12951. L-ONOR. CARMELO MIFSUD BONNICI staqsa lill- Ministru għall-Finanzi u x-Xogħol: B’referenza għat-tweġiba tal-mistoqsija parlamentari 11292, jista’ l-Ministru jgħid x’passi u miżuri qed jittieħdu sabiex it-3,471 persuna NEET jinġiebu lura biex jaħdmu jew jistudjaw?
31/10/2023
ONOR. CLYDE
CARUANA: Ngħarraf lill-Onor. Interpellant li l-Gvern, permezz
ta’ Jobsplus, ser ikompli joffri lill-persuni bejn l-età ta’ 15 sa 29 sena
l-iskema Garanzija għaż-Żgħażagħ.
Permezz ta’ din l-iskema, iż-żgħażagħ li la qegħdin f'impjieg u lanqas
fl-edukazzjoni u żgħażagħ li huma f'riskju li jaqgħu fil-kategorija NEET huma
pprovduti b'servizzi mfassla apposta biex jiggwidawhom biex ikomplu
bl-edukazzjoni tagħhom jew jidħlu f'impjieg bi qligħ. Biex tgħin
fl-integrazzjoni tan-NEETs fis-suq tax-xogħol, Jobsplus toffri wkoll inċentivi
finanzjarji lil min iħaddem permezz tal-Iskema tal-‘Access to Employment’ fejn min iħaddem jirċievi assistenza ta’
€110.93 (full-time) jew €55.47(part-time)
meta jimpjega kwalunkwe persuna bla xogħol ta’ bejn il-15 u l-24 sena li
qabel ipparteċipat u lestiet l-iskema tal-Garanzija għaż-ŻgħaŻagħ u tkun
ingaġġata għall-ewwel darba.
Jobsplus tamministra wkoll
il-proġett INTERCEPT li huwa mmirat
biex joħroġ il-potenzjal tan-NEETs bejn il-25 u d-29 fis-settur ekoloġiku.
Il-proġett wettaq riċerka dwar in-NEETS u l-kumpaniji ħodor, fejn ġew
identifikati l-ħtiġijiet u l-opportunitajiet f’dan il-qasam. Dan il-proġett
jinkludi taħriġ u placement fuq il-post tax-xogħol fis-settur ekoloġiku.
Apparti dawn il programmi,
Jobsplus toffri servizzi ta’ konsulenza dwar ix-xogħol sabiex tassisti
liż-żgħażagħ li huma mħajra jidħlu fid-dinja tax-xogħol. Jobsplus tikkollabora
wkoll ma’ entitajiet edukattivi sabiex toffri gwida dwar is-suq tax-xogħol, il-ħiliet
u l-opportunitajiet eżistenti.
Barra minn hekk, Jobsplus
hija involuta f’numru ta’ inizjattivi ta’ riċerka, bl-għan li jkollha iżjed
informazzjoni dwar iż-żgħażagħ u kif jistgħu jiġu megħjuna jilħqu
l-aspirazzjonijiet tagħhom.
Seduta 178
22/11/2023
No comments:
Post a Comment