12418. L-ONOR. CARMELO MIFSUD BONNICI staqsa lill-Ministru għall-Affarijiet Barranin u
Ewropej: Jista’ l-Ministru jgħid x’ħidma saret tul is-sena li għaddiet
mill-Ambaxxata ta’ Malta ġewwa Berlin il-Ġermanja?
17/01/2020
ONOR. EVARIST
BARTOLO: Ninsab infurmat li l’ħidma saret tul is-sena li
għaddiet mill-Ambaxxata ta’ Malta ġewwa Berlin il-Ġermanja hija kif gej:
Ħidma Politika
Ninforma lill-Onor.
Interpellant li matul is-sena li għaddiet (2019), l-Ambaxxata Maltija f’Berlin
inizjat u/jew ikkordinat numru ta’
żjarat u laqgħat fil-Ġermanja li kienu jinvolvu Ministri u Segretarju
Parlamentari, kif ukoll żjaratf’Malta, fosthom minn Ministru tal-Gvern Ġermaniz
u minn deputat mill-Bundestag.
Għall-ewwel darba, Malta kienet rappreżentata mill-Ministru għall-Affarijiet
Barranin fil-Konferenza dwar is-Sigurta’ li ssir kull sena fi Frar fil-belt ta’
Munich, il-“Munich Security Conference”.
L-Ambaxxata ħadet ħsieb li l-Ministru Carmelo Abela jiġi mistieden u ħejjiet
il-parteċipazzjoni tiegħu f’diversi sessjonijiet li saru matul il-Konferenza
fejn huwa għamel numru ta’ interventi. Il-Ministru kellu wkoll taħdidiet
uffiċjali mal-Ministru tal-Affarijiet Barranin tal-Armenja, li miegħu iffirma
Memorandum ta’ Ftehim, filwaqt li laqgħat bilaterali oħrajn saru mal-Ministri
tal-Affarijiet Barranin tal-Oman u tas-Sudan. Matul il-konferenza
(15-17.2.2019) il-Ministru kellu wkoll numru ta’ laqgħat ma’ Ministri u
rappreżentanti għoljin mill-Ġermanja u minn pajjiżi ohra. L-Ambaxxatur
akkompanja lill-Ministru waqt il-programm u l-laqgħat.
Iktar tard matul is-sena
l-Ambaxxata żammet kuntatt mal-organizzaturi tal-Munich Security Conference sabiex
taċċerta li l-Ministeru għall-Affarijiet Barranin Malti jkun rappreżentat
għall-darb’oħra fil-Munich Security
Conference 2020 li se ssir mill-14 sas 16 ta’ Frar 2020. F’Diċembru,
l-Ambaxxata kienet irrappreżentata f’laqgħa preparatorja li saret fi Munich
organizzata għall-rappreżentanti tal-Ambaxxati li l-membri tal-gvernijiet
tagħhom ġew mistiedna għall-konferenza. Fil-fatt il-preparamenti bħalissa huma
għaddejjin ġmielhom għall-parteċipazzjoni tal-Hon. Evarist Bartolo, Ministru
għall-Affarijiet Barranin u Ewropej, f’din il-konferenza.
Fl-okkażjoni tal-Fiera tat-Turiżmu ITB
li ssir kull sena f’Marzu f’Berlin, l-ikbar waħda tal-ġeneru tagħha fid-dinja u
li fiha Malta tieħu sehem permezz ta’ “stand” u delegazzjonijiet mill-MTA,
l-Air Malta, l-MIA u numru konsiderevoli ta’ rappreżentanti minn ditti privati,
l-Ambaxxata organizzat – f’isem l-MTA – riċeviment għal madwar 100 ruħ
mis-settur turistiku u tal-ivvjaġġar, ġurnalisti u rappreżentanti minn
assoċjazzjonijiet u ditti involuti fis-settur. L-istedina għal dan
ir-riċeviment ħarġet, mill-Ambaxxatur u miċ-Chairman tal-MTA, li ndirizzaw
lill-mistednin fil-bidu tar-riċeviment. It-turiżmu mill-Ġermanja lejn Malta
żdied kull sena matul dawn l-aħħar snin. Apparti mill-ITB, l-Ambaxxata tagħti
s-sostenn tagħha billi regolarment torganizza attivitajiet li juru
l-attrazzjonijiet ta’ Malta u Għawdex, eż. l-“Europa Lounge” f’Berlin (ara
isfel fis-sezzjoni “Promozzjoni ta’ Malta”). Is-sena l-oħra bdew wkoll l-ewwel
preparamenti inizjali għar-riċeviment annwali fl-okkażjoni tal-ITB Berlin 2020 li se tiġi mtellgħa
mill-Ambaxxata f’isem l-MTA, f’Marzu 2020.
Fiera oħra importanti li ssir kull sena ġewwa Berlin f’Jannar hija l-‘Green Week’. Barra l-esibizzjoni ta’
prodotti agrikoli, matul il-Fiera jiġu organizzati numru ta’ seminars u laqgħat
kif ukoll konferenza li fiha jieħdu sehem Ministri tal-Agrikoltura minn madwar
id-dinja. L-Ambaxxata ħadet ħsieb it-tħejjijiet li saru għall-parteċipazzjoni
tas-Segretarju Parlamentari Clint Camilleri u għenet matul iż-żjara tiegħu f’Berlin.
Ix-Charge d’Affairs a.i.
fl-Ambaxxata, Sephora Gauci, akkompanjat lis-Segretarju Parlamentari.
F’April, il-Ministru Joe Mizzi ħa sehem fil-konferenza Energy Transition Dialogue: New Horizons li saret fil-Ministeru
tal-Affarijiet Barranin Ġermaniż f’Berlin. L-Ambaxxata ikkordinat iż-żjara
tal-Ministru filwaqt li l-Ambaxxatur akkompanjah fit-taħdidiet li huwa kellu
mas-Segretarju Parlamentari fil-Ministeru Federali għall-Ekonomija u
l-Enerġija, Thomas Bareiss.
