15311. L-ONOR. CARMELO MIFSUD BONNICI staqsa lill- Prim Ministru: Jista’ l-Prim Ministru jgħid x’kienet l-ispiża li saret fil-Ministeru tul is-sena 2018 f’mobile phones kif ukoll jista’ jiġi indikat l-ispiża li saret fis-segreterija privata tal-ministru tul dik is-sena?
04/06/2020
ONOR. ROBERT
ABELA: Ninsab nformat li ma kien hemm ebda spiża fuq mobile phones fl-2018.
Seduta 346
22/06/2020
15310. L-ONOR. CARMELO MIFSUD BONNICI staqsa lill-
Ministru għall-Affarijiet Barranin u Ewropej: Jista’ l-Ministru jgħid x’passi u
programmi ġew segwiti għat-taħriġ u żvilupp fil-karriera diplomatika tul dawn
l-aħħar tliet snin? Jista’ jindika kemm persuni attendew għalihom?
04/06/2020
ONOR. EVARIST
BARTOLO: Ninforma lill-Onor. Interpellant illi l-Ministeru
tal-Affarijiet Barranin u Ewropej joffri diversi opportunitajiet ta’ taħriġ u
l-iżvilupp tal-karriera lid-diplomatiċi tiegħu.
Kull sena l-Ministeru joffri lil-uffiċjali tiegħu, korsijiet fuq livell
ta’ Masters kemm fl-Akkademja Mediterranja tal-Istudji Diplomatiċi (MEDAC) tal-Universita’ ta’Malta, kif
ukoll fl-Universita’ ta’ Sussex, l-Ingilterra jew f’dik ta’ Bruges,
il-Belġju.
Flimkien mal-EEAS, jiġu offruti korsijiet qosra ġewwa
Brussel relatati ma’ temi diversi tal-politika esterna u ta’ sikurezza komuni
tal-Unjoni Ewropeja (CFSP). Bl-għajnuna tal-MEDAC kif ukoll tad-DIPLO
Foundation, il-Ministeru joffri korsijiet fid-diplomazija u l-istorja Mediterranja,
fir-rizoluzzjoni tal-konflitti, fl-ekonomija fid-diplomazija kif ukoll dwar
id-dinja tal-informatika w l-governanza permezz tal-internet.
Diversi diplomatiċi
jintbagħtu jsewgu korsijiet qosra fid-diplomazija offruti minn Ministeri
tal-Affarijiet Barranin ta’ pajjizi li magħhom Malta għandha relazzjoni
mill-qrib.
Wara li jiggradwaw
mill-Universita f’qasam relatat mal-professjoni diplomatika u jsir reklutaġġ
ta’ uffiċjali ġodda, l-Ministeru jorganizza korsijiet qosra imma ntensivi dwar
ix-xogħol marbut mad-diversi direttorati tal-Ministeru sabiex dawn
jiffarmiljarizzaw irwieħhom mad-doveri professjonali li jkunu qegħdin
jistennewhom. Lid-diplomatiċi li jkunu
qegħdin iservu barra minn Malta, l-Ministeru joffrilhom l-opportunita’ sabiex
jitgħallmu jew jiżviluppaw il-lingwa barranija tal-post fejn ikunu qegħdin
iservu. Dan it-taħriġ, jekk ikun
possibbli, jista’ jitkompla ġaladarba l-uffiċjal jirritorna Malta.
L-istatistiċi għal dan
il-perjodu jindikaw li fl-aħħar tliet snin, 130 uffiċjal min dan il-Ministeru
attendew it-taħriġ li 60 minnhom huma membri tal-korp diplomatiku. Dan it-taħriġ ivarja minn taħriġ fil-lingwa,
għal taħriġ fil-kura tal-klijenti, għad-diplomazija u taħriġ relatat
mal-politika barranija, kemm f’Malta kif ukoll barra minn xtutna.
Seduta 346
22/06/2020
15309. L-ONOR. CARMELO MIFSUD BONNICI staqsa lill-
Deputat Prim Ministru u Ministru għas-Saħħa: Jista’ d-Deputat Prim Ministru u
Ministru għas-Saħħa jgħid xi spejjeż saru sal-aħħar ta’ April 2020 fil-proġett
li qiegħed jsir għal Ċentru tas-Saħħa Ġdid f’Raħal Ġdid? Jista’ jindika kemm
huwa previst li jiġi minfuq u jekk il-miri finanzjarji humiex jinżammu jew
superati?
04/06/2020
ONOR. CHRIS
FEARNE: Ninforma lill-Onor. Interpellant illi għal-proġett
tal-Paola Hub sal-aħħar t’April 2020,
tħallset is-somma ta’ €728,296 f’xogħol ta’ kostruzzjoni kif ukoll fi spejjeż
preliminarji bħal studji u investigazzjonijiet għal Impatt tat-Traffiku, Nar u
Ventilazzjoni, Ġeotekniċi, Stħarriġ fuq l-Art, Kontaminazzjoni ta 'Artijiet, Cost Benefit Analysis u Konsulenza dwar
Applikazzjoni tal-Unjoni Ewropeja. Minn dan l-ammont, €449,882 ġew minn Fondi
Ewropej.
