IL-GUDJA – TRIQ SAN ĊIRU - XOGĦLIJIET

29447. L-ONOR. CARMELO MIFSUD BONNICI  staqsa lill- Ministru għall-Ambjent, l-Enerġija u l-Indafa Pubblika: B’referenza għat-tweġiba tal-mistoqsija parlamentari 28319, tista’ l-Ministru tara li x-xogħlijiet fi Triq San Ċiru, fil-Gudja ma jdumux ma jiġu ffinalizzati sabiex jitnaqqas l-inkonvenjent lir-residenti?

 

26/06/2025

 

ONOR. MIRIAM DALLI:  Ninsab infurmata li x-xogħlijiet min-naħa tal-Korporazzjoni għas-Servizzi tal-Ilma fuq is-sistema tad-drenaġġ tlestew, filwaqt li għaddejjin dawk fuq in-network tal-ilma tax-xorb.

 

Seduta  362

01/07/2025

FORTI TA’ DELIMARA

29446. L-ONOR. CARMELO MIFSUD BONNICI  staqsa lill- Ministru għall-Kultura, l-Artijiet u l-Gvern Lokali: B’referenza għat-tweġiba tal-mistoqsija parlamentari 28888, jista’ l-Ministru jgħid jekk jikkunsidrax li mis-sena li ġejja, il-Forti ta’ Delimara tibda tinfetaħ kuljum?

 

26/06/2025

 

ONOR. OWEN BONNICI:  Ninsab infurmat li l-Forti ta’ Delimara jinfetaħ għal Open Days, attivitajiet speċjali organizzati mill-aġenzija, kif ukoll b’appuntament għal gruppi jew individwi li jixtiequ jżuruh. Barra minn hekk, fadal iktar xogħlijiet x'isiru.

Ukoll wieħed irid jikkunsidra li fortizzi oħrajn jinsabu miftuħin kuljum.

 

Seduta  362

01/07/2025

GĦAJN DWIELI - TEMPJI TA’ KORDIN

29445. L-ONOR. CARMELO MIFSUD BONNICI  staqsa lill- Ministru għall-Kultura, l-Artijiet u l-Gvern Lokali: B’referenza għat-tweġiba tal-mistoqsija parlamentari 28887, jista’ l-Ministru jgħid jekk jikkunsidrax li mis-sena li ġejja t-Tempji ta’ Kordin f’Għajn Dwieli, magħrufa wkoll bħala Kordin III, jibdew jinfetħu kuljum?

 

26/06/2025

 

ONOR. OWEN BONNICI:  Ninsab infurmat li Kordin III jinfetaħ għal open days, attivitajiet speċjali organizzati mill-aġenzija, kif ukoll b’appuntament għal gruppi jew individwi li jixtiequ jżuruh. Peress li huwa sit relattivament żgħir, b’kumplessi neolitici oħra ferm ikbar minnu viċin tiegħu, mhux sostenibbli u l anqas hu meħtieġ li jinfetaħ kuljum.

 

Seduta  362

01/07/2025

BORMLA - KAPPELLA TAL-MADONNA TAS-SOKKORS

29444. L-ONOR. CARMELO MIFSUD BONNICI  staqsa lill- Ministru għall-Kultura, l-Artijiet u l-Gvern Lokali: Jista’ l-Ministru jwieġeb il-mistoqsija parlamentari 28886 u jgħid jgħid jekk il-Kappella tal-Madonna tas-Sokkors f’Bormla hijiex tinfetaħ u jekk hijiex qed tiġi kkurata? Jista’ jgħid ukoll jekk huwiex possibbli li l-faċċata tagħha tinżamm f’kundizzjoni aħjar?

 

26/06/2025

 

ONOR. OWEN BONNICI:  Ninsab infurmat mill-Kunsill Lokali ta’ Bormla li l-Kappella tal-Madonna tas-Sokkors bħalissa mhux qed tinfetaħ għall-pubbliku u hemm il-ħsieb li jinbeda proċess għad-devoluzzjoni biex eventwalment tkun ikkurata.

