F’konferenza
tal-aħbarijiet, il-Kap tal-Oppożizzjoni Simon Busuttil qal li wara r-reshuffle
li għamel il-ġimgħa li għaddiet, il-pass li jmiss huwa li l-Oppożizzjoni turi
li hija tassew waħda li tagħmel differenza lin-nies fil-ħajja ta’ kuljum
tagħhom. Huwa qal dan hekk kif ħabbar tliet prijoritajiet politiċi ċari għal
tliet membri tas-Shadow Cabinet tal-Partit Nazzjonalista.
“Irrid li
l-Partit Nazzjonalista jagħmel differenza lin-nies fil-ħajja ta’ kuljum
tagħhom, anke mill-Oppożizzjoni,” qal Simon Busuttil.
It-tliet
prijoritajiet politiċi tal-Oppożizzjoni fil-bidu ta’ din is-sena se jkunu:
(1) il-prezzijiet għolja
tal-petrol u d-diesel;
(2)
id-dinjita’ tal-pazjenti fl-isptar Mater Dei u
(3)
t-trasparenza fil-kuntratti pubbliċi.
“Jekk
Joseph Muscat jaħseb li se jagħmi lin-nies billi jraħħas il-prezz b’1c jew 2c
qed jgħarralu” - Simon Busuttil
Dwar
il-prezzijiet tal-petrol u d-diesel, Simon Busuttil qal li huwa ċar daqs
il-kristall li l-Gvern Laburista qiegħed jisraq lill-poplu Malti għaliex
minkejja li l-prezz tal-fuel waqa’ bin-nofs, f’Malta il-prezz tal-petrol u
d-diesel għadhom l-istess. Illum Malta għandha l-ogħla prezz tal-petrol u
d-diesel fl-Unjoni Ewropea meta ma tqisx it-taxxi, filwaqt li għandha it-tielet
l-għola prezz tad-diesel u r-raba l-għola prezz tal-petrol meta tqis it-taxxi,
peress li ċerti pajjiżi għandhom taxxi fuq il-fuel għola minn tagħna.
“Dan
ifisser,” qal Simon Busuttil, “li l-Gvern ma għadda xejn mir-roħs straordinarju
li kien hemm fil-prezz tal-petrol u d-diesel kif kien isir taħt Gvern
Nazzjonalista u minflok żammu għalih. Dan mhu xejn għajr serq tal-konsumaturi”
qal Simon Busuttil, li żied jgħid “illum, jekk titfa €30 petrol fil-ġimgħa,
il-Gvern qed jisirqek mill-anqas €10, jiġifieri terz ta’ kemm tħallas, filwaqt
li jekk titfa €30 diesel fil-ġimgħa il-Gvern ikun qed jisirqek mill-anqas €12,
jigifieri viċin nofs il-prezz tad-diesel li tieħu.”
“Jekk Joseph
Muscat jaħseb li se jagħmi lill-nies billi jraħħas il-prezz b’1c jew 2c qed
jgħarralu” qal Simon Busuttil
“Dan” qal
il-Kap tal-Oppożizzjoni “mhux aċċettabbli għall-poplu Malti u Għawdxi u lanqas
mhu aċċettabbli għall-Partit Nazzjonalista.”
Għal dan
il-għan l-Kap tal-Oppożizzjoni talab lix-Shadow Minister Marthese Portelli
sabiex, f’isem l-Oppożizzjoni, tieħu dawk l-inizjattivi kollha neċessarji
sabiex twassal lill-Gvern sabiex inaqqas il-prezzijiet tal-petrol u d-diesel u
jġibhom f’livelli li jirriflettu eżatt ir-roħs fil-prezz internazzjonali.
“Jekk
Joseph Muscat jiġi jaqa u jqum mid-dinjita tal-pazjenti, aħna le” - Simon
Busuttil
Dwar
id-dinjità tal-pazjenti, il-Kap tal-Oppożizzjoni qal li s-sitwazzjoni fl-Isptar
Mater Dei saret waħda mwiegħra u issa qegħda tolqot ħażin id-dinjità
tal-pazjenti.
Simon
Busuttil qal li minkejja l-ħafna fanfarunati qabel l-elezzjoni li l-Partit
Laburista kellu roadmap għal kollox u li kien se jwettaq “pjan t’azzjoni
fl-immedjat dwar il-problema ta’ nuqqas ta’ sodod u pazjenti fil-kuruturi,”
f’dawn l-aħħar sentejn, mhux talli ma sar xejn talli s-sitwazzjoni maret ferm
għall-agħar.
“Taħt Joseph
Muscat għandna numru dejjem jikber ta’ pazjenti li qed jitpoġġew f’kurituri bla
ebda privatezza u bla faċilitajiet sanitarji. Taħt Joseph Muscat it-tobba u
l-infermiera lanqas biss jistgħu jagħtu kura dinjituża lill-pazjenti għax ma
jistgħux jinvistawhom sew. Taħt Joseph Muscat in-nisa u l-irġiel qed jitħallew
fl-istess kuritur u l-infermiera qed ikollhom jimsħuhom bil-wipes flok
jaħsluhom. Dan huwa l-mod kif Joseph Muscat waqqa d-dinjita tal-pazjenti,” qal
Simon Busuttil.
