Ġustizzja soċjali fit-teknoloġija

1.    F’dawn l-aħħar għaxar snin, pajjiżna għamel qabżiet kbar fit-teknoloġija moderna.  Filwaqt li kellna l-iżvantaġġi ta’ Stat li ma kienx jippermetti d-dħul tal-kompjuters u allura tlaqna fuq passi li kienu żammewna lura, għaddejna malajr sabiex inkunu minn ta’ quddiem.  L-investiment li sar f’din id-direzzjoni mill-Gvern għall-ġid komuni serva u qiegħed ikompli jagħti l-frott.  It-teknoloġija moderna mhux talli ma naqqsitx mix-xogħol, mill-postijiet tal-ħaddiema, talli serviet sabiex tkattarhom u tissudahom.  Permezz tal-viżjoni kostatement avvanzata tagħna ġibna iktar investiment u assigurajna t-tisħiħ tas-settur ekonomiku ta’ pajjiżna.

2.    Il-fatt li m’aħniex lura imma avvanzati sew ġie utli ħafna.  Diversi servizzi, organizzazzjonijiet u kumpanniji ġew f’dawn il-gżejjer proprju għax m’għandhomx problemi marbuta ma’ dan is-settur.  Illum it-teknoloġija hija mezz ta’ komunikazzjoni, però l-iktar ta’ informazzjoni u aċċessibilità.  Il-kamp ekonomiku ħa gwadann u jekk nibqgħu b’din il-linja politika allura, żgur mhux forsi, ser nimxu.  Biss qiegħed jagħmel ġid ukoll f’settur li, ħamsa u għoxrin sena ilu, ħadd ma kien jimmaġinah.

3.    Biss, il-ftuħ tal-fruntieri li qabel kien hemm sabiex dawn l-apparati moderni ma jidħlux f’pajjiżna ma ssarfux f’politika elitista.  Il-Gvern ħa ħsieb li ma jagħmilx restrizzjonijiet u għalhekk din it-teknoloġija ma baqgħetx f’idejn il-korporazzjonijiet kbar jew persuni li għandhom il-mezzi.  Il-prinċipju li nżamm kostantement kien dak li għandu jkun hemm tixrid lill-klassijiet kollha tas-soċjetà.  Ħadna ħsieb li nimplimentaw l-interklassiżmu hawn ukoll.  Illum il-ġurnata, kważi f’kull familja, speċjalment fejn hemm it-tfal, hemm ukoll kompjuter li jintuża.

4.    Ħaddanna hawn ukoll il-prinċipju tal-ġustizzja soċjali.  Assigurajna b’mezzi varji li ngħaddu dan l-apparat aktar faċilment.  Mhux biss, imma b’kollaborazzjoni soċjali, speċjalment mill-Kunsilli Lokali, ixxerred aħjar l-użu intelliġenti tiegħu lil kull persuna, hi x’inhi l-età tagħha.  Seħħet ukoll politika inter-ġenerazzjonali li biha llum persuni ta’ kull età jistgħu jitgħallmu u jagħmlu użu intelliġenti minnha.  It-teknoloġija hija llum mezz għal kull persuna biex tuża l-istrumenti soċjali għall-bżonnijiet tagħha.

5.    Il-Ġimgħa kont preżenti għall-attività tal-kumpannija kummerċjali TCTC flimkien mal-Kunsilli Lokali, u stajt nara kemm din ir-rabta soċjali u kummerċjali qegħda taħdem.  Id-diversi programmi li saru juru li sar avvanz kbir fis-soċjetà.  Għarfien ta’ kif taħdem is-sistema, kif tista’ tkun ta’ benefiċċju ta’ veru.  L-impenn, il-viżjoni tagħna huma proprju fuq din il-linja.  Illum hija għodda li għandha tkun aċċessibbli għas-soċjetà kollha.  Strument ta’ twettiq ta’ ġustizzja soċjali sabiex ebda persuna ma tkun żvantaġġjata.  Jekk trid, qegħdin għad-dispożizzjoni tiegħek u fl-istess ħin hemm faċilità kbira fl-użu.

6.    It-teknoloġija moderna fiha l-vantaġġi u l-iżvantaġġi fid-dinja soċjali.  Għalhekk għażilna li ma nħalluhiex żiemel sfrattat imma assigurajna, b’numru ta’ reati ġodda u emendi, li l-użu ħażin tagħha m’għandux jiġi permess.  Min jużaha bħala strument għat-tixrid tal-pornografija, inkella sabiex jissolleċita għal skopijiet simili għandu liġijiet iebsa warajh.  F’dan ir-rigward, il-Korp tal-Pulizija f’dawn is-snin bena fi ħdanu esperjenza u teknika biex iservi bħala difiża, speċjalment għal min huwa l-iktar vulnerabbli: uliedna.

