04/02/2020
ONOR. EVARIST
BARTOLO: Nixtieq ninforma lill-Onor. Interpellant bil-ħidma
attiva tal-Ambaxxata tagħna ġewwa Beijing, fiċ-Ċina tul is-sena li għaddiet.
l-Ambaxxata ħadmet bla
waqfien sabiex ir-relazzjonijiet eċċellenti bejn Malta u ċ-Ċina jkomplu jiġu
mtejba fuq kull livell. Għalhekk, kienu bosta l-inizzjattivi li din l-Ambaxxata
ħadet fl-2019 sabiex tkompli ssaħħaħ
ir-relazzjonijiet bilaterali u tgħolli l-profil ta’ Malta fiċ-Ċina f’oqsma
differenti:
Politika
Apparti li l-Ambaxxata ta’
Malta f’Beijing akkreditata għar-Repubblika Popolari taċ-Ċina, l-Ambaxxata
akkreditata wkoll għar-Repubblika tal-Mongolja, għar-Repubblika tal-Filippini
kif ukoll għar-Renju tal-Kambodja. Fis-16 ta’ Jannar 2019,
l-Ambaxxatur-Residenti f’Beijing ippreżenta l-kredenzjali lill-Eċċellenza
Tiegħu Nguyen Phu Trong, President tar-Repubblika tal-Vjetnam. B’hekk mill-2019
l’hawn, l-Ambaxxata ta’ Malta f’Beijing hija akkreditata għal ħames
pajjiżi.
Mill-aspett politiku, Iċ-Ċina
importanti kemm mill-qasam bilaterali kif ukoll mill-qasam multilaterali. Matul
dawn l-aħħar tnax-il xahar, l-Ambaxxata kompliet trawwem id-djalogu
mad-Dipartiment tal-Affarijiet Ewropej sabiex tassigura li l-Ministeru
għall-Affarijiet Barranin taċ-Ċina jkompli jaħdem fuq ir-rikjesti ta’ Malta u
jżomm lil Malta aġġornata fuq il-politika barranija taċ-Ċina u l-pożizzjoni
taċ-Ċina fuq kwistjonijiet reġjonali u internazzjonali. Dawn il-laqgħat jiġu
miżmuma kull tlett xhur. Fost affarijiet diskussi, ta’ min insemmu is-segwitu
fuq Memorandum ta’ Ftehim rigward One
Belt One Road iffirmat fis-6 ta’ Novembru 2018, proposta fuq l-iffirmar tal-Ftehim dwar Programm
Kulturali mill-2019 sal-2023, kif ukoll kwistijoniet bilaterali oħra.
L-Ambaxxata pparteċipat ukoll f’diversi laqgħat u ‘briefings’ organizzati
mid-Delegazzojoni tal-Unjoni Ewropeja f’Beijing, Ambaxxati ta’ pajjizi oħrajn
kif ukoll awtoritiajiet, organizzjonijiet Internazzjonali u istituzzjonjiet
akkademiċi oħra.
Xhieda tal-ħidma kontinwa
tal-Ambaxxata f’Beijing, hija bla dubju riflessa fl-onorazzjoni bi
preżentazzjoni tas-Super Ambassador’s
Award mis-Silk Road Spring Festival
Committee lill-Ambaxxatur ta’ Malta għaċ-Ċina f’Jannar 2019.
L-Ambaxxatur attenda
riċeviment tas-Sena l-Ġdida fl-State
Guesthouse ospitat mill-Eċċellenza Tiegħu Wang Yi, Kunsillier tal-Istat u
Ministru tal-Affarijiet Barranin taċ-Ċina.
Fuq stedina mill-Ministru tal-Affarijiet Barranin, l-Ambaxxatur ta’
Malta attenda wkoll diversi żjarat f’Provinċji differnti fosthom fil-Provinċja
ta’ Shanxi u l-belt ta’ Tianjin. Dawn iż-żjarat huma importanti għax
jikkontribwixxu għal-viżibilta’ ta’ Malta. L-aġenda waqt dawn iż-żjarat,
apparti li tinkludi laqgħat ma’ rappreżentanti reġjonali, tinkludi fost oħrajn
numru ta’ laqgħat mal-Kmamar tal-Kummerċ prominenti u Universtajiet.