Dan il-proġett se jkun jiswa madwar €39 miljun
ewro.
Seduta 346
22/06/2020
15308. L-ONOR. CARMELO MIFSUD BONNICI staqsa lill-
Ministru għall-Affarijiet Barranin u Ewropej: B’referenza għat-tweġiba
għall-mistoqsija parlamentari 14084, jista’ l-Ministru jgħid meta huwa previst
li terġa’ tiltaqa’ l-Kummissjoni Konġunta Malta-Alġerija?
04/06/2020
ONOR. EVARIST
BARTOLO: Nixtieq ninforma lil-Onor. Interpellant li waqt
il-ħames sessjoni tal-Kummisjoni Konġunta Malta-Alġerija li saret hawn Malta
fid-19 ta’ Diċembru 2018, ġie maqbul li s-sitt sessjoni ta’ din il-Kummissjoni
għandha tiltaqa’ fi żmien sentejn f’Alġiers. Id-data għad trid tkun maqbula
bejn iż-żewġ naħat tramite kuntatti
diplomatiċi, u dan suġġett li ċ-ċirkustanzi jippermettu.
Seduta 346
22/06/2020
15307. L-ONOR. CARMELO MIFSUD BONNICI staqsa lill-
Ministru għall-Ekonomija, Investiment u Negozji Żgħar: B’referenza għat-tweġiba
għall-mistoqsija parlamentari 14086, jista’ l-Ministru jgħid jekk kienx hemm xi
kuntratti li ġew iffirmatiwaqt iż-żjara kummerċjali fil-Ghana u jista’ jindika
mil-liema entitajiet pubbliċi u governattivi kienu l-erba’ uffiċjali għolja?
04/06/2020
ONOR. SILVIO
SCHEMBRI: Ninforma lill-Onor. Interpellant li l-entitajiet
pubbliċi u governattivi li żaru l-Ghana, apparti TradeMalta, kienu l-Malta
Enterprise, l-MCAST, il-Malta Medicines Authority u l-Universita ta Malta.
F'din iż-żjara kienu ffirmati ħames ‘memorandum of understanding’ bejn
entitajiet pubbliċi u governattivi u privati.
Seduta 346
22/06/2020
15306. L-ONOR. CARMELO MIFSUD BONNICI staqsa lill-
Prim Ministru: Jista’ l-Prim Ministru jgħid kemm hemm persuni preżentement
impjegati sal-aħħar tas-sena 2019 fil-Public Service Commission u jista’
jindika l-gradi relattivi?
04/06/2020
ONOR. ROBERT
ABELA: Ninsab nformat li sa l-aħħar ta’ l-2019 kien hemm
18-il impjegat mal-Public Service Commission li jvarjaw bħala gradi minn
Segretarju Eżekuttiv għal Assistenti Diretturi u ħaddiema klerikali u
amministrattivi.
Seduta 346
22/06/2020
15126. L-ONOR. CARMELO MIFSUD BONNICI staqsa lill-
Ministru għall-Wirt Nazzjonali, l-Arti u l-Gvern Lokali: B’referenza
għar-risposta għall-mistoqsija parlamentari 14292, jista’ l-Ministru jinforma
l-Kamra jekk il-Kunsill huwiex ser jingħata l-fondi neċessarji sabiex il-ħadid
msaddad u li jista’ jkun perikoluż, jiġu mibdula u fejn possibbli kkurati lura?
01/06/2020
ONOR. JOSÈ
HERRERA: Ninforma lill-Onor. Interpellant li ninsab infurmat
mill-Kunsill Lokali tax-Xgħajra li x-xogħol se jitwettaq mill-Ministeru
għat-Trasport, Infrastruttura u Proġetti Kapitali.
Seduta 342
10/06/2020
15125. L-ONOR. CARMELO MIFSUD BONNICI staqsa lill- Ministru għall-Edukazzjoni u Xogħol: B’referenza għar-risposta għall-mistoqsija parlamentari 14257, jista’ l-Ministru jinforma lill-Kamra jidhirlux li l-budget annwali ta’ madwar €10,500 (li ma jinkludix il-pagi) ma huwiex biżżejjed sabiex issir l-ħidma u r-riċerka fl-Argotti and Botanic Gardens Resource Centre, post strateġikament importanti għall-pajjiżna senjatament ukoll sabiex ikun hemm ġnien botaniku?