 

Seduta  362

01/07/2025

IMTIEĦEN - RAPPORTI

29443. L-ONOR. CARMELO MIFSUD BONNICI  staqsa lill- Ministru għall-Kultura, l-Artijiet u l-Gvern Lokali: Jista’ l-Ministru jwieġeb il-mistoqsija parlamentari 29302 u ċjoè: B’referenza għat-tweġiba tal-mistoqsija parlamentari 28908, jista’ l-Ministru jgħid jekk hemmx rapporti dwar l-imtieħen f’pajjiżna?

 

26/06/2025

 

ONOR. OWEN BONNICI:  Nitlob l-Onor. Interpellant ikun aktar ċar għal-liem mtieħen qed jirreferi peress li ma ngħatat l-ebda informazzjoni ġdida.

 

Seduta  362

01/07/2025

KERĊEM - PROĠETT TAL-GĦADIRA TA’ SAN RAFLU

29442. L-ONOR. CARMELO MIFSUD BONNICI  staqsa lill- Ministru għall-Kultura, l-Artijiet u l-Gvern Lokali: Jista’ l-Ministru jwieġeb il-mistoqsija parlamentari 29301 u ċjoè: B’referenza għat-tweġiba tal-mistoqsija parlamentari 28906, jista’ l-Ministru jgħid kemm ġie jiswa l-proġett tal-Għadira ta’ San Raflu f’Kerċem?

 

26/06/2025

 

ONOR. OWEN BONNICI:  Ninsab infurmat mill-Kunsill Lokali Kerċem li l-ispiża għal dan il-proġett kienet ta’ €108,617.19 (VAT inkl.)

 

Seduta  362

01/07/2025

SKEJJEL PRIMARJI - RIŻENJI TA’ GĦALLIEMA

29148. L-ONOR. CARMELO MIFSUD BONNICI  staqsa lill- Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni: Jista’ l-Ministru jwieġeb il-mistoqsija parlamentari 28890 u jgħid kemm hemm għalliema fl-iskejjel primarji li ser jirtiraw minħabba l-età matul il-ħames snin li ġejjin u kemm kien hemm għalliema li rriżenjaw matul l-aħħar ħames snin?

 

12/06/2025

 

ONOR. CLIFTON GRIMA:  Ninforma lill-Onor. Interpellant li matul il-ħames snin li ġejjin mistennija jirtiraw 26 għalliema, filwaqt li fl-aħħar ħames snin irriżenjaw 81 għalliem, matul l-aħħar ħames snin ġew ingaġġati 211 għalliem ġdid u 94 għalliema peripatetic

 

Seduta  362

01/07/2025

BORMLA – GROUND TAL-ISKOLA PRIMARJA

28307. L-ONOR. CARMELO MIFSUD BONNICI  staqsa lill- Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni: Jista’ l-Ministru jgħid jekk il-ground li l-Iskola Primarja ta’ Bormla għandha preżentement, huwiex ser jiġi garantit fil-kostruzzjoni futura li ser issir?

 

15/05/2025

 

ONOR. CLIFTON GRIMA:  Ninforma lill-Onor. Interpellant sabiex jirreferi d-domanda lill-Ministru kkonċernat.

 

Seduta  362

01/07/2025

ĦAL TARXIEN - SKOLA TAL-PRIMARJA L-ANTIKA

26960. L-ONOR. CARMELO MIFSUD BONNICI  staqsa lill- Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni: B’referenza għat-tweġiba tal-mistoqsija parlamentari 26273 jista’ l-Ministru jagħti tweġiba aktar dettaljata u jgħid ukoll jekk l-Iskola tal-Primarja l-antika f’Ħal Tarxien kollha hijiex qed tiġi utilizzata jew le?

 

28/03/2025

 

ONOR. CLIFTON GRIMA:  Ninforma lill-Onor. Interpellant li din l-iskola qed tintuża bħala induction hub.

