Il-Gvern qed jonqos milli jattira x-xogħol f’diversi setturi ekonomiċi.

Diversi setturi ekonomiċi f’pajjiżna għaddejjin minn perjodu diffiċli bi tnaqqis ta’ attività, bejgħ u li qed iwassal għal tnaqqis fil-postijiet tax-xogħol. Dan reġa’ kien ikkonfermat illum mill-Uffiċċju Nazzjonali tal-Istatistika li turi li, għalkemm globalment l-attività ekonomika f’pajjiżnà f’termini reali rreġistrat tkabbir modest ta’ 1.9% matul it-tielet kwart ta’ din is-sena fuq l-istess perjodu tas-sena li għaddiet, l-istess statistika tkompli tikkonferma t-tħassib espress riċentement mill-Partit Nazzjonalista fuq diversi setturi ekonomiċi u s-sitwazzjoni preżenti fis-suq tax-xogħol.

L-istatistika ppubblikata llum dwar il-Prodott Gross Domestiku tagħti stampa differenti minn dik li qed jipprova jpinġi l-Gvern. Filfatt, din turi attività dgħajfa – u tnaqqis sostanzjali – f’diversi oqsma, inkluż il-manifattura, il-kostruzzjoni, is-settur tal-proprjetà, attivitajiet kummerċjali bl-ingross u bl-imnut kif ukoll servizzi oħra, fosthom tiswijiet ta’ vetturi. Dawn l-indikaturi huma ta’ tħassib serju għall-kważi 60,000 persuna u l-familji tagħhom li jaħdmu f’dawn is-setturi.

Filwaqt li l-Gvern Laburista ħareġ jiftaħar b’dan it-“tkabbir”, ma qalx li parti mhux żgħira mit-tkabbir irreġistrat fl-ekonomija ġej mill-amministrazzjoni pubblika, li ma jfisser xejn ħlief riżultat ta’ ħatriet ta’ nies viċin il-Partit Laburista mad-dipartimenti, awtoritajiet u aġenziji.

Din l-istatistika tkompli torbot ma’ ċifri oħra ppubblikati fl-aħħar ġimgħat li juru tnaqqis drastiku fl-esportazzjoni, fil-produzzjoni industrijali u li xahar wara l-ieħor qed jirriżultaw f’rata akbar ta’ nies ifittxu l-postijiet tax-xogħol.

L-appell tal-Partit Nazzjonalista lill-Gvern jibqa’ wieħed ċar: il-familji jixraqilhom pjan għax-xogħol li tassew jagħraf kif se jattira lejn Malta investiment sostenibbli li joħloq aktar postijiet tax-xogħol ta’ kwalità – hekk biss nistgħu niżguraw li kif pajjiżna m’għeriqx fl-agħar maltemp, jibqa’ għaddej anke issa li madwarna qed jerġa’ jfeġġ il-bnazzi.

--

Uffiċċju Informazzjoni

Partit Nazzjonalista

Il-PBS moħħu biss biex jgħatti xtur il-Gvern

B’reazzjoni għall-istqarrija maħruġa mill-PBS illum, tlett ijiem wara li sar l-ilment oriġinali, il-Partit Nazzjonalista jinnota li kuntrarju għall-mezzi tax-xandir indipendenti kollha f’pajjiżna li rrapurtaw id-diskors tal-Ministru tal-Finanzi Edward Scicluna quddiem il-Membri tal-Parlament Ewropew, il-kamra tal-aħbarijiet tal-PBS ma rat l-ebda “valur ta’ aħbar” f'dak li ntqal. Lanqas ma rat “valur ta’ aħbar” fl-istqarrija tal-Partit Nazzjonalista dwar il-u-turn straordinarju tal-Ministru tal-Finanzi.

Quddiem il-Membri tal-Parlament Ewropew, il-Ministru tal-Finanzi sostna li l-iskema tal-bejgħ taċ-ċittadinanza ta’ pajjiżna hija żbaljata. Skont il-PBS, din l-ammissjoni ma fiha l-ebda “valur ta’ aħbar”.