L-Ambaxxata origanizzat iż-żjara f’Malta tad-deputat tal-Bundestag Dr. Christoph Ploss (CDU), li huwa
r-‘rapporteur’ dwar Malta fil-Kumitat tal-Bundestag għall-Affarijiet tal-Unjoni
Ewropea u membru fil-Kumitat tal-Bundestag għat-Trasport u l-Infrastruttura
Diġitali. L-Ambaxxatur iltaqa’ ma’ Dr. Ploss darbtejn qabel dan ġie Malta. Waqt
li kien Malta, Dr. Ploss iltaqa’, fost l-oħrajn, mal-Ministru l-Professur
Edward Scicluna, mas-Segretarju Parlamentari Dr. Aaron Farrugia, ma’
rappreżentanti mill-MFTP, mal-Professur Stephen Calleja u Dr. Monika Wohlfeld
mill-MEDAC.
Fit-18 ta’ Jannar l-Ambaxxatur kellu laqgħa twila mal-membri tal-Bundestag li
jiffurmaw parti mill-grupp ‘Seenotrettung’
(Sea Rescue) dwar is-sitwazzjoni tar-refuġjati u tal-migranti
fil-Mediterran. F’dan il-grupp hemm rappreżentati l-partiti kollha
fil-Bundestag barra l-partit AfD. Il-grupp huwa mmexxi mid-deputat president
(deputy speaker) tal-Bundestag, Claudia Roth. Matul il-laqgħa ġiet diskussa
l-possibilta’ li s-Sinjura Roth u l-membri tal-grupp jiġu Malta biex jaraw
b’għajnejhom is-sitwazzjoni diffiċli li tinsab fiha Malta u biex jaraw kif
Malta tista’ tigi mgħejuna.
Kull darba li l-AFM kienu
involuti f’operazzjonijiet ta’ salvataġġ
ta’ refuġjati jew migranti, l-Ambaxxata bgħatet l-informazzjoni rispettiva
lill-media, lill-Uffiċċju tal-President Ġermaniz, lill-Uffiċċju tal-Kanċillier,
lill-Ministeru tal-Affarijiet Barranin u diversi għaqdiet u persuni li
jikkuntattjaw l-Ambaxxata dwar dan is-suġġett. Dan biex nagħmluha ċara li,
f’dan il-qasam, kontra dak li kultant jiġi rrappurtat, Malta mhux biss dejjem
wettqet l-obbligi tagħha iżda wkoll marret oltre. Dan il-punt jiġi kkomunikat
ta’ spiss fil-laqgħat u l-kuntatti li l-istaff diplomatiku tal-Ambaxxata jkollu
mal-uffiċjali Ġermaniżi u dawk minn ambaxxati oħra ġewwa Berlin. B’riżultat
tal-inizjattivi tal-Ambaxxata, il-midja Ġermaniża diversi drabi tat prominenza
lix-xogħol tal-AFM. L-Ambaxxata osservat u rrappurtat b’reqqa u ta’ spiss dwar
id-diskussjoni dwar il-politika tal-migrazzjoni fil-Ġermanja kif wkoll dwar
x’kien qed jingħad fil-midja Ġermaniża dwar il-migrazzjoni fil-Mediterran.
L-Ambaxxata bagħtet wkoll stedina mingħand l-Onor. Dr Michael Farrugia
lill-E.T. Horst Seehofer, il-Ministru tal-Intern tal-Ġermanja sabiex jattendi
l-Laqgħa Ministerjali dwar il-Migrazzjoni li saret f’Malta f’Settembru 2019.
Kull sena ir-reġjun ta’
Ahrweiler, viċin ta’ Bonn, jorganizza programm kbir ta’ attivitajiet mifrux fuq
diversi gimgħat imsejjaħ “Ahrweiler Freiheitswochen” (Il-Ġimghat tal-Liberta
ta’ Ahrweiler). Is-suġġett din id-darba kien il-Futur tal-Ewropa. Il-programm
ta’ din is-sena sar taħt il-patruċinju
tal-Ambaxxatur Malti fil-Ġermanja li fetaħ il-programm uffiċjalment waqt
ċerimonja fl-14 ta’ Marzu fil-belt ta’ Remagen. B’hekk Malta ingħatat
pubbliċita’ bi prominenza fil-media. L-Ambaxxatur kien mistieden iżur ir-reġjun
fejn ta tlett taħdidiet, wieġeb domandi u kellu laqgħat ma’ diversi persuni
distinti li kienu preżenti għad-diskorsi tiegħu, fosthom deputati
mill-parlament tal-istat federali ta’ Rheinland-Pfalz (Rhineland Palatinate – belt
kapitali Mainz) u s-Sinjura Barbara Genscher, l-armla tal-ex Ministru
tal-Affarijiet Barranin Ġermaniż, Hans-Dietrich Genscher. Huwa kellu wkoll
laqgħa ma’ grupp kbir ta’ studenti minn tlett kulleġġi fir-reġjun li magħhom
iddiskuta r-rwol ta’ Malta fl-Ewropa, l-edukazzjoni u ż-żgħażagħ, kif ukoll
l-qagħda soċjali fil-pajjiż. Dwar din il-laqgħa kien hemm rapporti estensivi
fil-media.
L-Ambaxxatur kien involut
f’taħdidiet li bdew fl-2018 u issoktaw fl-ewwel xhur ta’ din is-sena ma’
rappreżentanti mill-Ministeru tal-Affarijiet Barranin tal-Ġermanja kif ukoll
ma’ persuni mis-settur akkademiku sabiex il-Gvern Ġermaniz ikompli jiffinanzja
il-katedra Ġermaniża fil-MEDAC
(“German Chair in Peace Studies and Conflict Prevention”). Wara diversi sinjali
li dan kien ser iseħħ, f’April waslet il-konferma uffiċjali li l-Ġermanja ser
tkompli tiffinanzja din il-katedra għal sentejn oħra. Iktar kmieni din is-sena,
fid-9 ta’ Jannar 2020, l-Ambaxxatur Ġermaniż għal Malta Walter Haßmann, f'isem
l-Uffiċċju Federali għall-Affarijiet Barranin tal-Ġermanja u l-Professur
Godfrey Pirotta, President tal-MEDAC, iffirmaw ftehim ta’ estensjoni
fil-preżenza ta' l-Onor. Carmelo Abela, Ministru għall-Affarijiet Barranin u
l-Promozzjoni tal-Kummerċ. Dan il-ftehim se jara t-tkomplija tal-katedra
Ġermaniża għall-Istudji għall-Paċi u l-Prevenzjoni tal-Kunflitti fil-MEDAC, li
jikkonferma l-interess tal-Ġermanja fir-Reġjun tal-Mediterran.
