Fuq FB taf issibu żgur.

1.      Mark Zuckerberg huwa llum rikonoxxut bħala dak li ħoloq din is-sistema li permezz tagħha nfetħu bibien ġodda fid-dinja tal-komunikazzjoni.  F’pajjiżna FB (Facebook) sar parti sħiħa mill-ħajja soċjali tagħna.  Issib il-preżenza tagħha kullimkien.  Kummerċ, kultura, politika, attività soċjali, li trid.  Aħna magħqudin ma’ diversi oħra fid-dinja mingħajr fruntieri.  Għadu fil-wieħed u tletin sena tiegħu, biss nistgħu naqblu li ismu niżżlu diġà qrib dawk bħal Bill Gates u Steve Jobs.

2.      Ideat għandu.  Wettaq uħud u oħrajn qiegħed jipprova kontra l-kurrenti.  Tul dawn l-aħħar xhur sibnih jaqbad għajn il-medja internazzjonali b’saħħa darbtejn.  Ftit qabel tmiem is-sena li għaddiet, fit-twelid ta’ bintu ħabbar li fis-snin li ġejjin ser jibda jagħti 99% tal-ishma li għandu ġewwa FB, stmati llum madwar 45 biljun dollaru.  Kull sena jgħaddi biljun.  Fl-istess żmien ħareġ bil-proġett magħruf bħala “Free Basics”.  Programm li bażikament huwa indirizzat sabiex jagħti aċċess ikbar u aqwa lil iktar bnedmin f’36 pajjiż fejn hemm faqar li jiċħad l-aċċess għall-internet.

3.      Inizjattivi li jitolbu żgur attenzjoni.  Preżentement, b’mod partikolari, għaddej b’diffikultajiet sabiex jintroduċi dan is-servizz ġewwa l-Indja.  Mill-popolazzjoni hemm kwart, 300 miljun, li għandhom aċċess u minn dak li qrajt jidher li sal-2020 dawn il-figuri għandhom jirduppjaw.  Għal dan il-bniedem dan huwa żmien huwa twil wisq.  L-aċċess għalih għandu jkun ferm iktar rapidu.  Imma għall-kuntrarju, l-awtorità Indjana TRAI (Telecom Regulatory Authority of India) din il-ġimgħa ċaħdet il-pakkett li kien qiegħed jipprova jintroduċi mal-kumpannija Reliance Communications.

4.      L-argumenti kontra, li ma kinux anqas mingħajr ebda bażi, jidher li kienu marbuta ma’ tlett punti:  “i) Free Basics is a walled garden of FB-approved content, ii) it breacher consumer privacy picking up all the data generated by users; iii) it is anticompetitive to boot”.  Hu x’inhu, kienu għalija iktar interessanti l-argumenti li Zuckerberg ressaq huwa u jipprova jikkonvinċi lill-pajjiż.  Għax meta l-kontroversji jikbru, allura ħafna drabi wieħed mhux biss jiddikjara l-pożizzjoni imma jimmotivaha wkoll.

5.      F’artikolu minnhom iddikjara dan: “We believe that connectivity is a human right and that getting connectivity for the world is one of the fundamental challenges of our generation.  When people are connected we can accomplish some pretty amazing things.  We can get closer to the people that we care about, we can get access to new jobs, and opportunities and ideas.  We can receive education and healthcare and access to new services.”  Mingħajr ma wieħed jidħol neċessarjament fil-polemika Indjana jew jekk effettivament FB huwiex l-istrument l-iktar effiċjenti għal dan, però jrid jingħad li għandna naqblu li kull bniedem illum għandu jkollu, mingħajr dubju, dan id-dritt kif ukoll il-mezzi biex iġibu fis-seħħ.

6.      Hemm f’dan sejħa lejn dak li huwa llum u dak li ġej għada pitgħada.  Pajjiżna fortunatament ilu snin twal jibni politika li tiftaħ dan is-settur.  L-investiment li sar kien verament qawwi taħt amministrazzjonijiet Nazzjonalisti, li proprju għax ma għamlu xejn għal ħamsa u għoxrin sena, fetħu beraħ dan is-settur.  Dan ilkoll nafu li serva sabiex għandna għodod mill-iktar avvanzati għall-industrija u l-kummerċ li ħolqu iktar postijiet tax-xogħol u ġid għall-ekonomija tagħna.  Imma ma kenitx limitata għal dawk li għandhom il-mezzi, imma kienet assigurata għal kulħadd.  Il-poplu għandu aċċess qawwi u veloċi għall-internet.  U nafu li hawn għandna ferm iktar ugwaljanza diġitali li f’popli u f’pajjiżi oħra ma hemmx.

7.      Il-ġenerazzjonijiet il-ġodda qed imissu direttament dan.  Iktar qegħdin il-ħin kollu fl-internet jużaw l-istrumenti kollha, fosthom il-FB.  Il-komunikazzjoni kibret ferm.  Id-dinja politika ppruvat tifhem u, f’ċertu sens, taħkem.  Prinċiparjament biex twassal il-messaġġi tagħha.  L-aħħar elezzjoni ġenerali tant kien hemm bumbardament qawwi u abbuż tas-sistema li l-effett illum huwa li ħafna qatgħu barra.  Iż-żgħażagħ għandhom id-dinja u l-ħajja tagħhom li fiha FB huwa parti integrali.  Is-soċjetà ta’ qabel naraha li ma tistax tifhem għax għadha kif kienet.  Din hija verament sfida ġdida bejn il-ġenerazzjonijiet.