 

Seduta  362

01/07/2025

FIL-KUNVENTI HEMM ID-DAWL

1. Iktar ma tersaq lejhom iktar tagħraf. Tifhem id-dinamika interna ta’ bnedmin li jgħixu flimkien b’ħajja dedikata għall-missjoni u vokazzjoni unika. Kif jgħixu, kif jitolbu, kif jaħdmu lkoll flimkien. X’jiddiskutu bejniethom u ma’ dawk li jmorru jitolbu parir jew jiftħu qalbhom magħhom. Fil-qalb miftuħa u l-ferħ kontinwu waqt li jaħdmu għall-oħrajn. Dawk li għandhom motto ċar ħafna li huwa marbut mal-messaġġ li San Pawl jagħti: “U intom, ħuti, agħmlu l-ġid bla qatt ma tegħjew.” Diversi, fil-fatt jagħrfu dan, u minkejja dak li jingħad għadhom ifittxu l-opinjonijiet ta’ dawn il-bnedmin, patrijiet u sorijiet. Gwida sabiex jifhmu dak li għaddejjin huma personalment minnu. Wens fil-kumplikazzjonijiet tal-ħajja, fit-traġedji li jaħbtu ħabta u sabta. Diversi drabi f’sitwazzjonijiet li fihom wieħed ma jifhimx għala sab ruħu f’pożizzjoni fejn qiegħed isofri inġustizzji. Imma jifhem li għandu jibda proċess ta’ fejqan lura.

Hemm direzzjoni

2. Fir-realtà, iktar ma jgħaddi żmien iktar wieħed jifhem li hemm dawl ta’ għerf uman mibni sija fuq snin ta’ esperjenzi umani, kif ukoll ta’ tagħlim. Hemm formazzjoni personali unika li tingħata lill-oħrajn bl-iktar mod miftuħ u attent. Tmur meta tmur f’kunvent issib għaddejja kontinwament attività għas-sewwa. Hemm direzzjonijiet li tista’ taqbad għalik innifsek bil-pariri tagħhom. Dawk indikati sabiex tagħmel ħajtek aħjar. Waħda iktar rilevanti u li tagħtik iktar dożi tajba fl-iskop u s-sens tal-ħajja. Ħafna bnedmin isibu ruħhom jgħaddu minn ħafna fil-ħajja mingħajr ma jifhmu dak li qed iġarrbu u li fil-fatt, minkejja dan, jistgħu jgħixu aħjar. Proċess xejn faċli, iktar u iktar fis-soċjetà tagħna li qegħda tnessi u twarrab dan l-għerf li ġie għalina fis-sekli ta’ esperjenza.

Anselm Grum (1945)

3. Ġie aktar dan f’kitbet dan il-bniedem. Dan il-patri Benedittin Ġermaniż, li din is-sena għalaq tmenin sena. Persuna mimlija għerf, esperjenza umana u reliġjuża. Wieħed li kiteb diversi kotba mill-isbaħ u mimlija b’riflessjonijiet sbieħ. Ilkoll fil-lingwa Tedeska fl-oriġinali biss, li jien irnexxieli nsib u naqra fit-traduzzjoni bl-Ingliż. Għalkemm huwa magħruf tant li l-kotba tiegħu nqalbu f’ħamsa u sittin lingwa oħra. Bniedem li minn meta kellu dsatax-il sena għex ħajtu fl-Abbazija ta’ Munstershwarzah, ħdejn Wurzburg, apparentement maqtugħ mid-dinja, imma fil-fatt kitbietu juru l-kontra. Kellu l-kariga ta’ ‘cellarer’, il-bniedem li naħseb li bħall-gwardjan tagħna jieħu ħsieb l-amministrazzjoni tal-abbazija. Li jara l-bżonnijiet tal-bnedmin u dak kollu li jinsab hemm biex jiġi kkurat u meħud fl-attenzjoni umana li jixraq. Ospitalità li dawk li jgħixu hemm u dawk li jmorru jinvistaw u jqattgħu ftit jiem miġbura fit-talb fis-sejħa sabiex ħajjithom tkun aħjar.

