffiċjal li jaħdmu fuq it-30 mutur li għandha l-awtorità.

 

Seduta  264

16/10/2024

KORP TAL-PULIZIJA - UFFIĊJALI GĦAŻ-ŻAMMA TAL-ORDNI FIT-TRAFFIKU

21183. L-ONOR. CARMELO MIFSUD BONNICI  staqsa lill- Ministru għall-Intern, is-Sigurtà u x-Xogħol: Jista’ l-Ministru jgħid kemm hemm uffiċjali fi ħdan il-Korp tal-Pulizija li huma inkarigati sabiex iżommu l-ordni fit-traffiku permezz tal-mobilità tal-muturi?

 

06/09/2024

 

ONOR. BYRON CAMILLERI:  Ninsab infurmat illi hemm erbgħa u tletin (34) uffiċjal tal-Pulizija li huma inkarigati sabiex iżommu l-ordni fit-traffiku permezz ta’ muturi.

Kif jaf ben tajjeb l-Onor. Membru llum hemm ukoll entitajiet oħra li jagħmlu dan ix-xogħol primarjament Transport Malta u anke LESA.

 

Seduta  264

16/10/2024

TRANSPORT MALTA – UFFIĊJALI GĦAŻ-ŻAMMA TAL-ORDNI FIT-TRAFFIKU

21182. L-ONOR. CARMELO MIFSUD BONNICI  staqsa lill- Ministru għat-Trasport, l-Infrastruttura u x-Xogħlijiet Pubbliċi: Jista’ l-Ministru jgħid kemm hemm uffiċjali fi ħdan Transport Malta li huma inkarigati sabiex iżommu l-ordni fit-traffiku permezz tal-mobilità tal-muturi?

 

06/09/2024

 

ONOR. CHRIS BONETT:  Ninforma lill-Onor. Interpellant illi l-Awtorità għat-Trasport f’Malta għandha sittax (16)-il uffiċjal li jaħdmu fis-sezzjoni tal-muturi.

 

Seduta  264

16/10/2024

Y-PLATES – ISTRUZZJONIJIET LIS-SEWWIEQA

21181. L-ONOR. CARMELO MIFSUD BONNICI  staqsa lill- Ministru għall-Intern, is-Sigurtà u x-Xogħol: Jista’ l-Ministru jara li tingħata d-direzzjoni sabiex sewwieqa tal-karozzi bil-“Y-Plates” jitfakkru li m’għandhomx iwaqqfu jew jiġbru l-passiġġieri tagħhom minn madwar roundabouts senjatament l-iktar minħabba l-perikolu inkors?

 

06/09/2024

 

ONOR. BYRON CAMILLERI:  Ninsab infurmat illi x-xenarju deskritt mill-Onor. Membru fil-mistoqsija tiegħu, huwa xenarju li huwa projbit għal kull sewwieq, inkluż dawk b’vetturi bil-Y plates. Għaldaqstant meta dawn is-sitwazzjonijiet jiġu għal konjizzjoni tal-Pulizija u Uffiċjali tal-Aġenzija LESA, dawn jieħdu l-passi meħtieġa, skond kif jitlob il-każ partikolari, biex jevitaw periklu għal kulħadd.

 

Seduta  264

16/10/2024

Y-PLATES - ISTRUZZJONIJIET LIS-SEWWIEQA

21180. L-ONOR. CARMELO MIFSUD BONNICI  staqsa lill- Ministru għat-Trasport, l-Infrastruttura u x-Xogħlijiet Pubbliċi: Jista’ l-Ministru jara li tingħata d-direzzjoni sabiex sewwieqa tal-karozzi bil- “Y-Plates” jitfakkru li m’għandhomx iwaqqfu jew jiġbru l-passiġġieri tagħhom minn madwar roundabouts senjatament l-iktar minħabba l-perikolu inkors?

 

06/09/2024

 

ONOR. CHRIS BONETT:  Ninforma lill-Onor. Interpellant illi l-Awtorità għat-Trasport f’Malta tara li r-regoli tas-sewqan jiġu osservati minn kull sewwieq fit-toroq ta’ pajjiżna, kemm dawk li jsuqu vetturi privati, dawk kummerċjali, kif ukoll sewwieqa tal-Y Plates. Madanakollu, minn żmien għal żmien l-Awtorità tagħmel ukoll kampanji edukattivi għall-informazzjoni tas-sewwieqa kollha.

 

 

Seduta  264

16/10/2024

IL-GUDJA - IN-WORK BENEFIT U BENEFIĊĊJI SOĊJALI

21143. L-ONOR. CARMELO MIFSUD BONNICI  staqsa lill- Ministru għall-Politika Soċjali u d-Drittijiet tat-Tfal: Jista’ l-Ministru jwieġeb il-mistoqsija parlamentari 19781 u jgħid kemm kien hemm persuni li matul is-sena 2023 ibbenefikaw mill-In-Work Benefit fil-Gudja u kemm irċevew komplessivament f’benefiċċji soċjali?

