AMBAXXATA TA’ MALTA FIL-KAJR - ĦIDMA

28539. L-ONOR. CARMELO MIFSUD BONNICI  staqsa lill- Deputat Prim Ministru u Ministru għall-Affarijiet Barranin u t-Turiżmu: Jista’ d-Deputat Prim Ministru u Ministru għall-Affarijiet Barranin u t-Turiżmu jgħid x’ħidma saret mill-Ambaxxata ta’ Malta fil-Kajr matul is-sena 2024?

 

22/05/2025

 

ONOR. IAN BORG:  Ninforma lill-Onor. Interpellant li l-ħidma u inizjattivi li ittieħdu mill-Ambaxxata ta’ pajjiżna għall-Eġittu tul is-sena 2024 huma:

 

Introduzzjoni

 

L-Ambaxxatur Roberto Pace qiegħed iservi bħala l-Ambaxxatur ta’ Malta ġewwa l-Eġittu, u huwa akkreditat ukoll għas-Sudan.

 

Fis-sena 2024 saru sensiela ta’ laqgħat bilaterali ma’ Ministri u uffiċjali Eġizzjani, li jirriflettu r-rabtiet sodi bejn iż-żewġ pajjiżi. Dawn l-impenji komplew isaħħu l-kooperazzjoni f’oqsma bħall-kummerċ, l-enerġija, is-sostenibbiltà, il-migrazzjoni, u l-kura soċjali. Ġew iffirmati wkoll żewġ Memoranda ta’ Ftehim importanti fl-oqsma tal-enerġija u l-politika soċjali. Fl-istess ħin, tniedu inizjattivi ġodda biex jiġu mħeġġa r-rabtiet kulturali u soċjali bejn il-komunitajiet Maltin u Eġizzjani.

 

Fl-istess sena, is-sitwazzjoni fis-Sudan kompliet tiggrava minħabba l-gwerra ċivili li qed tikkawża ħsarat kbar u sfidi umanitarji drastiċi. L-Ambaxxata kompliet bil-ħidma tagħha sabiex tagħmel analiżi kontinwa tas-sitwazzjoni politika u umanitarja fis-Sudan u tassisti fl-isforzi ta’ paċi u stabbiltà fir-reġjun.

 

Bilaterali

 

Matul dawn l-aħħar tnax-il xahar, il-ħidma kienet mifruxa kif indikat hawn taħt:

 

Eġittu

- Analiżi tas-sitwazzjoni politika fil-pajjiż, inkluż monitoraġġ regolari tal-iżviluppi politiċi u istituzzjonali, il-politika barranija tal-Eġittu, u l-impatt tagħhom fuq ir-reġjun u fuq l-interessi ta’ Malta fil-Mediterran u fil-Lvant Nofsani.

- Diskussjonijiet regolari mal-Ambaxxaturi u d-Deputati tal-pajjiżi tal-Unjoni Ewropea fuq żviluppi fl-Eġittu, kif fuq interessi u pożizzjonijiet komuni.

- Taħditiet interni kontinwi mal-Ministeru tal-Affarijiet Barranin u t-Turiżmu ta’ Malta dwar il-politika Maltija lejn il-Lvant Nofsani, kif ukoll dwar diversi temi li jolqtu r-relazzjonijiet bilaterali u dawk reġjonali, inkluż l-enerġija rinnovabbli, il-migrazzjoni, il-kummerċ, is-sigurtà marittima, u l-kooperazzjoni ekonomika u kulturali.

- Taħditiet mal-Ministeru tal-Affarijiet Barranin tal-Eġittu u mal-Uffiċċju tas-Servizzi tas-Sigurtà Eġizzjan fir-rigward tas-sigurtà domestika u l-impatt fuq ċittadini u interessi Maltin.

- Diskussjonijiet u koordinazzjoni ma’ diversi Ministeri tal-Eġittu waqt diversi laqgħat u żjarat, fosthom iż-żjara f’Malta tal-Ministru għall-Elettriku u l-Enerġija Rinnovabbli, Dr Mohamed Shaker El-Markabni, kif ukoll iż-żjarat fl-Eġittu tal-Ministru għall-Inklużjoni u s-Settur Volontarju, Julia Farrugia, u tal-Ministru għall-Ambjent, l-Enerġija u l-Indafa Pubblika, Miriam Dalli.

- Parteċipazzjoni f’diversi avvenimenti kulturali, konsolari, ekonomiċi, politiċi u diplomatiċi organizzati mill-Ministeri Eġizzjani, mill-Unjoni Ewropeja u mill-korp diplomatiku fil Kajr u f’Lixandra, bħala parti mill-ħidma diplomatika ta’ rutina.

- Laqgħat u taħditiet mal-Ministeru tal-Avjazzjoni Ċivili, ma’ linji tal-ajru, mas-settur privat dwar il-potenzjal fil-qasam tat-turiżmu, b’enfasi fuq l-esplorazzjoni ta’ rotot ġodda diretti bejn iż-żewġ pajjiżi.

- Taħditiet dwar diversi Memorandum ta’ Ftehim bejn Malta u l-Eġittu li għadhom qed jiġu negozjati, li jkopru oqsma ta’ interess reċiproku.

- Appoġġ għal artisti u riċerkaturi Maltin li jixtiequ jikkollaboraw jew jesebixxu l-ħidma tagħhom fl-Eġittu, kif ukoll promozzjoni ta’ boroż ta’ studju u laqgħat skont it-tema tal-borża ta’ studju (bħal MEDAC u-Sigurtà Marittima).

- Arranġament ta’ sapport reċiproka bejn l-Eġittu u Malta għall-kandidatura taż-żewġ pajjiżi fil Kategorija C tal-Kunsill tal-Organizzazzjoni Marittima Internazzjonali.

- Diskussjonijiet mal-UE u mal-gvern Eġizzjan fuq medda ta’ xhur li finalment wasslu għall-evakwazzjoni ta' pazjenti mediċi Palestinjani minn Gaza f'April 2025.

- Appoġġ kontinwu liċ-ċittadini u turisti Maltin fl-Eġittu, inkluż f’sitwazzjonijiet ta’ emerġenza konsulari jew każijiet ta’ vulnerabilità.

 

Sudan

- Analiżi kontinwa tas-sitwazzjoni politika u umanitarja fis-Sudan biex jinftiehem aħjar l-impatt fuq ir-reġjun u l-politika ta’ Malta.

- Diskussjonijiet regolari mal-Ambaxxaturi u d-Deputati tal-pajjiżi tal-UE għas-Sudan, speċjalment dawk li jkopru s-Sudan u l-pajjiżi tal-madwar mill-Kajr.

- Taħditiet Interni kontinwi mal-Ministeru tal-Affarijiet Barranin u t-Turiżmu ta’ Malta dwar diversi temi li jolqtu r-relazzjonijiet bilaterali u dawk reġjonali, inkluż l-iżvilupp tas-sitwazzjoni umanitarja fis-Sudan, il-migrazzjoni, u l-appoġġ għal inizjattivi ta’ paċi u stabbiltà fir-reġjun.

- Taħditiet mal-Ministeru tal-Affarijiet Barranin tal-Eġittu dwar is-sitwazzjoni fis-Sudan, b’attenzjoni għar-rwol tal-Eġittu fil-ħidma ta’ medjazzjoni u stabilizzazzjoni fir-reġjun.

 

Seduta  347

27/05/2025