GAŻA - GĦAJNUNA UMANITARJA

24730. L-ONOR. CARMELO MIFSUD BONNICI  staqsa lill- Deputat Prim Ministru u Ministru għall-Affarijiet Barranin u t-Turiżmu: Jista’ d-Deputat Prim Ministru u Ministru għall-Affarijiet Barranin u t-Turiżmu jindika kemm hija prevista u x’tip ser tkun l-għajnuna umanitarja ta’ pajjiżna lill-poplu Palestinjan f’Gaża tul is-sena 2025?

 

17/01/2025

 

ONOR. IAN BORG:  Ninforma lill-Onor. Interpellant li kif spjegajt fil-mistoqsija parlamentari 22858, il-Gvern Malti, inkluż il-Ministeru għall-Affarijiet Barranin u t-Turiżmu, ħa azzjoni immedjata biex jindirizza l-katastrofi umanitarja f’Gaża hekk kif saret evidenti il-gravità tas-sitwazzjoni. Sfortunatament, is-sitwazzjoni kompliet tiggrava minn Ottubru 2023. Madankollu, nittama li l-waqfien mill-ġlied miftiehem reċentement jippermetti flussi umanitarji ferm ikbar u aktar stabbli, filwaqt li jiġi żgurat li l-persunal umanitarju jkun protett u jingħata aċċess lejn Gaża f’dan il-mument kruċjali.

Il-Ministeru għall-Affarijiet Barranin u t-Turiżmu bħalissa qed jippjana n-nefqa annwali tal-għajnuna għall-iżvilupp għall-2025. Minħabba l-gravità tas-sitwazzjoni f’Gaża, fejn mijiet ta’ eluf ta’ persuni jeħtieġu għajnuna immedjata u assistenza fil-bini mill-ġdid ta’ djarhom, Gaża se tkun fost l-ewwel prijoritajiet li se jiġu ndirizzati. Matul l-2024, il-Gvern żied l-appoġġ tiegħu lejn l-Aġenzija tax-Xogħlijiet ta’ Ħelsien tan-Nazzjonijiet Maqgħuda, UNRWA għal EUR 190,000, waqt li ħafna pajjiżi oħra kienu waqqfu jew naqqsu l-finanzjament tagħhom. Dan huwa għarfien ċar tal-ħidma essenzjali li tagħmel din l-aġenzija f'Gaża.

Minkejja dan, il-ħidma tal-UNRWA hija mhedda minħabba żewġ liġijiet reċenti tal-Knesset Iżraeljan, li jistgħu jnaqqsu l-kapaċità tagħha li tipprovdi għajnuna umanitarja. Malta qed taħdem mill-qrib mal-imsieħba fl-UE biex tiżgura li l-operat tal-UNRWA ikun garantit. Barra minn hekk, qed jiġu evalwati forom oħra ta’ għajnuna, inkluż kollaborazzjonijiet ma’ organizzazzjonijiet lokali u internazzjonali biex jindirizzaw ħtiġijiet essenzjali bħal ikel, saħħa, edukazzjoni, u r-rikostruzzjoni tal-infrastruttura ta’ Gaża. Dan kollu jsir filwaqt li nżommu impenn sod lejn is-Soluzzjoni ta’ Żewġ Stati, li tippromwovi paċi u sigurtà bejn il-Palestina u l-Iżrael.

 

Seduta  305

29/01/2025