Quddiem il-Membri tal-Parlament Ewropew, il-Ministru tal-Finanzi sostna li għandu jkun hemm capping tal-ammont ta’ individwi li jsiru ċittadini kull sena. Skont il-PBS, din il-bidla fil-politika tal-Gvern ma fiha l-ebda “valur ta’ aħbar”.

Quddiem il-Membri tal-Parlament Ewropew, il-Ministru tal-Finanzi sostna li għandu jkun hemm rabta akbar bejn individwu li jixtieq isir ċittadin u pajjiżna. Skont il-PBS, din il-bidla fil-politika tal-Gvern ma fiha l-ebda “valur ta’ aħbar”.

Bl-aġir tiegħu, il-Kap tal-Kamra tal-Aħbarijiet Reno Bugeja qed ikun selettiv ħafna fl-għażla tiegħu ta’ dak li jiġi rrappurtat mix-xandir tal-Istat. Minflok iwassal l-aħbarijiet b’konsistenza editorjali fl-interess tal-pubbliku, il-PBS sar moħħu biss biex jgħatti xtur il-Gvern.

Peress li l-PBS qiegħed jippersisti fl-iżbilanċ ċar tiegħu, il-Partit Nazzjonalista se jkun qed jitlob lill-Awtorità tax-Xandir biex tagħti rimedju effettiv.

--

Uffiċċju Informazzjoni

Partit Nazzjonalista

Ipokresija mill-Gvern fil-qasam tal-immigrazzjoni irregolari

Dalgħodu waqt konferenza organizzata mill-People for Change Foundation, li fiha ġie diskuss il-prinċipju tan-non-refoulement, jiġifieri d-dmir ta’ kull pajjiż li ma jibgħatx immigranti lura f’pajjiżi fejn ma jistax ikun assigurat li d-drittijiet umani tagħhom ikunu mħarsa, il-Ministru Helena Dalli stqarret li l-Gvern Laburista huwa kommess li jipproteġi d-drittijiet umani tal-immigranti irregolari.

Iżda bejn il-kliem u l-fatti hemm baħar jikkumbatti. Il-Partit Nazzjonalista jfakkar li d-diskors sabiħ ħafna tal-Ministru Helena Dalli jistona ferm mal-attentat tal-Prim Ministru Joseph Muscat li jimplimenta politika ta’ pushbacks f’Lulju li għadda. Dakinhar, il-Gvern Laburista ma tħalliex iwettaq din il-politika żbaljata, billi jibgħat grupp ta’ immigranti irregolari lura l-Libja fis-satra tal-lejl, għaliex l-għaqdiet non-governattivi involuti f’dan is-settur għamlu talba formali lill-Qorti Ewropea tad-Drittijiet tal-Bniedem. Kienet l-istess Qorti li żammet lill-Prim Ministru Muscat milli jimplimenta l-pushback. 

Il-Gvern Malti llum qed ibati l-konsegwenzi tad-deċiżjoni li jipprova jimplimenta l-politika tal-pushbacks. Dan joħroġ ċar mill-falliment totali tiegħu li jikkonvinċi lill-pajjiżi membri tal-Unjoni Ewropea biex jagħtu aktar għajnuna konkreta fil-qasam tal-politika dwar l-immigrazzjoni irregolari fuq livell Ewropew, inkluż billi jiġi introdott il-burden sharing mandatorju li kien tant tkellem dwaru Joseph Muscat qabel l-elezzjoni ġenerali. 

Il-Gvern Malti għandu jħares id-drittijiet tal-bniedem b’konvinzjoni u mhux għax jiġi kostrett jagħmel dan minn xi awtorità internazzjonali. F’dan id-dawl, id-diskors tal-Ministru Helena Dalli llum hu każ ieħor ċar ta’ doublespeak, fejn il-Gvern jgħid ħaġa meta fil-fatt ikun għamel oħra.