 

03/09/2024

 

ONOR. MICHAEL FALZON:  Ninforma lill-Onor. Interpellant li, matul is-sena 2023 kien hemm 158-il benefiċċjarju tal-In Work Benefit residenti il-Gudja. Flimkien mal-In Work Benefit, il-benefiċċjarji komplessivament rċevew dawn il-benefiċċji/allowances/pensjonijiet elenkati fit-tabella ta’ hawn taħt.

 

Benefiċċji / Pensjonijiet	Benefiċċjarji 2023
Benfiċċju Addizzjonali għall-Ogħli tal-Ħajja	27
Allowance għat-Tfal	122
Bonus għat-Twelid	2
Carers Grant	0
Allowance għal Tfal b’Diżabilità	6
Pensjoni għal Korriment	1
Pensjoni tar-Romol	3
Benefiċċju għal Korriment fuq ix-Xogħol	2
Maternity Leave Benefit	2
Pensjoni tal-Invalidita	1
Benefiċċju għal Mard	26
Assistenza għal Diżabilità	1

Seduta  263

15/10/2024

IL-KALKARA - TRIQ SANTU ROKKU - ZEBRA CROSSINGS

21142. L-ONOR. CARMELO MIFSUD BONNICI  staqsa lill- Ministru għat-Trasport, l-Infrastruttura u x-Xogħlijiet Pubbliċi: B’referenza għat-tweġiba tal-mistoqsija parlamentari 19656, jista’ l-Ministru jara li sakemm isir l-upgrade minnu indikat fil-bidu ta’ Triq Santu Rokku, il-Kalkara min-naħa tal-Kunvent tal-Kapuċċini, isiru dawn iż-żewġ zebra crossings sabiex inaqqsu l-periklu għall-pubbliku?

03/09/2024

ONOR. CHRIS BONETT:  Ninforma lill-Onor. Interpellant illi l-Kunvent tal-Kapuċċini, immarkat bil-blu hawn fid-dokument li qed jitpoġġa fuq il-Mejda tal-Kamra, huwa mdawwar bit-toroq Santa Liberata, Ġużeppi Valerju Abela u Kapuċċini. Triq Santu Rokku, immarkata bl-aħmar, ma tmissx mal-Kunvent tal-Kapuċċini. Għaldaqstant, l-Onor. Interpellant huwa mitlub juri eżatt fejn qiegħed jissuġġerixxi li jsiru ż-żewġ zebra crossings sabiex l-Awtorità għat-Trasport tkun tista’ tevalwa din it-talba.

 

Seduta  263

15/10/2024

SANTA LUĊIJA - IN-WORK BENEFIT U BENEFIĊĊJI SOĊJALI

21141. L-ONOR. CARMELO MIFSUD BONNICI  staqsa lill- Ministru għall-Politika Soċjali u d-Drittijiet tat-Tfal: Jista’ l-Ministru jwieġeb il-mistoqsija parlamentari 19783 u jgħid kemm kien hemm persuni li matul is-sena 2023 ibbenefikaw mill-In-Work Benefit f’Santa Luċija u kemm irċevew komplessivament f’benefiċċji soċjali?

 

03/09/2024

 

ONOR. MICHAEL FALZON:  Ninforma lill-Onor. Interpellant li, matul is-sena 2023 kien hemm 108 benefiċċjarju tal-In Work Benefit residenti f’Santa Luċija. Flimkien mal-In Work Benefit, dawn il-benefiċċjarji komplessivament rċevew dawn il-benefiċċji/allowances/pensjonijiet elenkati fit-tabella ta’ hawn taħt.

 

Benefiċċji / Pensjonijiet	Benefiċċjarji 2023
Benfiċċju Addizzjonali għall-Ogħli tal-Ħajja	28
Allowance għat-Tfal	76
Allowance għal Tfal b’Diżabilità	6
Benefiċċju għal Korriment fuq ix-Xogħol	3
Pensjoni Kontributorja	1
Marriage Grant	1
Benefiċċju għal Mard	17
Assistenza għal Diżabilità	3

 

Seduta  263

15/10/2024

LANDSCAPE CONVENTION - PROĊESS TA’ RATIFIKA

21140. L-ONOR. CARMELO MIFSUD BONNICI  staqsa lill- Ministru għall-Ambjent, l-Enerġija u r-Riġenerazzjoni tal-Port il-Kbir: B’referenza għat-tweġiba tal-mistoqsija parlamentari 19660 u dawk preċedenti, tista’ l-Ministru tgħid f’liema stadju wasal il-proċess ta’ ratifika tal-Landscape Convention?

 

03/09/2024

 

ONOR. MIRIAM DALLI:  Ninforma lill-Onor. Interpellant li l-proċess ta’ ratifikazzjoni ta’ din il-Konvenzjoni għadu għaddej.

 

Seduta  263

15/10/2024

ĦAL TARXIEN - IN-WORK BENEFIT U BENEFIĊĊJI SOĊJALI

21139. L-ONOR. CARMELO MIFSUD BONNICI  staqsa lill- Ministru għall-Politika Soċjali u d-Drittijiet tat-Tfal: Jista’ l-Ministru jwieġeb il-mistoqsija parlamentari 19785 u jgħid kemm kien hemm persuni li matul is-sena 2023 ibbenefikaw mill-In-Work Benefit f’Ħal Tarxien u kemm irċevew komplessivament f’benefiċċji soċjali?

