KOLLEZZJONI TA’ MAPEP PREZZJUŻI

 15130. L-ONOR. CARMELO MIFSUD BONNICI staqsa lill-Ministru għall-Wirt Nazzjonali, l-Arti u l-Gvern Lokali: Jista’ l-Ministru jinforma lill-Kamra jekk il-kollezzjoni ta’ mapep prezzjużi li għaddew f’idejn l-Istat Malti mingħand l-individwu li d-dettalji dwaru qed jingħataw separatament humiex jiġu miżmuma fi stat tajjeb? Jista’ jgħid jekk ġewx esebiti? U jekk hemmx il-ħsieb li jsir mużew apposta sabiex jiġu esposti lkoll f’daqqa?

 

01/06/2020

 

ONOR. JOSÈ HERRERA: Ninforma lill-Onorevoli Interpellant illi ninsab infurmat minn Heritage Malta li l-kollezzjoni ta’ mapep imsemmija jinstabu fi stat ta’ konservazzjoni tajjeb. Fin-natura intrinsika tagħha, kollezzjoni bħal din hija waħda ta’ referenza.

 

Heritage Malta qatt ma kellha l-intenzjoni illi dawn il-mapep jiġu esibiti kollha, wisq anqas f’mużew iddedikat għalihom, kemm minħabba n-natura teknika u speċjalizzata tagħhom, kif ukoll minħabba l-konservazzjoni (peress li ma jifilħux ikunu esposti għad-dawl għal tul ta’ żmien).

 

Madankollu, isir użu frekwenti minn din il-kollezzjoni, kemm għall-wirja permanenti fil-Muzew tal-Arti (MUŻA), fejn jintużaw b’rotazzjoni skont il-bżonn, kif ukoll f’mużewijiet oħra, inkluż għal wirjiet temporanji, fosthom f’pajjiżi barranin. Barra minn hekk, huma dejjem aċċessibbli għal kull min irid jirreferi għalihom.

 

Seduta 343

15/06/2020