9152. L-ONOR. CARMELO MIFSUD BONNICI staqsa lill-
Ministru għall-Affarijiet Barranin: Jista’ l-Ministru jinforma lill-Kamra
x’pożizzjoni qed jieħu pajjiżna fil-konfront tal-partijiet fil-konflitt li hemm
pendenti fis-Sirja in vista tal-aħħar żviluppi li kien hemm f’dawn l-aħħar
ġimgħat?
25/04/2014
ONOR. GEORGE
VELLA: Matul il-kunflitt fis-Sirja, Malta b’mod konsistenti
saħqet dwar l-importanza tad-diplomazija bħala soluzzjoni għas-sitwazzjoni
kritika f’dan il-pajjiż, bil-prijorita’ immedjata tkun il-waqfien mill-ġlied u
vjolenza kontra ċ-ċivili mill-partijiet kollha ta’ dan il-kunflitt.
Il-pożizzjoni ta’Malta fuq
is-sitwazzjoni fis-Sirja hija riflessa fil-Konklużjonijiet u rapporti li ta’
kull xahar jiġu adottati mill-Ministri Għall-Affarijiet tal-Unjoni Ewropea
imlaqqajgħin fil-Kunsill għall Affarijiet Barranin.
B’mod partikolari, fl-aħħar
laqgħa tal-Kunsill tal-Ministri għall-Affarijiet Barranin tal-Unjoni Ewropea li
saret fl-14 ta’ April 2014, enfasizzajt il-kriżi umanitarja li żviluppat fi
traġedja għal eluf ta’ Sirjani. Semmejt
ukoll kif ir-rapporti li qed jinħarġu minn aġenżiji tal-Ġnus Magħquda huma
allarmanti, b’mod partikolari f’dak li għandu x’jaqsam mas-setturi l-aktar
vulnerabbli tas-soċjeta’ Sirjana, bħat-tfal.
Waqt l-istess laqgħa, sħaqt
ukoll fuq l-importanza li jiġu mħarsa d-drittijiet tal-minoranzi etniċi u
reliġjużi fis-Sirja. Il-pożizzjoni Maltija hija wkoll waħda ta’ solidarjeta’
mal-pajjżi ġirien tas-Sirja, il-Libanu, l-Ġordan, it-Turkija u saħansitra
l-Iraq li fetħu l-fruntieri tagħhom lil miljuni ta’ Sirjani li qed jaħarbu
mill-qilla tal-vjolenza u d-disperazzjoni.
Seduta 144
05/05/2014
No comments:
Post a Comment