01/06/2020
ONOR. OWEN BONNICI: Ninsab
infurmat li għal bosta snin u sal-lum il-ġurnata il-baġit annwali baqa'
l-istess. Iċ-Ċentru kien ħa sehem fi proġetti finanzjati minn entitajiet oħra u
b’hekk seta’ jagħmel xogħol importanti u iktar voluminuż minkejja d-daqs modest
tal-baġit allokat lilu. Kif kien ġie
spjegat, proġett wieħed kien jinvolvi żvilupp ta' pakketti edukattivi marbutin
mal-immaniġġjar tal-ġonna, u l-ieħor kien jinvolvi ġbir ta' żerriegħa u bini
ta' bank taż-żerriegħa. Għalhekk, barra minn dawn il-proġetti, ir-riċerka li
saret kienet dik li saret minn studenti ta' dipartimenti diversi. Hija l-fehma
tal-bord tal-Argotti li din id-direzzjoni għandha tkompli u tissaħħaħ.
Seduta 342
10/06/2020
15124. L-ONOR. CARMELO MIFSUD BONNICI staqsa lill-
Ministru għall-Wirt Nazzjonali, l-Arti u l-Gvern Lokali: Jista’ l-Ministru
jinforma lill-Kamra kemm kien hemm pubblikazzjonijiet minn Heritage Malta
fis-sena 2018? Jista’ jelenkahom u jgħid kemm ġew mibjugħa jew distrubwiti u
kemm għad fadal?
01/06/2020
ONOR. JOSÈ
HERRERA: Ninforma lill-Onor. Interpellant li l-informazzjoni
mitluba hi kif murija fit-tabella hawn taħt:
|
Sena 2018 - Heritage Malta – pubblikazzjonijiet |
|||
|
Nru ta’ Pubblikazzjonijiet |
Dettalji tal-Pubblikazzjonijiet |
Kemm ġew mibjugħa/distribwiti |
Kemm għad fadal |
|
1200 |
Tesserae 6, Spring 2018 –
ISBN 978-99932-57-54-7 |
585 |
715 |
|
1000 |
Il-Misteru ta’ Taht
is-Sigra tal-Harrub – ISBN 978-99932-57-52-3 |
869 |
131 |
|
50 |
Valletta, my city, my Story
(Talking Book) - ISRC MT-A1D-18-00001 |
10 |
40 |
|
1000 |
Il-Mithna ta’ Kola, Ktieb
ta’ Hidma – ISBN 978 99932-57-61-5 |
181 |
819 |
|
1000 |
Il-Katakombi ta’ San Pawl,
Ktieb ta’ Hidma – ISBN 978-99932-57-62-2 |
544 |
456 |
|
1000 |
Il-Muzew Marittimu, Ktieb
ta’ Hidma – ISBN 978-99932-57-63-9 |
151 |
849 |
|
1000 |
L-Armerija tal-Palazz,
Ktieb ta’ Hidma – ISBN 978-99932-57-64-6 |
313 |
687 |
|
1000 |
The Schranz Family of
Artists, a journey of Discovery – ISBN 978-99932-57-51-6 |
745 |
255 |
|
1000 |
Archaeological Fragments
and Other Sources of Information – ISBN 978-99932-57-53-0 |
174 |
826 |
|
2000 |
MUZA, The National
Community Art Museum, ERDF 05.019 – ISBN 978-99932-57-56-1 |
1171 |
829 |
|
1000 |
Core & Periphery, Mdina
& Safi in the 9th & 10th centuries – ISBN 978-99932-57-58-5 |
413 |
587 |
|
1000 |
Humillima Civitas
Vallettae, From Mount Xebb-er-rass to European Capital of Culture (Soft
Bound) – ISBN 978-99932-57-55-4 |
673 |
327 |
|
1500 |
Impressions of an Island, A
Malta Comic Con Artbool – ISBN 978-99932-57-57-8 |
501 |
999 |
|
1200 |
Tesserae 7, Autumn 2018 –
ISBN 978-99932-57-60-8 |
224 |
976 |
|
500 |
Humillima Civitas
Vallettae, From Mount Xebb-er-rass to European Capital of Culture (Hard
Bound) – ISBN 978-99932-57-65-3 |
76 |
424 |
Seduta 342
10/06/2020
15123. L-ONOR. CARMELO MIFSUD BONNICI staqsa lill-
Ministru għall-Affarijiet Barranin u Ewropej: B’referenza għar-risposta
għall-mistoqsija parlamentari 14092, jista’ l-Ministru jindika jekk kemm-il
darba fl-għażla tal-ambaxxaturi huwiex jingħata iktar piż għal dawk
fil-karriera diplomatika minn dawk li ma għandhomx u fost id-diplomatiċi huwiex
jiġi miżmum l-esperjenza u s-servizz li għandhom?
01/06/2020
ONOR. EVARIST
BARTOLO: Ninforma lill-Onor. Interpellant li fl-għażla
tal-ambaxxaturi l-Ministeru jkun qed jieħu bosta konsiderazzjonijiet, inkluż
il-prioritajiet tal-Gvern li jkun attiv bl-aħjar mod fil-qasam internazzjonali.
