33504. L-ONOR. CARMELO MIFSUD BONNICI staqsa lill-Ministru għall-Ambjent, l-Enerġija u l-Indafa Pubblika: Tista’ l-Ministru tgħid liema xogħlijiet ġew esegwiti fil-Park Naturali ta’ Xrobb l-Għaġin matul is-sena 2025?
07/01/2026
ONOR. MIRIAM DALLI: Ninforma lill-Onor.
Interpellant li, matul is-sena 2025, ix-xogħlijiet li saru fil-Park Naturali
ta’ Xrobb l-Għaġin, f’Marsaxlokk, kienu varji u ffukati fuq il-konservazzjoni
ambjentali, ir-restawr strutturali, u l-modernizzar infrastrutturali. Saru xogħlijiet
fuq il-ġestjoni ekoloġika tal-park, fejn tħawlu diversi siġar u arbuxelli,
ittejbet is-sistema tal-irrigazzjoni, qtugħ tal-ħaxix, żbir tas-siġar, restawr
tal-ħitan tas-sejjieħ, tneħħija ta’ pjanti invażivi u tisbiħ ġenerali fiż-żoni
tal-pikniks.
Flimkien mal-isforzi ambjentali, saru interventi
fuq l-assi strutturali tal-park fejn saru titjib u manutenzjoni meħtieġa.
L-interventi li saru ġewwa s-sala tal-konferenzi u l-hostel, jinkludu
installazzjoni ta’ diversi units tal-arja kundizzjonata, fannijiet ġodda,
tibdil ta’ hand dryers, tneħħa l-membrane qadim minn fuq is-saqaf tas-sala
tal-konferenzi u tpoġġa ieħor ġdid, tibdil ta’ madum, tikħil u tibjid f’diversi
partijiet u kmamar ġewwa l-binjiet. Jikkumplimenta dan ix-xogħol saru
interventi ta’ manutenzjoni fuq il-bordijiet tad-distribuzzjoni ewlenin li
jipprovdu provvista tal-elettriku lill-park kollu u għall-proġett tat-tempju
ta’ Heritage Malta, kif ukoll manutenzjoni tal-plumbing.
Proġetti ta’ konservazzjoni notevoli inkludew
ukoll it-tisħiħ strutturali ta’ tank ġdid għall-fkieren u beda x-xogħol fuq
is-sistema ta’ filtrazzjoni tal-ilma baħar biex isir rimi tiegħu b’mod
sostenibbli u skont il-permessi fis-seħħ.
Dawn ix-xogħlijiet ekoloġiċi u strutturali kienu
akkumpanjati minn rondi tas-sigurtà ta’ kuljum u minn programm edukattiv
estensiv għall-iskejjel kif ukoll żjarat għall-pubbliku ġenerali.
Seduta Numru 432
No comments:
Post a Comment