Fl-aħħar ta’ Marzu 2019,
l-Ambaxxatur irrappreżenta lil Malta fil-Forum Annwali BOAO, li sar fil-gżira
ta’ Hainan fin-nofsinhar taċ-Ċina. Waqt
il-preżentazzjoni tiegħu, l-Ambaxxatur għamel aċċen għall-andament
tal-ekonomija Maltija, iż-żieda fil-kummerċ bejn Malta u ċ-Ċina, speċjalment
fejn jidħol investiment fis-settur tal-enerġija mill-kumpanija Shanghai Electric Power Co. Ltd. (SEP),
kif ukoll it-twaqqif ta’ Shanghai
Electric Power (Malta Holdings) Ltd. f’Malta.
Bejn l-24 u s-27 ta’ April
2019, ġiet organizzata t-tieni laqgħa tal-Belt
and Road Initiative (BRI) f’Beijing.
F’din il-laqgħa importanti, Malta kienet irrappreżentata mill-Onorevoli
Joe Mizzi, eks Ministru għall-Enerġija u Maniġġjar tal-Ilma. Il-Ministru Mizzi attenda ċ-Ċerimonja tal-Inawgurazzjoni
tal-Belt and Road Energy Partnership
fejn indirizza konferenza dwar
l-Enerġija tal-BRI. Wara d-diskors
ewlieni tiegħu, l-Onorevoli Mizzi ffirma Memorandum ta’ Ftehim (MOU) ma’ Shanghai Electric Power (SEP) li
jirrikonoxxi wkoll iż-żieda fil-kooperazzjoni bejn Malta u s-SEP li se tara
investiment fil-provvista ta' enerġija fil-Montenegro permezz tal-bini ta'
turbini tar-riħ.
Bħala parti
mill-festeġġjameti tal-ħamsa w ħamsin sena’ anniversarju mill-kisba
tal-Indipendenza ta’ Malta, l-Ambaxxata ħejjiet riċeviment għal-aktar minn 500
persuna fosthom uffiċjali tal-Gvern Ċiniż, membri tal-kommunita’ diplomatika,
akkademja, setturi tan-negozju u l-kommunita’ Maltija fiċ-Ċina. Il-Viċi
Ministru għall-Affarijiet Barranin, l-Eċċellenza Tiegħu Qin Gang attenda dan
ir-riċeviment u tkellem fuq il-ħbiberija twila bejn iż-żewġ pajjiżi. Fl-1
t’Ottubru 2019, L-Ambaxxata ħadet sehem ukoll fiċ-ċelebrazzjoniet uffiċjali
tas-sebgħin anniversarju mit-twaqqif tar-Reppublika Popolari taċ-Ċina.
Kummerċjali u Promozzjoni ta' Malta
Sabiex issaħħaħ
il-viżibilita’ ta’ Malta fiċ-Ċina, l-Ambaxxata kompliet tistabilixxi kuntatt
ma’ diversi kmamar tal-kummerċ u l-Industrija u kif ukoll mal-Assoċjazzjonijiet
varji bil-għan li ttejjeb il-kuntatti fil-qasam kummerċjali sabiex tkun tista’
tagħti pariri siewja lil intrapriżi Maltin li huma nteressati li jinvestu
fiċ-Ċina.
