1. Partit, wara l-Elezzjoni Ġenerali,
jitlaq fi triqtu sabiex filwaqt li jkompli fil-ħidma normali tiegħu jibda
jirranka għall-appuntamenti elettorali li jiġu.
Il-ħatra ta’ Pawlu Borg Olivier bħala Segretarju Ġenerali kienet u
tibqa’ waħda tajba. Qed jagħmel xogħol
siewi li permezz tiegħu hemm pedamenti li qegħdin jitqegħdu. L-ewwel, hemm attenzjoni iktar lejn il-valuri
u l-prinċipji tal-partit; it-tieni, hemm impenn dirett lejn proċess ta’ djalogu
kostanti; it-tielet, flimkien mal-Assistent Segretarju Ġenerali Jean Pierre
Debono hemm l-issudar tal-istrutturi interni tal-partit u r-raba’, ftuħ iktar
immirat fil-ħidma ta’ informazzjoni u tixrid tal-messaġġ tagħna.
2. Fl-aħħar Kunsill Ġenerali ma kienx hemm
dubju li kellu id fl-għażla tas-suġġett li ġie trattat: “Bix-xogħol insaħħu
s-solidarjetà”. Fid-diskors ta’ l-introduzzjoni
tiegħu huwa qal: “Il-Partit Nazzjonalista huwa l-uniku partit fl-istorja
politika reċenti ta’ pajjiżna li wettaq u firex fil-prattika l-politika ta’
solidarjetà li ssib is-saħħa tagħha fil-fehmiet bażiċi tagħna bħala
partit.” Dan kollu huwa minnu proprju
għax dan il-partit żamm sod fil-bilanċi neċessarji sabiex il-ġustizzja soċjali
tibqa’ tirrenja. Dan però seta’ jsir għax kull amministrazzjoni tagħna żammet ix-xogħol bħala
prijorità.
3. Ix-xogħol u l-valur tiegħu fis-soċjetà
għalina huma l-ġebla tax-xewka. Biss
fhimna li dan jista’ jkun verament tajjeb u kostanti jekk inżidu fil-kontenut
tad-demokrazija. Kien hemm
sfortunatament żmien meta kienu jgħidulna min-naħa l-oħra tal-Kamra li
d-demokrazija mhix importanti, qisha xi ħaġa elitista, mentri l-klassi
tal-ħaddiem trid biss ix-xogħol.
L-argument politiku Laburista kien u għadu għal kollox żbaljat. Id-demokrazija, aktar ma tkun soda, aktar
tiggarantixxi l-ekonomija u x-xogħol.
Il-Partit Nazzjonalista jista’ jidher ma’ wħud li huwa mogħti
għall-prinċipji demokratiċi żżejjed, però dawn għad iridu
jindunaw li huma ċ-ċwievet ta’ suċċess.
4. Dak kollu li ġie mfassal u mplimentat
f’dawn is-snin serva sabiex jiġbed aktar investiment. Min għandu l-flus mhuwiex lest jeħodhom
f’pajjiż fejn ma hemmx demokrazija, ma hemmx stabilità, għax jaf li jkun
qiegħed jarmihom. Anzi, min huwa serju
jifhem li jekk kemm-il darba ma jkunx hemm mekkaniżmu effiċjenti li permezz
tiegħu d-drittijiet tal-ħaddiema huma effettivament protetti, ma jistax jaħdem
tajjeb. Ħadd fid-dinja ekonomika ma huwa
komdu jaħdem fl-industrija, fl-ekonomija jekk ma hemmx imħaddma l-bażi ta’ dak
li jissejjaħ “corporate social responsibility”.
Din mhix aktar ħolma lussuża, imma realtà.
5. Il-Kunsill qiegħed il-lenti fuq
id-dinja tax-xogħol għax hemm bżonn.
Hemm lok li nħarsu lejn is-settur, kif qed jaħdem u xi grad ta’
protezzjoni hemm għall-ħaddiem Malti.
Il-Partit Nazzjonalista kien u jibqa’ dejjem impenjat sabiex jassigura
li d-drittijiet li huwa ta lil kull settur, iktar u iktar wara d-dħul tagħna
fl-Unjoni Ewropea, jitħaddmu u jseħħu fir-realtà. Din hija tastiera importanti li mhux bi
ħsiebna nittraskuraw għax ix-xogħol huwa determinanti għalina lkoll bħala parti
vitali tagħna.
6. Il-memorja tal-Kunsill Ġenerali
ġustament tkompli tul is-sena li ġejja.
Is-Segretarju Ġenerali qabad programm li żgur huwa wieħed impenjattiv,
però determinanti.
Dan għax partit irid jibqa’ jbaqbaq bl-ideat, b’inizjattivi ġodda u dan
jidher ċar li qegħdin fi triqitna li jsir.
Is-seba’ punti li huwa elenka jidħlu fil-fond u hemm bżonn li jsiru,
speċjalment dik li hija l-iktar għal qalbu: il-formazzjoni politika. Fortunatament għalina bqajna partit
demokratiku nisrani li m’abbandunax il-prinċipji tiegħu imma ħaddimhom
iktar. Ix-xogħol, id-demokrazija u
l-ġustizzja soċjali għandhom valur u taw riżultati għax huma mibnija fuq dawn
il-valuri u mhux fuq dawk materjalisti.
Dan l-artikolu kien deher fil-harga tal-Mument tat-30 ta Mejju 2010.
No comments:
Post a Comment