--

Uffiċċju Informazzjoni

Partit Nazzjonalista

L-NSO jerġa’ jikkonferma tnaqqis fl-esportazzjoni

L-Uffiċċju Nazzjonali tal-Istatistika llum ħabbar li matul ix-xahar ta’ Ottubru, l-esportazzjoni minn pajjiżna reġgħet naqset, din id-darba b’36%, li jfisser tnaqqis ta’ aktar minn terz, meta mqabbel mal-istess perjodu s-sena li għaddiet. Din iċ-ċifra tikkonferma dak li ilu jsostni l-Partit Nazzjonalista, jiġifieri li l-ekonomija u l-industrija ta’ pajjiżna qegħdin jiffaċċjaw diffikultajiet li mhumiex jiġu indirizzati mill-Gvern. Tnaqqis fl-esportazzjoni ma jfisser xejn ħlief tnaqqis fl-attività tal-fabbriki, u allura tnaqqis fix-xogħol. 

Din hija ċifra li tkompli tqajjem tħassib fid-dawl tas-sitwazzjoni rrappurtata fl-aħħar jiem ta’ numru ta’ fabbriki ewlenin li ħabbru li se jnaqqsu sostanzjalment il-ħaddiema tagħhom jew li saħansitra kienu kostretti jpoġġu lill-ħaddiema tagħhom fuq sistema ta’ four-day week. Dan qed idgħajjef is-sitwazzjoni finanzjarja ta’ eluf ta’ familji Maltin u Għawdxin, u qed ikompli jdaħħal element ta’ inċertezza, li ma tawgurax tajjeb għall-ekonomija ta’ pajjiżna.

L-istqarrija tal-Uffiċċju Nazzjonali tal-Istatistika xxejjen ukoll l-iskuża li tipikament joħroġ biha l-Ministru tal-Finanzi Edward Scicluna, li jiġġustifika dan it-tnaqqis billi jgħid li dan ġej mit-tnaqqis ta’ riesportazzjoni ta’ tipi differenti ta’ fjuwil. Fil-fatt, l-Uffiċċju Nazzjonali tal-Istatistika jagħmilha ċara li anke meta tneħħi l-fjuwils mit-total tal-esportazzjoni, pajjiżna xorta rreġistra tnaqqis kbir ta’ 23% fuq l-istess perjodu s-sena li għaddiet.

L-appell tal-Partit Nazzjonalista jibqa’ wieħed ċar: il-Gvern għandu jaġixxi qabel ma jkun tard wisq. Il-Gvern għandu jieqaf iwebbes rasu u joħloq pjan serju dwar ix-xogħol sabiex isib is-soluzzjonijiet għall-industrija, għas-sidien tan-negozji u finalment għall-ħaddiema Maltin u Għawdxin u l-familji tagħhom.

​

Ma jridx jinduna.

1.            Diġà qiegħed iberraq waħda u sew.  Iktar u iktar f’ġimgħa fejn bibien is-smewwiet infetħu sew.  Biss, il-Gvern ma jridx jagħti każ.  Qiegħed idawwar  wiċċu l-bgħid minn dak li huwa għaddej.  Flok jaffrontah qiegħed jaħrab minnu.  Safar, konsulenzi, ħidma indirizzata sabiex tagħti dak li m’huwiex isir.  Il-problemi tal-poplu ma jissolvewx waħedhom jew billi jiġu injorati imma billi jipu konfrontati. 

2.            Bħalissa għaddejjin żewġ kurrenti kuntrarji li ma jwasslu lejn xejn ħlief lejn iktar beraq u sajjetti.  Il-Gven qiegħed jonfoq iktar milli jmissu fuq dak li ma jmissux.  Il-konsulenzi mingħajr skop, bidu jew tmiem għaddejjin mingħajr ebda forma ta’ regola ta’ xejn.  La linji ta’ speċjalizzazzjoni, anqas xi forma ta’ kriterju ta’ ħlas.  Kollox miftuħ għall-proċess ta’ konfużjoni.  Ħaġa waħda hemm ċara: li flus il-poplu qed jitberbqu mingħajr ebda forma ta’ kontroll.

