1. Fl-aħħar tas-sena li għaddiet ġraw eventi
li minnhom l-Unjoni Ewropea, u b’mod partikolari ż-Żona Ewro, ser ikollhom
konsegwenzi. F’Diċembru li għadda,
il-Prim Ministru attwali Antonis Samaras iddeċieda li jċaqlaq ‘il quddiem
il-vot għall-President tar-Repubblika Grieg.
Fi tlett laqgħat tal-parlament, il-maġġoranza mitluba mill-kostituzzjoni
ma ntlaħqitx. Il-kandidat Stavros Dimas
kellu l-appoġġ ta’ żewġ partiti fuq iċ-ċentru, wieħed in-ND (Demokrazija
Ġdida), partit fuq iċ-ċentru lemin parti mill-Partit Popolari Ewropew u l-PASOK
(Partit Soċjalista), partit fuq iċ-ċentru xellug parti mis-Soċjalisti
Ewropej. Minkejja dan l-appoġġ, in-numri
ma kienux biżżejjed u fid-29 ta’ Diċembru 2014 il-maġġoranza ma ntlaħqitx.
2. L-effetti immedjati u diretti ta’ dan huma
differenti u varji. Il-pajjiż ser imur
għall-elezzjonijiet ġenerali. Dan fih
innifsu ma għandux jinkwetana, meta nafu li l-Greċja huwa pajjiż fl-Ewropa li
jħaddan l-istess liġijiet u garanziji demokratiċi li aħna lkoll għandna. Biss, din id-darba l-affarijiet juru lihemm
riskji akbar li jħarsu u jolqtu l-istabilitajiet politiċi preżenti, kif ukoll
li jattakkaw dik ekonomika. L-istabilità
politika għax jidher li l-poter miċ-ċentru moderat ser imur lejn l-estremiżmu. Ser imur l-ewwel lejn ix-xellug, għax
il-partit magħrufa bħala “Syriza” immexxi minn Alexis Tsipras qiegħed fuq
quddien tal-kunsens elettorali bi kwazi 25%.
Mhux biss, imma anki fuq il-lemin estrem, ix-XA (Sebħ Ġdid) tielgħa huwa
wkoll minkejja li diversi mill-mexxejja tiegħu jinsabu l-ħabs akkużati b’reati.
3. Għall-aħbar li l-partit Syriza ser ikollu
f’idejh il-possibiltà tal-poter u li jifforma Gvern ġieb u għadu qiegħed iġib
inkwiet kbir. Dan huwa marbut mal-fatt
li dan il-partit ilu jitkellem kontra l-miżuri ta’ awsterità eknomika li dan
il-pajjiż ilu għaddej bihom għal dawn l-aħħar ħames snin. Diversi persuni tilfu jew ras inqas
fil-pensjoni tagħhom u dan apparti lista ta’ miżuri li wasslu għal iktar kumplikazzjonijiet
fil-ħajjiet tal-bnedmin. Hemm min qata’
qalbu, diversi għaddejjin minn pożizzjonijiet fejn il-faqar laħaqhom. Reazzjonijiet simili wieħed jistenna,
speċjalment meta nafu lkoll li l-figuri ekonomiċi, diversi drabi jinjoraw
il-fattur uman. Ħafna, li bħali qraw
il-kotba ta’ Joseph Stigliz, jafu kemm id-dinja rat minn dawn il-programmi li
huma mfassla mhux għall-bnedmin iżda għal magni.
4. Biss, il-bnedmin ma humiex, ma jistgħux
isiru magni. Imperfetti jibqgħu,
bil-bżonnijiet u n-neċessitajiet partikolari
tagħhom. Kif nafu dejjem, dak li jsir ma
jolqotx lil kulħadd l-istess. Hemm min
jibqa’ għaddej. Is-soċjetà tibqa’ tiġi
maqsuma f’biċċiet varji u differenti.
Dak li jidher li qiegħed jieħu post il-partit tax-xellug moderat, li
issa niżel viċin il-5% biss qiegħed iwieġeb għall-għajta ta’ dawk li jridu
jittamaw li l-pożizzjoni tagħhom ser tinbidel u ma jibqgħux fejn huma. Huwa ċar li l-PASOK, anki bid-dħul lura
tal-veteran George Papandreou, li għandi opinjoni tajba u li kelli x-xorti li
niltaqa’ u nkellem fit-tul, mhix sejra tibdel wisq is-sitwazzjoni. Il-pajjiż sejjer lejn tmexxija politika li
l-Ewropea ilha ħafna snin ma tara.
5. L-Ewropa prinċipalment immexxija
mill-Ġermanja tidher li qed issabbat diġà l-kotba. Diġà hija ċara li l-mewġa ta’ solidarjetà u
appoġġ li rajna ftit snin ilu meta pajjiżi varji, fosthom tagħna, ħarġu u
għamlu tajjeb għalihom. Il-klima ekonomika hija li issa wasal
iż-żmien li l-azzjoni tajba li saret fil-passat bi prezz għoli tiġi mħallsa
lura. Dan ma jidhirx li jista’ jew ser
isir b’bidla ta’ poter fil-Greċja.
Għalhekk beda diskors li ma hemmx triq oħra għal dak il-pajjiż ħlief li
jara x’ser jagħmel. Joħroġ miż-Żona
Ewro, li lkoll nafu li ma jistax isir.
Dan il-kliem qiegħed iħawwad ulterjorment il-pożizzjoni. Id-dinja taf li pożizzjonijiet estremi iktar
estremiżmu jġibu u ma jwasslux għat-toroq fin-nofs. Dħalna f’nofs konfużjoni ta’ ħsieb u
direzzjoni li ma hi tajba għal ħadd.
6. Diġà l-Ewropa għaddejja minn perjodu twil
fejn l-inflazzjoni hija negattiva u l-pronostiċi huma li sejrin lejn
iktar. Dan bil-Bank Ċentrali Ewropew,
immexxi mill-president intelliġenti mario Draghi f’pożizzjoni ta’ kważi
statiċità ma jurux ħafna tamiet għall-futur.
L-elezzjonijiet griegi ser isiru fil-25 ta’ Jannar. L-Ewropa għandha aktar ħin f’idejha li tifhem
li trid tara dak li ġej għal fuqha u tipprova taħirbu jew tnaqqsu. Bl-Unjoni u biż-Żona Ewro nafu li hemm konsegwenzi li fihom il-pajjiżi għandhom
idejhom marbuta ma’ xulxin. Jinżel
wieħed, jiġbed dejjem lill-ieħor miegħu.
Iktar minn diskors iebes, jaf ikun aħjar li nħarsu lejn iktar djalogu u
diskussjoni. Il-forzi politiċi, ġejjin
minn fejn ġejjin, iridu jifhmu li kull azzjoni tagħhom iġġib magħha
l-konsegwenzi. Jekk ikunu raġjonevoli,
allura l-pożizzjoni tippreċipita.
L-istabilità li għandna u rbaħna taf tintilef. Nittama li fil-jiem li ġejjin il-pożizzjoni
tinbidel u ma narawx dak li kellna ma’ wiċċna fl-aħħar ħames snin.
No comments:
Post a Comment