L-aktar inizjattivi
prominenti għall-promozzjoni ta’ kummerċ bejn Malta u ċ-Ċina jinkludu:
(i) It-Tinda Maltija
waqt it-tieni edizzjoni tal-Expo Internazzjonali Ċiniza tal-Importazzjoni
(CIIE)
L-Ambaxxata u l-Konsulat
Ġenerali f’Shanghai ħejjew il-preparamenti għaż-żjara ta’ tlett ijiem
tad-Delegazzjoni Maltija mmexxija mill-predeċessur tiegħi il-Ministru Carmelo
Abela, f’Shanghai biex tieħu sehem fit-tieni edizzjoni tal-Expo Internazzjonali
Ċiniza tal-Importazzjoni f’Novembru 2019. Id-delegazzjoni kienet tinkludi
rappreżentanti minn Trade Malta, il-Malta Enterprise, l-MCAST, u l-Kamra
tal-Kummerċ. Id-delegazzjoni Maltija ppromwoviet lil Malta fl-oqsma
tal-investiment, il-kummerċ, it-turiżmu, is-servizzi edukattivi, u l-wirt kulturali.
L-Ambaxxata u l-Konsulat
Ġenerali f’Shanghai kienu strumentali fit-twaqqif ta’ Tinda Maltija waqt l-Expo
li fiha ħadu sehem mal-160 pajjiż. Matul iż-żjara f’Shanghai, id-delegazzjoni
Maltija organizzat żewġ seminars bit-tema ‘L-ekonomija vibranti ta’ Malta’,
immirati lejn investituri Ċiniżi.
Il-Ministru Abela flimkien
mad-delegazzjoni Maltija żaru żewġ kumpaniji globali u b’reputazzjoni rinomata
li qed jieħdu interess kbir li jkabbru l-involviment u s-servizz li jagħmlu
lill-klijenti tagħhom f’pajjiżna. Dawn huma UnionPay u Shanghai Electric.
Il-Ministru Abela ppresieda wkoll l-iffirmar ta’ ftehim ta’ kooperazzjoni
fl-edukazzjoni ffirmat bejn l-MCAST u l-Università ta’ Guangdong
tal-industrija, il-kummerċ u t-teknoloġija.
(ii) Promozzjoni ta'
Malta
Saru numru ta' attivitajiet
speċifiċi għall-promozzjoni ta' Malta f'ħafna partijiet taċ-Ċina barra minn
Beijing. Dawn inkludew żjarat
mill-Ambaxxatur ta’ Malta fuq diversi weekends
sabiex jippreżenta diskorsi li jippromwovi lil Malta lil udjenzi li jvarjaw
minn 100 sa 500 persuna. Diskorsi bħal
dawn ġew ippreżentati f'Xian, Guangzhou, Shanghai, Shenzhen, Shenyang u
Chengdu.
Dawn il-preżentazzjonijiet
ġeneralment kienu akkumpanjati minn intervisti tal-medja għall-Istampa u
t-TV. L-Ambaxxatur ta' Malta akkumpanja
wkoll delegazzjoni kummerċjali minn Malta għall-Vjetnam u għamel diskorsi
ewlenin fil-promozzjonijiet f'Hanoi u Ho Chi Min City. F'Beijing, l-Ambaxxatur ta' Malta kellu
intervista maġġuri mal-Programm tat-TV onlajn tas-CCTV u tkellem fi promozzjoni
maġġuri tat-turiżmu matul il-Festival tar-Rebbiegħa Ċiniża.
Attivitajiet kummerċjali oħra
kienu jinkludu l-intervisti mill-Ambaxxatur ta’ Malta lil diversi persuni li
jixtiequ jipproponu pjanijiet ta’ negozju għal attivitajiet kummerċjali
f’Malta. Ħafna minn dawn il-persuni
esprimew interess ewlieni fil-Leġiżlazzjoni ta’ Malta dwar il-Blockchain u
għarfien tajjeb dwarha. Bosta minn dawn
il-persuni sussegwentement attendew is-Summit ta' Blockchain li sar f'Malta
fl-aħħar ta' Mejju, 2019.