Matul April saru preparamenti
għaż-żjara f’Malta tal-Ministru Ġermaniż
Hubertus Heil, il-Ministru fil-Gvern Federali għall-Impjiegi u Affarijiet
Soċjali, li seħħet f’Mejju. F’Malta, il-Ministru Heil kellu taħdidiet uffiċjali
u żar kumpaniji Ġermaniżi li joperaw f’Malta.
Saru wkoll il-preparamenti
għall-parteċipazzjoni tal-Ministru Carmelo Abela flimkien mal-Ambaxxatriċi
Prof. Simone Borg fil-Climate &
Security Conference f’Berlin. Fil-fatt, il-konferenza saret f’Ġunju u fiha
hadu sehem il-Ministru u l-Ambaxxatriċi. Il-parteċipazzjoni ta’ Malta f’din
il-konferenza seħħet wara li l-Ambaxxata ħadet ħsieb takkwista stedina
ufficjali.
L-Ambaxxata għenet ukoll
fit-tħejjija għall-parteċipazzjoni tal-Prim Ministru Dr Joseph Muscat
fiċ-ċerimonja tal-għoti tal-Premju Karlu Manju 2019 “Charlemagne Prize 2019” li saret fil-belt ta’ Aachen.
L-Ambaxxata għamlet kuntatt
maċ-Ċentru tal-Kontroll tat-Traffikuta’
Berlin u b’koordinazzjoni ma’ Transport Malta għamlet il-preparamenti
meħtiega sabiex delegazzjoni esperta minn Transport Malta żżur iċ-Ċentru
tal-Kontroll tat-Traffiku ta’ Berlin. Il-visita saret fl-20 t’Awwissu 2019
bl-għan li tiġi esplorata kooperazzjoni possibli għall-immaniġjar aħjar
tat-traffiku f’Malta. L-Ambaxxatur akkompanja lid-delegazzjoni Maltija waqt
iż-żjara taghhom ġewwa Berlin. Saru wkoll l-ewwel kuntatti sabiex issir żjara
fiċ-Ċentru tal-Kontroll tat-Traffiku ta’ Munich għall-konsultazzjonijiet
tekniċi. Ġie stabbilit wkoll kuntatt mad-Deutsches
Verkehrsforum, assoċjazzjoni ekonomika li sservi ta’ pjattaforma għal
diskussjoni bejn in-negozju, il-politika u x-xjenza dwar il-kwistjonijiet kollha
tat-trasport u li jippromwovi inizjattivi, ideat u impulsi għat-titjib
tal-kundizzjonijiet tat-traffiku fil-Ġermanja u fl-Ewropa.
Wara li ġie mħabbar li Dr
Ursula von der Leyen ġiet magħżula bħala l-President tal-Kummissjoni Ewropea,
il-Ministru għall-Intern u s-Sigurta’ Nazzjonali ta’ dak iż-żmien, f’Awwissu
l-Onor. Dr Michael Farrugia u l-Ambaxxatur attendew ċerimonja fuq stedina tal-Gvern Ġermaniż ad unur Dr Ursula von der
Leyen, li sa qabel ġiet innominata bħala President tal-Unjoni Ewropea
kienet il-Ministru tad-Difiża tal-Ġermanja.
Matul Ottubru u Novembru 2019
saru l-preparamenti għall-parteċipazzjoni tal-Onor. Ministru Carmelo Abela
fiċ-ċelebrazzjonijiet li saru fl-okkażjoni tat-30 anniversarju mill-waqgħa tal-Ħajt ta’ Berlin fid-9 ta’ Novembru,
li għalihom huwa kien mistieden mill-Ministru għall-Affarijiet Barranin
Ġermaniż l-E.T. Heiko Maas. L-Ambaxxatur akkompanja lill-Ministru f’din
l-okkażjoni.
L-Ambaxxata għenet sabiex
uffiċjali mid-Direttorat għad-Difiża tal-Ministeru għall-Intern u s-Sigurta’
Nazzjonali ta’ Malti jattendu l-Berlin
Security Conference li saret f’Novembru 2019.
Matul is-sena 2019,
l-Ambaxxata kompliet tosserva l-iżviluppi
politiċi fil-Ġermanja, kemm dawk domestiċi kif wkoll dawk li jirrigwardjaw
il-politika barranija tal-pajjiż u rrappurtat dwarhom lill-Ministeru
tal-Affarijiet Barranin u l-Promozzjoni tal-Kummerċ. Pereżempju, l-Ambaxxata
ġabret informazzjoni u irrapportat ta’ spiss dwar il-Proċess ta’ Berlin dwar il-Libja, li beda f’Settembru 2019 b’numru
ta’ laqgħat ta’ uffiċjali għolja li ħejjew għall-laqgħa ta’ numru ta’
kapitijiet ta’ stat u ta’ gvern ġewwa Berlin li saret fid-19 ta’ Jannar 2020.
Kuljum, bħal ma tagħmel
regolarment, l-Ambaxxata bagħtet Malta rapporti dwar artikli relevanti li
jidhru fil-media Ġermaniża, u darba fil-ġimgħa bagħtet rapport iktar estensiv
b’sezzjoni dwar Malta kif issemmiet
fil-midja Ġermaniża. Intbagħtu wkoll regolarment traduzzjonijiet
għall-Ingliz ta’ artikli Ġermanizi li kellhom x’jaqsmu ma’ Malta.
L-istaff tal-Ambaxxata ħa
sehem u rrapporta dwar diversi
konferenzi u seminars ta’ interess kif ukoll ‘briefings’ li saru
fil-Ministeri Ġermaniżi qabel/wara il-laqgħat Ministerjali tal-Kunsill
tal-Unjoni Ewropea, bħal FAC (Foreign Affairs Council), GAC (General Affairs
Council), ECOFIN (Economic and Financial Affairs Council), AGRIFISH
(Agriculture and Fisheries) u l-JHA (Justice and Home Affairs Council). Barra
minn hekk, membri mill-Ambaxxata attendew ukoll ċerti debriefings li saru wara
laqgħat li kellhom il-kanċillier jew Ministri tal-Gvern Federali ma’
interlokuturi minn pajjiżi oħra.