7.    It-teknoloġija tal-lum u ta’ għada għandha tibqa’ waħda li tasal għand il-poplu.  Tasal għandu mingħajr limitazzjonijiet u b’ġustizzja soċjali.  Għalhekk, mingħajr din il-viżjoni, pajjiżna jkun qiegħed jitlef.  It-tessut demokratiku tagħna jkun qiegħed imur lura.  Ikun żball politiku li wieħed, f’xi mument, jippermetti li mmorru lura minn dan.  Għalhekk, kif konna, għandna nkomplu nibqgħu ninvestu u naħdmu f’din id-direzzjoni biex din l-għodda nkomplu nsarrfuha għall-ġid tal-poplu ekonomikament, soċjalment u demokratikament.

Il-Ġustizzja Soċjali f’Ħidmitna

1.    Tul il-ġimgħa, il-Prim Ministru għamel sew li ressaq għal għajnejn il-poplu l-erba’ snin ta’ ħidma li twettqet minn dan it-tieni Gvern immexxi minnu.  Il-figuri, iċ-ċifri, ir-riżultati hemm qegħdin.  Jidhru quddiem kull min huwa interessat li jsir jafhom.  Tant hemm punti validi, li hemm bżonn li jaslu għand in-nies, ġewwa djarhom, fil-kċejjen tagħhom.  Hemm min ser jaqrahom, hemm min le, però dawk li jgħarfuhom ser jagħtu kredtu għax-xogħol li sar. Il-Gvern ħadem iktar minn qabel proprju għax fehem li jekk dan ma jsirx, il-pajjiż tagħna jmur lura. Għalhekk hemm kuntrasti li jsiru bejnna li ħdima, u l-Oppożizzjoni li ma għamlet xejn, salv li tikkritika inġustament. Titkellem qisu kull jum fuq il-bank ta’ quddiem il-każini tagħhom, mingħajr proposti veri. Proposti li jistgħu b’xi mod jitħaddmu.  Dan deher iktar evidenti għax waqt li l-Prim Ministru kien qiegħed jispega x’sar, fl-istess jum il-Kap tal-Oppożizzjoni ħareġ imaqdar jikkundanna u jcċekken.

2.    Kull gvern ikollu s-sodisfazzjonijiet u d-diżappunti tiegħu.  Ma jistax iħares lejn tal-ewwel mingħajr ma jikkunsidra t-tieni.  Hemm punti li twettqu, u huma ħafna, però hemm oħrajn inqas fin-numru li ma sarux.  Il-Prim Ministru huwa konxju minn dan il-bilanċ.  Fil-kalatura ta’ dak li sar, hemm ħafna ndikazzjoni mill-iktar evidenti ta’ impenn u bżulija.  Ħadd ma jista’, b’xi mod, jgħid li ma għamilniex kemm flaħna.  Kienu u jibqgħu erba’ snin li permezz tagħhom inbidlu u ġew riformati numru ta’ setturi li minnhom il-pajjiż qiegħed jieħu benefiċċju immedjat u ser jieħu aktar iktar ‘il quddiem. Biss jibqa dejjem dak li ghad jrid jsir. Dak li għadna naħdmu għalih.

3.    Dak li sar għamilnieh għall-ġid tal-bnedmin, tas-soċjetà li ngħixu fiha u mhux biex sempliċement ngħidu li saru.  Fil-konsiderazzjonijiet żammejna kontinwament li dak li qed nagħmlu qed isir għalina lkoll, għas-socjetà.  Kien hawn min pinġiena bħala persuni li jamministraw u jiddeċiedu mingħajr qalb.  Dan ma huwa minnu xejn.  Il-konsiderazzjoni prinċipali u kontinwa kienet u għadha dik li naraw li l-pajjiż jibqa’ jimxi ‘l quddiem u li nassiguraw li kull parti mis-soċjetà tiġi kkurata u effettwata negattivament fl-inqas mod possibbli.  Ma kienx, u mhux dejjem possibbli, speċjalment f’dak li hu marbut mal-ispejjeż marbuta mas-servizzi li qabel konna mdorrijin inħallsu f’ammonti iżgħar.

4.    Il-Gvern żamm lilu nnifsu viċin il-poplu.  Ma qagħadx ‘il bogħod, imma baqa’ jisma’ u jara.  Huwa magħruf li, minkejja kull xewqa ta’ min jieħu d-deċiżjonijiet, xorta jkollok effetti negattivi.  Tagħmel għal dak li taħseb li huwa l-aħjar, iżda ma jfissirx li dak li taħseb jkun effettivament hekk.  L-esperjenza politika tkabbarlek dejjem iktar il-kawtela u l-attenzjoni.  Kull soċjetà, nagħmlu x’nagħmlu, tgħaddi minn fażijiet differenti.  Jinbidlu dawk li jbatu.  Il-kategoriji ta’ dawk li huma l-inqas fis-soċjetà, ta’ dawk li jinqabdu f’sitwazzjonijiet partikolari, jduru.  Għalhekk tajjeb li naraw il-ħin kollu kif dak li hu għaddej nindirizzawh.  Jekk hemm min m’għadux ikampa minħabba żidiet, tibdiliet fiċ-ċirkostanzi, l-iskemi rridu narawhom u nindirizzawhom.