Ktieb interessanti

4. Fl-aħjar tiegħu kellu taħtu madwar tlett mitt impjegat u persuni li kien responsabbli għalihom. F’dan proprju sibt li kiteb ktieb speċjali flimkien ma’ Jochen Zeitz (1963), li għalkemm illum huwa s-CEO tal-Harley Davidson, dak iż-żmien kien manager mad-ditta PUMA. It-titolu, li jgħid ħafna dwaru, huwa: The Manager and the Monk (A discourse on Prayer, Profit and Principles (2010). Fih hemm riflessjonijiet mill-isbaħ dwar ħidmiethom it-tnejn fl-amministrazzjoni u fit-teħid tad-deċiżjonijiet li kull organizzazzjoni kbira titlob biex tibqa’ għaddejja. Id-diversi bnedmin li jinsabu fin-negozju jew segwaċi tal-management ma jagħmlux ħażin li jixtruh u jaqrawh, u jien ċert li minnu jitgħallmu ħafna. Direzzjonijiet u riflessjonijiet sbieħ li jqegħdu f’perspettivi differenti dak li bnedmin bħal Peter Drucker (1909-2025) qalu u kitbu.

X’jgħidu

5. Flimkien, huma jgħidu ħafna, imma fost oħrajn u indikattiv hekk fil-bidu: “We were aware that the missions and goals of our organizations and our lifestyles were worlds apart; this is exactly what drew us together. As people – and as authors – we were initially surprised and intrigued to find that there is more that unites us that divides us. We both wish to protect the environment, improve society, and employ sustainable methods, both within our ‘companies’ and beyond. As managers, we must learn to conduct business without harming people or the environment. As spiritual beings, we look for ways to find ourselves and create more unity without losing sight of the need for efficient management.” (Għarafna li l-missjonijiet u l-għanijiet tal-organizzazzjonijiet u l-istil ta’ kif ngħixu kienu differenti ħafna minn xulxin; u kien proprju dan li ġiebna flimkien. Bħala bnedmin, u kittieba, fil-bidu konna sorpriżi u nteressati meta sibna li kien hemm ferm iktar x’jgħaqqadna milli jifridna. It-tnejn nixtiequ nipproteġu l-ambjent, naħdmu għal soċjetà aħjar u nużaw metodi sostenibbli, kemm fil-‘kumpanniji’ tagħna u iktar. Bħala managers għandna nitgħallmu mmexxu l-ħidma tagħna mingħajr ma nagħmlu ħsara lill-bnedmin u lill-ambjent. Bħala bnedmin spiritwali nfittxu toroq li permezz tagħhom insibu lilna nfusna u noħolqu iktar unità mingħajr ma nneħħu l-ħarsa tagħna minn fuq il-bżonn li jkollna immaniġġjar effiċjenti).

Inqalbu

6. It-tnejn imxew iktar ’il quddiem għaliex Zeitz mar jgħix għal xi żmien fl-Abbazija: “... where he was able to find peace and see his world from a different point of view and where many things fell into perspective.” (... fejn seta’ jsib il-paċi u jara d-dinja minn lenti differenti u fejn diversi ħwejjeġ ġew fil-perspettiva korretta tagħhom.) Mentri Grum mar fil-kumpannija PUMA jifhem kif taħdem, espost għad-dinja tal-kummerċ fil-kumplessità tagħha. Il-ktieb fil-fatt jiftaħ orizzonti ġodda, u fl-istess waqt jipprova l-argument li bdejt bih. Il-bnedmin fil-kunventi huma mimlija b’abbiltajiet li mhumiex evidenti, salv għal dawk li jiltaqgħu magħhom. Hemm minn jikkundanna, jiddisprezza u ma jikkunsidrahomx, mentri fil-fatt, hemm dawl mill-isbaħ.

