1. Ninsabu
f’mument determinanti għal pajjiżna.
Ninsabu f’mument meta hemm bżonn, iktar minn qabel, li jittieħdu
d-deċiżjonijiet. Dawk li huma tajbin
biex jibdlu, biex inaddfu, mhux biex ikissru u jeqirdu. Ma’ kull jum, dak li għaddejjin minnu qiegħed
jaggrava ruħu. Sejrin iktar lura mhux
biss minħabba dak li seħħ taħt il-Gvern Laburista Muscat, imma issa dak li
mhuwiex taħt il-Gvern Laburista Abela.
Fuq il-venda
2. Il-pajjiż
għadda, f’dawn l-aħħar għoxrin sena, minn perjodu ta’ bidliet
fundamentali. Rajna tibdiliet soċjali u
ekonomiċi li rregolaw u kkundizzjonaw l-iżvilupp lejn proċess ta’ progress
qawwi u sostnut. Issa, illum però,
ninsabu wieqfa fuq il-venda. Żmien li
għandu jmexxina biex nagħżlu liema direzzjoni ser naqbdu. Minflok bdejna l-proċess biex inneħħu minn
fuqna d-dell ikrah tal-fama u fl-istima li ninsabu qed nittitubaw, nissaddu u
nistennew iktar.
It-twissija
3. It-tqegħdin
ta’ isem pajjiżna fuq il-Lista l-Griża tal-Financial Action Task Force ġiebet
dan. Mertu tal-ħidma żbaljata
mill-amministrazzjoni passata u preżenti, ingħatajna dan iċ-ċertifikat. Wieħed li jmiss direttament mhux biss
mal-fama, imma wkoll mal-but tagħna.
Il-ħajja qegħda togħla wkoll għal din ir-raġuni. L-istat tal-finanzi ta’ pajjiżna wkoll, kif
iċ-ċifri tal-NSO iddikjaraw din il-ġimgħa.
Għal min irid jisma’
4. Ftit jiem
ilu, is-Sur Paul Bonello, li huwa magħruf bħala persuna ntiża sew fis-settur
finanzjarju, ipprova jiftaħ għajnejna.
F’rapport li deher f’din il-gazzetta fil-15 ta’ Awissu ddikjara ċar:
l-ewwel, li hemm bżonn il-miżuri iebsa; u t-tieni, li l-Gvern irid iħalli
kollox għal wara l-elezzjoni ġenerali li ġejja.
Ħadd ma ċaħad jew merih f’din id-dikjarazzjoni. Bħas-soltu għaddiet, u l-Gvern qiegħed idawwar
mill-ġdid wiċċu.
Figuri u fatti
6. Il-fatti
huma iktar evidenti. Hemm iktar sadid
dieħel. Fl-ewwel seba’ xhur tas-sena,
diġà kien hemm ftit anqas minn 900 miljun ewro f’defiċit. Id-dejn fl-istess perjodu ġie rappurtat li
kien 7.9 biljun ewro, jew żieda ta’ 1.2 biljun ewro fuq l-istess perjodu
tas-sena. Mhux biss, imma qed naraw:
l-ewwel, defiċit li huwa strutturali b’żieda ta’ terż; it-tieni, li huwa viċin
id-doppju ta’ dak li kien ippjanat, u ċertament fost l-ogħla rata fl-Unjoni
Ewropea.
Fama
5. Ilkoll nafu
li l-fama hija l-isem li wieħed jagħmel jew jikseb għalih innifsu minħabba
għemilu jew kliemu. Fuq dak li wieħed
iwettaq tinbena l-istima ġenerali jew popolari tiegħu. Tista’ tkun pożittiva u tista’ tkun
peġġorattiva. Hija parti mill-proċess
ta’ dak li jwettaq kull pajjiż f’ħidmietu.
Jista’ jiddeċiedi li jimxi fit-triq li jibniha għat-tajjeb. Jista’ le, u wara jkollu jħallas il-kont. Jista’ jħalli s-sadid, u jista’ jneħħih.
Hemm oħrajn
6. L-istima u
l-fama jorbtu u jgħinu lil min irid jagħmel il-ġid lill-proxxmu tiegħu. Huma l-elementi essenzjali li fuqhom tista’
tibni u fuqhom tiddependi biex ħaddieħor jafda f’dak li qiegħed
tipproponi. Dan dejjem, l-ewwel, jekk
tħobb lill-poplu tiegħek; u fit-tieni, għalhekk, li tieħu ħsieb tressaq
proposti ġodda ta’ bidla mingħajr dewmien.
X’qed isir
7. Min jipprova
jgħid il-kontra, li jista’, naturalment ikun biss qiegħed jidħak bih
innifsu. Il-Gvern preżenti għamel, u
għadu għaddej, b’kampanja ta’ nuqqas jew ħabi tal-verità biex jiċħad dak li
kien u huwa minnu. Flok jattakka
l-problemi u l-kumplikazzjonijiet qiegħed, fir-realtà, jaħrab minnhom. Qiegħed itawwal, u għalhekk ser ikun hemm
bżonn ta’ ferm iktar miżuri minn issa meta niġu għalihom.