03/09/2024

 ONOR. MICHAEL FALZON:  Ninforma lill-Onor. Interpellant illi matul is-sena 2023 kien hemm 609 benefiċċjarju tal-In Work Benefit residenti f’Ħal Tarxien. Flimkien mal-In Work Benefit, il-benefiċċjarji komplessivament rċevew dawn il-benefiċċji/allowances/pensjonijiet elenkati fit-tabella ta’ hawn taħt.

 

Benefiċċji / Pensjonijiet	Benefiċċjarji 2023
Benfiċċju Addizzjonali għall-Ogħli tal-Ħajja	164
Allowance għat-Tfal	451
Bonus għat-Twelid	2
Assistenzagħal Diżabilità	3
Allowance għal Tfal b’Diżabilità	27
Pensjoni għal Korriment	1
Pensjoni tar-Romol	2
Foster Child Allowance	1
Benefiċċju għal Korriment fuq ix-Xogħol	7
Pensjoni Kontributorja	1
Maternity Leave Benefit	3
Marriage Grant	5
Benefiċċju għal Mard	109

Seduta  263

15/10/2024

KORRIMENTI FUQ IL-POST TAX-XOGĦOL - BENEFIĊĊJU - APPLIKAZZJONIJIET

21138. L-ONOR. CARMELO MIFSUD BONNICI  staqsa lill- Ministru għall-Politika Soċjali u d-Drittijiet tat-Tfal: B’referenza għat-tweġiba tal-mistoqsija parlamentari 19937, jista’ l-Ministru jgħid kemm mit-891 talba sottomessa għall-benefiċċju relatat mal-korriment fuq il-post tax-xogħol, ġew milqugħa sal-aħħar ta’ Awwissu? Jista’ jgħid ukoll kemm żdiedu l-applikazzjonijiet relattivi sal-ġurnata li fiha tiġi mwieġba din il-mistoqsija parlamentari?

03/09/2024

 

ONOR. MICHAEL FALZON:  Ninforma lill-Onor. Interpellant li mit-891 applikazzjoni sottomessa għall-benefiċċju relatat mal-korriment fuq il-post tax-xogħol kien hemm:

-             636 każ li tħallsu

-             233 każ li ma kinux milqugħa

-             22 każ li għadom pendenti.

 Kien hemm 803 applikazzjonijiet ġodda sakemm qed titħejja din it-tweġiba.

Seduta  263

15/10/2024 

IS-SABIĦ TAL-ĦAJJA

1. Kif hemm miktub, ħafna drabi ssib ruħek fejn ma kontx tgħid, jew taħseb, li ser tkun. Huwa veru li kif jikteb Marco Pozza (1979) fil-ktieb tiegħu L’Imbarazzo di Dio (2014), li nittama li għada pitgħada nikteb dwaru, hemm diversi sorpriżi varji u tajba lesti għalina. Hekk ħassejtni ftit jiem ilu waqt li rfist l-għatba tal-Knisja ta’ Ġesù Nazzarenu fix-Xagħra, Għawdex. Dħalt f’dinja oħra waqt il-preparazzjonijiet għall-festa ta’ Ġesù Nazzarenu li din is-sena ħabtet fit-13 ta’ Ottubru, fejn kien hemm ġabra kbira u paċi li tmiss miegħek u li tidħol ġewwa fik. Fil-post immexxi tant tajjeb mis-Sorijiet Franġiskani tal-Qalb ta’ Ġesù stajt nara li xejn ma kien barra minn postu. Ordni estern u miegħu aktar dak intern li kull bniedem, ġej minn fejn hu ġej, ifittex. F’hekk ħassejtni milqugħ bil-ferħ.

Ktejjeb

2. Għalkemm xtaqt nibqa’ hemm ġewwa, waqt li ersaqt biex noħroġ sibt mejda b’numru ta’ pubblikazzjonijiet fuqha. Nota żgħira miktuba sabiħ tħajjar lil kull min irid jaqbad waħda jew tnejn jew iktar u jeħodhom miegħu. Kemm hija tradizzjoni sabiħa, din li hija ġejja tul dawn l-aħħar snin. Laqtuni ġabra ta’ libretti li ma kontx naf bl-eżistenza tagħhom. Taħt it-titolu ġenerali Profili. Bijografiji ta’ Bnedmin bħalna li għexu l-Vanġelu nġabru, bl-ewwel għadd maħruġ fl-1982, ħajjiet differenti. Miktuba fil-qosor u diretti ħafna sabiex jinftehmu hemm il-ħajjiet tal-qaddisin fix-xhur. Persuni li għexu kemm felħu għall-oħrajn billi taw ħajjithom u ġidhom. Impenjati fid-duttrina soċjali bl-azzjoni u bil-kitba varja tagħhom. Bnedmin ta’ veru mimlija sens u sustanza. Dawl qawwi għad-dinja kollha, kemm dik Nisranija kif ukoll għal dik li le.