Fit-22 ta’ Frar 2019,
l-Ambaxxatur ta’ Malta ltaqa’ mal-Viċi-President, Manaġer Ġenerali, lilVIP
Service Manaġer, u mal-Eżekuttiv tal-Promozzjoni Internazzjonali tal-Grupp
taċ-Ċentru tal-Kummerċ Barrani taċ-Ċina, li fis-17 ta’ Marzu żaru l-Kamra
tal-Kummerċ, l-Intrapriża u l-Industrija f'Malta sabiex jippromwovi l-kummerċ
bilaterali bejn Malta u ċ-Ċina, u jistabbilixxu relazzjoni
m'organizzazzjonijiet tan-negozju li jistgħu jgħinu biex jiffaċilitaw
il-kummerċ u l-iskambji bejn iż-żewġ pajjiżi.
Fl-1 ta' Marzu, u fit-8 ta'
Marzu 2019, l-Ambaxxatur ta' Malta ltaqa’ diversi persuni miċ-China
Communications Construction Group (Ltd) li kienu ġew mistiedna f'Malta
mill-Onor. Dr. Christian Cardona, eks Ministru għall-Ekonomija, Investiment u
Negozji ż-¯għar sabiex jipparteċipaw fil-Konferenza ta’ l-Iskambju Tekniku
tal-Inġinerija Mina ta’ Ħong
Kong-Zhuhai-Macao taċ-Ċina fit-13 ta’ Marzu 2019. Aktar laqgħat saru mill-Ambaxxatur ta’ Malta
aktar tard f'Marzu għal persuni oħra mistiedna mill-Uffiċjal Eżekuttiv Ewlieni
ta' Infrastructure Malta biex jattendu konferenza simili li saret bejn it-22
ta’ Marzu u t-28 ta' Marzu, 2019.
Bejn it-2 ta’ April u l-4
t’April 2019, l-Ambaxxatur, fil-kapaċità tiegħu ta’ Konsulent, irrappreżenta
lill-Onor Edward Scicluna fil-laqgħa ta’ kull tliet xhur tal-Bank
tal-Investiment għall-Infrastruttura tal-Asja (AIIB), li minnu Malta hija waħda
mill-membri inawgurali. Il-bank ra
tkabbir mgħaġġel mis-57 membru oriġinali tiegħu f'Jannar 2016 għal 97 membru
attwalment.
Il-bosta attivitajiet ta’ Shanghai Electric Power f’Malta wasslu
għal ħtieġa ta’ ħafna delegazzjonijiet ta’ staff amministrattiv u tekniku biex
iżuru Malta. Fit-18 ta’ Frar, fil-5 ta’
Marzu, fl-20 ta’ Marzu u fit-8 ta’ April, 2019, l-Ambaxxatur ta’ Malta
intervista lil bosta minn dawn il-persuni li waslu Malta f’diversi
delegazzjonijiet fit-22 ta’ Frar, fil-15 ta’ Marzu, fid-29 ta’ Marzu u fit-8
ta’ Mejju, 2019.
F’Novembru 2019, l-Ambaxxatur
kellu laqgħa ma’ numru ta’ rappreżentanti tal-medja fl’Ambaxxata fejn tkellem
fuq opportuntajiet ta’ negozju u t-turiżmu f’Malta. Din l-intervista’ ġiet
ippubblikata u mxandra fuq stampa u stazzjonijiet ewlenin Ċiniżi.
Il-Konsulat Ġenerali
f’Shanghai waqqaf stand fuq Malta fil-fiera tal-Luxury Properties Showcase
(LPS) li saret f'Shanghai f'Diċembru 2019. Il-Konslu Ġenerali fetaħ
uffiċjalment l-LPS li kien jinkludi 300 esebitur minn 45 pajjiż.
Fost inizzjattivi oħrajn li
ħadet l-Ambaxxata biex iżżid il-visibilta’ ta’ Malta u
tippromwovi n-negozju, tajjeb insemmi l-pubblikazzjoni ta’ żewġ edizzjonijiet
speċjali tar-rivista’ esklussiva fuq Malta imsemmija Lookwe. Dawn ir-rivisti ġew imqassma lil madwar 4,000 persuna li
attendew avvenimenti varji organizzati mill-Ambaxxata’.
