SANTA LUĊIJA – GĦASSA TAL-PULIZIJA

5070. L-ONOR. CARMELO MIFSUD BONNICI  staqsa lill- Ministru għall-Intern, is-Sigurtà, ir-Riformi u l-Ugwaljanza: Jista’ l-Ministru jara li l-Għassa tal-Pulizija f’Santa Luċija tinfetaħ iktar spiss u jindika x’xogħol ta’ manutenzjoni sar is-sena li għaddiet u x’xogħol beħsiebu jsir din is-sena?

 

06/01/2023

 

ONOR. BYRON CAMILLERI:  Ninsab infurmat illi l-lokalità ta’ Santa Luċija hemm provdut is-servizz ta’ Pulizija tal-Komunità, kif ukoll bir-ronda regolari permezz ta’ uffiċjali b’vetturi tad-distrett u dawk tal-RIU. B’hekk jintlaħqu l-ħtiġijiet u s-servizzi operazzjonali kollha tal-pulizija f’din il-lokalità. L-għassa tal-Pulizija f’Santa Luċija tinfetaħ skont l-esiġenzi tas-servizz. Hemm Sistema elettronika installata mal-istess għassa, fejn il-pubbliku jista’ jaqbad mal-Kwartieri Ġenerali tal-Pulizija erbgħa u għoxrin siegħa kuljum, biex tiġi koordinata kull assistenza mitluba.

 

Huwa pjanat li l-għassa ta’ Santa Luċija ser tiġi konvertita f’hub għall-vittmi tal-vjolenza domestika biex b’hekk jitlaħħaq is-servizz li bħalissa toffri t-Taqsima dwar il-Vjolenza Abbażi tal-Ġeneru u l-Vjolenza Domestika għan-nofsinhar ta’ Malta. Pjanat ukoll illi l-istess għassa tospita l-Pulizija tal-Komunità għal-lokalitajiet ta’ Santa Luċija u Raħal Ġdid. Għaldaqstant huwa mistenni li jsiru xogħlijiet ta’ rinovar, interni kif ukoll esterni, biex jintlaħħqu l-miri u bżonnijiet imsemmija.

 

Seduta  74

11/01/2023