UFFIĊĊJU TAL-AVUKAT ĠENERALI – ĠBIR TA’ FLUS

9267. L-ONOR. CARMELO MIFSUD BONNICI  staqsa lill- Ministru għall-Ġustizzja, Kultura u Gvern Lokali: Jista’ l-Ministru jinforma lill-Kamra kemm inġabru flus għad-drittijiet u spejjeż dovuti mill-Uffiċċju tal-Avukat Ġenerali tul is-sena 2013 u jekk huwa possibbli jindikahom xahar b’xahar?

05/05/2014

  ONOR. OWEN BONNICI:  B’riferenza għall-mistoqsija parlamentari 9267, ara t-tabella annessa hawn taht:

01/01/13 - 31/12/13

Jan-13   5,803.45

Feb-13   3,538.35

Mar-13   9,845.68

Apr-13   12,513.07

May-13   14,470.90

Jun-13   5,629.22

Jul-13   12,109.06

Aug-13   9,144.49

Sep-13   9,089.52

Oct-13   21,279.76

Nov-13   17,710.79

Dec-13   11,799.85

Total   132,934.14

Seduta  147

12/05/2014

MINISTERU GĦALL-FINANZI - XIRI TA' KAROZZI.

9168. L-ONOR. CARMELO MIFSUD BONNICI  staqsa lill- Ministru għall-Finanzi: Jista' l-Ministru jwieġeb il-mistoqsija parlamentari 7771 u jinfroma lill-Kamra bil-lista dettaljata kemm il-Ministeru awtorizza li jinxtraw karozzi ġodda tul l-aħħar sena u kemmil-kuntratt ġdid għall-kirjiet ta' vetturi tul l-istess sena mill-Gvern u kemm kien hemm każijiet ta' xiri u kiri ta' vetturi li ma kienx awtorizzat?

25/04/2014

ONOR. EDWARD SCICLUNA: Ngħarraf lill-Onorevoli Interpellant illi l-informazzjoni mitluba għadha qed tinġabar.

MINISTERU GĦALL-EDUKAZZJONI U X-XOGĦOL - RIŻENJI

9166. L-ONOR. CARMELO MIFSUD BONNICI  staqsa lill- Ministru għall-Edukazzjoni u x-Xogħol: Jista’ l-Ministru jinforma lill-Kamra kemm hemm diretturi ġenerali, diretturi u assistenti diretturi li rriżenjaw jew tneħħew fil-Ministeru u fid-dipartimenti li jaqgħu taħt ir-responsabilità tiegħu minn Marzu 2013 sal-ġurnata tal-lum? Jista’ jindika r-raġuni għar-riżenja tagħhom u l-pożizzjoni li kienu jokkupaw?

25/04/2014

  ONOR. EVARIST BARTOLO:  Ninsab infurmat li fil-perjodu bejn Marzu 2013 sal-ġurnata tal-lum, ma kien hemm l-ebda persuna fil-pożizzjoni ta’ direttur ġenerali, direttur jew assistent direttur li rriżenjaw jew tneħħew fil-Ministeru u fid-dipartimenti li jaqgħu taħt ir-responsabilita’ tiegħi.

Il-Fiera tal-Ktieb f’Turin.

1.         Matul din il-ġimgħa ġiet fi tmiemha l-Fiera tal-Ktieb ġewwa l-belt Taljana ta’ Turin.  Fiera li ilni nsegwi u nixtieq li nattendi għaliha għax tkun mimlija b’kotba ġodda, awturi, ideat u diskussjonijiet interessanti.  Din is-sena reġa’ kien hemm żieda fil-parteċipazzjoni tal-poplu, marru iktar minn 20 fil-mija.  Mhux biss, imma żdiedu wkoll il-kotba li ġew mibjugħa b’il fuq minn 25 fil-mija.  Dawn huma sinjali ċari ta’ suċċess quddiem il-fatt li fieri oħra tul din is-sena raw tnaqqis ta’ preżenzi u bejgħ.