(iii) Turiżmu
Iż-żieda sostanzjali
fin-numru ta’ Ċiniżi li żaru Malta fl-2019 m’hijiex biss riżultat ta’ titjib
fis-sitwazzjoni ekonomika fiċ-Ċina, iżda hija wkoll frott ta’ l-isforzi
kontinwi tal-Ambaxxata fil-ħidma tagħha id f’id mal-Awtorità Maltija għat-Turiżmu
(MTA) biex jistabilixxu lil Malta bħala destinazzjoni turistika popolari fost
il-popolazzjoni Ċiniża. Sabiex Malta
tkun tista’ tikkompeti ma’ destinazzjonijiet turistiċi popolari oħrajn,
l-Ambaxxata u l-Konsulat ta’ Malta f’Shanghai, flimkien ma’ l-aġenti
sussidjarji jiffaċilitaw is-servizzi tal-viżi. B'appoġġ għall-promozzjoni
tat-turiżmu Ċiniż lejn Malta, l-Ambaxxatur kellu wkoll laqgħa ma' waħda
mill-akbar aġenziji turistiċi taċ-Ċina, CAISSA, biex jiddiskuti l-issimplifikar
tal-applikazzjonijiet ta’ viżi u biex jitlob l-appoġġ ta’ banek ewlenin
taċ-Ċina fil-forniment ta' dikjarazzjonijiet bankarji għall-applikazzjonijiet
ta’ viżi.
L-Ambaxxata f’Beijing
flimkien mal- Awtorità Maltija għat-Turiżmu (MTA) assiguraw li Malta jkollha
preżenza f’żewġ fieri tal-ivvjaġġar f’Beijing f’Ġunju u Ottubru 2019, li huma:
(i) Beijing International Tourist Expo (BITE) ( 5-7 ta’ Ġunju
2019)
(ii) China (Beijing) Trade Travel Festival, (13-15
t’Ottubru 2019)
Matul dawn il-fieri,
l-Ambaxxtur assista d-delegazzjoni tal-MTA u kien kelliem speċjali f’avveniment
tal-ftuħ uffiċjali ta’ waħda minn dawn il-fieri. Apparti dan, l-Ambaxxatur ta’
għadd ta’ intervisti lill-midja u tkellem ma’ numru ta’ persuni li żaru
it-tinda Maltija f’dawn il-fieri. L-MTA iffirmaw ukoll erbgħa Memoranda ta’
Ftehim ma’ kumpaniji ewlenin Ċiniżi fis-settur turistiku.
F’Diċembru 2019, Malta ġiet
ippremjata bħala Destinazzjoni ta’ Potenzjal tas-sena waqt avveniment
prestiġjġuż f’Beijing imtella mir-rivista Voyage.
(iv) Films
L-interess fl-industrija
tal-films f’Malta minn diversi produtturi Ċiniżi qiegħed dejjem jikber.
Avveniment ewlieni t'interess kummerċjali li seħħ f'nofs April kienet iż-żjara
f'Beijing mill-Kummissarju tal-Films ta' Malta, is-Sur Johann Grech u
l-assistent tiegħu, is-Sur Daniel Camilleri.
Bi tħejjija għal din iż-żjara l-Ambaxxatur ta’ Malta organizza numru konsiderevoli ta’ laqgħat ma’
wħud mill-aqwa atturi taċ-Ċina fl-industrija tal-Films u t-TV. Fost oħrajn, dawk inklużi kienu
rappreżentanti minn CCTV-6 Movie Channel,
ir-Rapport Dinji tal-Films, CKF Pictures,
Sky Golden Harvest Company, u Culture Investment Holding Co. Ltd, li
hija subordinata ta' Beijing Culture
Investment u Development Co, Ltd.
