Il-Partit Nazzjonalista juri tħassib dwar l-atmosfera ta’ tensjoni fil-Parlament

Stqarrija maħruġa mill-Grupp Parlamentari tal-Partit Nazzjonalista

Il-Partit Nazzjonalista jesprimi t-tħassib tiegħu dwar l-atmosfera fil-Parlament li kull ma jmur aktar qegħda tiddeġenera b’attakki kontinwi mill-Gvern kontra l-Oppożizzjoni.

Wara li nhar it-Tnejn li għadda l-Prim Ministru għamel diskors aggressiv b’attakki kontinwi kontra l-Kap tal-Oppożizzjoni, ilbieraħ il-Gvern, permezz tal-Ministri Marie-Louise Coleiro Preca u Joe Mizzi, ippruvaw jagħmlu mażra ma’ ħalq l-Oppożizzjoni. 

Fis-seduta parlamentari tal-bieraħ, il-Ministru Mizzi għamel talba lill-Ispeaker sabiex jiġi ssanzjonat (named) il-Membru Parlamentari George Pullicino wara li dan sempliċiment appella biex il-Ministri jkunu aktar konċiżi fit-tweġibiet tagħhom għall-Mistoqsijiet Parlamentari li għalihom huwa riżervat ħin limitat f'kull seduta. Dan minbarra l-fatt li l-mistoqsijiet li jsiru mhux dejjem qed jiġu mwieġba b’mod komplet.

Din mhijiex l-ewwel darba li l-Gvern ġie mitlub ma jtawwalx fir-risposti li jagħti fil-Parlament. Il-Partit Nazzjonalista jfakkar li f’ruling li kien ta fit-3 ta’ Ġunju 2013, l-Ispeaker Anġlu Farrugia kien sostna li r-risposti għall-mistoqsijiet parlamentari għandhom ikunu ċari u mingħajr tul żejjed. Dan ir-ruling huwa importanti għaliex l-Ispeaker jalloka tletin (30) minuta f’seduta parlamentari għall-mistoqsijiet parlamentari u l-mistoqsijiet supplimentari li joħorġu minnhom. Għaldaqstant, huwa kruċjali li dan il-ħin jintuża bl-aħjar mod possibbli fl-ispirtu tal-kontabbiltà u t-trasparenza. 

Minflok jattakka lill-Membri Parlamentari tal-Oppożizzjoni, il-Gvern għandu jkun ta’ eżempju billi jirrispondi l-mistoqsijiet li jsirulu fil-Parlament fl-ispirtu ta’ serjetà u trasparenza. 

--

Uffiċċju Informazzjoni

Partit Nazzjonalista