L-UKRAJNA - GĦAJNUNA UMANITARJA

24727. L-ONOR. CARMELO MIFSUD BONNICI  staqsa lill- Deputat Prim Ministru u Ministru għall-Affarijiet Barranin u t-Turiżmu: Jista’ d-Deputat Prim Ministru u Ministru għall-Affarijiet Barranin u t-Turiżmu jindika kemm hija prevista u x’tip ser tkun l-għajnuna umanitarja ta’ pajjiżna lill-Ukrajna tul is-sena 2025?

 

17/01/2025

 

ONOR. IAN BORG:  Ninforma lill-Onor. Interpellant, li kif spjegajt fil-mistoqsija parlamentari 22859, il-Gvern Malti, inkluż il-Ministeru għall-Affarijiet Barranin u t-Turiżmu, ilu b’mod konsistenti jipprovdi appoġġ umanitarju lill-Ukrajna sa mill-bidu tal-invażjoni illegali mir-Russja. Din l-invażjoni kkawżat tbatija kbira u bla preċedent lill-poplu Ukren.

L-appoġġ tagħna se jkompli matul l-2025, bil-prijorità tkun li naħdmu b’kollaborazzjoni mill-qrib ma’ organizzazzjonijiet internazzjonali, inklużi dawk tan-Nazzjonijiet Maqgħuda, biex jindirizzaw is-sitwazzjoni umanitarja fl-Ukrajna. Nemmen bis-sħiħ li l-aħjar mod kif nipprovdu għajnuna effettiva huwa billi nsaħħu l-kapaċitajiet tal-atturi umanitarji li diġà qegħdin fuq il-post u huma familjari mill-qrib mal-ħtiġijiet urġenti tal-komunitajiet lokali.

Bħalissa, il-Ministeru għall-Affarijiet Barranin u t-Turiżmu qed iħejji l-pjan ta’ nefqa annwali għall-iżvilupp barra minn Malta għall-2025. Dan jeħtieġ konsultazzjonijiet mal-imsieħba Ewropej tagħna, u ma' organizzazzjonijiet umanitarji madwar id-dinja, inklużi organizzazzjonijiet fi ħdan in-Nazzjonijiet Magħquda, sabiex ikollna fehma ċara tal-ħtiġijiet li jeżistu u kif jistgħu jiġu indirizzati bl-aħjar mod.

Madanakollu, l-ewwel donazzjonijiet lill-entitajiet umanitarji huma mistennija jibdew fil-ġimgħat li ġejjin. L-Ukrajna u l-poplu tagħha se jibqgħu prijorità assoluta għall-azzjoni umanitarja tal-Gvern Malti sakemm tibqa’ teħtieġ l-għajnuna tagħna.

 

Seduta  304

28/01/2025