L-Ambaxxatur u l-First Secretary
tal-Ambaxxata attendew diversi attivitajiet li saru f’Berlin li jikkonċernaw
l-Unjoni Ewropea, li jinkludu dawk organizzati mill-Presidenza kemm dik Rumena
kif ukoll dik Finlandiża tal-Kunsill tal-UE. Dawn l-attivitajiet kienu jinkludu
il-preżentazzjoni tal-prioritajiet tar-Rumanija u tal-Finlandja
għall-Presidenza rispettiva tagħhom u diskussjoni li saru fir-rappreżentanza
tal-Kummissjoni Ewropea f’Berlin, il-“working lunches” mogħtija mill-Ambaxxatur
Rumen u l-Ambaxxatriċi Finlandiża fejn il-mistieden tal-unur ikun ministru
federali, ministru tal-istat jew xi persuna distinta oħra, u attivitajiet
kulturali.
B’ħarsa ‘l quddiem lejn din
is-sena (2020), l-Ambaxxata segwiet mill-qrib il-politika Ewropea tal-Ġermanja,
peress li fit-tieni nofs tas-sena 2020 il-Ġermanja se jkollha l-Presidenza
tal-Kunsill tal-UE. Fis-sena 2019 bdew wkoll l-ewwel diskussjonijiet dwar
il-possibilita’ ta’ żjara ta’ xogħol tal-E.T. il-President ta’ Malta ġewwa
l-Ġermanja. L-Ambaxxata kienet ukoll f’kuntatt mal-Ministeru għall-Affarijiet
Barranin u mal-Bundestag (parlament) Ġermaniż dwar il-possibilita’ ta’ żjara
mill-Grupp Parlamentari Malta-Ġermanja f’Malta iktar tard din is-sena.
Il-mandat tal-Ambaxxatur
Friggieri f'Berlin intemm fit-31 ta’ Diċembru 2019. Huwa għamel numru ta’
żjarat ta’ tislima lil diversi uffiċjali Ġermaniżi, fosthom fil-Ministeru
għall-Affarijiet Barranin u fl-Uffiċċju tal-President Federali. Fis-27 ta’
Novembru 2019, l-Ambaxxatur ġie mistieden għall-farewell lunch għalih ospitat mir-Rappreżentant Speċjali
tal-Uffiċċju għall-Affarijiet Barranin Ġermaniż għar-Relazzjonijiet mal-Istati
Membri tal-UE, l-Ambaxxatriċi Sybille Katharina Sorg. Hi irringrazzjat
lill-Ambaxxatur Friggieri għall-koperazzjoni tajba u l-pariri siewja li kien ta
lill-Uffiċċju Federali tal-Affarijiet Barranin u istituzzjonijiet Ġermaniżi
oħra matul dawn l-aħħar sitt snin, speċjalment il-mod kif spjega Malta
lill-kontropartijiet Ġermaniżi tiegħu. Hija elenkat numru mill-kisbiet l-oħra
tiegħu matul il-mandat tiegħu fil-Ġermanja, bħall-isforzi tiegħu biex turi
Malta permezz tal-ħafna lekċers li huwa għamel madwar l-istati federali
Ġermaniżi biex jagħmel lil Malta magħrufa fil-Ġermanja, il-parteċipazzjoni
tiegħu f'diskussjonijiet pubbliċi kif ukoll permezz tal-attivitajiet kulturali,
avvenimenti organizzati mill-ambaxxata. Waqt din l-ikla, l-Ambaxxatur Friggieri
emfasizza r-relazzjonijiet tajbin bejn Malta u l-Ġermanja, kif wkol l-impenn
ta’ Malta biex tippromwovi l-paċi u l-kooperazzjoni fil-Mediterran. Hu semma
diversi eżempji bħall-parteċipazzjoni attiva tagħna fl-Unjoni għall-Mediterran
/ fis-Summits taż-¯ewġt Ixtut; fil-Fondazzjoni Anna Lindh kif ukoll
f’inizjattivi speċjali, bħall-ewwel Arab-European Businesswomen Forum li sar
Malta f’Novemberu 2019.
Kummerċjali
L-Ambaxxatur kompla bis-sensiela ta’
taħdidiet pubbliċi u laqgħat li ilu għaddej bihom għal żmien twil u li
fihom jittratta aspetti varji tal-kultura, l-ekonomija u l-ħajja soċjali
f’Malta u kuntatti bejn Malta u l-Ġermanja. Dawn l-attivitajiet komplew isiru,
fuq medja ta’ 1-2 fix-xahar, kemm fl-Ambaxxata kif ukoll f’postijiet oħrajn
barra Berlin. L-għanijiet ta’ dawn l-attivitajiet huma li Malta ssir iktar
magħrufa fil-Ġermanja (l-iktar f’dawk ir-reġjuni fejn s’issa ftit hija
magħrufa), u b’hekk jiżdied l-interess f’Malta biex jikber it-turiżmu, sabiex
dawk li jattendu isiru jafu iktar dwar il-kuntatti li diġa jeżistu bejn iż-żewġ
pajjiżi f’diversi setturi, jifhmu il-possibiltajiet ta’ “Doing Business in Malta”,
u biex jiġu esplorati oqsma ta’ interess komuni.
Eżempji: L-Ambaxxatur ta taħdita fil-belt ta’ Wittenberge, ltaqa’ ma’ 22
student tal-aħħar sena mill-Gustav Heinemann Oberschule u ma’ l-għalliema
tagħhom qabel ġew Malta fuq żjara edukattiva, u kellu laqgħa oħra ma’ grupp
mid-distrett ta’ Teltow-Fläming, inklużi persuni fil-kummerċ (fosthom sidien
ta’ katina ta’ supermarkets) immexxija minn Danny Eichenbaum MdL deputat
tas-CDU fil-parlament tal-istat federali ta’ Brandenburgu. Matul is-sena saru
attivitajiet oħra ta’ dan it-tip, waħda f’ Ġunju fil-belt ta’ Köthen u oħra
ftit iktar tard fil-belt ta’ Brandenburg an der Havel. Mhux l-ewwel darba li,
wara dawn l-attivitajiet, jiġi ffurmat grupp biex iżur Malta jew jintwera
interess f’xi qasam partikulari. Ngħidu aħna, fil-każ tal-grupp mid-distrett
ta’ Teltow-Fläming, imsemmi hawn fuq, l-interess kien fi skambjar ta’ żgħażagħ
għal skopjiet ta’ taħrig vokazzjonali - li diġà beda jseħħ. Fil-każ tat-taħdita
f’Wittenberge, fejn hemm wieħed miċ-ċentri l-iktar attrezzati biex jitħarrġu
l-għaddasa, l-interess kien f’Malta bħala destinazzjoni għall-għaddasa, settur
b’potenzjal sinifikanti fil-Ġermanja.