5.    Jekk xi ħadd jimmaġina li dan il-Gvern inqata’ mir-realtà, qiegħed jiżbalja.  It-tmexxija tal-lum tħares, b’mod partikolari, għal min huwa ‘l isfel.  Trid tassigura li tagħtih l-assistenza neċessarja.  Kull min jersaq b’ideat, direzzjonijiet, bħal ma għamlet reċentement il-Caritas, aħna nibqgħu narawhom sabiex nagħmlu dak li hu sewwa.  Nieħdu u neżaminaw sewwa dak li qed jingħad sabiex nindirizzaw dejjem aħjar dak li ċittadini varji jsibu jew jistgħu jsibu ruħhom fih.  Ir-riżultati li wieħed jilħaq jibqgħu tajba sakemm ikollhom il-viżjoni tagħna tal-ġustizzja soċjali.  M’aħniex segwaċi ta’ dawk li jħarsu lejn is-soċjetà mil-lenti tal-liberaliżmu ekonomiku selvaġġ li jikkundanna lil min huwa minn taħt b’awto-responsabbiltà. 

6.    Il-problema prinċipali ta’ kif issir l-politika fis-soċjetà tal-lum hija marbuta mal-fatt li din qegħda tħares lejn l-immaġini u l-perċezzjoni iktar mis-sustanza tal-affarijiet.  Is-sustanza, il-formazzjoni u l-preparazzjoni tal-politiku niżlu ‘l isfel sew.  Il-vuċijiet ta’ dawk li jħarsu biss lejn kif jidhru meta jgħidu xi ħaġa qed jiżdiedu u qed jaqtgħu ruħhom kompletament minn jekk kemm-il darba dak li qalu huwiex tajjeb jew le.  Proprosta tista’ tidher sabiħa u aċċettabbli, però għall-ġid tal-poplu huwa iktar importanti li dak li twettaq ikun ibbażat fuq valuri tajba u li, minnhom infushom, jagħmlu l-ġid.  Il-ħidma politika hija fit-triq it-tajba meta tassigura li dak li qed isir minnha qed iġib fis-seħħ pedamenti sodi.  Tassigura l-Ġustizzja Soċjali li hija neċessarja mhux biss fil-ħidma li ma tiqafx, imma fit-tiftix kostanti li wieħed jagħmel verament is-sewwa u mhux sempliċement jidher li qed jagħmel dan.

Fis-settur tal-Immigrazzjoni

1.    Is-settur tal-immigrazzjoni irregolari kien, għadu u ser jibqa’ wieħed mill-iktar impenjattivi għal dan il-Gvern u għal kull wieħed ieħor li jiġi warajh.  F’dawn l-erba’ snin li sibtni rrid naffronta l-kumplessitajiet li jitwieldu minn dan il-fenomenu tgħallimt u nibqa’ kuljum nitgħallem.  Tul din il-leġislatura kellna, għall-ewwel darba, Ministeru wieħed responsabbli mill-immigrazzjoni u ma baqax aktar maqsum.  Deċiżjoni tajba għax ippermettiet li jsir xogħol b’ferm iktar attenzjoni u kollaborazzjoni.  Illum, jekk inħares lura, żgur mhux forsi nara numru ta’ punti li avvanzajna fihom għall-ġid ta’ dawn il-persuni umani u tal-poplu tagħna.

2.    Mill-bidu tal-leġislatura fhimt li kellna l-vantaġġ tas-sħubija tagħna fl-Unjoni Ewropea, li stajna nressquha għal deċiżjonijiet aktar effettivi.  Deċiżjonijiet inċiżivi għal dawn il-gżejjer u għall-Ewropa kollha kemm hi.  Fit-tieni sitt xhur tal-2008 daħlet il-Presidenza Franċiża, pajjiż kbir Mediterranju u fl-istess ħin b’saħħa kbira fl-Unjoni Ewropea, li din mexxiet ‘il quddiem proċess li wassal lejn id-dokument finali tal-Patt tal-Immigrazzjoni u l-Ażil.  Fid-diversi punti pożittivi li kien hemm, u li wħud minnhom daħlu proprju fuq l-insistenza tagħna, kien hemm partikolarment tlieta.  L-ewwel: id-dħul ta’ klawsola ta’ solidarjetà; it-tieni: it-twaqqif ta’ uffiċċju magħruf bħala l-Uffiċċju Ewropew għas-Sostenn fil-Qasam tal-Ażil (EASO); u t-tielet li niffukaw fuq ir-ripatriju ta’ min ġie hawn illegalment u li għalhekk ma kienx ħaqqu protezzjoni.

3.    Minn dak id-dokument imxejna ‘l quddiem.  B’ħidmitna żammejna dan is-suġġett għoli fuq l-aġenda ta’ kull Presidenza Ewropea li ġiet wara.  Saru numru ta’ dokumenti importanti, fosthom dak ta’ Stokkolma u issa reċentement dak taħt din il-Presidenza Daniża fejn dħalna ferm iktar fil-fond fis-suġġett, inkluż b’mod iktar dirett kif tista’ sseħħ is-solidarjetà mal-Membri, huma min huma, u huwa x’inhuwa s-settur fl-immigrazzjoni.  Mhux biss, imma l-Uffiċċju Ewropew għas-Sostenn fil-Qasam tal-Ażil ġie mwaqqaf u diġà qiegħed jiffunzjona f’pajjiżna.  Ma’ dan irnexxielna nħaddmu mekkaniżmu ta’ solidarjetà li permezz tiegħu numru ta’ pajjiżi fl-Unjoni Ewropea addottaw persuni li waslu għandna u li ngħatatilhom protezzjoni.