Finali

7. Wara ħafna diskussjonijiet mill-isbaħ, fi kliem Grun, il-ktieb jagħlaq hekk: “Mr Zeitz, you and I are stamped by this hope in the same way. We see the world realistically, but we refuse to look at it with dark glasses. We see it through the glasses of confidence and hope.” (Sur Zeitz, int u jien ninsabu magħġuna l-istess f’din it-tama. Naraw id-dinja b’mod realistiku imma nirrifjutaw li nħarsu lejha minn wara lenti skura u sewda. Narawha mil-lenti ta’ kunfidenza u tama.) Id-dinja ta’ madwarna għandha bżonn tikber fit-tama u tagħmel kuraġġ. Hemm triq ’il quddiem li għandna nieħdu sabiex ikollna dinja aħjar. Waħda li dawk fil-kunventi kapaċi jagħtuna ferm iktar milli naħsbu. Dan għax fil-kunventi hemm id-dawl.

ĦAL TARXIEN - TRIQ L-ISQAJJAQ

29441. L-ONOR. CARMELO MIFSUD BONNICI  staqsa lill- Ministru għall-Kultura, l-Artijiet u l-Gvern Lokali: Jista’ l-Ministru jwieġeb il-mistoqsija parlamentari 29298 u ċjoè: B’referenza għat-tweġiba tal-mistoqsija parlamentari 26886 dwar kemm ilha ma tiġi miżbugħa ż-Zebra Crossing li hemm fi Triq l-Isqajjaq, f’Ħal Tarxien, jista’ l-Ministru jgħid jekk ix-xogħol ġiex esegwit?

 

26/06/2025

 

ONOR. OWEN BONNICI:  Ninsab infurmat mill-Kunsill Lokali ta’ Ħal Tarxien li l-marki imsemmija ġew miżbugħa tliet xhur ilu.

 

Seduta  361

30/06/2025

BORMLA - PJAZZA GAVINO GULIA - TISWIJA TA’ ĊANGATURA

29440. L-ONOR. CARMELO MIFSUD BONNICI  staqsa lill- Ministru għall-Kultura, l-Artijiet u l-Gvern Lokali: Jista’ l-Ministru jwieġeb il-mistoqsija parlamentari 29297 u ċjoè: B’referenza għat-tweġiba tal-mistoqsija parlamentari 26963 dwar jekk huwiex possibbli li ċ-ċangatura fi Pjazza Gavino Gulia f’Bormla tissewwa qabel il-purċissjoni tal-Irxoxt, jista’ l-Ministru jgħid jekk ġiex stabbilit programm tax-xogħol billi l-istess sejra iktar lura?

 

26/06/2025

 

ONOR. OWEN BONNICI:  Ninsab infurmat mill-Kunsill Lokali ta’ Bormla li fil-bidu ta’ Ġunju saret żjara fuq il-post flimkien mad-Direttur Ġenerali u l-perit mid-Dipartiment tax-Xogħlijiet Pubbliċi, fejn ġew diskussi l-problemi relatati mal-ħsarat fiċ-ċangatura. Se jsiru xi testijiet sabiex tiġi determinata l-firxa tal-problema u jiġu identifikati s-soluzzjonijiet possibbli.

 

Seduta  361

30/06/2025

ĦAL GĦAXAQ - SERVIZZI OFFRUTI FIL-BERĠA

29306. L-ONOR. CARMELO MIFSUD BONNICI  staqsa lill- Ministru għas-Saħħa u l-Anzjanità Attiva: Jista’ l-Ministru jwieġeb i-mistoqsija parlamentari 28921 fl-intier tagħha u jgħid x’servizzi huma offruti fil-Klinika fil-Komunità (Berġa) f’Ħal Għaxaq u jekk dawn humiex ser jiżdiedu?