Fi Frar, l-Ambaxxatur żar il-“Handwerkskammer” (Chamber of Skilled Crafts and Trades) ta’ Hanover, waħda mill-ikbar
kmamar ta’ snajja speċjalizzati fil-Ġermanja. Hemmhekk iddiskuta mal-President
Wilhelm Steinmann u s-CEO Peter Karst diversi ideat dwar kif jistgħu jikbru
l-kuntatti ma’ Malta, kemm bħala lok għall-manufattura ta’ ċertu prodotti kif
ukoll fis-settur tat-taħriġ ta’ żgħażagħ fi snajja speċjalizzati. Bħala
riżultat ta’ din iż-żjara, is-CEO Peter Karst ġie Malta f’April u ltaqa’, fost
oħrajn, mal-Ministru Bartolo.
Ta’ importanza kienet iż-żjara li għamel f’Malta ir-rappreżentant tal-“gtai” (Germany Trade and Invest). L-Ambaxxatur
iltaqa’ ma’ dan ir-rappreżentant (Oliver Döhne) qabel ġie Malta, baqa’
f’kuntatt miegħu u għamillu l-appuntamenti neċessarji ma’ persuni li setgħu
jagħtuh l-informazzjoni li xtaq (Malta Enterprise, Trade Malta, Bank Centrali,
Chamber of Commerce, Industry and Enterprise). Ir-rapporti li jsiru mill-gtai
(li hija aġenzija tal-Gvern Federali) dwar il-pajjiżi rispettivi huma kruċjali
f’każ li investitur jew kummerċjant ikun qed jikkonsidra jinvesti jew
jinnegozja ma’ pajjiż partikulari. Fir-rapport il-ġdid li ppublikat il-“gtai”
din is-sena joħorgu ċari dawn il-fatti: il-qagħda b’saħħitha tal-ekonomija
Maltija, ir-ritmu mgħaġġel li bih qed tikber, il-proġetti kbar ippjanati, u
l-oqsma li investituri jew nies tan-negozju Ġermaniżi għandhom jikkunsidraw
meta jħarsu lejn Malta. L-Ambaxxata tgħaddi lill-Malta Enterprise u
istituzzjonijiet oħra f’Malta kuntatti jew talbiet għal informazzjoni minn
persuni, kumpaniji jew aġenziji minn oqsma differenti li jistgħu ikunu ta’
interess.
F’Settembru, waqt żjara
f’Malta, l-Ambaxxatur iltaqa’ mal-membri tal-Kunsill tan-Negozju Ġermaniż-Malti
(German-Maltese Business Council). Preżenti kien hemm ukoll il-Kap
tal-Affarijiet Ekonomiċi u Kummerċjali fi ħdan l-Ambaxxata Ġermaniża kif wkoll
uffiċjal mid-Desk Kummerċjali fil-Ministeru għall-Affarijiet Barranin u
l-Promozzjoni tal-Kummerċ. L-Ambaxxatur akkompanja grupp ta VIPs mill-istat
Ġermaniż ta’ Baden-Württemberg għal laqgħa mal-Ministru tal-Edukazzjoni u
x-Xogħol.
Promozzjoni ta’ Malta, diplomazija
kulturali u diplomazija pubblika
F’Jannar, l-Ambaxxata irranġat programm għal żjara edukattiva f’Malta minn 24
student mill-Berlin Campus - Stanford
University taħt it-tmexxija tal-Professur Uli Brückner. L-Ambaxxata ippreparatilhom
programm intensiv li kien jinkludi laqgħa mal-Eċċellenza Tagħha il-President
ta‘ Malta, viżita tal-bini tal-Parlament u laqgħa ma’ Mr Speaker Dr. Angelo
Farrugia, u diskussjoni mal-Ministru Evarist Bartolo. Din kienet it-tieni darba
li l-Ambaxxata ħadmet mal-Campus ta’ Berlin ta’ Stanford biex grupp ta’
studenti jżuru Malta; l-Ambaxxata kienet ikkordinat l-ewwel żjara fl-2015.
Fuq stedina tat-tmexxija tal-“Europaschule” (skola Ewropea) Kinderakademie der Johanniter fil-belt ta’
Eberswalde fl-istat federali ta’ Brandenburgu, l-Ambaxxatur u l-First Secretary fl-Ambaxxata żaru
l-iskola u tkellmu mal-għalliema u ma’ ħafna mill-istudenti fil-klassijiet
tagħhom. Saret talba għal kuntatt ma’ skola Maltija u biex jinstabu pen-friends
Maltin għat-tfal tal-iskola. Dan qed isir fi ħdan il-MEDE. L-istedina biex
l-Ambaxxatur iżur l-iskola saret wara li ftit qabel hu kien għamel żjara
uffiċjali, ta taħdita pubblika fil-belt u kellu laqgħat mal-awtoritajiet inkluż
is-sindku u t-tim tiegħu.
L-Ambaxxatur kien mistieden jieħu sehem f’diskussjoni
– flimkien ma’ speċjalista dwar is-suġġett, ma’ membru tal-parlament Ewropew u
flimkien ma’ professur tal-psikoloġija mill-Universita’ Humboldt – li saret
f’ċinema ewlieni f’Berlin wara l-ewwel wirja tal-verżjoni Ġermaniża tal-film
“The Erased Son” (titlu bil-Ġermaniż: ‘Der verlorene Sohn’). Il-film famuż
jittratta il-problemi u t-tbatija li jgħaddu minnhom ġuvni Amerikan u l-familja
tiegħu meta hu jiġi furzat jattendi kors ta’ “conversion therapy”. Malta kienet
ippreżentata mill-organizzaturi bħala xempju ta’ kif għandhom isiru
l-affarijiet f’dan il-qasam, filwaqt li l-Ambaxxatur spjega s-sinifikat
tal-liġi li tipprojbixxi din it-tip ta’ hekk imsejħa “terapija”.
