1. Tul din is-sena ser ikollna okkażjoni oħra sabiħa li tista’ titlob minna riflessjoni. Fid-dawl tal-viżta li ġejja tal-Papa Franġisku, nistgħu niftakru wkoll f’ta’ qabel. Niftakru b’ferħ li l-ewwel Papa li rifes din l-art kien il-maħbub qaddis Papa Ġwanni Pawlu II. Dak li wettaq hawn, il-memorja li ħajja, kif ukoll il-messaġġi li ġie bihom u ħa ħsieb li jwassal lilna lkoll. Ser, nittama, nieqfu u nirriflettu fuq dan.
Il-Qdusija ta’ Papa Wojtyla
2. Għal diversi
bħali, m’għandniex dubji fuq il-qdusija ta’ dan il-bniedem. Minn dak li rajna, mill-ammirazzjoni li
bnejna, mill-attenzjoni li ħassejna lejn ħidmietu, hemm għarfien ċar. Nagħrfuh bħala persuna speċjali, li
b’ħidmietu ġieb bidliet importanti fid-dinja.
Bidliet għas-sewwa, għall-paċi, għall-ġustizzja, għall-protezzjoni sħiħa
tad-dinjità umana. Ħidma li ġiebet
riżultati li nieħdu frott minnhom.
F’pajjiżna wkoll ċaqlaq sew l-affarijiet. Mexxiena iktar ‘il quddiem f’dak li aħna, u
f’dak li nistgħu nkunu. Bniedem
kumpless, ċertament ‘il barra mill-ordinarju, li ħalla marka storika importanti
li nħoss li mhux ser ikollna bħalu.
Suġġett għad-diskussjoni?
3. Dak li nieħu
bħala aċċettat sibtu, f’dawn il-jiem, dibattut.
Fi ktejjeb mimli ħsieb, proprju bit-titolu “Il-Qdusija ta’ Papa
Wojtyla”, sibtni naqra iktar fuq dan.
Il-kitba oriġinali hija ta’ Andrea Riccardi, li huwa professur
fl-istorja kontemporanja f’Ruma. Persuna
li kiteb sew. Magħruf. B’mod partikolari fi ktieb ieħor, “Il Potere
del Papa da Pio XII a Giovanni Paolo II”, li bdejn nipprova naqra wkoll. Imma, f’din il-linja ta’ ħsieb ta’ dan
il-ktejjeb, titlaq minn pass apparentement sempliċi, imma pass pass isir iktar
interessanti, kumplikat u indikattiv.
Il-kliem li jmexxina huwa dan: “Il-qdusija qatt ma waslet daqshekk
malajr għal Papa”.
It-triq twila tiegħu
4. F’din
is-sena, ser niftakruh ukoll għax ser jaħbat il-mitt sena mit-twelid
tiegħu. Fit-18 ta’ Mejju 2020, huwa
twieled fil-Polonja, f’Wadowice. Ser
naraw ukoll dak li kellu jgħaddi minnu.
Kemm għadda minn provi. Kemm
kellu jbati għall-oħrajn. Kemm kellu
rieda qaddisa biex iwettaq is-sewwa.
Kemm ħalla marka ma’ diversi li kienu maqtugħa mill-Knisja. Proprju għalhekk, dan il-ktejjeb ta’ Riccardi
jaf ikun gwida sabiħa għal min irid jiddibatti aktar fil-fond. Jaf ikun mument li jressaq iktar malajr għal
riflessjoni fuqu. Fuq il-bniedem qabel
sar Papa. Fuqu wara li laħaq,
bl-attentat ta’ ħajtu, u iktar minn hekk fi triqtu wara li l-Mulej sejjaħlu
fit-2 ta’ April 2005 sal-mument li ġie mgħolli ‘l fuq.
Il-ktieb jgħid: “Santo Subito”
5. F’kitba
mill-aqwa, u waħda li tista’ tinqara’ bil-lingwa nazzjonali mertu ta’ persuna
li, jekk ma tkunx attent, jibqa’ fid-dell li jidher li xtaq ikun. Fl-ewwel paġna jingħad: “Ġwanni Pawlu II, fi
żmien tassew qasir l-ewwel sar beatu, imbagħad qaddis. Ftit xhur wara mewtu, infetħet il-kawża
tal-beatifikazzjoni, bis-saħħa tad-dispensa li ħareġ Benedittu XVI. Fl-aħħar, fl-2011, sitt snin wara mewtu,
il-Papa xandru bħala beatu. Min-naħa
tiegħu, Papa Franġisku qatagħha li jikkanonizza lil Ġwanni Pawlu II. Ried li ċ-ċerimonja ssir fl-2014, flimkien
ma’ dik ta’ Ġwanni XXIII. F’anqas minn
għaxar snin mill-mewt, Karol Wojtyla, il-Papa Ġwanni Pawlu II, hu diġà qaddis
tal-Knisja Kattolika.”
Diskussjoni interessanti
6. Mertu
tal-intelliġenza tal-Franġiskan Edmund Teuma, dan il-ktieb ta’ sebgħin paġna
ġie għad-dispożizzjoni tagħna. Wieħed
li, bil-qalb, nirrakkomanda. Wieħed li
fih, it-traduttur jipprova “jaħrab” mill-mertu li ħaqqu għax issibu biss jekk
tħares b’ħafna reqqa. Mertu li jidher
fil-kliem magħżula minn fost dak li l-Malti tagħna jagħti. Mertu li jidher fil-konklużjonijiet, meta
jingħad: “Papa Wojtyla kellu effett ta’ ħelsien mill-beżgħat,
mill-kondizzjonament, mis-sens ta’ dekandenza.
Daħħal lill-poplu tiegħu f’xenarju ġdid, dak tas-seklu 21. Anki għall-Papat, dik tiegħu kienet tmexxija
eċċezzjonali, personali u kariżmatika.”
Waqt li nippreparaw ruħna għall-appuntament mal-Papa Franġisku, ejjew
nieqfu u nirrikonoxxu l-qdusija ta’ Karol Wojtyla.
No comments:
Post a Comment