Il-Partit
Nazzjonalista jirreferi għall-aħbar li l-Ministru għall-Edukazzjoni u x-Xogħol
Evarist Bartolo ssottometta l-pjanijiet tal-Gvern Laburista
għall-implimentazzjoni tal-Garanzija għaż-Żgħażagħ lill-Kummissjoni Ewropea.
Dan il-pjan qed jiġi sottomess sena wara kampanja elettorali li fiha Joseph
Muscat stqarr solennement li kellu roadmap lest biex iż-żgħażagħ kollha
“li wara l-età ta’ 16-il sena, jekk ma jkunux fit-tagħlim, jew ikollhom xogħol,
jingħataw taħriġ.” Dan l-istess pjan qed jintbagħat xahar u nofs wara li
l-Kummissjoni Ewropea ċanfret lill-Gvern Malti talli kien wieħed minn grupp
żgħir ta’ pajjiżi li ma kinux issottomettew il-pjanijiet tagħhom.
Minkejja li
l-Prim Ministru Muscat stqarr diversi drabi li kellu roadmap ċar
għall-implimentazzjoni tal-Garanzija għaż-Żgħażagħ, fil-pjanijiet li
ssottometta lill-Kummissjoni Ewropea l-Ministru għall-Edukazzjoni u x-Xogħol
qiegħed jgħid li l-garanzija jista’ jagħtiha lil 350 żagħżugħ u żagħżugħa biss.
Dan minkejja li skont statistika mogħtija mill-Ministru għall-Edukazzjoni u
x-Xogħol stess, f’pajjiżna hemm 5,800 żagħżugħ u żagħżugħa li huma
qiegħda.
Il-progress
tal-Gvern Laburista fl-implimentazzjoni tal-Garanzija għaż-Żgħażagħ qed ikun
letarġiku u sfurzat u żgur li mhux qed ikun b’saħħtu u effettiv biżżejjed
sabiex jikkumbatti ż-żieda fir-rata tal-qgħad fost iż-żgħażagħ, li f’din
l-aħħar sena żdiedet minn 13.6% għal 15.3% skont l-aħħar statistika maħruġa
mill-aġenzija Eurostat.
Il-Partit
Nazzjonalista jinsisti mill-ġdid li l-Gvern jikkonsulta lill-imsieħba soċjali u
lill-Oppożizzjoni biex jifformula strateġija ħolistika dwar ix-xogħol li
timmotiva liż-żgħażagħ biex ikomplu jistudjaw u jitħarrġu u toħloq biżżejjed
opportunitajiet ta’ xogħol għall-ħaddiema Maltin u Għawdxin.
--
Uffiċċju
Informazzjoni
Partit
Nazzjonalista
No comments:
Post a Comment