MALTA AFRICA STRATEGY FOR PARTNERSHIP - ĦIDMA

28545. L-ONOR. CARMELO MIFSUD BONNICI  staqsa lill- Deputat Prim Ministru u Ministru għall-Affarijiet Barranin u t-Turiżmu: Jista’ d-Deputat Prim Ministru u Ministru għall-Affarijiet Barranin u t-Turiżmu jgħid x’ħidma kompliet titwettaq matul is-snin 2024 u 2025, b’rabta mal-Malta Africa Strategy for Partnership 2020-2025?

 

22/05/2025

 

ONOR. IAN BORG:  Ninforma lill-Onor. Interpellant illi matul l-2024 u l-2025, il-Ministeru għall-Affarijiet Barranin u t-Turiżmu kompla jwettaq il-Malta Africa Strategy for Partnership 2020–2025, li għandha l-għan li ssaħħaħ relazzjonijiet sostenibbli mal-pajjiżi Afrikani fuq livell politiku, ekonomiku u multilaterali, b’enfasi fuq proprjetà Afrikana tas-soluzzjonijiet, governanza tajba u koerenza reġjonali.

 

Il-ħidma ewlenija kienet tinkludi:

 

–            Il-konsolidazzjoni tal-preżenza diplomatika f’Addis Ababa u f’Accra, li qed jiffaċilitaw il-kuntatt regolari ma’ sħab Afrikani u jikkontribwixxu għal involviment iktar iffukat fir-reġjuni rispettivi;

–            L-iżvilupp ta’ relazzjonijiet bilaterali aktar sodi mal-Etjopja u mal-Ghana, inkluż permezz ta’ laqgħat ministerjali u djalogi tematiċi dwar it-turiżmu, l-edukazzjoni, il-konnettività u kwistjonijiet ta’ sigurtà reġjonali;

–            L-istabbiliment ta’ rappreżentanza diplomatika għal diversi Stati oħra permezz ta’ ħatriet ta’ Ambaxxaturi mhux residenti, fosthom għall-Angola, il-Capo Verde, in-Namibja, in-Niġerja, ir-Rwanda, is-Senegal, u s-Seychelles, bħala parti mill-istrateġija diplomatika ta’ Malta għall-Afrika;

–            Parteċipazzjoni attiva fil-fora bejn l-UE u l-Afrika, inkluż il-proċess ta’ reviżjoni tad-Dokument Konġunt UE–UA u l-Ministerial Summit tal-2025, kif ukoll il-laqgħat regolari fil-Grupp Afrikani tal-Kunsill (COAFR);

–            Koordinazzjoni kontinwa mar-Rappreżentanti Speċjali tal-UE għall-Afrika, b’mod partikolari permezz ta’ Ambaxxatur inkarigat mill-monitoraġġ tal-iżviluppi u l-kontribut ta’ Malta f’dawn il-qafas;

–            Kontribut f’suġġetti ta’ rilevanza tematika bħall-ġustizzja klimatika, il-governanza diġitali u l-konnettività edukattiva, li ġew indirizzati kemm f’laqgħat bilaterali kif ukoll f’fora multilaterali;

–            Bidu tal-proċess ta’ reviżjoni tal-Istrateġija Nazzjonali għall-Afrika lejn it-tmiem tal-2024, biex jiġu identifikati l-prijoritajiet għal perjodu ġdid 2025–2030, f’konformità mal-Istrateġija tal-Politika Barranija mġedda tal-Ministeru.

 

L-attivitajiet imwettqa sa issa kkontribwixxew għal profil aktar ċar u kredibbli ta’ Malta bħala sieħeb proporzjonat, realistiku u impenjat favur djalogu strutturat mal-kontinent Afrikan.

 

Seduta  348

28/05/2025