4.    Iċ-Ċentri tagħna li kienu kkiritikati daqqa ġustament u daqqa inġustament għaddejna minn proċessi varji sabiex inkunu nistgħu nżommuhom fi stat tajjeb u nippruvaw nissudawhom.  Dan ma kien faċli xejn.  Biss ħadna d-deċiżjoni li dawn ikunu miftuħa għall-iskrutinju tal-opinjoni pubblika.  Kien u jibqa’ diffiċli li wieħed iżomm tajjeb dawn il-postijiet meta fihom għandek diversi persuni li qed jokkupawhom.  Biss irnexxielna nibdlu u issa ser jirnexxilna anke nneħħu t-tined li għad fadal wara li diġà konna neħħejna diversi minnhom.  Nittama li fil-ġimgħat li ġejjin il-post jerġa’ jittrasofrma ruħu.  Li hu żgur hu li hemm ferm iktar servizzi li jingħataw minn qatt qabel.

5.    Sar xogħol ieħor marbut mal-iskrutinju tal-varji talbiet għall-ażil li jsiru minn persuni li jaslu hawn.  Pajjiżna jibqa’ l-iktar wieħed li rċieva talbiet għall-ażil fid-dinja.  Mhux biss, imma 98% ta’ dawk li jaslu hawn, jagħmlu tali talba.  Għalhekk, f’dawn l-erba’ snin żdiedu konsiderevolment il-pressjonijiet sabiex l-applikazzjonijiet jiġu magħluqa malajr kemm jista’ jkun.  Dan effettivament sar u baqa’ jsir.  L-uffiċċju mmexxi mill-Kummissarju għar-Rifuġjati għamel xogħol impressjonanti hawn, b’tibdiliet u b’abbiltajiet li ftit pajjiżi Ewropej laħqu.  L-applikazzjonijiet qegħdin jingħalqu dejjem f’perjodu iktar qasir.

6.    Din il-ħidma hija parti minn dak li jsir minn dan il-pajjiż f’dan is-settur importanti.  Però jsir kontinwament mhux sporadikament.  Din il-ġimgħa kellna wkoll żewġ passi oħra: l-ewwel, numru ta’ persuni li ma kienx ħaqqhom protezzjoni li ġew ripatrijati lura lejn pajjiżhom il-Ghana; u t-tieni, numru ieħor ta’ persuni li ġew integrati fl-Istati Uniti.  F’dan il-mument partikolari, fiċ-Ċentri Miftuħa u Magħluqa hemm inqas minn tlett elef ruħ.  Bil-ħidma li għamilna, u li għadna qed nagħmlu, ser inkomplu nippruvaw nassiguraw li min ħaqqu protezzjoni nassistuh biex jiġi rilokat f’pajjiż ieħor u dawk li le, li jiġu ripatrijati lura f’pajjiżhom.  Dan hu parti mix-xogħol li sar u li għadu jsir f’dan is-settur.

Sabar u paċenzja

1.    Forsi l-esperjenzi umani li kull persuna tmiss magħhom ta’ kuljum, forsi l-età, forsi wkoll il-qari jew dawn kollha flimkien juru kemm is-sabar u l-paċenzja huma essenzjali.  Importanti sabiex wieħed jipprova jqiegħed lilu nnifsu biex issir is-sewwa.  Meta deċiżjonijiet jiġu meħuda malajr, b’reazzjoni għal ħwejjeġ oħra, mhux dejjem ikunu f’posthom u anzi, ċertu drabi, jagħlqu l-bieb għal passi oħra aqwa u aħjar.  Imma l-ħajja hekk hi.  Jekk ma toqgħodx attent, taħkmek fin-naħa l-iżbaljata.  Tirkbek u tispiċċa twettaq il-kontra ta’ dak li trid.

2.    Aktar ma jgħaddi ż-żmien, aktar ma nara lill-bniedem mill-eżistenza umana u mill-politika nara kemm il-paċenzja u s-sabar huma virtujiet li jridu jiġu koltivati f’qalb u f’moħħ kull bniedem.  Hemm ħafna sitwazzjonijiet li fihom trid tieqaf u tirrifletti.  Tieqaf sabiex tbati diskors żejjed u aġir żbaljat bis-sabar u r-rassenjazzjoni li, għada pitgħada, is-sewwa jseħħ.  Din mhix xi esperjenza unika għal persuna waħda.  Kull bniedem fil-ħajja tiegħu f’din id-dinja jrid jara minn dan ma’ wiċċu.  Isofri, ibati diversi forom ta’ inġustizzja f’dak li jkun qiegħed jagħmel u, jekk ma jkollux il-fidi u l-umiltà tal-paċenzja, jaf li jekk jirreaġixxi jiżbalja.

