KUMMISSJONI GĦOLJA TA’ MALTA FIL-KANADA - ĦIDMA

25955. L-ONOR. CARMELO MIFSUD BONNICI  staqsa lid- Deputat Prim Ministru u Ministru għall-Affarijiet Barranin u t-Turiżmu: Jista’ d-Deputat Prim Ministru u Ministru għall-Affarijiet Barranin u t-Turiżmu jgħid x’ħidma saret mill-Kummissjoni Għolja ta’ pajjiżna fil-Kanada minn meta nfetħet sal-aħħar ta’ Diċembru 2024?

 

26/02/2025

 

ONOR. IAN BORG:  Ninforma lill-Onor. Interpellant illi l-Kummissjoni Għolja ta’ Malta f’Ottawa ġewwa l-Kanada għaddejja mill-fażi inizjali tagħha. Il-Kummissarju Għoli Dr. Mark Pace ippreżenta l-kredenzjali tiegħu f’April li għadda. Għaddejja ħidma sħiħa biex jiġu stabbiliti l-funzjonijiet amministrattivi meħtieġa sabiex il-Kummissjoni Għolja tkun tista’ topera bis-sħiħ.

Bħala titjib fir-relazzjonijiet bilaterali ta’ bejn Malta u l-Kanada saru diversi laqgħat introduttorji mal-awtoritajiet lokali. Il-Kanadiżi urew interess partikolari fl-irwol ta’ Malta f’organizzazzjonijiet multilaterali, bħall-Presidenza Maltija fil-Grupp ta’ Azzjoni Ministerjali fil-Commonwealth (Commonwealth Ministerial Action Group, CMAG), kif ukoll sabiex jibdew sensiela ta’ konsultazzjonijiet politiċi (Political Consultations).

Il-Kummissjoni Għolja stabbilixxiet kuntatti ma’ Membri tal-House of Commons u s-Senat u bħalissa għaddejjin diskussjonijiet għat-twaqqif ta’ Grupp ta’ Ħbiberija Parlamentari Kanadiż-Malti (Maltese-Canadian Parliamentary Friendship Group) bl-appoġġ ta’ Deputati Kanadiżi ta’ nisel Malti.

Il-Kummissjoni Għolja qiegħda tikkopera ukoll mal-Malta Enterprise u mal-Kamra tal-Kummerċ ta’ Malta dwar it-tfassil ta’ strateġija għal relazzjoni bilaterali aktar b’saħħitha fl-isfera ekonomika. Qed tikkopera ukoll mal-Awtorita’ Maltija tat-Turiżmu sabiex tfakkar is-sittin sena anniversarju tal-Indipendenza ta’ Malta kif ukoll minn meta ġew stabbiliti r-relazzjonijiet bilaterali bejn Malta u l-Kanada.

Minn dan l-aspett, il-Kummisjoni Għolja qiegħda tagħti prijorita’ kbira lid-dijaspora Maltija. Ta’ min ifakkar li l-Kanada tospita t-tieni l-akbar komunita’ ta’ Maltin li jgħixu barra minn xtutna. Il-Kummissjoni għenet ukoll fl-identifikazzjoni tal-membri Kanadiżi fil-Kumitat tal-Maltin li jgħixu barra minn Malta. Barra minn hekk, il-Kummissjoni nediet ukoll għaqda informali ta’ professjonisti, akkademiċi u artisti Kanadiżi-Maltin li jiltaqgħu għal laqgħat regolari, bil-għan li trawwem kuntatti bejn in-nies, skambji ekonomiċi u edukattivi. Ġew stabbiliti ukoll kuntatti ma’ Universita’ ġewwa Ottawa u qed isiru l-preparamenti għall-ewwel diskussjonijiet ma’ tliet fakultajiet ġewwa l-Università ta’ Malta.

 

Seduta  322

12/03/2025