SUDAN - GWERRA ĊIVILI - POŻIZZJONI DIPLOMATIKA

25531. L-ONOR. CARMELO MIFSUD BONNICI  staqsa lill- Deputat Prim Ministru u Ministru għall-Affarijiet Barranin u t-Turiżmu: Jista’ d-Deputat Prim Ministru u Ministru għall-Affarijiet Barranin u t-Turiżmu jgħid x’pożizzjoni diplomatika ttieħdet u x’rappreżentazzjonijiet saru fil-konfront tal-gwerra ċivili li għaddejja fis-Sudan u jekk pajjiżna huwiex b’xi mod jgħin umanitarjament?

 

13/02/2025

 

ONOR. IAN BORG:  Ninforma lill-Onor. Interpellant illi minn meta beda l-kunflitt fis-Sudan, Malta baqgħet konsistenti fl-enfasi tagħha fuq l-importanza li tinżamm l-għaqda, is-sovranità u l-integrità territorjali tas-Sudan, filwaqt li sejħet għal waqfien immedjat u mingħajr kundizzjonijiet tal-ġlied sabiex jiffaċilita’ djalogu politiku u triq lejn il-paċi. Malta tkompli tappoġġa l-isforzi diplomatiċi mill-Unjoni Afrikana (AU), l-Awtorità Intergovernattiva dwar l-Iżvilupp (IGAD), il-Lega tal-Istati Għarab, in-Nazzjonijiet Magħquda (UN), kif ukoll il-kontributi minn pajjiżi bħas-Sawdi Arabja, l-Eġittu, l-Iżvizzera, it-Turkija u l-Istati Uniti.

 

Malta wkoll kienet soda fil-kundanna tagħha tal-azzjonijiet ta’ atturi kemm statali kif ukoll mhux statali li kkontribwew għal ammont ta’ mewt u qerda fost iċ-ċivili kważi mingħajr preċedent, u li l-għemil tagħhom wassal għas-sitwazzjoni diżastruża preżenti. Aktar minn 10 miljun persuna ġew spostati internament, filwaqt li aktar minn 2 miljuni ħarbu lejn pajjiżi ġirien.

 

Malta hija ferm imħassba li aktar minn 20 miljun persuna fis-Sudan jeħtieġu assistenza umanitarja urġenti, iżda minħabba l-vjolenza persistenti, numru żgħir biss minn dawn irċevew l-għajnuna meħtieġa. F’dan il-kuntest, huwa kruċjali li jitneħħew l-ostakli għall-aċċess umanitarju u li d-daħliet biex taqsam il-fruntieri fis-Sudan jibqgħu miftuħa sabiex l-għajnuna tilħaq lil dawk fil-bżonn.

 

Malta temmen bis-sħiħ li dawk kollha responsabbli għall-kriżi attwali għandhom jiġu identifikati u miżmuma responsabbli għall-atroċitajiet li wettqu u li għadhom iwettqu. F’dan ir-rigward, Malta appoġġjat bis-sħiħ l-isforzi tal-Unjoni Ewropea biex timponi miżuri restrittivi fuq individwi u entitajiet li heddew il-paċi, l-istabbiltà u s-sigurtà tas-Sudan, u se tkompli tappoġġa sanzjonijiet addizzjonali kontra dawk fil-pożizzjonijiet ta’ tmexxija li jfixklu l-operazzjonijiet umanitarji u r-ritorn għal tranżizzjoni demokratika.

 

Fl-aħħar nett, kif indikajna bosta drabi matul il-mandat ta’ Malta fil-Kunsill tas-Sigurtà tan-Nazzjonijiet Magħquda bejn l-2023 u l-2024, Malta temmen li t-tranżizzjoni lejn gvern demokratiku trid tibqa’ l-għan aħħari għas-Sudan, flimkien ma’ żieda konsiderevoli fl-għajnuna allokata għaċ-ċivili fil-pajjiż. Minn meta beda l-kunflitt fl-2023, il-Ministeru għall-Affarijiet Barranin u t-Turiżmu ta madwar €125,000 f’għajnuna umanitarja, u l-Ministeru se jkompli jipprovdi din l-assistenza matul l-2025.

 

Seduta  314

19/02/2025