Fl-okkażjoni
ta’ Jum l-Ewropa, il-Partit Nazzjonalista jġedded il-prinċipji li għaqqdu
lill-pajjiżi tal-Unjoni Ewropea u li wasslu għal kooperazzjoni bla preċedent
fil-kontinent Ewropew: il-prinċipji tal-paċi, is-solidarjetà, il-libertà u
l-kooperazzjoni. Jum l-Ewropa hija okkażjoni li tfakkarna li flimkien nistgħu
negħlbu l-isfidi li nsibu quddiemna b’mod aqwa. Magħqudin immorru aħjar.
L-Ewropa
mhix biss kontinent jew istituzzjoni. L-Ewropa tirrappreżenta l-idea
tad-demokrazija, id-drittijiet, il-libertà, id-dinjità, l-ugwaljanza,
is-solidarjetà, l-inklużjoni, il-ġustizzja, il-liġijiet indaqs għal kulħadd,
il-pluraliżmu, il-paċi, il-ħarsien u l-għaqda.
Illum
f’pajjiżna jeżisti kunsens li Malta hi Aħjar fl-Unjoni Ewropea; 75% tal-poplu
Malti u Għawdxi llum iħossuhom Ewropew. Pajjiżna bbenefika bis-sħiħ bis-sħubija
fl-Unjoni Ewropea, mhux biss bil-fondi li ksibna bħala pajjiż, total ta’ €2,354
miljun, iżda wkoll bl-opportunitajiet li nfetħu kif ukoll b’titjib fil-kwalità
tal-ħajja tagħna.
Sħubija
fl-Unjoni Ewropea għenet ukoll biex jinħoloq aktar xogħol u aktar
opportunitajiet. Biżżejjed insemmu:
1. Fondi biex jiġi nċentivat l-investiment
min-negozji, inkluż fondi biex negozji kbar, intrapriżi żgħar u medji, u start-ups,
ikunu jistgħu jinvestu u jżidu l-postijiet tax-xogħol;
2. Fondi għat-taħriġ tal-ħaddiema u
l-istudenti biex isiru korsijiet ta’ taħriġ biex il-ħaddiema jadattaw u jieħdu
vantaġġ mill-opportunitajiet kollha li qegħdin jinfetħu u sabiex iż-żgħażagħ
jiżviluppaw it-talenti tagħhom; u
3. Fondi ddedikati għall-infrastruttura u
t-tisħiħ tal-prodott turistiku, li wasslu għall-ħarsien tal-wirt kulturali
tagħna, it-titjib tal-infrastruttura ta’ pajjiżna, u skemi oħra biex intrapriżi
fis-settur turistiku jinvestu u joħolqu aktar postijiet tax-xogħol u
opportunitajiet.
Il-Partit
Nazzjonalista mill-Oppożizzjoni se jkompli jaħdem għal soċjetà aħjar billi
jagħti l-kontribut sħiħ tiegħu għal Malta Aħjar fl-Ewropa.
--
Uffiċċju
Informazzjoni
Partit
Nazzjonalista
No comments:
Post a Comment