Wirt uniku

3. Kotba li baqgħu għaddejjin sew. Kotba li kienu maħruġa b’tant impenn u determinazzjoni mis-Soċjetà tad-Duttrina Nisranija, il-M.U.S.E.U.M. F’dak il-mument waqaft u waqt li qiegħed ngħid f’qalbi x’idea tajba kienet dik tas-Sorijiet ġentili u ferħana li għamlu dan, mort biex nibda nintilef naqra x’fihom. Fl-ewwel wieħed kien hemm l-introduzzjoni ċara fejn jingħad: “Dak li għandek f’idejk huwa l-ewwel għadd ta’ perjodiku ġdid dwar il-Qaddisin. F’kull għadd ikun hemm erba’ jew iżjed profili ta’ qaddisin li t-tifkira tagħhom tkun fix-xahar li joħroġ il-perjodiku. Għal Malta aktarx li din hija l-ewwel darba li qed toħroġ pubblikazzjoni ta’ din ix-xorta. L-għan tagħna huwa li tidħol fostna l-Maltin id-drawwa ta’ qari ta’ ħajjiet ta’ bnedmin bħalna li kienu Nsara awtentiċi. Qari bħal dan ma jistax ikun li ma jħallix ħafna ġid spiritwali, kif għandna diversi eżempji fl-istorja.”

X’ħidma diretta

4. F’dan, mingħajr ma ridt ftakart f’kemm is-Soċjetà tad-Duttrina Nisranija ppubblikat fil-passat u kemm, fil-fatt, għadha għaddejja tippubblika. Taġġorna ruħha għall-kurrenti u sfidi li l-Insara, il-bnedmin ta’ rieda tajba jiffaċċjaw fid-dinja differenti tal-lum. Ftakart ukoll kemm kelli għalliema varji fl-iskola primarja u sekondarja li kienu jħajruni naqra kotba li s-Soċjetà kienet toħroġ mill-famuża Veritas Press f’Ħaż-Żabbar. X’determinazzjoni u motivazzjoni ta’ bnedmin li kienu iddedikati lejn l-oħrajn! Bi ħlewwa u bla ebda impożizzjoni. Ġie quddiemi l-għalliem li kelli Bormla, is-Sur Chetcuti, li kien jibqa’ mal-klassi kollha wara l-ħin biex ikompli jippreparana. Mhux biss, imma biex ma nitilfux l-interess, f’mument kien jibgħatna nixtru mill-kantuniera l-qagħaq tal-għasel. Ċert li parti sew mis-salarju ta’ għalliem kien jonfqu fuqna. U ħadd minna ma kien jiddejjaq; anzi, konna nibqgħu miegħu nitgħallmu bil-ferħ.

Ħaqqhom

5. F’dan hemm kuntrast aqwa llum, fejn għal dawk li telgħin qisha s-soċjetà tibża’ tixtri jew tgħaddi kotba bħal dawn, u fuq dan wieħed għandu jirrifletti aktar. Anki l-Istat, qisu sar jistħi jirrikonoxxi li dawn iwettqu l-ġid fil-formazzjoni edukattiva. Ftakart li qabel, f’moħħna kellna mudelli varji. Bejn l-atturi ta’ Hollywood u bejn il-footballers il-kbar kellna wkoll bnedmin li għexu fil-qdusija. Konna, u naħseb li għandna, nammiraw ħidmiethom. Nisslu fina sens ta’ determinazzjoni u perseveranza għas-sewwa. Mhux biss, iżda nisslu aktar fina l-ħsieb li l-bniedem għandu jkun determinat jaħdem għal dak li huwa ġust. Fil-kuraġġ li fl-aħħar mill-aħħar aħna msejjħa biex nixhdu għall-verità. Dak il-bniedem li jrid jagħti xiehda għall-kelma t-tajba għax fl-aħħar waħdu ser ikun iġġudikat. Anki jekk inkunu bħal ma kienu huma, waħedna, dan xorta għandu jsir. Aħjar fil-kumpanija ta’ dak li hu siewi milli fil-kumpanija ta’ dak li huwa żbaljat. Mertu tas-Soċjetà li nxtered materjal tajjeb li bih issawru bnedmin tal-affari tagħhom. Dawk li kienu u huma preżenti jservu lil pajjiżna b’dedikazzjoni.

F’Kuba

6. Fid-dmir l-iktar ċar u essenzjali li n-Nisrani fil-ħajja pubblika u privata tiegħu huwa msejjaħ sabiex iwettaq dak li jevanġelizza, diversi soċji u membri wettqu opri kbar. Ftakart li ftit jiem ilu, is-Sezzjoni f’Raħal Ġdid fakkret il-mija u ħmistax-il sena (115) tal-preżenza tagħha f’dik il-lokalità. Parti mill-proċess u l-iżvilupp tal-progress kontinwu tagħha, fi kważi kull rokna ta’ pajjiżna għandna preżenza ħajja ta’ din is-Soċjetà. Mingħajr ma ridt ftakart u fraħt li ġewwa Saguna La Grande ġewwa Kuba, is-Soċjetà tad-Duttrina Nisranija hija preżenti wkoll. F’dik l-art daqshekk diffiċli sa ftit snin ilu, issa hemm ċaqliq sabiħ. Għal quddiesa mmexxija mill-Isqof Arturo Gonzalez inġabru mitejn katekista u missjunarju. Dan sabiex mija u għaxar ċertifikat jitqassmu lill-katekisti li ġew ippreparati mill-membri tas-Soċjetà. F’aħbar li b’aktar interess għalija terġa’ tirrapporta li tul il-jum diversi xtraw pubblikazzjonijiet varji tagħha.