3.    Hemm min fis-soċjetà tagħna, bħal kull f’soċjetà oħra f’kull żmien, li jara li jqiegħed lilu nnifsu għas-servizz ta’ dak li jaf li huwa ħażin u żbaljat.  Għad hawn diversi li jaħsbu li kollox jista’ jkun ġustifikat, l-aqwa li l-għan aħħari suppost li jkun tajjeb u nobbli.  Diversi jqegħdu fuq il-pedestall tagħhom miri li jridu jilħqu akkost ta’ kollox.  Jinħakmu mill-bżonn li joħolqu għalihom infushom u jwettqu atti żbaljati kontra terzi persuni.  Tiskanta kif wara sekli ta’ esperjenzi umani miktuba, rakkontati u li qegħdin għad-disposizzjoni tagħna lkoll jibqa’ jkun hemm min jaħseb li, b’aġir żbaljat, ser jiggwadanja.

4.    B’żerriegħa ħażina, frott tajjeb ma joħroġx.  Tiżragħha meta tiżragħha, fejn u x’ħin trid, xorta waħda hemm tibqa’ mwaħħla – tidher mod u tkun mod ieħor.  Trid tistabar u tistenna li tqiegħed żerriegħa tajba u trid tara li tipproteġiha biex tikber soda u dritta ‘l fuq.  Tieħu l-ħin tagħha, verament, u frottha jdum ma jingħata, imma meta trendi, it-tjubija hemm tkun.  Uħud jgħidu li tkun qed tkaxkar saqajk, tinki, toqgħod lura meta fir-realtà tkun qed tara x’inhu l-aħjar li għandu jsir.  Ħafna nies jiġru, persuni li jkunu reazzjonarji hekk jagħmlu u jispiċċaw jidhru li qed jimxu ‘l quddiem, mentri fir-realtà jkunu qed imorru passi lura. 

5.    Hemm diversi, elenku twil fl-istorja tal-bniedem, ta’ deċiżjonijiet li jiġu meħuda b’dan il-mod.  Servew biss sabiex saddew ħalq il-kritiċi li però, maż-żmien, urew ruħhom bħala inadegwati.  Il-verità dik hi.  It-triq biex isir proġett tajjeb, wieħed li jservi verament lill-bniedem, hija twila u diffiċli.  L-esperjenza politika llum anzi għallmitni li aktar ma jkun ser isir pass tajjeb għall-bniedem,  iktar jinqalgħu ntoppi u rwiefen.  Kritika inġusta ma tonqosx, gambetti anqas.  Aktar ma jqum il-maltemp, iktar tkun taf li dak li qed tagħmel ser iservi mhux biex jitkattar il-ħażen, imma jissoda s-sewwa.  Għażliet mhux faċli għall-politiku, però li jagħżlu bejn dawk li jmorru għaċ-ċapċip faċli jew dawk li jippreferu jgħaddu mill-manglu tat-tbatija biex iservu verament u mhux apparentement.

6.    Nikteb dan f’din il-Ġimgħa Mqaddsa li għalija għadha importanti.  Bdejtha bis-sodisfazzjon li nara ġabra ta’ persuni li jinsabu fil-Faċilità Korrettiva ta’ Kordin itellgħu dramm bl-isem ta’ “Għotja”.  Ir-riformi li bdew isiru bl-Att u l-politika tagħna dwar il-Ġustizzja Riparatriċi bdew jagħtu l-frott tagħhom.  Ħadmu fiha b’impenn li huwa neċessarju sabiex bniedem jibdel ħajtu.  Mhux biżżejjed li ssakkar lin-nies ġewwa ċella, imma huwa importanti li tgħinhom jifhmu fejn żbaljaw u kif jistgħu jsiru persuni aħjar.  Il-kliem ta’ Fr Franco Fenech, kappillan tal-Faċilità kienu f’posthom meta qal: “Għalija huma mumenti speċjali ħafna, li fihom nagħraf kemm kull persuna għandha kwalitajiet li mhux dejjem kellha x-xorti li jkollha ambjent tajjeb u adegwat biex tiżviluppahom.  Imma meta l-persuna ssib ambjent li jgħinha ħalli tiskopri u tiżviluppa dawn il-kwalitajiet, allura tkun lesta timpenja ruħha u tagħmel kull sagrifiċċju biex tikber.”  Il-produzzjoni ta’ dan id-dramm tat opportunità lil xi wħud mill-priġunieri biex jiskopru xi ħaġa ġdida fihom infushom, tant li huma stess kienu sorpriżi bil-“prodott”.  Il-paċenzja, is-sabar, kienu l-linji li ggwidawna sabiex fid-diskors żejjed li sar f’dawn ix-xhur, il-miżuri tal-ġustizzja riparatriċi mhux tkissru kif riedhom ħaddieħor, imma qed jibdew jagħtu l-frott it-tajjeb.  Għal dan aħna nibqgħu naħdmu u nimpenjaw ruħna.  Mill-qalb nawgura l-Għid it-Tajjeb lil kulħadd.