3.            Fl-aħħa ta’ kull erba’ ġimgħat, il-kont tal-pajjiż fir-rikorrent żdied konsiderevolment.  Fil-bidu jista’ jkun li ma jidhrux dawn l-ispejjeż fil-baħar, però maż-żmien ser jakkumulaw għad-dannu tagħna lkoll.  Mhux biss imma l-Gvern, li b’dan qiegħed  jipperikola l-istabbiltà tagħna, is-sistema soċjali tagħna, qiegħed jaħrab mill-fatt li ċ-ċifri tal-qagħad telgħin.  Ma’ kull xahar għandek fuq naħa ħruġ ikbar u fuq in-naħa l-oħra għandek ċavetta vitali tal-ekonomija sejra lura. 

4.            Meta jibda jkollok iktar bnedmin jirreġistraw tkun qiegħed tiftaħ bieb għal inkwiet futur.  Illum il-ġurntata nafu Ii meta l-ekonomija timxi, l-istat soċjali jibqa’ għaddej tajjeb skont kemm ikollu persuni jaħdmu u kemm iżomm mill-inqas l-indiċi tan-nies bla xogħol.  Gvern Nazzjonalista kien fehem tajjeb dan il-mekkaniżmu vitali u assiguah, minkejja kull difett ieħo li kellu u li ħallas sew għalih: dak li jżomm ix-xogħol bħala prijorità.  Dan il-Gvern Laburista minflok, f’dan il-perjodu m’huwiex fuq l-istess linja. 

5.            Minflok, moħħu biex jidħol għal ħwejjeġ oħra li m’humhiex prijoritajiet nazzjonali, imma sempliċement prijoritajiet personali.  Prijoritajiet li ġejjin minn dak li l-Gvern kontinwament jiddikjara.  Flok qed niddibattu l-ekonomija, flok qed nieħdu miżuri ta’ bidla u korrezzjoni, qed naħirbu fuq liġijiet oħra.  Diġà għandna diskors tal-budget li minnu ma nistgħux nieħdu tarf tal-linja li qed jieħu biss li jkollna liġijiet immirati biss biex iqassmu lil dak u lill-ieħor huwa viċin it-traġedji.

6.            Diġà kellna liġi qabel is-sajf immirata sabiex numru ta’ membri parlamentari min-naħa tal-Gvern immirati sabiex jappuntaw lil dak u lill-ieħor f’pożizzjonijiet fejn ikunu jistgħu jdaħħlu ferm iktar.  Wara morna għan-nomina ta’ ambaxxaturi bla esperjenza jew kompetenza.  Wara morna għall-iżball tal-bejgħ taċ-ċittadinanza.  Issa bdejna dik tal-ordnijiet tal-mertu.  Gvern li jqiegħed dan bħala l-ordni tal-ġurnata huwa wieħed li għadu ma sabx id-direzzjoni.  Wieħed li għadu ma fehemx kemm huwa diffiċli biex tmexxi dan il-pajjiż.  Wieħed li jekk jibqa’ sejjer hekk ser ikun qabad ir-roadmap tal-preċipizzju.

7.            Il-Gvern ma jridx jinduna li diġà żera’ ż-żerriegħa ta’ inkwiet futur.  Jekk ser ikompli jaħrab mill-problemi ser ikollna iktar nuqqasijiet milli diġà għandna.  Ix-xogħol, l-ekonomija u l-istat soċjali huma katina.  Waħda li ma tgħaddix mingħajr l-oħra.  Iktar ma jiddritta malajrr, tant aħjar għall-pajjiż.  Iktar ma jdum, iktar ser jeħduna lura.  Il-maġġoranza hija qawwija f’idejh.  Dmirna jibqa’ li niġbdulu l-attenzjoni, forsi fl-aħħar jinduna.

Iddeċiedi Xi Trid.