Nista’ nikkonferma li jingħata piż xieraq lil dawk l-Uffiċċjali fil-karriera
diplomatika
Seduta 342
10/06/2020
15122. L-ONOR. CARMELO MIFSUD BONNICI staqsa lill-
Ministru għall-Wirt Nazzjonali, l-Arti u l-Gvern Lokali: Jista’ l-Ministru
jinforma lill-Kamra jekk il-kundizzjonijiet kif kontenuti fl-Att Pubbliku
tat-13 ta’ Ottubru 1988 li fih ġew trasferiti lill-pajjiżna l-partiti
tal-mużika komposta mill-Maestro li d-dettalji dawru qed jingħataw
separatament, huwiex qiegħdin jiġu debitament osservati?
01/06/2020
ONOR. JOSÈ
HERRERA: Ninforma l-Onor. Interpellant li l-informazzjoni
mitluba għadha qed tinġabar.
Seduta 342
10/06/2020
15121. L-ONOR. CARMELO MIFSUD BONNICI staqsa lill-
Ministru għall-Ekonomija, Investiment u Negozji Żgħar: Jista’ l-Ministru
jwieġeb il-mistoqsija parlamentari 14273 u ċjoè: B’referenza għall-mistoqsija
parlamentari 13389 jista’ l-Ministru jgħid x’ħidma saret biex jiġi rettifikat
dak li kien indikat fl-istess domanda f’Kordin fil-parti fejn hemm
il-Faċilitajiet Sportivi?
01/06/2020
ONOR. SILVIO SCHEMBRI: Ninforma lill-Onor. Interpellant li din
l-informazzjoni għadha qed tingabar.
Seduta 342
10/06/2020
14533. L-ONOR. CARMELO MIFSUD BONNICI staqsa lill-Ministru għall-Familja, Drittijiet tat-Tfal u Solidarjetà Soċjali: Jista’ l-Ministru jgħid jekk hiex qiegħda tingħata għajnuna soċjali lill-persuni li preżentement jinsabu f’ħabsijiet barra minn pajjiżna?
11/05/2020
ONOR. MICHAEL
FALZON: Ninforma lill-Onor. Interpellant li, d-Dipartiment
tas-Sigurtà Soċjali ma jħallas l-ebda Għajnuna Soċjali lil persuni li qegħdin
il-ħabs, la f’Malta u lanqas barra minn Malta.
Seduta 338
02/06/2020
14532. L-ONOR. CARMELO MIFSUD BONNICI staqsa lill-Ministru
għall-Affarijiet Barranin u Ewropej: Jista’ l-Ministru jgħid kemm hemm Maltin
li preżentement jinsabu f’ħabsijiet barra minn pajjiżna? Jista’ jindika kemm
ġew rilaxxati tul is-sena li għaddiet?
11/05/2020
ONOR. EVARIST
BARTOLO: Infurmat li bħalissa hemm ħdax (11)-il persuna ta’
nazzjonalità Maltija li qegħdin f’ħabsijiet barra minn Malta. Dawn qegħdin
fil-pajjiżi kif imsemmi hawn taħt:
L-Awstralja (8), l-Italja
(1), il-Polonja (1), u Spanja (1).
Matul is-sena li għaddiet
inħelsu żewġ (2) persuni: wieħed (1) mill- Emirati Għarab Magħquda u ieħor (1)
mir-Renju Unit.
Nixtieq niġbed l-attenzjoni
ta’ l-Onorevoli Interpellant li din iċ- ċifra tikkorrispondi biss ma’ dawk
il-persuni li talbu għall-assistenza tal-Missjonijiet tagħna barra minn Malta.
Seduta 338
02/06/2020
14531. L-ONOR. CARMELO MIFSUD BONNICI staqsa lill-Ministru
għall-Intern, is-Sigurtà Nazzjonali u l-Infurzar tal-Liġi: Jista’ l-Ministru
jgħid kemm kien hemm Maltin li jinsabu preżentement f’ħabsijiet barra minn
pajjiżna? Jista’ jindika kemm ġew rilaxxati tul is-sena li għaddiet?
11/05/2020
ONOR. BYRON
CAMILLERI: Nitlob lill-Onor. Interpellant jagħmel il-mistoqsija
tiegħu lill-Ministru kkonċernat.
Seduta 338
02/06/2020
14530. L-ONOR. CARMELO MIFSUD BONNICI staqsa lill-Ministru
għall-Affarijiet Barranin u Ewropej: B’referenza għall-aħbar li ġiet imxandra
f’Novembru 2017 li hemm “Ħsieb biex ambaxxati jiġu mmexxijien aħjar”, jista’
l-Ministru jgħid x’passi ttieħdu u x’kienu r-riżultati? Jista’ jindika x’miżuri
medium u long term ġew identifikati?
11/05/2020
ONOR. EVARIST BARTOLO: Nixtieq ninforma lill-Onor. Interpellant li minn Novembru 2017, ġew segwiti
numru ta' miżuri sabiex jitjieb l-operat tal-Ambaxxati ta' Malta sabiex
jirrappreżentaw u jmexxu aħjar l-interessi tagħna kif ukoll biex iservu aħjar
liċ-ċittadini Maltin li jgħixu jew jinsabu barra l-pajjiż. Qed inpoggi fuq
il-Mejda tal-Kamra dawn il-miżuri.