Grupp ta’ studenti flimkien mal-professuri tagħhom mill-Berlin School of
Economics and Law (HWR) xtaqu preżentazzjoni
dwar Malta, l-infurzar tal-liġi u l-korp tal-pulizija. Għal dan il-għan
kellhom laqgħa fl-ambaxxata mal-Ambaxxatur u ma’ l-First Secretary. Wara s-suċċess li kellha laqgħa s-sena l-oħra,
beda x-xogħol fuq żjara oħra ġewwa l-Ambaxxata ta’ 15-il student mill-istess
skola u li fil-futur beħsiebom jokkupaw karigi għolja fil-pulizija, u fejn
ic-Charge’ d’Affaires, a.i. se tagħti preżentazzjoni dwar Malta u l-infurzar
tal-liġi f’pajjiżna.
L-ambaxxata pparteċipat fl-Europa Lounge, organizzata mill-Rappreżentazzjoni tal-Istat Federali ta’
Baden-Württemberg f’Berlin, fejn, bl-għajnuna tal-MTA Frankfurt, ġew offruti
ikel u xorb Malti filwaqt li Malta ngħatat pubbliċita’ b’diversi metodi. Kien
hemm madwar 1500 mistiedna, inklużi rappreżentanti tal-politika, mill-mezzi
tax-Xandir, mis-settur ekonomiku u l-korp diplomatiku. L-istaff tal-Ambaxxata
wieġeb diversi mistoqsijiet dwar Malta.
Permezz tal-Konslu Onorarju ġewwa Munich, l-Ambaxxata għenet wkoll billi
offriet materjal promozzjonali dwar Malta kif wkoll xorb Malti għal avveniment
li sar ġewwa Munich bejn numru ta’ konsli favur l-UE.
L-Ambaxxata kompliet tkun involuta fil-laqgħat u l-avvenimenti
tal-EUNIC (EU National Institutes of Culture) ġewwa Berlin. Fid-9 ta’
Mejju, l-Ambaxxata ipparteċipat ukoll f’avveniment ta’ qari ta’ ħrejjef Ewropej
bil-Ġermaniż lil grupp kbir ta’ tfal minn skejjel primarji f’Berlin
fl-okkażjoni ta’ Jum l-Ewropa. L-Ambaxxata ħadet sehem permezz ta’ qari ta’ ħrafa
Maltija li ġiet maqluba għall-Ġermaniż mill-istaff tal-Ambaxxata għal din
l-attivita’. Fit-23 ta’ Mejju, l-Ambaxxata ospitat sessjoni plenarja tal-EUNIC bil-parteċipazzjoni ta’ 30
rappreżentant minn Istituti Kulturali Ewropej varji ġewwa Berlin. Matul din is-sessjoni, ġie elett l-ewwel
Deputat Speaker (id-Direttur tal-Istitut Kulturali Ċek), u wara saret
diskussjoni dwar l-organizzazzjoni ta’ avvenimenti bħal dawk li jsiru matul
il-Jum Ewropej tal-Lingwi (li l-Ambaxxata tipparteċipa fih kull sena). F’Settembru
2019, l-Ambaxxata pparteċipat fl-avvenimenti konnessi mal-Jum Ewropej tal-Lingwi billi tagħti żewġ “crash-courses” fil-Malti
bażiku lil studenti f’żewġ skejjel primarji f’Berlin. L-esperjenza uriet li
kemm it-tfal kif ukoll l-għalliema u l-ġenituri tat-tfal japprezzaw ħafna dawn
it-tip ta’ attivitajiet. Tħejja wkoll kwiżż lingwistiku fir-Rappreżentazzjoni
tal-Kummissjoni Ewropea fis-26 ta’ Settembru u l-Ambaxxata pproduċiet diversi
mistoqsijiet dwar il-Malti għal dan il-kwiżż.
L-Ambaxxatur kien mistieden
jagħti taħdita fil-belt ta’ Adenau.
Fost affarijiet oħra, huwa tkellem dwar il-kuntatti bejn il-belt ta’ Adenau u
Malta. Dawn jinkludu kemm rabtiet storiċi – f’Adenau kien hemm kummenda
(‘commandery’) tal-Ordni – kif ukoll kuntatti iktar reċenti. F’Adenau kienet
twaqqfet lejn l-aħħar tat-tmeninijiet u l-bidu tad-disgħinijiet tas-seklu
l-ieħor l-Għaqda Ġermaniża-Maltija (Deutsch-Maltesische Gesellschaft). Wara
iktar minn 30 sena din l-għaqda għada ibbażata f’ Adenau u tagħmel xogħol ta’
fejda kbira b’risq il-ħbiberija bejn iż-żewġ popli, filwaqt li Adenau għanda
ġemellaġġ mal-Mellieħa – l-iktar ġemellaġġ antik u attiv bejn post f’Malta u
post fil-Ġermanja.
L-Ambaxxata għamlet il-preparamenti kollha biex, flimkien mal-Ministeru
tal-Affarijiet Barranin Ġermaniż u ma’ Ambaxxati ta’ pajjiżi oħra f’Berlin,
tieħu sehem f’attivitajiet msejħa “Diplomacy
for Sustainability” waqt il-Ġimgħa Ewropea għall-Iżvilupp Sostenibbli
(European Sustainable Development Week). L-iskop kien li tigi inkuraġġita
l-implementazzjoni tas-‘Sustainable Development Goals’ tal-Aġenda 2030.
Il-fokus tal-avveniment organizzat mill-Ambaxxata Maltija kien SDG 14,
speċifikament “il-ħajja taħt l-ilma” u l-konservazzjoni u l-użu sostenibbli
tal-oċejani, l-ibħra u r-riżorsi tal-baħar bħala komponent ewlieni ta’ futur
sostenibbli. Fil-fatt, fl-4 ta’ Ġunju, l-Ambaxxata organizzat f’sala ġewwa
Berlin il-wirja tad-dokumentarju “Comino: Secret Paradise” bil-parteċipazzjoni
tal-Ambaxxatur Malti għall-Oċejani il-Prof. Alan Deidun li ta lecture u wieġeb
id-domandi li sarulu mill-udjenza.