2.         Ma hemmx dubju li dan huwa appuntament importanti mhux biss għall-Italja imma għad-dinja tal-letteratura Ewropea.  Il-kuntrast fil-ħsieb, l-iskambju ta’ ideat huma essenzjali mhux biss għal belt waħda imma għal dawk li jippruvaw iżommu ruħhom infurmati u aġġornati.  Proċess li f’pajjiżna f’mumenti deher li sejjer jaqbad, però ma rnexxilux biżżejjed għal varjetà kbira ta’ raġunijiet.  Naħseb li għandna d-dmir li naraw kif nistgħu, bħala poplu, nħajru iktar lil dawk li jistampaw, jippubblikaw, ibiegħu u jqassmu l-kotba biex jaqbdu din it-triq importanti.

3.         Fil-Fiera ta’ Turin laqtuni żewġ interventi interessanti, wieħed ta’ Roberto Saviano, li sar famuż bil-pubblikazzjoni tal-ktieb “Camorra”, kif ukoll dak ta’ Eugenio Scalfani li għamel żmien twil editur tal-gazzetta importanti “La Repubblica”.  Saviano, li reċentement kien il-mira ta’ diversi attakki xejn tajba dwar kitbietu, huwa u jieħu sehem f’diskussjoni dwar ktieb li għandu ma’ ħames kittieba oħra bl-isem “Sei fuori posto” qal: “Quello che mi sento di dire, nel clima complicato che viviamo e che sono sicuro gli altri colleghi condividono, è che raccontare significa resistere, raccontare non significa diffamare il proprio paese ma amarlo.”  Kunċett interessanti u veritier.  Il-kittieb jagħti minnu nnifsu lill-oħrajn sabiex jaqraw u jifhmu dak li jgħaddi fl-esperjenzi li jgħarbel.  Għalhekk ikompli jgħid: “Ē il lettore che rende pericoloso raccontare ciò che realmente accade” u iktar 'il quddiem ikompli: “questa è la potenza della letteratura.  Ē quello che fa paura, perchè quello che scrive diventa di chi lo legge.”  Ideat, ħsibijiet li jħalluk taħseb.

4.         It-tieni ktieb li qajjem ukoll dibattitu interessanti ġej mingħand il-fundatur ta’ “La Repubblica”, Eugenio Scalfari bl-isem “Per l’alto mare aperto”.  Ktieb mill-iktar studjat, mimli b’punti li jwassluk sabiex taħseb u tirrifletti.  F’ċertu sens nasal biex nikkonkludi li huwa l-aħjar ta’ dak kollu li ilu għaddej minnu dan il-bniedem intelliġenti.  L-awtur jitkellem fuq il-valuri u l-kulturi li tħaddnu minn diversi filosofi u ħassieba bħal Spinoza, Kant, Hegel, Diderot u Nietzche.  F’mument minnhom jitkellem fuq il-ġenerazzjonijiet ġodda u jgħid hekk: “Non amano leggere libri, non amano la parola scritta.  Non contestano, come facciamo noi, i valori dei nostri nonni e dei nostri padri per cambiarli : non lo fanno semplicemente perchè non vogliono nuovi valori. Vogliono ricominciare da zero, il che è pure importante.  Se li fanno da soli, i valori.”

5.         Dan huwa l-ispirtu li qiegħed jiżviluppa fi ħdan l-Ewropa moderna wara sekli twal ta’ tagħlim, riċerka u ħsieb.  Aħna m’aħniex wisq ‘il bgħid minnhom dawn il-pożizzjonijiet.  Jistgħu jgħaddu u ma narawhomx, nistgħu nifhmuhom aktar tard, però illum għandna l-opportunità unika li ngħarfuhom.  Il-pajjiż jikber meta jkollu diskussjonijiet fondi li permezz tagħhom suġġetti jiġu kkonfrontati sewwa u mhux b’mod superfiċjali.  Il-ġlieda f’dan is-seklu kif qalu tajjeb Saviano u Scalfari, hija dik li tikkumbatti l-kultura tal-“hit and run” jew tal-i”snatch and grab” li qegħda ġġib teknoloġija moderna fejn il-ħin huwa limitat, u tmur lejn waħda dettaljata li ma taċċettax statements faċli mingħajr ma narawhom fil-fond.