Seduta 338
02/06/2020
14529. L-ONOR. CARMELO MIFSUD BONNICI staqsa lill-Ministru
għall-Affarijiet Barranin u Ewropej: B’referenza għat-tweġiba tal-mistoqsija
parlamentari 13775, jista’ l-Ministru jgħid jekk humiex se jittieħdu xi passi
sabiex iktar persuni li huma residenti barra jiġu infurmati li jistgħu
jirreġistraw taħt in-Notifika D?
11/05/2020
ONOR. EVARIST
BARTOLO: Ninforma lill-Onor. Interpellant li fil-waqt li
r-reġistrazzjoni taħt in-Notifka D intiża għal dawk il-Maltin li jgħixu barra
minn Malta hija fuq bażi volontarja, il-Ministeru qed jaħseb dwar modi kif din
in-Notifika tista’ tkun iżjed magħrufa permezz ta’ iżjed pubbliċita’ u metodi
aktar moderni kif wieħed ikun jista’ jaċċessaha biex jimliha u jibgħatha
minnufih. Dan u aktar impenn minn naħa tal-Ambaxxati Maltin biex jippromwovu
din ir-reġistrazzjoni voluntarja għandu jgħin biex in-numri ta’ dawk li
jitħajjru jimlew u jibgħatu din in-notifika jiżdied.
Seduta 338
02/06/2020
14528. L-ONOR. CARMELO MIFSUD BONNICI staqsa lill-Ministru
għall-Affarijiet Barranin u Ewropej:
Jista’ l-Ministru jgħid
x’servizzi qed jingħataw taħt l-iskema Consul
on The Move kif ukoll f’liema pajjiżi u jekk kemm-il darba sarux talbiet
għall-iktar fondi sabiex dan jibqa’ jiġi sostnut tul din is-sena?
11/05/2020
ONOR. EVARIST
BARTOLO: Ninforma lill-Onor. Interpellant li l-Ministeru
informa lill-Ambaxxati u l-Kummissjonijiet Għolja Maltin fejn jiġi organizzat
il-Program Consul-on-the-Move kull sena biex il-projezzjonijiet ta’ żjarat għal
din is-sena jkun sospiżi minħabba l-pandemija COVID-19. Dettalji dwar meta
l-Ambaxxati u l-Kummissjonijiet Għolja Maltin ikunu jistgħu jerġgħu jibdew
jippjanaw għal skeda ġdid ta’ żjarat tiġi kkomunikata lilhom fi żmien opportun.
Sandanittant il-Ministeru jixtieq jinforma li għal din is-sena ma sarux talbiet
għal iktar fondi biex isostnu dan il-Program permess li sa issa ma tinħassx
il-ħtieġa għal dan.
Seduta 338
02/06/2020
14527. L-ONOR. CARMELO MIFSUD BONNICI staqsa lill-
Ministru għall-Affarijiet Barranin u Ewropej: Jista’ l-Ministru jindika minn
min huwa kompost il-kunsill interministerjali dwar it-tagħlim tal-Lingwa
Maltija ai termini tal-ħidma li għandha ssir taħt il-Kunsill għall-Maltin li
jgħixu Barra minn Malta? Jista’ jiġi indikat jekk kemm-il darba l-applikazzjoni
għall-fondi mill-Unjoni Ewropea ġietx milqugħa jew le?
11/05/2020
ONOR. EVARIST
BARTOLO: Ninforma lill-Onor. Interpellant li l-imsemmi Kunsill
kien fil-verità Kumitat li twaqqaf fl-2015 mill-Ministeru għall-Edukazzjoni u
x-Xogħol, bil-għan li jsegwi mill-qrib l-idea oriġinali li titwaqqaf
pjattaforma diġitali għat-tagħlim tal-ilsien Malti. Fil-perjodu li fih kien
attiv il-Kumitat saret ħidma flimkien mal-Ministeru għall-Edukazzjoni u x-Xogħol
biex jinkisbu fondi Ewropej mill-Integra-LLAPSI+ (Language Learning and Parental Support for Integration Plus) għal
dan il-proġett. Il-Kumitat baqa’ jiffunzjona sal-2017 meta l-fondi ġew allokati
lill-Ministeru għall-Edukazzjoni u x-Xogħol biex tkun tista’ tibda l-ħidma fuq
dan il-proġett. Il-Kumitat imsemmi kien kompost mid-Direttur Ġenerali
għall-Affarijiet Politiċi u Ewropej, id-Direttur responsabbli għall-Maltin li
Jgħixu Barra minn Malta, is-Segretarju tal-Kunsill għall-Maltin li Jgħixu Barra
minn Malta, id-Direttur tal-Akkademja Mediterranja għall-iStudji Diplomatiċi
(MEDAC), u rappreżentanti mill-Ministeru għall-Edukazzjoni u x-Xogħol
rispetttivament. Tajjeb wieħed ifakkar li fl-aħħar laqgħa ġeneral tal-Kunsill
għall-Maltin li Jgħixu Barra minn Malta, id-Direttur Ġenerali responsabbli minn
dan il-proġett fi ħdan il-Ministeru għall-Edukazzjoni u x-Xogħol informa
l-membri tal-Kunsill li l-proġett imsemmi beħsiebu jkun lest sal-aħħar ta’ din
is-sena.