Is-sena l-oħra twaqqfet
għall-ewwel darba l-preżenza tal-Ambaxxata fuq il-mezzi tal-medja soċjali (Twitter u Facebook), bil-għan li b’dawn
il-mezzi tippromwovi aħjar lill-pajjiż, ix-xogħol li jitwettaq mill-Gvern, mill-MFTP
u mill-Ambaxxata. Il-paġni tal-Ambaxxata bdew jiġu aġġornati fuq bażi regulari.
Ambaxxata ħadmet fuq
applikazzjonijiet sabiex torganizza avvenimenti kulturali f’Berlin, li imbagħad
ġew approvati mill-Bord tal-Cultural Diplomacy Fund
tal-Ministeru tal-Affarijiet Barranin u l-Promozzjoni tal-Kummerċ.
L-avvenimenti li ttellew jinkludu serata ta’ żfin u mużika, msejħa “Diaspora” bil-parteċipazzjoni
tal-kumpanija “Contact Dance Company”,
taħt it-tmexxija tas-Sinjura Francesca Tranter u bil-parteċipazzjoni
tal-kompożitur u perkussjonista magħruf Renzo Spiteri. Din is-serata saret
fit-13 ta’ Ġunju fit-Theater am Aufbauhaus fil-preżenza ta’ udjenza mdaqqsa li
apprezzat ferm l-attività. Nhar is-26 ta’ Novembru 2019, ntwera l-film ‘Limestone Cowboy’ (Direttur u
Produttur Abigail Mallia) fis-Sala taċ-Ċinema DelphiLux ġewwa Berlin,
bil-parteċipazzjoni ta’ żewġ atturi Maltin, Davide Tucci u Paul Cilia.
L-arranġamenti kollha loġistici, stediniet u koordinazzjoni saru
mill-Ambaxxata.
F’Settembru, l-Ambaxxatur
ospita l-‘Malta Day Reception’ ġewwa
Berlin, li għaliha attendew, fost oħrajn, membri tal-Ministeru tal-Affarijiet
Barranin Ġermaniż, diversi Ambaxxaturi akkreditati għall-kapitali Ġermaniża,
fosthom n-Nunzju Appostoliku u d-Dekan tal-Korp Diplomatiku l-Arċisqof Dott.
Nikola Eterovic, il-Kap il-ġdid tal-Kummissjoni tal-UE ġewwa Berlin, Mr Jörg
Wojahn, il-President tal-Assoċjazzjoni
Ġermaniża-Maltija, is-Sur Christian Launer and s-Sa. Bettina Launer, ġurnalisti
u ħbieb oħra ta’ Malta. Ġew organizzati
wkoll receptions oħra fl-okkażjoni tal-‘Malta Day 2019’ mill-Konslu Onorarju
ta’ Malta għall-Istat Federali ta’
Baden-Württemberg, Dott. Rainer Dulger, u l-Konslu Onorarju għal Malta għall-Istat Federali tal-Bavarja, Dott.
Malik Englmaier.
Permezz tal-kuntatti tagħha,
l-Ambaxxata ppromwoviet b’mod attiv is-settur Malti tat-teknoloġija u diġitali,
tant li rċeviet proposti sabiex Malta tkun nvoluta f’konferenzi u kongressi li
jiġu organizzati fil-Ġermanja, fosthom il-hub.berlin,
festival annwali tat-teknoloġija u n-negozju, organizzat mill-Bitkom,
l-Assoċjazzjoni diġitali Ġermaniża, kif ukoll id-Digital State Congress, organizzat
mill-Behördenspiegel. Konsultazzjonijiet interni fi ħdan l-awtoritajiet
responsabbli f’Malta jinsabu għaddejjin.
Il-First Secretary tal-Ambaxxata ġiet mistiedna sabiex tattendi għall-ewwel avveniment tal-proġett bl-isem ta’
“Germany International” fl-iskola Sekondarja Refik-Veseli, fil-preżenza
tal-Ministru tal-Istat għall-Migrazzjoni, Refuġjati u Integrazzjoni fi ħdan
l-Uffiċċju tal-Kanċellier Federali.
Il-proġett joffri metodu ta’ tagħlim li jwassal edukazzjoni politika
permezz ta’ kwiżż interattiv, u li jinvolvi l-possibiltà ta’ skambju animat
mal-istudenti u jippromwovi t-tolleranza u l-fehim bejniethom. Matul il-kwiżż, l-First Secretary tal-Ambaxxata tkellmet dwar id-dijaspora Maltija
fil-Ġermanja.
F’Diċembru, ħarġet l-intervista li saret lill-Ambaxxatur
Malti, Dott. Albert Friġġieri fil-ġurnal “Der Behördenspiegel”, li l-qarrejja
tagħha huma l-ħaddiema taċ-Ċivil Ġermaniżi.
KONSOLARI
Matul ix-xhur kollha x-xogħol
konsulari kompla bla waqfien sabiex ingħatat għajnuna lil ċittadini Maltin
liċ-ċittadini Maltin li jgħixu fil-Ġermanja, kif wkoll lil Maltin li jivvjaġġaw
lejn il-Ġermanja u li jkunu jeħtiegu l-għajnuna, bħal meta jitilfu jew
jinsterqilhom il-passaport jew ikollhom bżonn għajnuna medika. F’każijiet fejn
persuni tilfu d-dokument tal-ivvjaġġgar tagħhom sar koordinament kontinwu
mal-Pulizija Ġermaniża sabiex jinħarġu dokumenti ta' vjaġġar t'emerġenza
fl-ajruporti stess, mall-Pulizija Maltija u d-Direttorat Konsulari
tal-Ministeru għall-Affarijiet Barranin.