Minn dakinhar kien hemm korrispondenza ta' segwitu minn numru ta' dawn
il-kumpaniji li wrew interess kbir fl-industrija tal-films f’Malta.
F’Settembru 2019, l-Ambaxxata
assistiet kumpanija Maltija biex tippromwovi l-industrija tal-films f’Malta
fiċ-Ċina fil-Festival Internazzjonali tat-Televisjoni u l-Films li saret
f’Beijing.
F’Novembru 2019, l-Ambaxxatur
għamel żjara ta’ kortesija fl-istudjos ta’ Hongyi Culture and Cutting Edge
Pictures li huma sħab ma’ kumpanija stabillita Maltija fis-settur tal-films.
F’Diċembru 2019, L-Ambaxxatur
ta’ Malta attenda il-Film Festival Internazzjonali f’Hainan fejn Malta kellha
preżena b’tinda ddedikata biex tippromwovi l-industrija tal-films f’Malta.
It-tinda Maltija ġibdet l-attenzjoni ta’ diversi produtturi tal-films Ċiniżi u
wasslet biex qanqlet l-interess għal ġbid ta’ film Ċiniż f’Malta f’Marzu 2020.
(v) Edukazzjoni
Xejra kummerċjali pjaċevoli
oħra fl-2019 kienet iż-żieda mgħaġġla fin-numru t’applikazzjonijiet minn
studenti biex isegwu programm ta’ studju ma’ diversi istituzzjonijiet terzjarji
Maltin kif ukoll ma’ skejjel tat-tagħlim
tal-lingwa Ingliża.
L-Ambaxxatur ta’ Malta żar
Shanghai biex jipparteċipa bħala Mistieden Speċjali fil-Ftuħ Uffiċjali
tal-Uffiċċju ta’ Shanghai tal-Università Amerikana ta’ Malta (AUM). Fiċ-Ċerimonja, l-Università ffirmat ukoll
Memorandum ta’ Ftehim (MOU) mal-Università Normali tal-Lvant taċ-Ċina.
Akkademiċi minn diversi
universitajiet fiċ-Ċina ppreżentaw numru ta’ dokumenti ta riċerka f'għadd ta'
konferenzi li saru f'Malta. L-Ambaxxatur
ta’ Malta ltaqa’ ma’ għalliema minn diversi Universitajiet Ċiniżi fosthom
mill-Università tat-Teknoloġija ta’ Hubei, id-Dekan u numru ta’ professuri
mill-Università tax-Xlokk, kif ukoll riċerkatur tas-Servizz Nazzjonali tad-Data
u l-Informazzjoni Marittima taċ-Ċina.
(vi) Kultura
Prijorita’ oħra fil-ħidma
tal-Ambaxxata f’Beijing hi li tgħolli l-profil kulturali ta’ pajjizijna. Bla
dubju wieħed mill-aktar avveniment kulturali importanti fl-2019 kien
il-Festival tal-Gourmet Malti li sar fil-Lukanda Minzu, lukanda ta’ fama
dinjija. Il-festival, li nfetaħ
uffiċjalment b'Konferenza tal-Midja mill-Ambaxxatur Malti fl-20 ta' Marzu 2019,
dam għaddej sal-aħħar ta’ Marzu 2019. Ħames koki prominenti Maltin attendew dan
il-festival. Fid-29 ta' Marzu, 2019, sar Pranzu Gala li għalih attendew diversi
persuni prominenti mill-gvern Ċiniż, NGOs, kumpaniji tal-istat u CAISSA,
kumpanija ewlenija tat-turiżmu.
Il-Festival tal-Malta Gourmet
sar permezz tal-kooperazzjoni bejn l-Assoċjazzjoni Maltija għall-Ħbiberija
maċ-Ċina, il-Minzu Hotel, l-Assoċjazzjoni tal-Ħbiberija Popolari ta' Beijing
ma' Pajjiżi Barranin, l-Ambaxxata ta' Malta f'Beijing, u l-Awtorità tat-Turiżmu
ta' Malta.