 

20/06/2025

 

ONOR. JO ETIENNE ABELA:  Ninforma lill-Onor. Interpellant li fil-Klinika tal-Komunità (Berġa) f’Ħal Għaxaq qed jiġu offruti diversi servizzi primarji importanti, fosthom dawk ta’ Tabib tal-Familja, tal-Infermiera, tal-Fiżjoterapija, Podjatrija u tal-Patoloġija tal-Lingwa Mitkellma.

 

Seduta  361

30/06/2025

MARSAXLOKK - SERVIZZI OFFRUTI FIL-BERĠA

29305. L-ONOR. CARMELO MIFSUD BONNICI  staqsa lill- Ministru għas-Saħħa u l-Anzjanità Attiva: Jista’ l-Ministru jwieġeb i-mistoqsija parlamentari 28920 fl-intier tagħha u jgħid x’servizzi huma offruti fil-Klinika fil-Komunità (Berġa) f’Marsaxlokk u jekk dawn humiex ser jiżdiedu?

 

20/06/2025

 

ONOR. JO ETIENNE ABELA:  Ninforma lill-Onor. Interpellant li fil-Klinika tal-Komunità (Berġa) f’Marsaxlokk qed jiġu offruti diversi servizzi primarji importanti, fosthom dawk ta’ Tabib tal-Familja, tal-Infermiera, tad-Dijetetista, tal-Fiżjoterapija, Podjatrija, Patoloġija tal-Lingwa Mitkellma, il-Psikoloġija u servizz ta’ tneħħid tad-demm. Id-Dipartiment tal-Kura Primarja joffri ukoll klinika speċjalizzata Ġenito-Urinarja kif ukoll klinika għall-Mard Kroniku tal-Kliewi.

Barra min hekk, din il-Klinika fil-Komunità tagħti spazju għal-servizzi sekondarji ta’ Newroloġija u klinika għat-Tfal u l-Adoloxxenti (mid-Dipartiment għas-Saħħa Mentali).

 

Seduta  361

30/06/2025

IŻ-ŻEJTUN - SERVIZZI OFFRUTI FIL-BERĠA

29304. L-ONOR. CARMELO MIFSUD BONNICI  staqsa lill- Ministru għas-Saħħa u l-Anzjanità Attiva: Jista’ l-Ministru jwieġeb i-mistoqsija parlamentari 28919 fl-intier tagħha u jgħid x’servizzi huma offruti fil-Klinika fil-Komunità (Berġa) fiż-Żejtun u jekk dawn humiex ser jiżdiedu?

 

20/06/2025

 

ONOR. JO ETIENNE ABELA:  Ninforma lill-Onor. Interpellant li fil-Klinika tal-Komunità (Berġa) fiż-Żejtun qed jiġu offruti diversi servizzi primarji importanti, fosthom dawk ta’ Tabib tal-Familja, tal-Infermiera, tal-Fiżjoterapija, Podjatrija, Patoloġija tal-Lingwa Mitkellma, in-Nutrizzjonista u il-Psikoloġija.

 

Seduta  361

30/06/2025

WIED IL-GĦAJN - BERĠA - SERVIZZI OFFRUTI

29303. L-ONOR. CARMELO MIFSUD BONNICI  staqsa lill- Ministru għas-Saħħa u l-Anzjanità Attiva: Jista’ l-Ministru jwieġeb i-mistoqsija parlamentari 28918 fl-intier tagħha u jgħid x’servizzi huma offruti fil-Klinika fil-Komunità (Berġa) f’Wied il-Għajn u jekk dawn humiex ser jiżdiedu?

 

20/06/2025

 

ONOR. JO ETIENNE ABELA:  Ninforma lill-Onor. Interpellant li fil-Klinika tal-Komunità (Berġa) f’Wied il-Għajn qed jiġu offruti diversi servizzi primarji importanti, fosthom dawk ta’ Tabib tal-Familja, tal-Infermiera, tal-Fiżjoterapija, Podjatrija, Patoloġija tal-Lingwa Mitkellma u servizz ta’ tneħħid tad-demm.

 

Seduta  361

30/06/2025