Il-poplu ta’ dawn il-gżejjer

1.    Wasalna f’mument fl-istorja ta’ pajjiżna li bħalu, fil-passat, ma kellniex.  Il-gżejjer baqgħu l-istess, bl-istess qies, bl-istess pajsaġġ imma l-poplu kiber sew fin-numru.  Qbiżna sew l-erba’ mitt elf ruħ li huma reġistrati li jgħixu f’xi parti jew oħra.  Qbiżna sew ukoll in-numru ta’ persuni li jiġu jżuruna.  It-turiżmu hawn qiegħed il-ħin kollu jikber u jiżdied tant li kważi ma nistgħux inlaħħqu miegħu.  Għandna wkoll taħlit ikbar u differenti ta’ kulturi u ideat.  M’għadniex esposti għal ftit mezzi ta’ komunikazzjoni bħal ma konna.  M’għadniex daqshekk viċin ta’ xulxin li kulħadd jaf b’ta’ ħaddieħor.

2.    Definittivament, ix-xenarju soċjo-kulturali nbidel ta’ taħt fuq.  Il-ħid għad-dispożizzjoni tagħna nbidel kompletament.  Qabel, ħafna aktar persuni kellhom sfog li setgħu jqattgħu iktar ħin jitkellmu.  It-tradizzjonijiet Maltin u Għawdxin bdew idubu u jieqfu milli jibqgħu jitħaddnu.  Bil-ħinijiet tax-xogħol, bil-pressjonijiet moderni varji naqsu dawk li fil-jum jieklu lkoll bħala familja mdawra flimkien madwar il-mejda.  Qed jispiċċaw mumenti meta l-familja estiża bin-nanniet, zijiet, neputijiet, qraba u ħbieb jiltaqgħu fuq bażi regolari.  Kull bniedem qisu għaddej mill-proċess li minn persuna jsir individwu.

3.    Isalvaw ċerti tradizzjonijiet, imġieba tajba li tirrispetta d-dinjità tal-bniedem il-festi reliġjużi.  Ngħidu x’ngħidu, għad hemm saħħa, ġibda, kalamita għal ċelebrazzjonijiet esterni u interni ta’ dawn l-attivitajiet.  Diversi huma dawk li jimpenjaw ruħhom fis-setturi varji bħall-każini tal-baned, kmamar tan-nar, kumitati tal-armar, kunsilli parrokkjali.  Huma ftit mill-elementi prinċipali li jippreparaw, iħeġġu u jieħdu ħsieb li jorganizzaw.  Ħafna huma volontarji, għalkemm mhux kollha, imma hemm passjoni, determinazzjoni u perseveranza li ftit ser issib.  Dan kollu ilu magħna u għadu għaddej minkejja t-trapass taż-żmien.

4.    Il-Ħdud żgur, imma anke tul il-ġimgħa, l-każini tal-baned ikunu mimlija bin-nies.  Bnedmin ta’ kull età li huma hemm, miġbura jaraw x’qed jiġri u jieħdu ħsieb li jsostnu materjalment u finanzjarjament is-soċjetà tagħhom.  Hemm ħeġġa, li rari ssib bħalha u li għandha l-kwalità li hija kostanti.  Diversi inizjattivi jitwieldu għandhom minn dawn il-laqgħat.

5.    Meta ddur issib li dawn il-persuni huma dawk li jieħdu sehem fil-purċissjonijiet tal-Ġimgħa l-Kbira.  Hawn ukoll tara l-ħeġġa għall-parteċipazzjoni attiva fl-irfiegħ, fl-akkumpanjar, fil-kostumi, f’dak kollu li organizzazzjoni bħal din tinvolvi.  Kull sena hemm sforz kbir, enerġija barra mis-soltu li tiġi dedikata f’dan.  Tibqa’ wkoll taħseb kemm persuni jsegwu l-purċissjonijiet b’attenzjoni.  Iċ-ċaqliq minn post għall-ieħor huwa interessanti, b’diversi jieħdu ħsieb li jmorru post differenti kull sena proprju, proprju biex jaraw, iqabblu u jidħlu fl-atmosfera.

6.    Hekk għadha parti tajba mis-soċjetà Maltija.  Għalkemm kbirna fil-popolazzjoni, xorta ma tlifniex din l-influwenza.  Hemm ġabra kbira u ċelebrazzjoni esterna manifesta ta’ dak li aħna u li rridu nkomplu nkunu.  Ninnota li, għalkemm hemm nuqqas ta’ interess f’involviment politiku, f’dawn l-okkażjonijiet hemm anzi proprju l-kontra.  Dan huwa tajjeb u jkun żball jekk xi ħadd jipprova jċekknu jew imaqdru.  Id-demokrazija hija miftuħa għall-kurrenti varji ta’ ideat u hekk għandu jkun, biss ħadd ma jista’ jgħid li għax m’aħniex ninbidlu f’dawn il-valuri, allura li aħna xi soċjetà żbaljata jew lura.  It-tradizzjonijiet reliġjużi tagħna ġieħ jagħmlulna u għalhekk għandna nkomplu nassigurawhom.

