ĊIMITERJU TAL-ADDOLORATA - MONITERAĠĠ FUQ OQBRA ABBANDUNATI JEW DELAPIDATI

15638. L-ONOR. CARMELO MIFSUD BONNICI  staqsa lill- Ministru għas-Saħħa u l-Anzjanità Attiva: Jista’ l-Ministru jgħid jekk huwiex isir moniteraġġ fuq oqbra abbandunati jew delapidati jew li qed jagħmlu ħsara lill-oqbra oħrajn fiċ-Ċimiterju tal-Addolorata f’Raħal Ġdid? Jekk iva, jista’ jingħata rendikont ta’ dak li qiegħed isir?

 

25/01/2024

 

ONOR. JO ETIENNE ABELA:  Ninsab infurmat li ma jsirx monitoraġġ ta’ oqbra hekk indikati bħala abbandunati jew delapidati fiċ-ċimiterju tal-Addolorata f’Raħal Ġdid.  Dan għax dawn l-oqbra huma privati u għaldaqstant ikkunsidrati bħala responsabbilità tas-sidien jew werrieta tal-qabar.  Minkejja dan, meta l-uffiċċju tal-Amministrazzjoni tad-Dfin ikollu l-informazzjoni dwar xi ħsara li tkun qed issir, u jkollu l-kuntatt tas-sidien jew werrieta tal-qabar privat, dawn jiġu nfurmati dwar is-sitwazzjoni sabiex tiġi rranġata mill-aktar fis possibbli. 

Fir-rigward tal-oqbra komuni, il-manutenzjoni ssir mill-kumpanija li tmexxi l-Addoloratta bħala parti mill-konċessjoni li ngħatat lil din l-istess kumpanija fl-4 ta’ Frar 2019.

Ninsab infurmat ukoll illi hemm stanti fejn oqbra jiġu ssiġillati fuq xewqa tas-sidien kif ikun indikat fit-testmenti rispettivi tagħhom.  Ikun hemm stanti oħrajn fejn jew ma jibqgħax werrieta, jew il-werrieta ikunu siefru u għaldaqstant tali oqbra ma jibqgħux jintużaw mill-familjari.

 

Seduta  208

20/02/2024