1. Il-pajjiż
tagħna għaddej, għal darb’oħra, minn mument diffiċli. Irridu naċċettaw li l-aħħar tlett xhur kienu differenti, u li mhux nieqsa mill-inċertezza.
Bil-bidliet varji li rajna, qegħdin issa f’fażi oħra. Preżentement, il-pożizzjoni għadha mhix ċara,
u anqas ma hi stabbli. Bil-ħatriet li
saru. Bil-kumplikazzjonijiet ta’ bnedmin
li daħlu u nħarġu. Kif ukoll ta’ oħrajn
li ma ġewx magħżula. Il-pajjiż għadu
mhuwiex iħoss li bdejna mixjin lura lejn is-sewwa u n-normalità.
Il-pożizzjoni mhix faċli
2. Ċertament,
il-pożizzjoni ‘Post-Muscat’ fiha ħafna iktar milli nimmaġinaw. Kif qed naraw, ma’ kull ġurnata hemm żviluppi
ġodda fix-xena twila tal-iskandli politiċi li mhux biss qed naraw, imma issa
qed immissu mal-konsegwenzi tagħhom.
Hemm f’dan, fuq naħa l-għarfien
‘pożittiv’ li qed jitneħħew iktar persuni li ma kellhomx ikunu fil-poter. Fuq l-oħra, dak ‘negattiv’ fejn hemm, kif
konna għidna, ferm u ferm iktar moffa milli wieħed jaħseb. Napprezzaw li min għandu r-responsabbiltà
jrid jinqasam bejn deċiżjonijiet tajba għall-pajjiż u l-effett xejn tajjeb tagħhom
fuq il-Partit Laburista.
Jista’ jasal?
3. Napprezzaw li
f’dan trid proġett politiku fit-tul biex tnaddaf. Imma d-domanda fuq fomm diversi kienet, tul
dawn il-ġimgħat, indirizzata lejn jekk kienx inbidel xi ħaġa minn żmien
il-Gvern Laburista ta’ qabel. Il-pajjiż
kien qiegħed jistenna numru ta’ sinjali li beda jaċċetta li ma jistgħux
jiġu. Ma jistgħux għal diversi
raġunijiet. Fosthom, ukoll,
il-kompromessi mill-iktar strambi li saru fil-ħatriet politiċi. Hemm ukoll, inqas ċara, id-direzzjoni
politika li qegħda tittieħed. Hemm,
inqas konvinċenti, kemm din it-tmexxija politika għandha l-prijoritajiet
politiċi tagħha ma’ dak li qed titlob is-sitwazzjoni nazzjonali.
Dewmien politiku
4. Meta l-Partit
Nazzjonalista laqqa’ l-Kunsill Ġenerali fit-13 ta’ Diċembru li għadda, kien
hemm min ikkritikah. Illum hemm kunsens
komuni li dak li sar kien tajjeb.
Il-ħmistax-il punt li ressaqna mhux biss taw direzzjoni ċara, imma wrew
ukoll li l-prijoritajiet li ntgħażlu kienu, u għadhom, direttament
f’posthom. Tant kienu hekk, li tul
il-kampanja interna tal-Partit Laburista, iż-żewġ kanditati ġew influwenzati u
ressqu diversi bħala proposti tagħhom kontra l-kandidat l-ieħor. Kien hemm għalhekk, dak iż-żmien, f’dan,
l-impressjoni li ser ikun hemm proċess ta’ bidla fid-direzzjoni t-tajba
mingħajr dewmien. Illum, il-pożizzjoni
nbidlet. Dak li għandu jsir qiegħed idum
ma jsir, u dak li ma jridux li jsir qegħdin iħalluh lura.
Konverġenza
5. Jekk il-Gvern
irid, għandu l-id tal-koperazzjoni politika tal-Partit Nazzjonalista fuq dawn
il-punti. Però, jidher dejjem iktar li
din mhijiex ser tittieħed. Dan huwa
ċertament żball politiku kbir. Hija
opportunità unika li qegħda titwarrab għal raġunijiet varji. Fuq naħa, l-inabilità li tingħaraf il-gravità
tas-sitwazzjoni. Fuq l-oħra, il-ħeġġa li
tkompli tikxef kemm il-Gvern Muscat kien għaddej ħażin. Fl-oħra, il-biża’ żbaljata fi triq
is-suppervja li trid taqbel ma’ aġenda li ġiet stabbilita diġà mill-Partit
fl-Oppożizzjoni.
Iktar ma jgħaddi l-ħin
6. Iktar ma
jgħadd l-ħin, iktar ser ikun diffiċli biex il-bidliet li għandhom isiru,
iseħħu. Proprju għalhekk li ser nibqgħu nħeġġu
sabiex il-liġijiet li għandhom jiġu preżentati jiġu mressqa mill-ewwel. Naraw li hemm bżonn korrezzjoni
fid-direzzjoni politika nazzjonali li l-Gvern preżenti mhuwiex jieħu. Hemm bżonn li ssir il-bidla fil-Partit
Laburista fl-għarfien ta’ kif u għal liema raġuni partiti politiċi jingħataw
il-fiduċja tal-poplu. Spjegazzjonijiet
ċari li hemm bżonn isiru fuq x’ġara u x’mar ħażin. Spjegazzjonijiet ta’ kif min kien fil-poter ra li għandu programm
politiku fejn lill-poplu turih ħaġa, mentri l-affarijiet ikunu mod ieħor. Kuntatt lura ma’ dak li huwa sewwa.
Ix-xenarju preżenti
7. Il-pożizzjoni
politika nazzjonali tagħna mhix tajba.
Il-futur għadna ma bdejniex naħdmu lejh.
Fl-instabilità tagħna għandna xenarji madwarna li jitolbu l-attenzjoni. Għandna l-pożizzjoni fil-Libja li għaddejja
minn mument partikolari u perikoluż.
Għandna, fuq l-oħra, il-kumplikazzjonijiet qawwija li ġejjin mill-ħruġ
tar-Renju Unit mill-Unjoni Ewropea.
Għandna l-problemi fl-abbiltà tagħna biex nassiguraw fondi mill-Budget
tal-Unjoni Ewropea, li jippermettilna nkomplu navvanzaw ‘il quddiem. Elementi urġenti li ċertament jitolbu
direzzjoni u programm serju, effettiv, min-naħa tal-Gvern.
Fl-għażliet li ġejjin
8. Fl-għażliet
li ġejjin, il-linja politika għandha tibqa’ dik li tassigura riformi li jbiddlu
verament. Riformi li jħarsu: l-ewwel,
il-preżent u l-futur; it-tieni, dak li qed jiġri hawn u dak li qed jiġri
madwarna. Ninsistu, għalhekk, f’ħidma li
tħeġġeġ li jsir, l-ewwel, dak li huwa tajjb fih innifsu, u għax huwa hekk, huwa
għall-“konvenjenza” tal-pajjiz.
Ninsistu, it-tieni, li ma jibqgħux iktar, miżuri ta’ konvenjenza
politika semi-makkjavelljana. Ninsistu
fl-użu tar-raġuni, li dan il-Gvern Laburista jibda l-proċess veru
tal-bidla. Pajjiżna għadu għaddej
mill-effetti diżastrużi ta’ terrimot politiku mingħajr preċedent. Jekk ma jkunx hemm għarfien ta’ din
il-verità, ma jistax ikun hemm il-bidla li għandna bżonn. Proprju għalhekk li dan il-poplu ser ikompli
jistaqsi lilu nnifsu: x’bidliet wara dan it-terrimot politiku?
No comments:
Post a Comment