Il-Partit Nazzjonalista jisħaq li għandu jkun hemm rabta ġenwina bejn il-persuna u l-pajjiż biex tingħata ċ-ċittadinanza

Il-Partit Nazzjonalista jagħmel referenza għall-istqarrija tal-Gvern Laburista dwar l-iskema tal-bejgħ taċ-ċittadinanza. Il-Partit Nazzjonalista jisħaq li huwa l-Prim Ministru li qiegħed jippersisti bi żball permezz ta’ skema li hija llegali u li tmur kontra l-liġi Ewropea u d-dritt internazzjonali. Dan qalitu b’mod ċar il-Viċi-President tal-Kummissjoni Ewropea Viviane Reding kif ukoll is-Segretarja għall-Intern tar-Renju Unit Theresa May li stqarret li ċ-ċittadinanza huwa dritt u mhux privileġġ.

Il-Prim Ministru u l-Gvern Laburista issa spiċċaw  jattakkaw lil kull min ma jaqbilx mal-iskema tal-bejgħ taċ-ċittadinanza. Fl-istess waqt il-Prim Ministru qiegħed jinsa li kien hu stess li ta prova li ċ-ċittadinanza tista’ tiġi rtirata u dan meta fl-Avviż Legali li ppubblika ftit tal-jiem ilu stabbilixxa li min ma jżommx ma’ dak li tgħid il-liġi dwar il-bejgħ taċ-ċittadinanza jitlef iċ-ċittadinanza tiegħu. Dan juri kemm il-Partit Nazzjonalista għandu raġun meta jsostni li ċittadinanza li tkun ġiet mixtrija tista’ tiġi rtirata u dan minħabba li ma tkun teżisti l-ebda rabta bejn il-persuna u l-pajjiż li tagħha huwa jkun xtara ċ-ċittadinanza.  

Il-Partit Nazzjonalista jenfasizza li l-fatt li l-Kummissjoni Ewropea qegħda tinvestiga l-bejgħ taċ-ċittadinanza mill-Gvern Malti minħabba li dan jikser it-Trattat dwar l-Unjoni Ewropea, tista’ fiha nfisha twassal biex l-iskema tal-Gvern Laburista tkun iddikjarata llegali u għalhekk kwalunkwe ċittadinanza li tkun laħqet ġiet mogħtija tkun illegali u għalhekk invalida.

Fid-dawl ta' dan kollu l-Partit Nazzjonalista qiegħed mill-ġdid isejjaħ lill-Prim Ministru u lill-Gvern immexxi minnu sabiex jagħtu widen għal dak li ilha tgħid l-Oppożizzjoni. B'mod partikolari il-Partit Nazzjonalista qiegħed jinsisti li skema li biha tingħata ċ-ċittadinanza għandu jkun fiha l-obbligu li l-persuna mhux biss ikollha proprjetà fil-pajjiż u tagħmel investiment li joħloq ix-xogħol iżda jkun fiha wkoll l-obbligu li l-persuna tirrisjedi f'pajjiżna għal numru ta' snin qabel hija tkun tista' tiġi mogħtija ċ-ċittadinanza. B'dan il-mod tkun inħolqot rabta ġenwina bejn il-persuna u pajjiżna. Huwa b'dan il-mod biss li Malta tista’ tevita li tispiċċa quddiem il-Qorti Ewropea.

--

Uffiċċju Informazzjoni

Partit Nazzjonalista