Ġid soċjali uniku

7. Waqt li kelli f’idi l-ktejjeb li ġbart, quddiem din l-aħbar ħassejt kurrent ta’ gratitudni. Dan fl-għarfien li din is-Soċjetà wettqet u għadha tista’ tkompli twettaq ġid soċjali imprezzabbli. Ftakart f’kemm eluf ta’ snin ilu, ir-Rumani sekularizzati kienu moħħhom li għandhom jiffurmaw ċittadini eżemplari. Kemm għandhom isejħulhom għad-dmirijiet li jkunu onesti, integri u ġellieda għall-verità. Mentri llum, biex niddikjaraw u nipproklamaw kemm aħna sekularizzati, spiċċajna nduru fid-deżert tan-nuqqas ta’ valuri fundamentali tas-sewwa. Li aktar ma nqtajna mill-fonti tal-għerf, aktar qed nissudaw l-injoranza u l-egoiżmu. Imma minkejja dan, hemm dejjem riħ ta’ bidla u tama aqwa għall-futur. Proprju f’dan, waqt li nżilt mit-taraġ taz-zuntier fhimt aktar kemm hi sabiħa l-ħajja.

RAĦAL ĠDID – TNEĦĦIJA TA’ SIĠRA LI QIEGĦDA TAGĦMEL ĦSARA LIL PROPRJETÀ

21137. L-ONOR. CARMELO MIFSUD BONNICI  staqsa lill- Ministru għall-Wirt Nazzjonali, l-Arti u l-Gvern Lokali: B’referenza għat-tweġiba tal-mistoqsija parlamentari 19663 u għad-diversi mistoqsijiet oħra preċedenti, jista’ l-Ministru jara li s-siġra li hemm fuq wara tal-proprjetà li d-dettalji dwarha qed jingħataw separatament, tiġi effettivament imneħħija kif ingħad fl-istess tweġiba?

 

03/09/2024

 

ONOR. OWEN BONNICI:  Ninsab infurmat mill-Kunsill Lokali ta’ Raħal Ġdid li kif diġà indikat din is-siġra qed tkompli tinżabar sabiex tkun kontrollata.

 

Seduta  262

14/10/2024

RAĦAL ĠDID - IN-WORK BENEFIT U BENEFIĊĊJI SOĊJALI

21136. L-ONOR. CARMELO MIFSUD BONNICI  staqsa lill- Ministru għall-Politika Soċjali u d-Drittijiet tat-Tfal: Jista’ l-Ministru jwieġeb il-mistoqsija parlamentari 19787 u jgħid kemm kien hemm persuni li matul is-sena 2023 ibbenefikaw mill-In-Work Benefit f’Raħal Ġdid u kemm irċevew komplessivament f’benefiċċji soċjali?

 

03/09/2024

 

ONOR. MICHAEL FALZON:  Ninforma lill-Onor. Interpellant li, matul is-sena 2023 kien hemm 475 benefiċċjarju tal-In Work Benefit residenti Raħal Ġdid. Flimkien mal-In Work Benefit, il-benefiċċjarji komplessivament rċevew dawn il-benefiċċji/allowances/pensjonijiet elenkati fit-tabella ta’ hawn taħt.

 

Benefiċċji Socjali/Pensjonijiet	Benefiċċjarji 2023
Benfiċċju Addizzonali għall-Ogħli tal-Ħajja	118
Assistenza għal Persuni b’Vista Batuta	1
Allowance għat-Tfal	338
Bonus għat-Twelid	1
Carers Grant	1
Allowance għal Tfal b’Diżabilità	29
Pensjoni tar-Romol	7
Benefiċċju għal Korriment	6
Maternity Benefit	2
Marriage Grant	5
Pensjoni Kontributorja	7
Benefiċċju tal-Mard	76
Assistenza għal Diżabilità Severa	6

 

Seduta  262

14/10/2024

IL-FGURA - IN-WORK BENEFIT U BENEFIĊĊJI SOĊJALI

21135. L-ONOR. CARMELO MIFSUD BONNICI  staqsa lill- Ministru għall-Politika Soċjali u d-Drittijiet tat-Tfal: Jista’ l-Ministru jwieġeb il-mistoqsija parlamentari 19789 u jgħid kemm kien hemm persuni li matul is-sena 2023 ibbenefikaw mill-In-Work Benefit fil-Fgura u kemm irċevew komplessivament f’benefiċċji soċjali?

 

03/09/2024

 

ONOR. MICHAEL FALZON:  Ninforma lill-Onor. Interpellant li, matul is-sena 2023 kien hemm 864 benefiċċjarju tal-In Work Benefit residenti l-Fgura. Flimkien mal-In Work Benefit, il-benefiċċjarji komplessivament rċevew dawn il-benefiċċji/allowances/pensjonijiet elenkati fit-tabella ta’ hawn taħt.