Ħidmet il-Parlament

1.    Tul din il-ġimgħa l-Parlament aġġorna, kif jagħmel kull sena, għall-vaganzi tal-Għid il-Kbir.  Sfortunatament kien hemm żmien meta, bi sfida għall-valuri u t-tradizzjonijiet insara tagħna, kien hemm min kien jibqa’ jinsisti li jibqa’ jlaqqa’ l-Kamra sa Ħamis ix-Xirka u anke jitħajjar fil-Ġimgħa l-Kbira.  Dan illum għadda proprju għax ħadna ħsieb li nagħtu l-importanza li ħaqqha l-politika nazzjonali mingħajr ma narawha b’xi mod tirbaħ fuq dik reliġjuża.  Hekk għamlu l-kapijiet tal-Kamra ta’ qabli.  Il-President Emeritu Guido de Marco (Alla jagħtih il-Ġenna), Lawrence Gonzi u Tonio Borg kollha segwew din il-prattika tajba.  Ma ltqajniex fil-mument li għal diversi Maltin u Għawdxin huwa għal qalbhom.  Din hija l-marka ta’ dan il-partit, u hekk baqgħet.  Għalhekk dan l-aġġornament ma ħariġx barra min-normal.

2.    Aġġornajna wara li l-Kamra ilha tiltaqa’ regolarment u kontinwament mill-bidu tas-sena.  Fl-ewwel xahrejn fil-fatt iltqajna 27 darba u f’dawn is-seduti numru konsiderevoli ta’ membri ħadu sehem.  Kien hemm xejn inqas minn 64 membru b’madwar 100 siegħa ta’ dibattitu u domandi parlamentari li ħafna drabi jittrasformaw ruħhom f’mumenti interessanti.  Fil-fatt, f’dawn ix-xhur ġew preżentati xejn inqas minn 2,326 domanda parlamentari.  Dan huwa xiehda ċara li l-Parlament baqa’ l-post fejn tiġi rispettata d-demokrazija.  Baqa’ wkoll il-post fejn il-Ministri u s-Segretarji Parlamentari baqgħu jattendu regolarment u jwieġbu għad-domandi li jsirulhom miż-żewġ naħat tal-Kamra.  Ma kellniex dawk it-tip ta’ tweġibiet li “mhux fl-interess tal-poplu”, anqas ma kellna Ministru wieħed li jrid ilaħħaq ta’ kulħadd.  Il-Kamra tad-Deputati baqgħet taħdem tajjeb u dik il-ħidma baqgħet tiġi segwita u rrappurtata kontinwament.  F’ebda mument ma morna lura minn xi valur demokratiku.

3.    Mhux biss iddibattejna liġijiet varji imma approvajna wkoll, bil-kunsens taż-żewġ naħat, numru ta’ liġijiet.  Fil-fatt, hawn ukoll, il-ħidma leġislattiva ma waqgħetx lura.  Ġew approvati 3 liġijiet ġodda li huma marbuta mal-Att dwar is-Sigurtà Soċjali, il-pożizzjoni ta’ persuni b’diżabilità u l-liġi dwar is-self lill-Greċja.  Mhux biss, imma ġew ippreżentati wkoll 102 avviżi legali li huma wkoll, kif inhuwa magħruf, iżidu fil-korp leġislattiv tagħna u huma determinanti.  Biex wasalna hawn, il-Parlament ħadem.  Dan sar sija fid-dibattitu tat-tieni qari, kif ukoll fi stadju ta’ Kumitat.  Għax huwa magħruf li ħafna mil-liġijiet tagħna jingħataw l-iskrutinju neċessarju tagħhom f’kull stadju tal-Parlament.  F’dawn is-snin li ilni fl-Eżekuttiv, minn esperjenza ta’ 38 abbozz ta’ liġi li b’xi mod fih kelli sehem dirett, nista’ ngħid li huwa dejjem tajjeb li kull liġi tieħu l-ħin tagħha u li fuqha jkun hemm ir-riflessjoni neċessarja.  Naqbel li, kemm jista’ jkun, m’għandekx tagħmel limitu jew kontroll fuq kemm seduti jew membri jieħdu sehem f’dibattitu fuq xi liġi partikolari.

4.    Mhux biss, imma fuq l-aġenda parlamentari hemm ukoll numru ta’ abbozzi ta’ liġi pendenti.  Dan huwa wkoll mertu ta’ dan il-Gvern li ħa ħsieb li jkollu dejjem kwantità ta’ abbozzi ta’ liġijiet lesti biex jiġu dibattuti  Kien ikun hemm nuqqas kieku ma kellniex.  Proprju l-fatt li għandna ħafna juri, minflok, li aħna attivi u bqajna Gvern li jrid jibdel, jirriforma u dan sabiex ikollna soċjetà aħjar.  Dan huwa iktar ċar mill-fatt li għalkemm approvajna 3 abbozzi ta’ liġijiet, ġew preżentati 4 oħra ġodda.  Għalhekk il-Kamra quddiemha għandha aġenda twila, tajba u li għandna napprovaw.  Naqblu u m’hemmx dubju li għalkemm diversi liġijiet huma tajba fihom infushom, xorta jkun jonqoshom tibdiliet ta’ rfinar li jrid isir kontinwament.  Dan huwa proċess normali u s-soltu l-Oppożizzjoni timxi fuq din il-linja, għalkemm din is-sena kellna l-eċċezzjoni fuq l-abbozz ta’ liġi dwar l-Edukazzjoni li, stranament, iddikjaraw li għax jaqblu miegħu, ser jivvutaw il-kontra.