1.         Kemm hi tajba din.  Il-Gvern għadu ma jistax iżarma lilu nnifsu mill-fosdqa li kellu fl-Oppożizzjoni.  Għadu ma jistax jifhem li fil-pożizzjoni l-ġdida jrid jiddeċiedi u jieħu pożizzjoni.  Fl-Oppożizzjoni kienu draw li jilgħabu fuq iż-żewġ naħat.  Kienu ħaduha bħala parti mis-sistema li jgħidu ”iva” lil dawk li ma jistgħux jaqblu magħhom.  Din kienet mill-iktar evidenti għax kull settur ried jisma’ “iva”, anke fejn m’għandux raġun u dan kien jiġi servut minnhom.

2.         Issa però, il-porporina bdiet taqa’ u l-kurrazza tleqq tleqq issa bdiet tittappan.  Il-Gvern għadu mhux jinduna li jrid jiddeċiedi u jgħid x’jaħseb, x’ser effettivament iwettaq u jagħżel triqtu.  Għadu mhux jara li meta tmexxi ma tistax tibqa’ tidher sabiħ ma’ kulħadd u, f’mumenti, trid bilfors tixrob il-kalċi qares.  Triq tieħu naħa u timxi fuqha.  Gvern tajjeb fuq dan jintagħżel.  Kemm ikun kapaċi jieħu deċiżjonijiet li ma tantx ikollu ċapċip fuqhom imma li fiż-żmien irendu f’suċċess.

3.         Id-deċiżjonijiet diffiċli huma dawn – dawk li tmexxi ‘l quddiem f’direzzjonijiet tajba, anke jekk taf li fil-bidu mhux ser ikollok kunsensi.  Kull gvern irid jiffaċċja dan.  Kull min irid,mhux biss il-ġid imma kapaċi li jwettqu jagġraf dan b’iktar attenzjoni u faċilità minn ħaddieħor li moħħu biss kemm huwa popolari.  Poplu jippretendi mill-mexxejja tiegħu li jeħduh ‘il quddiem u lest li jaċċetta li hemm min qiegħed ġewwa u jaf iktar, imma mhux lest li jittieħed fejn huwa ċert li dawn huma toroq żbaljati.

4.         Il-kwistjoni tal-bejgħ taċ-ċittadinanza tagħna ilha issa ġimgħat tieħu l-attenzjoni politika u pubblika.  Il-Kunsill Ġenerali tal-partit il-Ġimgħa u l-Ħadd li għaddew serva sabiex dan il-messaġġ ċar jasal iktar.  Tasal ċara l-pożizzjoni nazzjonali tagħna, li aħna li rridu verament il-ġid lil dan il-poplu qed nagħmlu ħilitna sabiex inżommu lura kemm jista’ jkun liġi żbaljata.  Liġi li hija hekk mhux għax qed ngħidu aħna li hija ta’ tal natura, imma għax hija minnha nfisha mhux f’lokha.

5.         Il-poplu nafu li m’huwiex il-ħin kollu mwaħħal mal-istazzjonijiet tax-xandir, anqas jixtri jew jaqra l-gazzetti kull ġurnata imma maż-żmien tasallu wkoll.  Walssalnihielu u fehemha tajjeb.  La żidna u lanqas naqqasna, imma għidna l-verità.  Għidna l-affarijiet kif inhuma.  Sfortunatament, il-Gvern dam biex fehem u jirreaġixxi.  Webbes rasu waħda u sew u spiċċa beda triq li fiha jrid jieħu lura parti minn dak li ma kellux jagħmel.  Ir-realtà hija li aħna diġà ġejna umiljati bħala pajjiż u din mhux faċli ġġibha lura.

6.         Mhux faċli li tħassar dak li qiegħed idur kontra l-immaġini tajba li kellna.  Iktar ma l-Gvern idum jaħsibha, iktar agħar.  Iktar ma jdum biex jiddeċiedi li għandu jgħaddi liġi malajr sabiex iħassarha, iktar agħar.  Ma jistax jippretendi li jibqa’ jidħak bina lkoll.  Jgħid li l-liġi mhux ser iġibha fis-seħħ meta nafu diġà li l-liġi, kif ġiet approvata skont il-liġi, daħlet bil-volontà tagħhom dritt dritt fil-liġijiet tagħna.  Il-Gvern qiegħed jipprova jaħrab dak li huwa inevitabbli.  Li ċeda fuq is-segretezza kien pass ‘il quddiem.  Biss, dan waħdu mhux biżżejjed.  Trid tħassarha b’liġi apposta.