 

Benefiċċji Socjali/Pensjonijiet	Benefiċċjarji 2023
Benfiċċju Addizzonali għall-Ogħli tal-Ħajja	216
Assistenza għal Persuni b’Vista Batuta	1
Allowance għat-Tfal	637
Bonus għat-Twelid	5
Assistenza għal Diżabilità	5
Allowance għal Tfal b’Diżabilità	47
Pensjoni tar-Romol	4
Foster child Allowance	1
Benefiċċju għal Korriment	12
Maternity Leave Benefit	6
Marriage Grant	12
Pensjoni Kontributorja	13
Benefiċċju tal-Mard	114
Assistenza għal Diżabilità Severa	9

 

Seduta  262

14/10/2024

IL-FURJANA - TRIQ ĠNIEN DANTE ALIGHIERI

21134. L-ONOR. CARMELO MIFSUD BONNICI  staqsa lill- Ministru għall-Wirt Nazzjonali, l-Arti u l-Gvern Lokali: B’referenza għat-tweġiba tal-mistoqsija parlamentari 19659 u dawk preċedenti dwar Ġnien Dante Alighieri fil-Furjana, jista’ l-Ministru jgħid jekk ittiħdux il-passi neċessarji u mitluba sabiex jinżamm fi stat aħjar? Jista’ wkoll jara li dan il-ġnien jibda jinfetaħ għall-pubbliku?

 

03/09/2024

 

ONOR. OWEN BONNICI:  Ninsab infurmat mill-Kunsill Lokali tal-Furjana li  kif indikat f’PQ 19659 sar it-tindif, il-ħrit tal-konki madwar is-siġar u t-tisqija tal-ġnien u dan qed jinżamm b’mod regolari. Il-kuntrattur ingħata wkoll struzzjonijiet biex issir żabra u l-ġbir tal-frott meta jkun l-aktar żmien ideali. Wara li ntemm is-servizz tal-konsorzju ELC, il-Kunsill qiegħed jieħu ħsieb dan il-ġnien li qed jinfetaħ skont t-talbiet li jsiru.

 

Seduta  262

14/10/2024

IL-BELT VALLETTA - PJAN GĦALL-KONTROLL TAT-TRAFFIKU FIX-XATT FEJN ISORĠU L-CRUISE LINERS

21133. L-ONOR. CARMELO MIFSUD BONNICI  staqsa lill- Ministru għat-Trasport, l-Infrastruttura u x-Xogħlijiet Pubbliċi: B’referenza għat-tweġiba tal-mistoqsija parlamentari 20085, jista’ l-Ministru jgħid x’passi ulterjuri ttieħdu fir-rigward tal-pjan aħjar għall-kontroll tat-traffiku fix-xatt meta jsorġu l-cruise liners, in vista tal-volum kbir ta’ traffiku li jiġi ġġenerat u li jkollu effett fuq l-akkwati?

 

03/09/2024

 

ONOR. CHRIS BONETT:  Ninforma lill-Onor. Interpellant illi l-informazzjoni qed tinġabar.

 

Seduta  262

14/10/2024

BORMLA - IN-WORK BENEFIT U BENEFIĊĊJI SOĊJALI

21132. L-ONOR. CARMELO MIFSUD BONNICI  staqsa lill- Ministru għall-Politika Soċjali u d-Drittijiet tat-Tfal: Jista’ l-Ministru jwieġeb il-mistoqsija parlamentari 19791 u jgħid kemm kien hemm persuni li matul is-sena 2023 ibbenefikaw mill-In-Work Benefit f’Bormla u kemm irċevew komplessivament f’benefiċċji soċjali?

 

03/09/2024

 

ONOR. MICHAEL FALZON:  Ninforma lill-Onor. Interpellant li, matul l-2023 kien hemm 193-il  benefiċċjarju tal-In Work Benefit residenti Bormla. Flimkien mal-In Work Benefit, il-benefiċċjarji komplessivament rċevew dawn il-benefiċċji/allowances/pensjonijiet elenkati fit-tabella ta’ hawn taħt.

 

Benefiċċji Socjali/Pensjonijiet	Benefiċċjarji 2023
Benfiċċju Addizzonali għall-Ogħli tal-Ħajja	65
Allowance għat-Tfal	140
Bonus għat-Twelid	3
Allowance għal Tfal b’Diżabilità	4
Pensjoni tar-Romol	1
Foster child Allowance	1
Benefiċċju għal Korriment	6
Maternity Leave Benefit / Maternity Benefit	3
Marriage Grant	2
Pensjoni Kontributorja	3
Benefiċċju tal-Mard	31
Assistenza għal Diżabilità Severa	3

 

Seduta  262

14/10/2024

ĦA PASS LURA

1. Ninsabu resqin lejn mument li fl-istorja attwali fih importanza ikbar min-normal. F’inqas minn xahar ser ikollna l-vot presidenzjali tal-Istati Uniti tal-Amerika. Pożizzjoni xejn faċli fuq ix-xenarju internazzjonali b’kumplikazzjonijiet kontinwi. Iktar ma jgħaddu l-jiem, iktar qed naraw forza ta’ distruzzjoni tirbaħ fuq ir-raġuni u s-sewwa. Bħalissa m’għadniex ingawdu mill-paċi u l-istabilità, imma ninsabu mħassba kontinwament fuq dak li ġej iktar għalina. Dak li laqatna diġà u dak li kapaċi jolqotna iktar fil-jiem li ġejjin. Iktar u iktar f’dak li jista’ jseħħ f’kull direzzjoni f’dawk l-elezzjonijiet presidenzjali.