 Dan l-artikolu deher fil-harga tal-Illum tat-23 ta Mejju 2010.

Intransiġenza sterili.

1.         L-eventi parlamentari tal-aħħar jiem jitolbu riflessjoni.  Ħidma fl-isfond ta’ poplu li qiegħed jesiġi komportament differenti fi ħdan l-istituzzjoni demokratika tal-Kamra tad-Deputati.  Dak li ġara ngħid li ġieb miegħu diversi domandi minn dawk il-familji li huma mdorrija bi klassi politika li taħseb, tikkontribwixxi u tagħti lura ħsibijiet sabiex il-poplu jimxi 'l quddiem.  Ma nemminx li kien hemm għatx fl-elettorat għar-rulings ta’ l-iSpeaker, anqas wisq eċċitament għal xmara ta’ votazzjonijiet.

2.         Fil-jiem li qattajna hemm sas-siegħat bikrin ta’ filgħodu, daqqa fuq kif u min ivvota, oħra fuq il-minuti ta’ laqgħa jew fuq jekk kellniex nivvutaw, ma kellniex lill-poplu mwaħħal mar-radju jisma’.  Anzi, naħseb li dan l-aġir żied fil-kontenut ta’ dawk li jaħsbu kontinwament li l-politiċi huma żejda.  Ta’ dawk li jiddisprezzawna u, flok jarawna ta’ għajnuna, jarawna bħala xkiel għall-ħidma ekonomika tagħhom.

3.         F’dan is-sens nikteb sabiex nirriafferma l-valur tal-politika u ta’ dawk li ddedikaw ħajjithom bħala politiċi.  Fil-ħidma ta’ kull ġurnata, għalija u għal diversi oħra, jidher mill-iktar ċar li mingħajr il-paċi, it-trankwillità interna u l-użu tar-raġuni ma tagħtix lura ħidma tajba.  Il-Parlament m’huwiex magħmul minn bnedmin li ma jaqblu fuq xejn imma minn persuni li, għalkemm ikollhom punti ta’ opinjoni differenti, jaslu fi ftehim.  Kull membru huwa fid-dmir u mistieden jikkontribwixxi fil-liġijiet u ħsibijiet li jkunu għaddejjin.

4.         Meta tintilef ir-raġuni, meta jkun hemm aġir żbaljat u l-għajjat, meta jkun hemm intransiġenża, l-ispazju ta’ diskussjoni jidher li jonqos.  Ngħid li jekk fil-passat kien hemm min seta’ jappellalu dan l-aġir ta’ diffikultà, illum naqas ħafna.  Iż-żmien li għamilna nħarsu lejn xulxin waqt li l-minuti u s-siegħat prezzjużi kienu għaddejjin għandna nutilizzawh lejn ħidma futura aħjar.

5.         Hemm bżonn li r-raġuni terġa’ tieħu lura postha.  Il-kalma, t-trankwillità u l-ispirtu ta’ djalogu u diskussjoni, li ħafna drabi kienu jirrenjaw, hemm bżonn li jerġgħu jieħdu lura x-xettru.  F’dan kollu, r-riżenja tad-Deputat Speaker Carmelo Abela hija telfa għall-bilanċ parlamentari intern, vuċi leali lejn is-Sedja u moderata f’diskorsha u f’għemilha.  Fl-opinjoni tiegħi, dan kien żball politiku li l-Partit Laburista wettaq li ma fih ebda forma ta’ rabta ma’ dak li għaddejna minnu. 