Ebda pjan
8. Is-sitwazzjoni
hija gravi minnha nfisha. Hija gravi
aktar għax hemm defiċit ta’ kredibilità.
Min kien fl-għaġna ma jistax jitwemmen, barra minn xtutna, li huwa
l-Gvern li jista’ jġib il-bidla. Imma
mhux biss. Anki jekk wieħed iwarrab dan
il-punt, is-sitwazzjoni qegħda tiggrava iktar ruħha. Dan quddiem il-fatt li l-Gvern m’għandux
pjan, u wisq inqas għandu wieħed serju biex noħorġu minn dan id-dell li ninsabu
fih.
Ma ssolvix ruħha
9. Din mhix
sitwazzjoni li ser issolvi ruħha bit-trapass taż-żmien. Anqas bil-ħidma ordinarja ta’ amministrazzjoni. Trid ferm u ferm iktar minn hekk. Triq ħidma preparata u determinata biex
nirbħu lura l-fiduċja. Miżuri ġodda,
ċertament, li jolqtu fejn għandhom.
Tħaddim ta’ dak li għandna, iktar minn qatt qabel. Bidla fil-mentalità u fil-persuni li okkupaw
ċerti karigi istituzzjonali.
Barra minn xtutna
10. Mhux biss f’pajjiżna, imma trid issir ukoll il-ħidma barra minn
xtutna fil-kapitali varji Ewropej biex l-opinjonijiet jinbidlu. Mhuwiex biżżejjed li darba kull xahar wieħed
jiltaqa’ fil-laqgħat fi Brussell. Imma
hemm bżonn attività diretta mal-kapijiet tal-Istati varji. Dan, ovvjament, jekk dejjem iridu jiltaqgħu
magħna. Din hija ħidma essenzjali li
trid issir anki fin-normalità u li għamilna fil-Gvernijiet Nazzjonalisti
preċedenti. Issa, f’dan il-mument gravi,
mhix issir. U nibża’ iktar li jum wara
jum ser tiġi f’pożizzjoni li ma tistax issir.
Mhux biss
11. Imma ma’ dan hemm bżonn iktar direzzjoni ċara lid-diplomatiċi
tagħna. L-ambaxxati ta’ pajjiżna mxerrda
mad-dinja jridu linja ta’ strateġija ċara ta’ fejn u kif għandhom jaħdmu. Iridu iktar għajnuna f’persuni biex ilaħħqu
ma’ dmirijiethom. Iridu iktar il-libertà
tal-awtonomija li jaħdmu kif jafu sewwa huma.
Iridu ferm iktar informazzjoni preċiża u korretta sabiex jaħdmu.
Fil-passività
12. Fil-passività tal-Gvern hemm konsegwenzi. Huwa ċar ħafna li ttieħdet id-deċiżjoni li
Awwissu għalih huwa xahar ta’ mistrieħ.
M’għandux bżonn jitħabat sabiex jibdel.
Kif, allura, nistgħu nirbħu lura l-punti ta’ kredtu? Kif jista’ xi ħadd jemmen li qed nieħdu
l-passi, meta m’aħna nagħmlu xejn konkret?
Kif jista’ xi ħadd jipprova jidħol tarka u jgħinna, jekk aħna stess
qegħdin nittraskuraw lura? Hawn xi ħadd
jaħseb li minn barra minn xtutna mhuwiex iqis il-passi tagħna, jum wara jum?
Għadna daqshekk lura
13. Il-punt leġittimu huwa proprju dan. Għax jekk hemm min mill-Gvern li qiegħed
jaħseb li għax qed jipprova jċekken dak li huwa kbir li ħaddieħor qed jemmen,
nafu proprju l-kontra. Iktar ma jaġixxi
kif qiegħed dan il-Gvern, iktar qed jikber is-suspett. L-effett huwa li hawn ferm aktar persuni
speċjalizzati fis-settur li qegħdin josservaw b’iktar dettalji dak li qiegħed
isir.
Rapport
14. Ir-rapporti tagħhom mhumiex favorevoli għalina. U dan, il-Gvern jafu sewwa, għax qiegħed jiġi
nfurmat. Jekk qegħdin ‘l isfel, iktar
ser nibqgħu niżlin. Jekk Maltin qed
ibatu biex jiftħu l-kontijiet ma’ banek barranin, issa hemm kollox wieqaf. Jekk kellna l-oġġezzjoni ta’ tlett pajjiżi,
ser inkunu qed inżidu iktar in-numru kontra tagħna.
Min imexxi
15. Ftit snin ilu, wettaqna x’wettaqna, il-poplu kien ċert u moħħu
mistrieħ li l-fama ta’ pajjiżna kienet miżmuma tajba. Il-Partit Nazzjonalista ħalla warajh dan
il-kredtu. Kien għad-dispożizzjoni
tal-Gvern Laburista biex kompla jimxi fuq dak li stabbilejna, imma nafu li ġie
abbużat. Illum daħal iktar is-sadid, u
kif kienu jgħidulna: musmar imsaddad, il-ħajt triq taqla’ biex tneħħih.
No comments:
Post a Comment