Hu żied
jgħid li “jekk Joseph Muscat jiġi jaqa u jqum mid-dinjità tal-pazjenti,
il-Partit Nazzjonalista le.”
Għal dan
il-għan il-Kap tal-Oppożizzjoni talab lix-Shadow Minister Claudette Buttigieg
sabiex, f’isem l-Oppożizzjoni tieħu dawk l-inizjattivi kollha li hemm bżonn
sabiex tikxef l-inkompetenza tal-Gvern u ġġiegħlu jieħu azzjoni biex id-dinjità
tal-pazjenti tibda tiġi rispettata.
“Erġajna
lura għal Gvern li għalih it-trasparenza u l-informazzjoni mhumiex fl-interess
tal-poplu” - Simon Busuttil
Dwar
it-trasparenza, il-Kap tal-Oppożizzjoni spjega li t-trasparenza mill-Gvern u
d-dritt għall-informazzjoni lill-pubbliku huma essenzjali f’demokrazija.
Madankollu, f’Malta, il-Gvern għadu qed jaħbi numru ta’ dokumenti ta’ interess
pubbliku, fosthom kuntratti pubbliċi, b’mod li mhux aċċettabbli f’soċjetà
demokratika.
Fost dawn
hemm: il-kuntratti bejn l-Enemalta u x-Shanghai Electric, il-kuntratti bejn
il-Gvern u l-Electrogas, il-kuntratti dwar ix-xiri taż-żejt, il-kuntratt bejn
il-Gvern u Henley & Partners, ir-rapport dwar l-onorarja u r-rapporti dwar
l-inkjesti li kienu saru taħt il-Ministru Manuel Mallia dwar il-każ ta’ Darryl
Luke Borg u dwar il-każ ta’ waqfien ta’ proċeduri kriminali mill-eks Kummissarju
Peter Paul Zammit.
“Erġajna
lura għal Gvern li għalih it-trasparenza u l-informazzjoni mhumiex fl-interess
tal-poplu,” qal Simon Busuttil. “Iżda dan mhux aċċettabbli għalina u l-Partit
Nazzjonalista se jaħdem biex jikxef il-ħabi ta’ Joseph Muscat.”
Il-Kap
tal-Oppożizzjoni qal li filwaqt li suppost għandu jsir dibattitu parlamentari
dwar il-kuntratt li l-Enemalta ffirmat max-Shanghai Electric, il-kuntratt in
kwistjoni baqa ma ġiex ippubblikat. “Kif jippretendi Joseph Muscat li jista’
jsir dibattitu parlamentari serju jekk hu jaf kollox u l-poplu ma jaf xejn?”
qal Simon Busuttil. “Jaqaw Joseph Muscat irid jitkellem waħdu?” Għaldaqstant
qabel isir dibattitu l-Oppożizzjoni se tibqa tinsisti li għandhom jiġu
pubblikati d-dokumenti kollha tal-kuntratti li ġew iffirmati.
Għal dan
il-għan il-Kap tal-Oppożizzjoni talab lix-Shadow Minister Jason Azzopardi
sabiex jieħu dawk l-inizjattivi kollha li hemm bżonn sabiex jikxef il-ħabi
tal-Gvern Laburista u jwassal għall-pubblikazzjoni tal-kuntratti u dokumenti li
l-Gvern qiegħed jaħbi.
Referendum
kaċċa: il-mazz issa huwa f’idejn il-poplu u l-PN jirrispetta d-deċiżjoni
tal-poplu - Simon Busuttil
Fi tmiem
l-intervent tiegħu il-Kap tal-Oppożizzjoni għamel kumment ukoll dwar l-aħħar
żviluppi dwar ir-referendum dwar il-kaċċa fir-Rebbiegħa. Huwa qal li l-Prim
Ministru għaġġel meta qabad u ddeċieda d-data tar-referendum meta l-liġi hija
ċara u tagħti dan id-dritt espressament lill-President tar-Repubblika.
Dr. Busuttil
qal li referendum huwa l-akbar forma ta’ espressjoni ta’ demokrazija diretta u
jagħti l-aħħar kelma f’idejn in-nies. Il-Partit Nazzjonalista kien hu li ta dan
id-dritt ta’ referendum u baqa’ jiddefendih anke matul l-aħħar sena meta l-Prim
Ministru għamel kull ma seta’ biex dan ir-referendum ma jsirx - tant li kien
saħansitra se jħassar l-elezzjoni tal-Kunsilli Lokali biex ir-referendum ma
jaqbiżx turnout ta’ 50%.
Għal dik li
hija l-pożizzjoni tal-Partit Nazzjonalista, il-Kap tal-Oppożizzjoni qal li issa
li hu magħruf li se jsir referendum, dalgħodu stess hu ta direzzjoni biex
il-Partit jibda jiddiskuti din il-kwistjoni fl-istrutturi interni tiegħu. Hekk
kif dan l-eżerċizzju jitlesta, il-Partit Nazzjonalista se jħabbar id-deċiżjoni
li jkun wasal għaliha.
“Dan hu dak
li wieħed jistenna minn partit dekomratiku,” qal Simon Busuttil filwaqt li qal
li, dwar ir-referendum tal-kaċċa, “il-mazz issa huwa f’idejn il-poplu u
l-Partit Nazzjonalista jirrispetta d-deċiżjoni tal-poplu kif dejjem
għamel.”
12.01.15
No comments:
Post a Comment