6.         Fil-jum tal-Ħamis, 6 ta’ Mejju, l-irjus tal-kelliema fl-Oppożizzjoni kienu saħnu diġà sew.  Dan kien wisq ovvju mil-libertà aktar minn normali ta’ ċertifikati li ngħatat in-naħa tal-Gvern.  Id-diskors ta’ korruzzjoni kien għal kollox barra minn loku.  Mhux biss fil-każ innifsu, imma l-iktar għax dan hu partit politiku li assigura qafas ta’ liġijiet li jikkumbattu l-korruzzjoni bl-għeruq u x-xniexel.  Veru li hemm min jinsa, imma l-liġijiet hemm qegħdin.  Kull min jara aġir illegali għandu l-istrumenti kollha għad-disposizzjoni tiegħu sabiex imexxi u jassigura li jittieħdu passi kontra minn wettaq l-illegalità.  Rapporti, kif għamlu fil-passat, jistgħu jkomplu jsiru.  Però hemm id-distinzjoni bejn il-perċezzjoni u l-verità tal-fatti.

7.         Fil-Parlament, l-intransiġenza ma twassal lejn imkien.  In-nifs tal-Gvern ma jinqatax b’dawn il-metodi, anzi jossiġenawh aktar.  Voti kontra voti, rulings u iktar rulings, fl-aħħar tal-jum jieqfu mal-fatt li l-Partit Nazzjonalista qiegħed fil-Gvern.  Qiegħed hemm għax għażlu l-poplu.  Din kienet id-deċiżjoni elettorali u hija rispettata f’maġġoranza stabbli.  Dan hu l-punt f’din id-diskussjoni li jrid jiġi aċċettat mill-Oppożizzjoni, xejn iktar u xejn inqas.  It-triq tal-intransiġenza tagħmel ħsara lid-demokrazija u lil dak il-partit li jħaddanha.

Dan l-artikolu deher fil-harga tal-Mument tas-16 ta Mejju 2010

Umanitá u Ministeru.(wara l-mewt tal-Kappuċċin Patri William Axiaq)

 

1.         Nhar il-Ħadd li għadda xterdet l-aħbar li l-Kappuċċin Patri William Axiaq kien mar lura f’idejn Missierna.  Minnufih ġew quddiemi numru ta’ memorji mill-isbaħ li għandi ta’ dan il-bniedem umli li serva lill-proxxmu b’imħabba u dedikazzjoni.  Id-dinja fiha l-ikrah tagħha imma għandha wkoll l-aspett sabiħ, dak li jżommok għaddej anki meta tista’ tara li m’hemmx ħruġ mit-triq mudlama li tkun fiha.  Għal diversi persuni huwa serva bħala gwida, dawl, fejn il-pariri t-tajba ma jonqsux.  Kien dawl għal dawk fil-ħajja reliġjuża, kif ukoll għal dawk il-bnedmin l-oħra ta’ rieda tajba.

2.         Kellu kważi dejjem tbissima ħelwa u umli fuqu.  Rari ħafna kont tmur għandu u fil-pront ma kienx jilqgħek.  Dejjem miftuħ għall-ideat ġodda u preparat jiddiskuti kwalunkwe idea taħt il-kappa tax-xemx.  Kien bniedem li qara ħafna.  Niftakarni xi snin ilu nidħol fiċ-ċella tiegħu fil-kunvent ta’ Santa Liberata ġewwa l-Kalkara.  Kellu kwantità kbira ta’ kotba, kollha stivati b’ordni mill-iktar impressjonanti, wieħed wara l-ieħor, kollha wara xulxin.  Kien jemmen fl-ordni, fil-bżonn tal-perfezzjoni u dan kien jidher internament u esternament.

