Il-poplu ta’ dawn il-gżejjer

1.    Wasalna f’mument fl-istorja ta’ pajjiżna li bħalu, fil-passat, ma kellniex.  Il-gżejjer baqgħu l-istess, bl-istess qies, bl-istess pajsaġġ imma l-poplu kiber sew fin-numru.  Qbiżna sew l-erba’ mitt elf ruħ li huma reġistrati li jgħixu f’xi parti jew oħra.  Qbiżna sew ukoll in-numru ta’ persuni li jiġu jżuruna.  It-turiżmu hawn qiegħed il-ħin kollu jikber u jiżdied tant li kważi ma nistgħux inlaħħqu miegħu.  Għandna wkoll taħlit ikbar u differenti ta’ kulturi u ideat.  M’għadniex esposti għal ftit mezzi ta’ komunikazzjoni bħal ma konna.  M’għadniex daqshekk viċin ta’ xulxin li kulħadd jaf b’ta’ ħaddieħor.

2.    Definittivament, ix-xenarju soċjo-kulturali nbidel ta’ taħt fuq.  Il-ħid għad-dispożizzjoni tagħna nbidel kompletament.  Qabel, ħafna aktar persuni kellhom sfog li setgħu jqattgħu iktar ħin jitkellmu.  It-tradizzjonijiet Maltin u Għawdxin bdew idubu u jieqfu milli jibqgħu jitħaddnu.  Bil-ħinijiet tax-xogħol, bil-pressjonijiet moderni varji naqsu dawk li fil-jum jieklu lkoll bħala familja mdawra flimkien madwar il-mejda.  Qed jispiċċaw mumenti meta l-familja estiża bin-nanniet, zijiet, neputijiet, qraba u ħbieb jiltaqgħu fuq bażi regolari.  Kull bniedem qisu għaddej mill-proċess li minn persuna jsir individwu.

3.    Isalvaw ċerti tradizzjonijiet, imġieba tajba li tirrispetta d-dinjità tal-bniedem il-festi reliġjużi.  Ngħidu x’ngħidu, għad hemm saħħa, ġibda, kalamita għal ċelebrazzjonijiet esterni u interni ta’ dawn l-attivitajiet.  Diversi huma dawk li jimpenjaw ruħhom fis-setturi varji bħall-każini tal-baned, kmamar tan-nar, kumitati tal-armar, kunsilli parrokkjali.  Huma ftit mill-elementi prinċipali li jippreparaw, iħeġġu u jieħdu ħsieb li jorganizzaw.  Ħafna huma volontarji, għalkemm mhux kollha, imma hemm passjoni, determinazzjoni u perseveranza li ftit ser issib.  Dan kollu ilu magħna u għadu għaddej minkejja t-trapass taż-żmien.

4.    Il-Ħdud żgur, imma anke tul il-ġimgħa, l-każini tal-baned ikunu mimlija bin-nies.  Bnedmin ta’ kull età li huma hemm, miġbura jaraw x’qed jiġri u jieħdu ħsieb li jsostnu materjalment u finanzjarjament is-soċjetà tagħhom.  Hemm ħeġġa, li rari ssib bħalha u li għandha l-kwalità li hija kostanti.  Diversi inizjattivi jitwieldu għandhom minn dawn il-laqgħat.

5.    Meta ddur issib li dawn il-persuni huma dawk li jieħdu sehem fil-purċissjonijiet tal-Ġimgħa l-Kbira.  Hawn ukoll tara l-ħeġġa għall-parteċipazzjoni attiva fl-irfiegħ, fl-akkumpanjar, fil-kostumi, f’dak kollu li organizzazzjoni bħal din tinvolvi.  Kull sena hemm sforz kbir, enerġija barra mis-soltu li tiġi dedikata f’dan.  Tibqa’ wkoll taħseb kemm persuni jsegwu l-purċissjonijiet b’attenzjoni.  Iċ-ċaqliq minn post għall-ieħor huwa interessanti, b’diversi jieħdu ħsieb li jmorru post differenti kull sena proprju, proprju biex jaraw, iqabblu u jidħlu fl-atmosfera.

6.    Hekk għadha parti tajba mis-soċjetà Maltija.  Għalkemm kbirna fil-popolazzjoni, xorta ma tlifniex din l-influwenza.  Hemm ġabra kbira u ċelebrazzjoni esterna manifesta ta’ dak li aħna u li rridu nkomplu nkunu.  Ninnota li, għalkemm hemm nuqqas ta’ interess f’involviment politiku, f’dawn l-okkażjonijiet hemm anzi proprju l-kontra.  Dan huwa tajjeb u jkun żball jekk xi ħadd jipprova jċekknu jew imaqdru.  Id-demokrazija hija miftuħa għall-kurrenti varji ta’ ideat u hekk għandu jkun, biss ħadd ma jista’ jgħid li għax m’aħniex ninbidlu f’dawn il-valuri, allura li aħna xi soċjetà żbaljata jew lura.  It-tradizzjonijiet reliġjużi tagħna ġieħ jagħmlulna u għalhekk għandna nkomplu nassigurawhom.