Fl-2019, Malta u ċ-Ċina
komplew ikkabru n-numru ta’attivitajiet u skambji kulturali. Dawn l-attivitajiet ġew organizzati
miċ-Ċentru Kulturali taċ-Ċina f'Malta, li għandu relazzjoni tajba ħafna
mal-Ambaxxata ta' Malta f'Beijing. Fl-10 ta’ Jannar 2019, l-Ambaxxatur ta'
Malta f'Beijing intervista lid-Direttur u 14-il membru tal-Fujian Quanzhou
Ċentru ta’ Protezzjoni tal-Patrimonju Kulturali Intanġibbli tar-Repubblika
Popolari taċ-Ċina, li żar Malta fis-17 ta' Jannar 2019, biex jagħmel numru ta'
prestazzjonijiet fuq perjodu ta’ ħamest ijiem.
Fil-21 ta' Jannar 2019, l-Ambaxxatur intervista seba' persuni
sponsorjati mid-Dipartiment tal-Kultura u t-Turiżmu tar-Reġjun Awtonomu ta’
Guangxi Zhuang li attendew il-Forum tat-Turiżmu tal-Mediterran u l-Wirja
tal-Kultura u t-Turiżmu ta' Guangxi li saret fiċ-Ċentru Kulturali taċ-Ċina
fil-Belt Valletta. Fil-21 ta' Frar,
2019, l-Ambaxxatur ta' Malta intervista wkoll artist Ċiniż prominenti li kellu
Wirja Solo f'Malta mit-3 ta' Marzu, 2019.
Fid-19 ta' Marzu, 2019, saret ukoll intervista addizzjonali fl-Ambaxxata
ta' Malta f'Beijing ma' artist prominenti ieħor.
Attività li saret
karatteristika regolari fl-Ambaxxata ta’ Malta f’Beijing hija l-istedina
mill-Ambaxxatur ta’ Malta lil studenti minn xi skejjel prominenti fiċ-Ċina biex
jipparteċipaw f’diversi attivitajiet fl-Ambaxxata. Fil-passat, dawn inkludew dibattiti, qari
tal-poeżija, kanzunetti u żfin, kif ukoll il-preżentazzjoni ta’ diskorsi
mill-istudenti.
F’Novembru 2019, l-Ambaxxatur
attenda ċerimonja ta ’tnedija ta’ kors fil-lingwa Maltija li se beda jiġi
mgħallem din is-sena fil-Beijing Foreign Studies University (BFSU).
L-Ambaxxatur ta’ Malta u
s-Sinjura tiegħu attendew ukoll numru ta’ wirjiet kulturali bħad-Dance Folk
Rumen, Prestazzjoni tal-Opra ta’ Peking organizzata mill-Ministeru tal-Kultura
u t-Turiżmu taċ-Ċina, il-Ballu Irlandiż ta’ San Patrizju, u l-24 Edizzjoni
tax-Xahar tal-Frankofonija.
(vii) Konsolari
Flimkien maż-żieda
sostanzjali fin-numru tal-viżi mir-Repubblika Popolari taċ-Ċina, l-Ambaxxata
ta’ Malta f’Beijing rat ukoll żieda konsiderevoli fin-numru t’applikazzjonijiet
għall-viżi mill-Filippini. Barra minn
hekk matul l-2019 Central VISA Unit ta’ Malta (CVU), approva wkoll numru kbir
t’applikazzjonijiet mill-Vjetnam, it-Tajlandja u l-Indoneżja. Il-Maġġor parti tal-applikazzjonijiet
mill-Filippini kienu jinkludu permessi għal-studju u permessi tax-xogħol li
jirriflettu t-tkabbir sostanzjali tal-ħaddiema Filippini fl-industriji Maltin,
fosthom Carers, l-oqsma tas-saħħa u l- ospitalita’. Fl-2019, l-Ambaxxata ta’ Malta f’Beijing u
l-Konsulat Ġenerali ta’ Shanghai flimkien ipproċessaw total ta’ 9,988 applikazzjoni. Minn dawn 6,808 applikazzjoniet kienu ta’ persuni
Ċiniżi, 2969 applikazzjoni ta’
persuni Filippini, 103 applikazzjoni
ta’ persuni Vjentamiżi u 108
applikazzjoni minn persuni provenjenti minn 20 pajjiż differenti fil-kontinent Asjatiku u lil hinn.
