9148. L-ONOR. CARMELO MIFSUD BONNICI staqsa lill-
Ministru għall-Affarijiet Barranin: Jista’ l-Ministru jinforma lill-Kamra x’ġie
diskuss meta ltaqa’ mal-persuna li d-dettalji dwarha qed jingħataw separatament
fiż-żjara riċenti tagħha f’Malta,
partikolarment dwar il-kwistjoni pendenti fl-Ukraina? X’ġie ffirmat u
x’programm ta’ kooperazzjoni se jkun hemm?
25/04/2014
ONOR. GEORGE
VELLA: Jiena nippretendi li l-Onor. Interpellant diġa qara
l-Press Release, u r-rapport tal-Press
Conference li saret fi tmiem il-laqgħa bejn il-Viċi Prim Ministru u Ministru
għall Affarijiet Barranin Natalia Gherman u jien.
Fl-10 t’April, iltqajt
f’Malta mal-Viċi Prim Ministru u Ministru għall-Affarijiet Barranin u
l-Integrazzjoni Ewropea tar-Repubblika tal-Moldova, l-E.T. Natalia Gherman. Din
iż-żjara seħħet f'mument kruċjali f’kuntest ta’ żviluppi sinifikanti li qed
iseħħu fil-Lvant tal-Ewropa.
Waqt it-taħdidiet li kelli
mal-Ministru Gherman ġew diskussi għadd ta’temi bilaterali kif ukoll
is-sitwazzjoni fir-reġjun, speċjalment l-aħħar żviluppi fl-Ukrajna u l-impatt li dawn kellhom fuq
il-pajjiżi ġirien.
F’dan il-kuntest jiena sħaqt
fuq l-importanza li Malta tagħti lill-Partenarjat tal-Lvant tal-Unjoni Ewropea
(Eastern Partnership) u kif dan l-istrument jista’ jwassal lejn stabbilta’
ekonomika u politika dejjiema fir-reġjun.
Infurmajt ukoll lill-Ministru
Gherman li Malta ssostni li għandu jiġi ffirmat il-Ftehim ta’ Assoċjazzjoni, li
jinkludi ukoll Deep and Comprehensive
Free Trade Area, bejn l-UE u l-Moldova f'Ġunju ta' din is-sena, kif ġie
miftiehem ukoll mill-Kapijiet ta’ Stat u Gvern waqt il-Kunsill Ewropew tal-20
ta’ Marzu 2014.
Waqt din iż-żjara, ġew
iffirmati Ftehim għall-Ħelsien mit-Taxxa Doppja, kif ukoll Joint Declaration fejn Malta lesta li tagħti għajnuna lill-Moldova
f’termini ta’ taħriġ u sostenn fl-ambitu tal-aspirazzjonijiet Ewropej ta’ dan
il-pajjiż. Permezz ta’ din il-Joint Declaration, Malta ser tkun
qegħda:
· toffri l-appoġġ tagħha għal
koperazzjoni dejjiema ta’ natura politika u settorjali bejn l-Unjoni Ewropea u
l-Moldova;
· taqsam l-esperjenzi tagħha
f’dak li jirrigwarda integrazzjoni aktar
mill-qrib mal-Unjoni;
· tassisti lill-Moldova biex
issaħħaħ il-parteċipazzjoni tagħha fi ħdan l-aġenziji u proġetti tal-Unjoni;
· tagħti kontribut fit-tisħiħ
tal-istituzzjonijiet fil-Moldova permezz ta’ taħriġ ta’ membri tal-korp
diplomatiku.
Seduta 144
05/05/2014
No comments:
Post a Comment