3.         Il-laqgħa fil-kunvent ma kinitx l-unika għax meta kien ikolli l-opportunità, u hu wkoll da parti tiegħu, kont insibni nitkellem miegħu fuq diversi punti ta’ interess intellettwali u reliġjuż.  Moħħ mill-iktar ċar, fin, u li jifhem mill-ewwel dak li tkun qiegħed tgħid u jgħinek tasal waħdek għal konklużjoni.  Niftakru meta jum minnhom kont onorat bil-preżenza tiegħu f’darna.  Kont għadni ma dħaltx fil-kamp politiku u kelli ftit iktar ħin għad-dispożizzjoni tiegħi.  Intlifna niddiskutu artikolu li kien kiteb fir-rivista pastorali “Pastor” li deher fil-ħarġa ta’ Novembru 1978 bl-isem “Umanità u Ministeru” u mingħajr ma ridna bdejna nqabblu l-ħidma reliġjuża ma’ dik politika.  Hu kien kiteb diversi artikoli tajba, però fuq dan bqajt norbot lili nnifsi fil-ħidma li dħalt għaliha aktar tard, speċjalment f’dak li kien qiegħed jara li għandhom ikunu l-kwalitajiet tas-saċerdot.

4.         Dwar il-bniedem għas-servizz totali ta’ l-umanità, is-saċerdot, huwa u jiċċita lill-Papa Piju XII kien kiteb hekk: “Il-perfezzjoni tas-saċerdot mhix ħaġa li tmur għal rasha, imma hija kwistjoni li timxi wara u titqiegħed fuq il-perfezzjoni naturali u umana ta’ dak li jkun.  Ħadd ma jsir saċerdot perfett, qabel ma dan, b’xi mod ikun bniedem perfett ...  Dal-bżonn huwa, biex ngħid hekk, aċċettat mill-poplu Nisrani, li jixtieq jara fir-ragħaj tiegħu bniedem aħjar minn ħaddieħor f’dawk li huma doti u virtujiet anki naturali, “persuna 'l fuq minn ħaddieħor” f’dawk li huma kwalitajiet intellettwali u morali, jiġifieri kolt, intelliġenti, ekwilibrat fil-ġudizzju, żgur u kalm f’egħmilu, imparzjali u ordnat, ġeneruż u pront għall-maħfra, ħabib, tista’ tiftiehem miegħu u għadu tal-għażż, f’kelma waħda “il-bniedem perfett ta’ Alla”.  Kliem li ma jieqfux jgħallmu fir-rilevanza ta’ ħidmet is-saċerdozju f’dawn iż-żminijiet li qed ngħixu.

5.         Fil-fatt, l-artikoli tiegħu kienu dejjem miktuba tajjeb.  Idum jaħseb qabel iqiegħed il-ħsieb fuq il-karta u kull darba wieħed ikun jista’ jsegwi l-loġika, l-prinċipji, l-valuri u l-konsistenza tiegħu.  Kien wieħed minn dawk l-intellettwali ta’ pajjiżna li bil-qari li kien kontinwament jagħmel kien kapaċi jikkontribwixxi wara li jgħarbel tajjeb.  Niftakar diskussjoni miegħu dwar Don Primo Mazzolari, saċerdot Taljan li kont skoprejt mill-kotba li kienu jiġu pubblikati miċ-Cinque Lune li dak iż-żmien kienet tistampa għad-Demokrazia Cristiana mentri hu kien qara direttament mill-pubblikazzjonijiet li għamel Mazzolari nnifsu.  Kien silifni żewġ kotba tiegħu, qrajthom u fil-pront tajthomlu lura.  Il-kotba għalih kienu ċwievet li bihom jista’ jiġbor u jagħti kliem ta’ għajnuna

6.         Illum nifhem kemm hu ta’ sehemu lix-xenarju reliġjuż, soċjali, kulturali u anki politiku ta’ pajjiżna.  Naħseb li kliemu jibqgħu tajba, mhux sempliċement fil-kuntest uniku ta’ żmienu imma applikabbli għal kull żmien.  Tajjeb jekk xi ħadd jaqbadhom u jiġborhom sabiex jiġu pubblikati għax fihom ħafna sens u sustanza.  Kotba li jistgħu jingħaqdu mad-diversi oħrajn li hu kien ippubblika.  Għandi numru minnhom li qegħdin fuq l-ixkafef ta’ dari u ma niddejjaqx narahom jiżdiedu b’kitbietu.