7.         Minflok jaqtagħha u jiddeċiedi, il-Prim Ministru jidher li qiegħed ikompli jtawwalha u jaħrabha.  Mhux biss, imma qiegħed jonqos milli jkun ċar f’dak li sewwasew irid u minflok jibgħat messaġġi mħawda.  F’pajjiżna jgħid li lest li jiċċaqlaq issa wara tant żmien u, minflok ikun konsistenti, jerġa’ jsiefer, jonfoq flus il-poplu f’dak li huwa evdienti li ma jridux.  Kif jista’ jkun konsistenti u kredibbli jekk fuq naħa jgħid, wara li ilu xhur iwebbes rasu, li issa jrid jiftiehem mal-Oppożizzjoni meta fl-istess ħin jinsab fl-Istati Uniti jidher biex jinxtrw iktar passaporti?  Il-korrettenza kienet titlob żgur li ma jmurx.

8.         Iktar ma jgħaddi ż-żmien, il-pożizzjoni iktar qed tikkomplika ruħha.  Ir-responsabbiltà ta’ dan l-aġir skorrett huwa kollu fuq in-naħa tal-Gvern u hu jrid iġorrha.  Aħna dmirna għamilnih u ser inkomplu nagħmluh.  Konna disposti mill-bidu biex naslu f’liġi li tagħmel il-ġid, u anzi fid-dibattitu ħadna ħsieb li niftħulu għajnejh kif tista’ ssir verament tajba, imma l-piż jibqa’ fuq il-Gvern li jagħmel l-affarijiet sewwa.  Aħna ċari konna u ċari bqajna.  Il-Gvern li tħawwad.  Jonqsu biss li joħroġ minnha billi jiddeċiedi sewwasew xi jrid.

Ferita Nazzjonali

1.         L-unur ma jistax jinxtara.  Jista’ jinkiseb maż-żmien.  Jinkiseb bl-imġieba tajba kostanti, onesta u retta.  Iktar ma wieħed iżomm ruħu marbut mal-prinċipji tas-sewwa, iktar jikbirlu l-unur.  Jikbirlu miegħu nnifsu li jagħraf li qiegħed jimxi b’umiltà fit-triq id-dritta; u t-tieni ma’ dawk li jżommu ruħhom mal-bnedmin ta’ rieda tajba.  Faċli titlifha.  Diffiċli żżommha.  Taf li hemm min ikun iridlek il-ġid u hemm min id-deni.  Tal-ewwel jarawk fuq dak li tkun qed tagħmel; tat-tieni jieħdu kull okkażjoni sabiex ikerrħuk.

2.         Dawk huma r-regoli naturali tal-ħajja.  Taf diġà li hemm min jgħir għalik, jew jaħseb li ser jieħu gwadann billi jkerrħek, però tkun qed tiżbalja bil-kbir meta ġġib l-għali fuqek.  Meta tkun kaġun inti stess tat-tkissir tar-reputazzjoni tiegħek, allura ma tantx tista’ titkellem.  Tagħti vantaġġ lil ħaddieħor u fl-istess ħin tinżel niżla li, tagħmel x’tagħmel, tkun diffiċli ħafna biex terġa’ ġġibha lura.  Torbot mażżra miegħek innifsek li iktar ma tissielet magħha, iktar tissikkak.  Il-ġudizzju, l-għaqal u l-prudenza jżommuk milli taqa’ f’dan il-bir, però jekk ma tagħtix każ tagħhom u tiddisprezzahom allura ma hemmx ħlief li twaħħal fik innifsek.