¯ieda maġġuri fl-ammont ta'
xogħol kemm tal-Ambaxxata ta' Beijing kif ukoll tal-Konsulat Ġenerali ta' Shanghai
ġejja mill-ipproċessar u x-xhieda ta' dokumenti għall-applikanti għall-Malta
Residence VISA Program (MRVP) u l-Malta Individual Investor Program (MIIP).
Kemm fl-Ambaxxata ta' Beijing kif ukoll fil-Konsulat-Ġenerali ta' Shanghai,
it-Tlieta u l-Ħamis ta ' kull ġimgħa huma kważi totalment iddedikati
għall-intervisti tal-applikanti ewlenin u d-dipendenti tagħhom, kif ukoll
ix-xhieda tad-dokumenti rilevanti. Kull applikazzjoni tista' tinkludi sa għaxar
jew tnax-il persuna, u ssarraf f’xogħol
li jieħu ħafna ħin. Fl-2019
l-Ambaxxata ta' Beijing u l-Konsulat-Ġenerali ta ' Shanghai pproċessaw aktar
minn 286 applikazzjoni għall-MRVP u 32-il applikazzjoni għall-MIIP.
L-Ambaxxata ta’ Malta
f’Beijing hija wkoll responsabbli mill-amministrazzjoni tal-Konsulat Ġenerali
ta’ Shanghai, fejn minbarra l-ipproċessar tal-applikazzjonijiet għall-viżi u
l-intervisti tal-MRVP u l-MIIP, ħafna attivitajiet jimxu b'mod parallel
mal-attivitajiet fl-Ambaxxata. Dawn
jinkludu attivitajiet bħall-attendenza għal laqgħat tal-Heads of Missions (HOMS), l-Akkoljenza f'Jum Nazzjonali, l-iffirmar
tal-Kotba ta' Kondoljanzi, eċċ.
L-Ambaxxata ta' Malta
f'Beijing hija assistita fil-ħidma tagħha mill-Konslu Onorarju f'Manila, li
s-sena li għaddiet iċċelebra 30 sena
f'dan ir-rwol volontarju, u l-Konslu Onorarju fil-Mongolja li ġie maħtur
fl-2019.
Mill-Preżentazzjoni tal-Ittri
ta' Kredenzjali fis-16 ta' Jannar, 2019, l-Ambaxxata ta' Malta kellha wkoll
l-assistenza eċċellenti tal-Konslu Onorarju fil-Vjetnam, li diġà pprovda appoġġ
qawwi lid-delegazzjonijiet tal-kummerċ li jżuru l-pajjiż u
għall-organizzazzjoni ta' adozzjonijiet barranin mill-Vjetnam minn familji
Maltin.
Wara bosta xhur ta'
negozjati, il-Ministeru għall-Affarijiet Barranin taċ-Ċina approva wkoll
l-għoti ta' l-Exequatur lill-Konslu Onorarju għal Malta f'Hong Kong, li ġiet
maħtura fl-2019.
(viii) Kwistjonijiet Oħra
Dawn inkludew l-attivitajiet
bħalma huma li l-Ambaxxatur ta’ Malta jirċievi Sejħa tal-Korteżija minn
Ambaxxaturi li għadhom kif ġew maħtura, ikliet ospitati minn Ambaxxaturi oħra,
riċevimenti tal- Jum Nazzjonali kif ukoll iffirmar ta’ kotba ta’ kondoljanzi
f’isem Malta.
Seduta 297
11/02/2020
No comments:
Post a Comment