7.         Patri William Axiaq kien ukoll ċar ħafna waqt il-priedki tiegħu.  Dak li jaħseb kien iwasslu tajjeb mingħajr ebda forma ta’ retorika żejda jew ħsibijiet li ma jiftehmux.  Jekk għandu bżonn iwassal messaġġ kien jaf jagħmel dan u ma kienx hemm tlaqliq fih.  Ideat ċari li faċli jinftehmu u ma jkunx polemikużi, dritti għall-qalb u l-moħħ ta’ dawk li jkunu qed jisimugħ.  Niftakru jippriedka sija l-Kalkara, Għajn Dwieli kif ukoll Ħaż-Żabbar.  Proprju ta’ l-aħħar kienet viċin il-qalb tiegħu.  Irrakkonta u kiteb diversi artikoli fuq tfulitu u dak kollu li Ħaż-Żabbar u niesu kienu jirrappreżentaw għalih.  Ħsibijiet nobbli, mimlija b’umanità li ma hemmx dubju li kien iħoss ma’ kull karattru li kien jiddeskrivi, dan flimkien mal-imħabba partikolari għall-Madonna tal-Grazzja.

8.         Kien parti minn ġenerazzjoni ta’ żgħażagħ Żabbarin li daħlu mal-Kapuċċini.  Niftakar qablu lil Patri Arkanġlu li tant tgħallimt mingħandu wkoll.  Bnedmin kuraġġużi u konvinti minn dak li jaħsbu u jgħidu.  Min ried parir kienu jagħtuhulu dritti dritti.  Patri William kien jaf sew u ser jibqa’ fil-memorja ta’ ħafna li rabtu partijiet minn ħajtu miegħu, jien inkluż.  Niftakar b’mod iktar dirett meta darba mort għandu fis-sagristija ta’ Għajn Dwieli wara l-quddiesa tat-tmienja ta’ filgħodu u waqt li kont qed ngħidlu minn dak li kont għaddej qalli: “Il-jum li jieqfu jikkritikawk nieqaf nemmen fik.”  Qawwieli qalbi u bqajt naħseb fil-fond fuq dawn il-kliem.

9.         Kont naf li saħħtu ma tant kienet tajba għax l-aħħar li smajt il-quddies li kien iċċelebra l-Ewkaristija fiha qalli li ma kienx qed iħossu tajjeb u talabni nitlob għalih, bl-umiltà solita tiegħu.  Biss nammetti li ma kontx indunajt li kien qiegħed daqshekk ħażin.  Jiddispjaċini ferm li ma kellix l-opportunità nerġa’ narah għax f’dak il-jum konna tkellimna li għandi nistiednu d-dar sabiex nerġa’ ngawdi l-kumpannija tiegħu.  Biss ma kellux ikun, isejjaħ għal ħajja aħjar.  Reġa’ ssejjaħ lura fi ħdan il-Missier Etern.  Ser nitilfuh żgur fix-xenarju tagħna.  M’għandix dubju li ħalla warajh wirt imprezzabbli, sija fil-komunità Franġiskana kif ukoll għalina lkoll.  Kien bniedem mimli umanità li għex il-ministeru tiegħu sal-aħħar fil-perfezzjoni.

 Dan l-artikolu kien deher fil-harga tal-Illum tal-14 ta Mejju 2010.

Il-liġi u l-poplu

1.         Kien hemm żmien fiċ-ċiviltà tal-bniedem fejn il-liġijiet kienu ftit, jinġabru fi ftit artikoli li ma jaqbżux diversi paġni.  Ma hemmx dubju li kienet il-ħakma ta’ Ruma, l-ewwel repubblikana u wara imperjali, li bidlet din it-tendenza.  Fil-fatt, tant saru liġijiet f’dak il-perjodu li kellhom diffikultà huma stess sabiex jidentifikaw liema waħda tirbaħ fuq l-oħra.  Anzi, l-lejn is-sena 400 wara Sidna Ġesù Krisu qam ukoll il-punt ta’ x’sewwasew tgħid il-liġi.