Wieħed isellem

2. F’dan, ċertament wieħed isellem lill-President attwali Joe Biden fil-ħidma li sa issa wettaq tul dawn l-aħħar erba’ snin. Mexxa lura l-pajjiż lejn in-normalità li kien qiegħed jitlef. L-ekonomija mxiet ’il quddiem u l-istatura għoliet mill-ġdid fil-kamp tas-sens u l-loġika, tant neċessarju biex jitmexxa Gvern ta’ poplu daqshekk kbir. Sfortunatament, fil-maġġor parti tiegħu l-elettorat baqa’ maqsum, u dan iktar b’dak li seħħ fis-6 ta’ Jannar 2021 meta ġabra ta’ persuni favur Donald Trump attakkaw il-post ċentrali tal-Istat, il-Capitol Hill. Qatt fl-istorja demokratika ta’ dak il-pajjiż ma kien seħħ dan. Tkissir u tifrik fil-qalba tad-demokrazija u dawn immexxija u msaħħna minn min kien tilef l-elezzjoni imma li ma riedx jaċċetta r-riżultat.

Ebda mexxej

3. Ebda politiku u ebda mexxej ma jista’ jiddikjara li kull ma wettaq huwa tajjeb u li ma hemmx sostitut għalih. Ir-realtà turi li kull persuna sservi daqqa ħafna lill-oħrajn, u daqqa iktar lilha nnifisha. Jista’ wkoll ikollok l-aqwa mexxej fl-onestà, fl-integrità u fil-bżonn rigoruż li jgħid il-verità iżda dan ma jkollux kunsens elettorali warajh. F’dan jista’ jkollna l-kontra, imma fid-dinja demokratika hemm regoli ċari. Jekk partit irid jirbaħ u jwettaq programm elettorali li jħoss li huwa l-aħjar irid jagħraf din l-għażla. Idur fuqu nnifsu u jkun kapaċi jieħu d-deċiżjonijiet it-tajba li jafu jkunu wkoll ikkumplikati. Mexxej demokratiku tajjeb jirrikjedi li jkollu dożi ta’ umiltà li jippermettulu jimxi pass lura.

Hekk seħħ

4. Hekk, fil-fatt, sabu ruħhom wkoll il-President Joe Biden u l-Partit Demokratiku Amerikan. L-għażla għalihom ma kinitx faċli quddiem il-fatt li Biden żied sew fl-età u li l-poplu kien qiegħed juri li l-Partit Repubblikan kien ser jitlaq b’vantaġġ kbir. Kien hemm pressjoni, u ċertament ma kienx hemm dejjem diskussjonijiet paċifiċi, imma għalihom ittieħdet id-deċiżjoni t-tajba. Saret il-bidla sabiex tidħol Kamala Harris, li ċertament għandha l-esperjenza tagħha, għalkemm inqas minn dik ta’ Biden, imma kienet u hija l-Viċi President tal-pajjiż. Rajna tibdil kbir f’dan, u l-Partit Demokratiku, li kien qiegħed ibati sew, sab demm ġdid u mmobilita ferm iktar il-poplu Demokratiku. Kemm, fl-aħħar tal-ġurnata dik id-deċiżjoni hija tajba għad irridu naraw, imma saret bl-aħjar intenzjonijiet.

Fit-triq politika

5. Li huwa ċert hu li jekk qabel kienet rebħa ċerta għal Donald Trump, li jibqa’ f’dan il-favorit, id-Demokratiċi jinsabu f’pożizzjoni elettorali aqwa. Ma kien faċli xejn li titlob mexxej b’tant dinjità u attenzjoni jmur pass lura, imma d-deċiżjoni ittieħdet u l-bidla seħħet. L-elettorat jurik dak li għaddej fih u dak li qiegħed jippretendi minn dawk li jmexxuh. Proprju f’dan anki jekk finalment ma jkunx hemm rebħa għal Harris, xorta l-pass politiku huwa ċertament fit-triq it-tajba. Dan iktar u iktar fid-dawl tal-fatt li b’dak li qiegħed jirriżulta kontinwament, l-eletturi presidenzjali ser ikunu kważi ugwali. L-istati li ser jintrebħu għal ftit voti minn kandidat jew ieħor jafu jwasslu għal pożizzjoni fejn l-eletturi jkunu ugwali u wara jkun is-Senat li jiddeċiedi. Ovvjament vot favur Trump, billi hemmhekk hemm maġġoranza Repubblikana.