Seduta 337
01/06/2020
14526. L-ONOR. CARMELO MIFSUD BONNICI staqsa lill-
Ministru għall-Finanzi u s-Servizzi Finanzjarji: B’referenza għall-mistoqsija
parlamentari 13778, jista’ l-Ministru jgħid jekk l-applikazzjoni li l-Awtorità
rċeviet sabiex jiġi offrut l-Equity
Release for Pensioners ġietx approvata u jekk fl-affermattiv liema huwa
l-bank applikanti?
11/05/2020
ONOR. EDWARD
SCICLUNA: Ninforma lill-Onor. Interpellant li l-applikazzjoni li
l-Awtorità rċeviet sabiex jiġi offrut l-Equity Release for Pensioners għadha
qed tiġi proċessata.
Meta applikazzjoni tiġi
approvata mill-Awtorità informazzjoni fuq l-entità li ġiet liċenzjata titpoġġa
fuq il-website tal-Awtorità.
Seduta 337
01/06/2020
14525. L-ONOR. CARMELO MIFSUD BONNICI staqsa lill-
Ministru għall-Affarijiet Barranin u Ewropej: Jista’ l-Ministru jgħid jekk
l-assoċjazzjonijiet tal-Maltin li jgħixu barra minn Malta humiex isibu
diffikultà sabiex jinformaw il-membri tagħhom dwar ħidmet il-Kunsill
għall-Maltin li jgħixu Barra minn Malta u jistgħux jingħataw għajnuna
finanzjarja u loġistika sabiex iwettqu dan?
11/05/2020
ONOR. EVARIST
BARTOLO: Infurmat li waħda mill-funzjonijiet tal-Kunsill
tal-Maltin li Jgħixu barra minn Malta hi li jżomm lill-assoċjazzjonijiet
tal-Maltin infurmati bl-inizjattivi li jkunu qed isiru, kif ukoll jgħaddilhom
informazzjoni oħra utli li fil-fehma tal-Kunsill tinteressahom mill-qrib.
Mill-informazzjoni li għandu l-Ministeru, l-assoċjazzjonijiet Maltin attivi
barra minn Malta m’għandhomx diffikultajiet biex din l-informazzjoni jgħadduha
lill-membri rispettivi tagħhom u jqis il-kuntatt tal-membri tal-Kunsill ma’
dawn l-assoċjazzjonijiet bħala fundamentali biex jinżamm kuntatt ħaj bejn
iż-żewġ naħat. Dwar għajnuna finanzjarja u loġistika lill-assoċjazzjonijiet
imsemmija, f’dan l-istadju l-Ministru ma jħossx li għandu jikkonsidraha, anki
għaliex fil-ħidma pjanata tal-Kunsill, hemm diġa’ maħsubin miżuri bie
jindirizzaw xi lakuni li jista’ jkun hemm bl-użu aktar effiċjenti
tal-informatika.
Seduta 337
01/06/2020
14524. L-ONOR. CARMELO MIFSUD BONNICI staqsa lill-
Ministru għall-Affarijiet Barranin u Ewropej: Jista’ l-Ministru jgħid jekk
il-proposta li tresqet fi ħdan il-Kunsill għall-Maltin li jgħixu barra minn
Malta li jkun hemm mużew jew ċentru ta’ informazzjoni flimkien mal-Università
ta’ Malta sabiex l-istorja tal-immigrazzjoni ta’ Maltin u Għawdxin lejn pajjiżi
oħra, tiġi miġbura u ppreservata?
11/05/2020
ONOR. EVARIST
BARTOLO: Infurmat li l-inizjattiva msemmija kienet preżentata
fl-ewwel laqgħa tal-Kunsill tal-Maltin li Jgħixu Barra minn Malta fl-2011 u li
kienet issemmiet fil-Konvenzjonijiet tal-Maltin li Jgħixu barra minn Malta ta’
bejn 1969 u l-2000. Madankollu minħabba nuqqaas ta’ finanzi baqa’ qatt ma sar
xejn. Sadanittant tajjeb wieħed ifakkar li l-Kummissjoni Emigranti kienet
waqqfet il-Mużew tal-Emigrazzjoni f’Dar l-Emigrant li t-tieni fażi tiegħu
tnediet fl-2012. F’dan is-sens il-gvern iqis li Mużew ieħor ddedikat
għall-Emigranti Maltin ikun qed jidduplika x-xogħol tajjeb li diġa’ sar
mill-Kummissjoni Emigranti, u minflok qed jaħseb biex isaħħaħ l-infrastruttura
diġitali tiegħu biex fuq medda ta’ żmien il-Maltin li jgħixu barra minn Malta
jkollhom sit elettroniku ddedikat għalihom.