5.    Il-ħidma parlamentari ssir ukoll fid-diversi Kumitati li għandna mwaqqfa.  Fil-fatt, hawn ukoll, dawn komplessivament iltaqgħu 39 darba u dan ukoll huwa tajjeb.  Biss biss, il-Kumitat dwar ix-Xogħol tal-Kamra, iktar magħruf bħala l-House Business Committee, ltaqa’ 6 darbiet.  F’dawn il-Kumitati ħafna drabi, għalkemm mhux dejjem, ix-xogħol isir fil-kalma u s-serenità.  Dan huwa tajjeb.  Fil-fatt fil-Kamra, iktar ma jkun hemm kalma u attenzjoni għal dak li jkun qiegħed isir, tant l-aħjar.  Nittama li, meta nerġgħu niltaqgħu, l-atmosfera tkun din sabiex napprovaw iktar liġijiet milli diġà approvajna.  Huwa essenzjali għall-poplu ta’ dawn il-Gżejjer li jirċievi mingħandna dan is-servizz.

6.    Hemm iktar xogħol li sar f’dawn ix-xhur marbut ukoll mal-ħidma li ssir kontinwament mill-membri parlamentari barra minn xtutna.  Biss, huwa żgur evidenti li l-Parlament ħadem u approva tajjeb fuq diversi punti għax huwa ċar li, fil-maġġoranza ta’ dak li jgħaddi mill-Kamra, jgħaddi għax naqblu fuqu t-tnejn.  Fil-Parlament it-tħaddim tad-demokrazija ma naqasx, anzi kompla jitkattar.  Kellu bżonn ħaddieħor żamm l-istess livell għoli li żammejna aħna.  Ikunu xi jkunu ċ-ċirkostanzi, aħna hekk determinati li nkomplu nagħmlu.  Għandna ħafna iktar li jrid isir u nħares ‘il quddiem sabiex inkomplu naħdmu u napprovaw liġijiet u miżuri li jagħmlu l-ġid lil pajjiżna.  Dak kommessi għalih u determinati li nibqgħu nżommuh.

CoE report confused on Role of Malta’s Rescue Co-Ordination Centre

The Government of Malta refers to the report “Lives lost in the Mediterranean Sea: who is responsible?” published today by the Committee on Migration, Refugees and Displaced Persons of the Parliamentary Assembly of the Council of Europe (CoE) drafted by rapporteur Ms. Tineke Strik of the Netherlands.

The report in question causes some confusion regarding the role of Malta’s Rescue Co-Ordination Centre (RCC) in the tragic incident it refers to.

The Safety of Life at Seas Convention (SOLAS) and the Search And Rescue Convention (SAR) unequivocally lay down the international legal framework in search and rescue operations.

In this case it must be stressed that the ill-fated boat was never within Malta’s Search and Rescue Region (SRR) which is controlled by Malta’s RCC. Indeed, both positions reported by the satellite phone on board put the boat to be very well-within the Libyan SRR on the 27^th of March 2011 when the ordeal started.

Further to this, the CoE Report clearly states that RCC Malta was not the first rescue coordination centre to have received information about the boat in question. This is relevant since Article 6.7 of the International Maritime Organisation’s Guidelines on the treatment of persons rescued at sea invariably states:

When appropriate, the first RCC contacted should immediately begin efforts to transfer the case to the RCC responsible for the region in which the assistance is being rendered. When the RCC responsible for the SAR region in which assistance is needed is informed about the situation, that RCC should immediately accept responsibility for co-ordinating the rescue efforts, since related responsibilities, including arrangements for a place of safety for survivors, fall primarily on the Government responsible for that region. The first RCC, however, is responsible for co-ordinating the case until the responsible RCC or other competent authority assumes responsibility.

It should be noted that, in the same timeframe as the above events, RCC Malta and the Rome Maritime Rescue Co-ordination Centre were also cooperating on a further three reports of craft carrying persons underway in the Central Mediterranean, some of which had been reported by satellite telephones and others which had been sighted by NATO units engaged in operations north of Libya. In all three of these cases, all persons aboard were accounted for.

In view of the above, and the fact that the stricken boat remained in the Libyan Search and Rescue Region, RCC Malta acted in support of MRCC Rome (which was the entity co-ordinating the operation) by repeatedly attempting to contact the satellite phone in question and trying to pinpoint the location of the boat. All the necessary possible action which surpasses the legal obligations incumbent upon Malta was taken by the Maltese Authorities in this case.