1. Kontra dak li ħaddieħor ħaseb, il-Partit
Demokratiku Kristjan fil-Ġermanja, immexxi mill-Kanċilliera Angela Merkel għadu
għaddej fi triqtu. Ftit kienu dawk li
bassru li fl-elezzjonijiet li saru fl-istat ta’ Saarland il-Ħadd li għadda, dan
il-partit kellu jkun l-uniku wieħed mill-partiti stabbiliti li jżid fil-kunsens
u fis-siġġijiet. Kien hemm min qiegħed
jara li l-Kanċilliera kienet riesqa lejn telfa elettorali. Biss, ir-riżultat wera l-kontra. Is-suċċess ta’ dan ġej minn numru ta’ fatturi
li jidher ċar li influwenzaw direttament lill-elettorat kawt u attent. Prinċipalment il-karattru, il-valuri u
l-imġieba tal-istess Merkel.
Simpatija u rispett
2. Għaddiet minn diffikultajiet tul dawn
l-aħħar xhur. Sabet ruħha attakkata internament
ukoll, partikolarment wara l-mewġa ta’ immigrazzjoni irregolari li ħakmet
lill-pajjiż. Illum is-sitwazzjoni
nbidlet sew u għal dan kien hemm żewġ fatturi determinanti. L-ewwel, ġibdet fuqha simpatija u rispett
fil-mod eżemplari li ġiebet ruħha bih waqt il-laqgħa li kellha mal-President
Amerikan Donald Trump. Hemm żammet
il-pożizzjonijiet Ewropej b’attenzjoni u direzzjoni ċara. Kliem bla sens ma qalitx. Ma kinitx b’xi mod aggressiva, imma
mill-iktar raġjonevoli. Anzi għoliet
fil-mument meta, minkejja li offriet lill-istess President Trump li jieħdu
b’idejn xulxin hu, b’nuqqas ta’ kortesija, diplomazija u bir-regoli bażiċi ta’
mġieba, injoraha.
L-effett Shulz
3. Ma tilfitx rasha f’dak il-mument verament
diffiċli, imma żammet sħiħ id-dinjità tagħha u f’dak il-ħin kien ċar li
ħaddieħor naqasha. Ma’ dan żied iktar
l-effett favur tagħha wara li l-Partit Soċjal-Demokratiku għażel mexxej ġdid
f’Martin Schulz biex jikkuntrastaha.
Għażla li saret ġimgħa biss qabel dawn l-elezzjonijiet, bil-kandidat
il-ġid iġib l-approvazzjoni assoluta tal-partit kollu u deher li ma kien ser
ikollu xejn xi jżommu, impinġi bħala kważi invinċibbli. Schulz, ma hemmx dubju li huwa magħruf sewwa
f’pajjiżna u fl-Ewropa. Biss għandu
l-iżvantaġġi li ilu wisq maqtugħ mill-politika nazzjonali Ġermaniża, kif ukoll
li huwa parti mid-deċiżjonijiet Ewropej li ma kienux biżżejjed popolari f’dak
il-pajjiż. Il-Partit Soċjal-Demokratiku
seta’ ħaseb li x-xilep kien ġewwa b’din il-mossa “sorpiża”, però r-riżultati
llum qed juru li dak li qed jidher artifiċjali m’huwiex jirnexxi ħafna.
Żammet ir-rilevanza
4. Fil-verità Angela Merkel, tul dawn is-snin
li mill-2005 ilha kanċilliera, irnexxielha taħdem bis-serjetà biex tibdel
il-perkors Ewropew u dak nazzjonali.
Żammet ir-rilevanza tal-Partit Demokratiku Kristjan billi ma abbandunatx
il-valuri u l-prinċipji nsara li jispirawna u jiggwidawna. Ħadet ħsieb timxi b’għaqal fl-iktar
sitwazzjonijiet kumplikati li l-kriżi finanzjarja ġiebet fuqna lkoll. Fuq kollox, żammet ukoll l-integrità personali
tagħha ntatta. La daħlet
f’kumplikazzjonijiet marbutama’ abbuż jew korruzzjoni fil-poter; anqas ma
tilfet rasha fuq xi ħmerija, imma ddedikat ruħha kompletament għall-politika
attiva u parteċipattiva. Ir-rispett
lejha huwa għalhekk iktar u iktar konsolidat, issa li riesqa lejn it-tnax-il
sena tat-tmexxija kontinwa tagħha.
Ħolma tal-ftit
5. Dan kollu huwa iktar u iktar rilevanti
llum f’Unjoni Ewropea li għandha diversi sfidi xi twieġeb għalihom. Is-Sibt li għadda, l-istess Merkel ingħaqdet
mal-mexxejja Ewropej l-oħra sabiex jiġi ċelebrat is-sittin anniversarju
tat-Trattat ta’ Ruma, li ta bidu għall-Unjoni Ewropea ta’ issa. Għalkemm bħala fatt ma tantx issemmew,
il-missirijiet ta’ dan il-ftehim kienu tlett demokristjani. Il-ġermaniż Konrad Adenauer, it-taljan Alcide
De Gasperi u l-franċiż Robert Schuman wittew it-triq u ħarsu ‘l quddiem. Kienu, kif għemilhom jixhed, bnedmin ta’ sens
u sustanza. Dawk li kienu batew u fehmu
li l-futur ewropew fil-paċi u l-ġustizzja jrid proġett ambizzjuż li jgħaqqad, u
mhux jifred. Kif tajjeb intqal, il-ħolma
tal-ftit żviluppat fit-tama ta’ ħafna.
Moderata u fiċ-ċentru
6. Lil Merkel illum nistgħu faċilment
inqegħduha fost dawn il-mexxejja fi ħdan din it-tradizzjoni ta’ bnedmin ta’
integrità u direzzjoni. Saret forza ta’
stabilità għal pajjiżha u għall-istess Unjoni.
Waqt li pajjiżi oħrajn biddlu, hija baqgħet hemm. Ma ntilfitx f’diskors dispreġjattiv, anqas
f’isteriżmu, imma bil-kalma mexxiet ‘il quddiem pajjiż kbir f’mumenti diffiċli
u kumplikati ħafna. Punti li kif qed
naraw qegħdin jiġu apprezzati iktar minn pajjiż li ma jridx ikun
avventuruż. Punti li jikxfu
l-preparazzjoni politika tagħha ta’ bniedma li hija mgħarrfa u soda għax
fl-apprendistat tagħha ġiet magħġuna u mbaskta tajjeb minn ta’ qabilha.
Eżempju għalina
7. Dak li għaddej f’dak il-pajjiż kbir għandu
jservi għalina bħala eżempju. Iservi
biex jixhed għall-fatt li partit fiċ-Ċentru m’għandux bżonn imur lejn il-lemin
biex jirbaħ il-kunsens elettorali. Anzi,
għandu jassigura li jifhem li bit-tħaddim tal-valuri nsara tiegħu, u
l-ideoloġija politika demokratika nisranija li jħaddan, il-poplu ma jinqatax
minnu. F’dinja politika fejn dejjem
tonqos il-fiduċja f’dawk li jiġu eletti.
Fejn hemm iktar li jiġu ttantati lejn imġieba żbaljata. Dan kollu huwa iktar rilevanti sabiex
il-ġlieda għas-sewwa u għall-politika t-tajba jerġgħu jieħdu lura s-saħħa. Għax hemm bżonn li l-popli ewropej jirbħu
lura l-fiduċja tagħhom f’mexxejja li kapaċi jservu b’dinjità u attenzjoni.