Seduta 337
01/06/2020
14523. L-ONOR. CARMELO MIFSUD BONNICI staqsa lill- Ministru għall-Wirt Nazzjonali, l-Arti u l-Gvern Lokali: Jista’ l-Ministru jgħid kemm kienu l-fondi li ġew allokati mid-Dipartiment lill-Kunsill Lokali Tarxien biex kif kien ġie debitament imħabbar isir Open Air Gym fi Triq il-Kurunell Mas, Ħal Tarxien? Jista’ jiġi indikat ukoll min kienu l-kuntratturi/suppliers li ġew inkarigati biex jaħdmu fuq dan il-proġett u jekk tħallsu meta tħallsu? Jista’ jiġi indikat jekk kemm-il darba ġewx utilizzati fondi oħra apparti dawk mgħoddija speċifikament għall-proġett? Jekk iva, jista’ jindika minn liema vot u meta tħallsu dawn il-pagamenti?
11/05/2020
ONOR. JOSÈ HERRERA: Ninforma lill-Onor. Interpellant li ninsab
infurmat mill-Kunsill Lokali ta’ Ħal Tarxien li l-fondi allokati lill-Kunsill
biex isir Open Air Gym fi Triq il-Kurunell Mas jammonta għal € 250,000.
Il-Kuntrattur inkarigat biex jaħdem fuq
dan il-proġett kien Catbros Ltd. II-proġett attwalment ġie jiswa € 335,791.80 u
sal-aħħar ta’ Ġunju 2019 kien tħallas l-ammont ta’ €95,172.71. Bejn Lulju 2019
u April 2020 l-ammont li tħallas kien dak ta’ € 295,285.80. Il-bilanċ pendenti
jitħallas meta ssir iċ-ċertifikazzjoni mill-perit fuq ix-xogħlijiet.
Il-fondi in eċċess qed jitħallsu
mill-fondi tal-Kunsill.
Seduta 337
01/06/2020
14522. L-ONOR. CARMELO MIFSUD BONNICI staqsa lill- Ministru għall-Affarijiet Barranin u Ewropej: B’referenza għall-mistoqsija parlamentari 12205, jista’ l-Ministru jgħid jekk waħda mill-ħames organizzazzjonijiet mhux governattivi reġistrati ai termini tal-artikolu 10 tal-Kapitolu 515 tal-Liġijiet ta’ Malta humiex eleġibbli sabiex japplikaw għall-fondi tal-Unjoni Ewropea? Jekk iva, liema u jekk le x’diffikultajiet hemm?
11/05/2020
ONOR. EVARIST
BARTOLO: Infurmat illi l-organizzazzjonijiet li qed jirreferi
għalihom l-Onor. Interpellant, ma jikkwalifikawx ai termini tal-artikolu 70(1)
tar-Regolament (UE) Nru 1303/2013 tal-Parlament Ewropew u tal-Kunsill tas-17
ta’ Diċembru 2013 li jistabbilixxi dispożizzjonijiet komuni dwar il-Fond
Ewropew għall-Iżvilupp Reġjonali, il-Fond Soċjali Ewropew, il-Fond ta'
Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u
tas-Sajd Ewropew u li jistabbilixxi d-dispożizzjonijiet ġenerali dwar il-Fond
Ewropew għall-Iżvilupp Reġjonali, il-Fond Soċjali Ewropew, il-Fond ta' Koeżjoni
u l-Fond Ewropew għall-Affarijiet Marittimi u s-Sajd u li jħassar ir-Regolament
tal-Kunsill (KE) Nru 1083/2006.
Seduta 337
01/06/2020
14521. L-ONOR. CARMELO MIFSUD BONNICI staqsa lill-
Ministru għall-Affarijiet Barranin u Ewropej: Jista’ l-Ministru jgħid min,
preżentement, qiegħed iservi bħala Segretarju tal-Kunsill għall-Maltin li
Jgħixu Barra minn Malta u jekk il-ħatra hiex uffiċjali?
11/05/2020
ONOR. EVARIST
BARTOLO: Ninforma lill-Onorevoli Interpellant li s-Segretarju
tal-Kunsill tal-Maltin li Jgħixu Barra minn Malta huwa s-Sur Joseph A. Xerri li
reġa’ inħatar fil-kariga għal terminu ieħor ta’ tliet (3) snin b’seħħ mill-24
ta’ Novembru 2019. Il-ħatra hija uffiċjali wara li l-Ministru għall-Affarijiet
Barranin u Ewropej bagħat l-ittra tal-ħatra lis-Sur Xerri fit-18 ta’ Frar 2020
wara li kienu tlestew il-proċeduri meħtieġa.
