1.
Dak li ġara l-bieraħ (il-gimgha) huwa eżempju ta’ kif m’għandekx
taġixxi fil-politika. Id-deċiżjoni
żbaljata li ħa xi ħadd fil-Partit Laburista hija tant gravi li, żgur mhux
forsi, ser ikollha effett fuq l-elettorat Malti u Għawdxi. Dak l-elettorat li huwa moderat iħares ‘il
quddiem u kapaċi jgħarbel dak li huwa għaddej.
Meta partit, flok jassoċja ruħu mar-raġuni jassoċja ruħu mal-kontra,
ikun qiegħed jitlef mill-forom ta’ kredenzjali li jista’ jkollu. F’kelma waħda: għidli ma’ min tagħmilha u
ngħidlek x’int. Il-kumpannija li tkossok
komdu magħha, kif ħassejtek hekk u tivvota magħha darbtejn kontra s-sewwa,
titkellem waħedha għalik.
2.
Ngħid dan għax din kienet ġimgħa mqanqla sew. L-imġieba żbaljata ta’ ċerti membri
tal-Ġudikatura reġgħet ġibdet l-attenzjoni tal-pajjiż. Il-ħidma kordinata tal-forza tal-ordni ħarġet
ir-riżultati tagħha fil-beraħ. Ħaqqha
għal darb’oħra prosit. Kien ikun żball
politiku oħxon li kieku l-Gvern sema’ minn min irid li l-awtorizzazzjoni għat-tapping tat-telefonati ma jsirx, kif qed
isir, mill-Prim Ministru imma minn xi membru tal-Ġudikatura. Għax nafu li, sfortunatament, hemm min hu kapaċi
jibqa’ jżomm id-dinjità u l-pożizzjoni, u hemm min le. It-tentazzjonijiet jiġu fuq kull
persuna. Biss, dawk li għandhom il-poter
demokratiku fil-Ġudikatura, fil-Leġislattiv u fl-Eżekuttiv jafu li huma f’mira
aqwa. Nittama li dawk li b’xi mod ħadu għalihom
fil-passat għax żammejt din il-linja fil-ħidma tiegħi, jifhmu iktar.
3.
L-istituzzjonijiet demokratiċi f’pajjiżna, fil-maġġoranza
tagħhom, huma tajba u m’għandhomx bżonn ta’ riformi radikali jew faxxisti. Iridu jiġu mħaddma kif suppost u rfinati,
mhux imħarbta. L-aġir ta’ persuna
fl-istituzzjonijiet, anke fil-Ġudikatura, għandhom ikunu dejjem
demokratiċi. F’isem il-poplu u mhux b’xi
forma ta’ dritt divin jew dittatorjali.
Fejn kull persuna tifhem li hija għodda għat-tħaddim tal-liġi, u
għalhekk marbuta mal-liġi, sija fil-kelma tagħħha kif ukoll fl-ispirtu. Għamilt diversi sforzi sabiex dan il-messaġġ
jasal u ktibt numru ta’ artikoli f’kemm ilni nirrappreżenta lill-poplu, proprju
għax nara li kull persuna tifhem li hija strument tal-liġi sabiex tamministra l-ġustizzja.
4.
Minkejja dak li seħħ, jibqa’ jkolli fiduċja
fil-maġġoranza tal-membri tal-Ġudikatura.
Ikun żball jekk naslu għal xi konklużjoni kuntrarja. Hemm ħafna bnedmin ta’ rieda tajba, li jaħdmu
ħafna, li huma onesti u li jżommu posthom u jamministraw il-ġustizzja kif
jixirqilha. Kont naf dan meta kont
fl-Eżekuttiv, u kkonfermajtu ferm iktar issa li qiegħed lura
fil-professjoni. Biss, hemm bżonn
makkinarju intern ħafna iktar b’saħħtu li bih il-Ġudikatura twettaq dixxiplina
interna fuqha nfisha. Korrezzjonijiet
fil-bidu għax hemm diġà dan il-poter intern.
Għad hemm eżempji ta’ min jibqa’ jġib ruħu ħażin. Għalhekk hemm bżonn ta’ ħidma ulterjuri, imma
li hija bis-sens, u mhux sempliċement reazzjonarja.
5.
Hemm żewġ toroq li ppruvajt nutilizza: f’waħda
rnexxieli u fit-tieni sibt ostakoli varji minkejja l-isforzi differenti
tiegħi. Dan, l-ewwel, billi tissoda
iktar il-poter intern tal-Prim Imħallef, li kont diġà wettaqt b’passi kbar
fl-2007. Biss, għalija, hemm lok għal
iktar issudar. Sfortunatament,
għar-raġunijiet tagħha, l-Oppożizzjoni tul din il-leġislatura tkellmet diversi
drabi li hija tant kontra dawn il-poteri, u li anzi, trid tneħħihom. Kull Qorti Ewropea għaddiet minn dan
il-proċess għall-aħjar u li jrid ikompli jsir.
It-tieni, li sija fil-Kummissjoni tal-Amministrazzjoni nfisha, kif ukoll
barra, ikun hemm qbil kostituzzjonali neċessarju għal tibdil. Min qiegħed involut fil-Kummissjoni u
fil-Ġudikatura jrid jifhem li dawn il-linji huma inevitabbli u jridu jkunu huma
promoturi u parti minnhom.
6.
Il-pajjiż tagħna huwa wieħed demokratiku fejn hemm
is-saltna tad-dritt. Kull persuna hija
suġġett għal dan u ħadd ma jista’, b’xi mod, jaħrab minnha. Fl-aħħar mill-aħħar, hija kwistjoni ta’
prinċipju. Kif kien qal John F. Kennedy:
“Our country is founded on the principle
that observance of the law is the eternal safeguard of liberty and defiance of
the law is the surest road to tyranny.”
Aħna, bħala demokristjani, dejjem nemmnu fil-bniedem, fid-djalogu bħala
strument li jwassal għal deċiżjonijiet tajba u bnejna Stat li l-liġijiet tiegħu
jirrispettaw din il-linja. Ma nistgħux
naqblu, għalhekk, ma’ min irid jimponi bil-forza fuq l-oħrajn u min huwa
segwaċi tal-lemin estrem. L-inċidenti
ta’ dawn il-jiem juru dejjem iktar kemm il-Partit Nazzjonalista baqa’ wieħed
moderat, progressiv u verament demokratiku, li lest li jaħdem għas-sewwa u
l-ġustizzja. Kif għidt: hija fl-aħħar
mill-aħħar, kwistjoni ta’ prinċipju.
No comments:
Post a Comment