2.         L-abbundanza ta’ liġijiet li nħarġu f’elf sena ta’ storja wasslu għal konfużjoni.  Liema hija l-liġi li għandha validità, x’inhuwa l-kontenut tagħha u x’interpretazzjoni korretta għandha tingħata?  Saru diversi attentati sabiex il-pożizzjoni tiġi ċċarata u l-amministrazzjoni tal-ġustizzja tkun iktar faċli, però dan baqa’ ma seħħx jekk mhux fir-renju ta’ l-Imperatur Ġustinjanu fis-sena 500.  Proprju minħabba din il-konfużjoni li ġie kompilat dokument uniku magħruf bħala l-Corpus Juris Civilis fejn ġew miġbura l-liġijiet kollha u għalhekk l-ewwel kodifikazzjoni estensiva.

3.         Dak huwa dokument legali li baqa’ dawl għal diversi ġenerazzjonijiet, però l-verità hija li ftit wara l-mewt tal-Imperatur, billi kienu voluminużi iżżejjed spiċċa biex beda jiġi skartat.  Ġie minflku formulat dokument iqsar u li kien għalihom iktar prattiku.  Fil-fatt, din hija lezzjoni li għandha tiftħilna għajnejna meta qisna niġġustifikaw l-eżistenza legali tagħna b’aktar liġijiet.  Għandna nieqfu naħsbu fuq dan fil-Kamra tar-Rappreżentanti tagħna.

4.         Ninnota li nisbni, f’diversi mumenti nara li altru dak li jkun ġie mgħoddi, diskuss u approvat fil-Parlament, u altru dak li huwa magħruf mal-poplu.  Mhux biss mal-pajjiż in ġenerali, imma wkoll fost min jipprattika fil-professjoni legali.  Sfortunatament hemm nuqqas ta’ informazzjoni lil min għandu jibbenefika prinċipalment mil-liġi.  Min l-iktar li għandu raġuni sabiex ikun jaf isib ruħu l-iktar nieqes mill-informazzjoni.

5.         Huwa però minnu li aħna uniċi għax għall-kuntrarju ta’ oħrajn għandna aċċess faċli għall-informazzjoni minn fuq it-teknoloġija moderna.  Il-liġijiet tagħna kollha jinsabu f’forma elettronika li kulħadd jista’ jara u jaqra.  Biss, dan waħdu ma jfissirx li b’daqshekk is-sitwazzjoni hija riżolta.  Il-liġi daqqa miktuba b’sempliċità u daqqa b’kumplikazzjonijiet kbar li anke min ilu jipprattika jsib diffikultà jifhem.  L-aċċess għal-liġi mhux biżżejjed, trid issir spjegazzjoni sempliċi.

6.         Diversi drabi nħares lura lejn numru ta’ liġijiet li saru u nqis kemm u sa fejn ħadmu.  Għalhekk nara bħala pożittiv li dawn b’xi mod niddiskutuhom sija fil-Parlament, kif ukoll fil-pubbliku.  Hemm tara kemm dak li sar jekk effettivament wasalx għand iċ-ċittadin tagħna.  Hemm dmir li naraw, l-ewwel, li nippruvaw inċekknu fil-volumi tal-liġijiet li għandna; it-tieni li nippruvaw inġibu iktar sempliċità fil-kliem użat, u t-tielet li nispjegaw aktar dak li jkun qiegħed isir u li effettivament sar.  Il-liġi ssir sabiex tagħti aktar drittijiet lil dan il-poplu, biex permezz tagħha tikber iktar il-ġustizzja soċjali u għandna nibqgħu għaddejjin sabiex infissru aħjar dak li ġibna fis-seħħ.

 Dan l-artikolu kien deher fil-harga tal-Illum tat-30 ta Mejju 2010.