Seduta 336
27/05/2020
14520. L-ONOR. CARMELO MIFSUD BONNICI staqsa lill-
Ministru għall-Wirt Nazzjonali, l-Arti u l-Gvern Lokali: Jista’ l-Ministru
jgħid f’liema pożizzjoni finanzjarja kien jinsab il-Kunsill Lokali ta’ Ħal
Tarxien fl-aħħar ta’ Ġunju 2019? Jista’ jgħid jekk kienx hemm deficit u jekk iva kemm kien? Jista’
jiġi indikat ukoll x’kienet il-pożizzjoni finanzjarja sal-aħħar ta’ April 2020?
11/05/2020
ONOR. JOSÈ
HERRERA: Ninforma lill-Onor. Interpellant li ninsab infurmat
mill-Kunsill Lokali ta’ Ħal Tarxien illi sal-aħħar ta’ Ġunju 2019, il-Kunsill
kellu deficit ta’ €244,373 skont il-Mid-Term Financial Audit għas-sena
finanzjarja bejn l-1 ta’ Jannar 2019 u t-30 ta’ Ġunju 2019.
Skont ir-Rapport Finanzjarju
tal-ewwel kwart tas-sena, il-Kunsill kellu deficit
ta’ €135,646.
Seduta 336
27/05/2020
14293. L-ONOR. CARMELO MIFSUD BONNICI staqsa lill-
Ministru għall-Ambjent, it-Tibdil fil-Klima u l-Ippjanar: Jista’ l-Ministru
jgħid x’passi qed jittieħdu sabiex jiġi riabilitat il-masġar li hemm bejn
il-Fgura u Ħaż-Żabbar li qiegħed fuq ix-xellug li jibda minn Triq Kottoner
fil-Fgura u jieħu għal Triq il-Kunsill tal-Ewropa?
04/05/2020
ONOR. AARON
FARRUGIA: Ninforma lill-Onor. Interpellant li l-masġar bħalissa
qiegħed jiġi rijabilitat. Dan il-masġar jikkonsisti primarjament minn siġar
maturi taż-żebbuġ li kollha ġew miżbura. Sar ukoll twittija ta’ ħamrija madwar
is-siġar u tul il-masġar kollu sabiex l-art tkun aktar stabbli u sigura. Dan in
vista li dan il-Park ikun jista’ jilqa’ familji fih meta jinfetaħ għal
pubbliku. Sar ukoll tħawwil ta’ siġar u arbuxelli indiġeni u mistenni li jsir
aktar tħawwil fil-planting season ta’ Settembru/Ottubru.
Matul il-masġar tqiegħdu
picnic benches u bins flimkien ma' sistema ta’ dawl baxx matul il-passaġġi
f’nofs il-masġar. Inbnew faċilitajiet sanitarji u inxtara logħob għat-tfal li
ser ikun qiegħed jiġi installat fil-jiem li gejjin. Saret ukoll installazzjoni
tal-ewwel parti ta’ sistema ta’ CCTV sabiex timmoniterja l-attivita fil-Park.
Seduta 336
27/05/2020
14292. L-ONOR. CARMELO MIFSUD BONNICI staqsa lill-
Ministru għall-Wirt Nazzjonali, l-Arti u l-Gvern Lokali: B’referenza
għall-mistoqsija parlamentari 11910, jista’ l-Ministru jgħid x’passi ulterjuri
ttieħdu mill-Ministeru sabiex ikun hemm rijabilitazzjoni tax-Xatt tax-Xgħajra
senjatament il-ħadid li huwa msaddad sew? Jista’ jgħid jekk il-public convenience hiex ser titlesta
kollha qabel is-sajf jew le?
04/05/2020
ONOR. JOSÈ
HERRERA: Ninforma lill-Onor. Interpellant li ninsab infurmat
mill-Kunsill Lokali tax-Xgħajra li bħalissa għaddej xogħol ta' manutenzjoni
tal-bankijiet kif ukoll tal-latrina pubblika li maħsuba tkun lesta sal-aħħar
ta' Mejju.
Apparti minn hekk, fix-Xatt
tax-Xgħajra sar ukoll xogħol ta' railing
fit-turġien li jagħtu għal fuq il-blat u tindif u qtugħ ta' ħaxix. Il-Kunsill
qed jaħdem sabiex jinbidel ir-railing
tax-xatt kollhu minħabba li qiegħed fi stat ħażin ħafna.
Seduta 336
27/05/2020
14291. L-ONOR. CARMELO MIFSUD BONNICI staqsa lill-
Ministru għat-Turiżmu u Protezzjoni tal-Konsumatur: B’referenza
għall-mistoqsija parlamentari 11910, jista’ l-Ministru jgħid x’passi ulterjuri
ttieħdu mill-Ministeru sabiex ikun hemm rijabilitazzjoni tax-Xatt tax-Xgħajra
senjatament il-ħadid li huwa msaddad sew? Jista’ jgħid jekk il-public convenience hiex ser titlesta
kollha qabel is-sajf jew le?
04/05/2020
ONOR. JULIA
FARRUGIA PORTELLI: Nitlob lill-Onor. Interpellant biex jagħmel
il-mistoqsija tiegħu lill-Ministeru kkonċernat.
Seduta 336
27/05/2020