Għajnuna ingħatat wkoll
lid-dipartiment fil-Ministeru tas-Saħħa li hu nkarigat li jibgħat pazjenti għal
trattament barra l-pajjiż, kif ukoll lill-pazjenti nfushom u lill-familjari
tagħhom. F’każ partikulari, l-Ambaxxata pprovdiet għajnuna lill-familja ta’
ċittadin Malti li miet waqt żjara f’Berlin. Ir-ripatrijazzjoni tal-kadavru lura
lejn Malta ġiet organizzata bl-għajnuna tal-Ambaxxata. Matul is-sena,
l-ambaxxata għenet f’diversi każijiet ta’ ċittadini Maltin li ddaħħlu l-isptar
waqt btajjel tagħhom fil-Ġermanja. F’każ partikolari ieħor, l-Ambaxxata tat
kull għajnuna lill-familja ta’ pazjent ta’ nazzjonalità Maltija li ddaħħal
fis-sala tal-kura intensiva ġewwa sptar fil-Ġermanja meta kien fuq btala. Dan
sabiex jinkiseb ċertifikat provviżorju sabiex jissostitwixxi l-EHIC
b’koordinazzjoni mad-dipartiment pertinenti fil-Ministeru tas-Saħħa. Baqa’
jinżamm kuntatt regulari mal-familja, id-Direttorat Konsulari, l-MFTP u s-sezzjoni
ta’ Trattamenti Barra minn Malta fi ħdan il-Ministeru tas-Saħħa. Waqt xogħol
ieħor ġewwa Munich, il-Konslu tal-Ambaxxata, flimkien mal-Konslu Onorarju
tal-Bavarja (it-tnejn tobba) żaru lill-pazjent u l-familja l-isptar u tawhom
is-sostenn tagħhom. Wara perjodu twil, il-pazjent ġie rritornat lura Malta
permezz ta’ ambulanza tal-ajru.
Ġiet ipprovduta informazzjoni
dwar visa u rekwiżiti oħra dwar vjaġġar lejn Malta, ġew ipproċessati
applikazzjonijiet għal passaporti u reġistrazzjonijiet ta’ żwieġ, servizz ta’
Kummissjonarji b’setgħa li jagħtu l-ġuramenti; talbiet għal informazzjoni dwar
għajxien, xogħol u vjaġġar ġewwa l-Ġermanja u f’Malta. Kważi kull xahar saru
wkoll talbiet għal informazzjoni dwar il-kisba ta’ tiġdid ta’ liċenzja
tas-sewqan, dwar l-għotja tal-kunsens tal-ġenituri għal applikazzjoni għal
passaport ta’ minorenni, wirt f’Malta, informazzjoni turistika, mistoqsijiet
rigward riżultati ta’ awtopsja ġewwa Malta, il-bidu ta’ negozju f’Malta,
liċenzji ta’ xogħol, u żwiġijiet f’Malta.
It-tabella hawn taħt tinkludi
statistika dwar numru ta’ servizzi konsolari li ġew ipprovduti mill-Ambaxxata
Maltija matul is-sena 2019.
|
Birth registration /
Reġistrazzjoni tat-twelid
|
18
|
|
Marriage/ Divorce
registration / Reġistrazzjoni taż-¯wieġ / Divorzju
|
4
|
|
Citizenship application /
Applikazzjoni taċ-Ċittadinanza
|
3
|
|
Power of attorney / Prokura
|
-
|
|
Legalisation of documents /
Legalizzazzjoni ta’ dokumenti
|
4
|
|
Declaration on oath /
Dikjarazzjoni bil-ġurament
|
4
|
|
Passport applications / Applikazzjonijiet
tal-passaport
|
47
|
|
Emergency Travel Documents
/ Dokumenti ta' Vjaġġar f'Emerġenza maħruġ kemm lil Maltin kif ukoll lil
refuġjati
|
NIL
|
|
Diplomatic passports /
Passaporti diplomatiċi
|
NIL
|
|
Enquiries received on
requirements for visa to Malta / Inkjesti li waslu dwar rekwiżiti għal viża
għal Malta.
|
345
|
|
Facilitation of visa for
Maltese through Embassy/Għajnuna lil Maltin dwar viżi
|
NIL
|
Xogħol konsolari ieħor:
Ta’ kull xhar, l-Ambaxxata bagħtet lura lejn il-Ministeru numru ta’ passaporti
u dokumenti ta’ residenza Maltin li kienu ntilfu u nstabu fil-Ġermanja
mill-awtoritajiet. L-Ambaxxata għenet wkoll diversi delegazzjonijiet Maltin li
għaddew mill-ajruporti Ġermaniżi.
F’Mejju intlaqgħu talbiet ta’
informazzjoni minn ċittadini ta’ nazzjonalità Maltija dwar votazzjoni
fl-elezzjonijiet tal-Parlament Ewropew f’Malta.
L-Ambaxxata mexxiet talbiet
għall-approvazzjoni diplomatika mill-awtoritajiet Ġermaniżi sabiex ajruplani
tal-Forzi Armati ta’ Malta jkunu jistgħu jidħlu fl-ispazju tal-ajru Ġermaniż.
L-ambaxxata kompliet tikkoordina flimkien mal-Korp tal-Pulizija u l-Uffiċċju
tal-Kummissarju tar-Refuġjati f’Malta r-ritorn ta’ ċittadini ta’ pajjiżi terzi
li jgawdu minn protezzjoni f’Malta – meta dawn jinstabu fil-Ġermanja
mill-awtoritajiet Ġermaniżi – sabiex b’hekk jiġu irritornati lura lejn Malta.
Ingħatat ukoll għajnuna lill-Forzi Armati Maltin sabiex inkiseb il-permess
sabiex jgħaddu munizzjon millitari mill-Ġermanja lejn l-operazzjoni konġunta
tal-Frontex f’pajjiż ieħor. Għajnuna oħra li ngħatat tinkludi wkoll talba li ġiet mgħoddija
lill-Identity Malta u l-Uffiċċju tal-Passaporti sabiex jingħataw kampjuni ta’
Passaporti u Karti tal-Identità Maltin għal skopijiet ta’ taħriġ tal-Pulizija
Ġermaniża fl-ajruport ta’ Munich u għal raġunijiet ta’ paragun f’każ ta’
skrutinju ta’ dokumenti.
L-Ambaxxata rrappurtat
lid-Direttorat Konsulari tal-MFTP dwar ta’ attakki jew inċidenti li saru ġewwa
l-Ġermanja, bħal pereżempju l-attakk li sar f’sinagoga ġewwa Halle (ebda Maltin
ma kienu involuti).
L-Ambaxxata kkuntattjat
il-membri kollha tad-Dijaspora Maltija li toqgħod il-Ġermanja u li hija
magħrufa mal-Ambaxxata, sabiex tippromwovi l-Ħames Konferenza tal-Maltin li Jgħixu Barra.
Seduta 291
27/01/2020
No comments:
Post a Comment