3.         Il-valuri taċ-ċiviltà tagħna huma ċari.  Bażati fuq prinċipji li ssawru maż-żmien u li bbażaw ruħhom manifestament fuq dawk insara.  Jekk tarmi dawn l-ankri li bihom twettaq is-sewwa u tagħmel il-ġid lill-proxxmu, tarmi lilek innifsek.  Hemm min irid jisfida sekli sħaħ ta’ esperjenzi umani u jmur il-kontra għax jimmaġina li sab triq ġdida.  Jista’, però kull ma jkun qiegħed jagħmel huwa li jidħak bih innifsu u b’dawk li fdawh.  Mhux biss, imma meta jonqos li jagħraf li dan it-tagħlim iżommok ‘il bogħod mill-iżbalji jispiċċa jħossu komdu ma’ dak li m’huwiex sewwa.  L-unur jiddependi wkoll kemm trid tħobb l-indafa u kemm tħossok paxxut ma’ dak li m’huwiex.

4.         Il-liġi dwar iċ-ċittadinanza, dik l-emenda li biha issa ser nibdew infittxu li nbiegħu ċ-ċittadinanza tagħna hija każ mill-iktar ċar ta’ dan.  Aħna fl-Oppożizzjoni qegħdin u liġi bħal din qatt ma għamilna jew qatt ma konna ser nagħmluha.  Stajna biss nopponu għaliha, u hekk għamilna billi kull membru tagħna tkellem kontra.  L-obbligu, ir-responsabbiltà qegħdin b’mod qawwi fuq il-Gvern.  Huwa hu li ħareġ b’din il-liġi u għalhekk irid iwieġeb għall-effetti ħżiena tagħha.

5.         Huma ħżiena għax ebda poplu ma jarmi unuru, ma jasal li jbiegħ dak li huwa l-iktar għażiż għalih innifsu.  B’din il-liġi, flus mhux xierqa jistgħu jidħlu imma biha d-dinjità tagħna qed tintrema.  Biha l-Gvernh fetaħ attakk għas-sens b’saħħtu ta’ nazzjonaliżmu tagħna.  Mhux dak estremista iżda dak li għalih aħna kburin, li jagħtina sens ta’ rabta u kburija.  Kien hemm żmien meta kien hemm soċjetajiet antiki u primittivi li kienu jippermettu aġir kontra n-natura umana.  Kellna dawk li kienu jippermettu familji li sforz il-faqar ibiegħu ‘l uliedhom.  Biss dan iż-żmien għadda.

6.         Pajjiżna m’għandux bżonn jasal f’dan ix-xifer.  Diġà qed nieħdu reputazzjoni ħażina barra minn xtutna biha.  Diġà gazzetti barranin qed jirrappurtaw b’ebda forma ta’ tifħir għalina li aħna qegħdin inbiegħu dak li huwa l-iktar għażiż għalina.  Diġà qed tidher barra li min ser jixtri din iċ-ċittadinanza ser jagħmel hekk għax għandu bżonn, għax għandu xi ħaġa li jrid jaħbi, għax għandu storja passata xejn tajba.  U l-liġi qed tkompli ssaħħaħ din il-konvinzjoni għax qed tassigura li l-ismijiet ta’ dawn il-karattri jibqgħu mistura.  Dak li ma joħroġx għad-dawl għandu raġuni biex jibqa’ fid-dlam.

7.         Din il-liġi qegħda tmur kontra kull dekor, kull sens ta’ deċenza, kull ma huwa naturali fil-bniedem.  Hija liġi li ser tkissrilna r-reputazzjoni għolja ħafna li l-Partit Nazzjonalista, għax huwa proprju nazzjonalist, irnexxielu jwettaq.  Din hija ferita qawwija.  Biha ser nitilfu f’kull settur u ser nibdew it-triq tat-tkasbir.  Hija ferita mortali, gravissima għalina lkoll li ridna s-sewwa u ħdimna għaliha.  Ferita nazzjonali li biha ser nitilfu ħafna mid-demm tal-investiment tagħna lkoll.