Kull vot jgħodd

6. Għalina li nippruvaw nifhmu l-kurrenti u x-xenarji f’dak il-pajjiż mhux dejjem ikunu loġiċi jew evidenti. Imma l-fatt jibqa’ li anki jekk dak huwa poplu kbir, kull vot jgħodd iktar minn qabel, l-iktar f’dawk li jissejħu “swing states”. Dawk li jinbidlu kull elezzjoni u li jiddeterminaw b’sorpriżi. F’dan, il-vantaġġ għall-kamp ta’ Donald Trump huwa ikbar. Ħareġ mix-xenarju presidenzjali bħala l-vittma. Ġie iktar u iktar f’dan il-mantar tul dawn is-snin, fejn diversi drabi ġie ipproċessat fuq diversi reati li huwa allegatament wettaq. Ma’ dan, għalkemm l-ekonomija hija aħjar u l-impiegi żdiedu fil-post fejn hemm il-voti determinanti, il-pożizzjoni baqgħet l-istess. Dak li jissejjaħ “Rust Belt” baqa’ mingħajr tweġibiet ekonomiċi u dawn ċertament ser ikollhom il-piż tagħhom f’dak li ġej. Mhux faċli għal Kamala Harris biex tibdel dan, imma sa issa rnexxielha tnaqqas il-vantaġġ. Kemm dan ser jibqa’ sal-aħħar jum, dik hija ħaġa oħra.

Determinanti

7. F’dan kollu huma determinanti l-voti u r-riżultat tagħhom. Id-dinja hija mimlija bi traġedji fejn il-politika tal-gwerra qegħda tirbaħ fuq dik tal-paċi. Jitla’ min jitla’, u fuq dan id-deċiżjoni ta’ ma’ min wieħed għandu jżomm mhijiex faċli, mhux ser isolvi l-kumplikazzjonijiet li għaddejjin. Ser jipprova jġib ruħu fil-forza determinanti li l-pajjiż irid għalih innifsu. Dawk li huma xejn ġusti lejn Joe Biden jaf jiddispjaċihom li kellhom persuna tajba. Imma l-fatt jibqa’ li huwa għamel deċiżjoni li ħaqqha tifħir ġenerali: dik li għażel li jieħu pass lura. Għax l-elettorat jirbaħ u wieħed irid jagħti każ tiegħu u mhux jinjorah. Min huwa demokratiku jirrispetta l-opinjoni pubblika u mhux jinjoraha jew jgħaddiha biż-żmien. F’dan, ikun xi jkun ir-riżultat f’dak il-pajjiż, jibqa’ żgur determinanti li huwa ħa pass lura għas-sewwa.

RAPPORT TAL-OMBUDSMAN - VETTURI ABBORD BASTIMENTI TAL-GOZO CHANNEL

21131. L-ONOR. CARMELO MIFSUD BONNICI  staqsa lill-Ministru għal Għawdex u l-Ippjanar: Jista’ l-Ministru jwieġeb il-mistoqsija parlamentari 20083 u jgħid x’passi ttieħdu fir-rigward tar-rapport tal-Ombudsman ippreżentat fl-20 ta’ Novembru 2023 fir-rigward ta’ vetturi abbord il-bastimenti tal-Gozo Channel?

 

03/09/2024

 

ONOR. CLINT CAMILLERI:  Ninforma lill-Onor. Interpellant li l-vetturi kollha li jkunu abbord il-bastimenti tal-Gozo Channel, qed ikollhom il-magna mitfija. Min-naħa l-oħra, il-passaġġiera mhux jitħallew joqgħodu fil-garaxx tal-vapur matul it-traġitt tal-vjaġġ.

 

Seduta  261

09/10/2024

SPORTMALTA U L-KUNTRATTUR TAX-SHOOTING RANGE - FTEHIM

21130. L-ONOR. CARMELO MIFSUD BONNICI  staqsa lill-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni: Jista’ l-Ministru jwieġeb il-mistoqsijiet parlamentari 19071 u 19363 u ċjoè: B’referenza għat-tweġiba tal-mistoqsija parlamentari 18518, jista’ l-Ministru jqiegħed fuq il-Mejda tal-Kamra d-dokumenti kollha rilevanti tal-ftehim bejn SportMalta u l-kuntrattur tax-Shooting Range, billi dawn ma kinux kompleti? Jista’ jqiegħed ukoll fuq il-Mejda tal-Kamra d-dokumenti kollha relatati mal-medjazzjoni mmexxija mill-Perit li d-dettalji dwaru qed jingħataw separatament, bejn SportMalta u l-kuntrattur li d-dettalji dwaru wkoll qed jingħataw separatament, inkluż u mhux limitat għad-deċiżjoni u/jew rakkomandazzjoni tal-istess Perit, liema medjazzjoni wasslet għaċ-ċessjoni tal-kawżi bejn SportMalta u l-istess kuntrattur quddiem il-Prim’Awla tal-Qorti Ċivili?

 

03/09/2024

 

ONOR. CLIFTON GRIMA:  Nirreferi lill-Onor. Interpellant għat-tweġiba tal-mistoqsija parlamentari 19926.

 

Seduta  261

09/10/2024