8.      Dan jidher iktar u iktar f’kategorija ta’ żgħażagħ magħrufa bħala NEET (Not in Education, Employment or Training).  Minn domandi li għamilt jidher li hemm ċertu diffikultà biex tidentifika kemm huma u min huma dawk li spiċċaw l-iskola, li la qed jaħdmu, la baqgħu jistudjaw u lanqas daħlu għal xi taħriġ.  Jidher li ma’ kull sena, kwart ta’ dawk li jispiċċaw mill-iskola f’ċertu sens jisparixxu mill-istatistika.  Dawn hemm bżonn urġenti li jintlaħqu lura.  Mhux biex wieħed imexxihom fejn ma jridux, imma biex jikkomunika l-opportunitajiet u l-iktar li jħajjarhom jibqgħu jitgħallmu.

9.      Naf li hemm sforzi mid-Dipartiment tal-Edukazzjoni, sija fuq FB kif ukoll fuq Twitter.  Biss, apparti l-fatt li f’mumenti jagħti l-impressjoni li huwa estensjoni politika tal-partit fil-Gvern, ma jidhirx li qed jirnexxi.  Hemm bżonn viżjoni u linja ta’ ħsieb kompletament differenti minn dak li hemm sabiex naslu għandhom.  Pariri diretti minn Zuckerberg ma hemmx bżonn, però użu aqwa tal-mezzi ta’ komunikazzjoni li vvinta hemm.  Dan għax, ikolli ngħid, iż-żagħżugħ li qiegħed f’din il-kategorija fuq FB taf issibu żgur.

Id-disattenzjoni tal-arroganza.

1.         Il-poter jgħaddi lill-bnedmin minn diversi provi.  Jara fil-proċess jekk jaħkimhomx jew huwiex ser jinżamm f’postu minnhom.  Hemm fuq naħa min, bi ftit, malajr jitlagħlu għal rasu u hemm min jibqa’ dak li hu.  Il-kotba tal-ħajja politika jgħallmu li l-poter iħassar u jikkorrompi lill-bnedmin u li  meta dan, terġa’, jkun assolut il-ħsara tkun daqshekk ieħor fl-effetti tagħha.

2.      Bħalissa f’pajjiżna wieħed ikollu, b’dieqa kbira, jammetti li l-affarijiet qabdu triqat żbaljati.  Għax hemm dispjaċir fil-fatt li flok qed naraw avvanz ‘il quddiem fil-kwalità tat-tmexxija tal-pajjiż, fil-mod ta’ kif isiru l-affarijiet, qed naraw proprju l-kontra.  Għax hawn forom varji ta’ nuqqasijiet li diversi jaħsbu li huma mwielda mill-arroganza.  Minn min iħossu daqshekk b’saħħtu li jista’ jaġixxi kif irid u mingħajr konsegwenza.

3.      Il-kontroll u d-dixxiplina fil-Gvern f’dan sejra lura.  Il-fatt li ġie stabbilit li biex ikun hemm ċaqliq fis-siġġijiet tal-ministri jrid ikun hemm rapporti twal u voluminużi fejn il-provi huma qawwija qiegħed iġib dawn il-konsegwenzi.  Il-messaġġ huwa li jekk ma tkunx ultra-gravi ma jsir xejn.  Kollox jibqa’ għaddej u allura jikber iktar il-ħsieb arroganti ta’ dawk li jħossu li xejn ma jista’ jneħħihom mill-poter.

4.      Dan il-Gvern twieled bl-iżvantaġġ li għandu maġġoranza kbira wisq.  Għax hija proprju din li qegħda tieklu minn ġewwa.  Tieklu għax il-poter qiegħed jidher li qed jiġi użat bl-aġir tal-arroganti.  Ta’ min ma joqgħodx attent, ta’ min jaħseb li xejn ma huwa ser jilħqu għax ċert li ser jibqa’ hemm għal snin twal.  Dan kollu għax tlett snin ilu ġieb riżultat elettorali li qatt ma rajna bħalu.

5.      Dak li jinstema’ ġimgħa wara ġimgħa huwa biss l-effett ta’ din il-kawża.  Dak li qiegħed jidher fil-gazzetti u fuq fomm il-poplu huwa kollu ġej minn numru li qegħdin fil-Kabinett li l-poter ma jafux jaħkmuh u, minflok, ħadhom.  Ċert li kieku kien hemm nofs farka ta’ dak li għaddejjin immu llum ħames snin ilu, kieku ttieħdu n-nies sabiex jitħaġġru pubblikament.  B’dawk li huma arroganti llum ikunu fost tal-ewwel li jgaraw.

6.      L-arloġġ elettorali ma jistenna lil ħadd.  Il-Prim Ministru kellu dawn l-aħħar xhur biex jifhem li hemm bżonn bidliet kbar fl-Eżekuttiv u jaġixxi.  Biss, jew għal nuqqas ta’ ġudizzju, jew għad-disattenzjoni, traskuraġni, jew il-ħsieb li n-nies jinsew baqgħu ma tteħdux id-deċiżjonijiet li kellhom.  Ħasra, għax hemm tant deputati u segretarji parlamentari validi u serji li qegħdin fil-bank tal-Gvern li stranament, flok jiġu magħżula biex jibdlu lil dawk li qed ifallu, qed jitħallew dejjem iktar lura.  Il-poplu llum qiegħed ibatihom.  Il-partit fil-Gvern bihom beda jitlef mill-kunsensi.

7.      L-iktar telf huwa dak fl-aspett tal-mant tas-sewwa.  Ħafna jaħsbu li l-elezzjonijiet ġenerali jintrebħu jew jintilfu skond kemm tkun qassamt jew ikun hemm flus jiġru fil-but.  Dan għandu effett, però l-prinċipali jibqa’ marbut mal-korrettezza, mal-onestà, mal-umiltà, mal-użu tal-verità u mal-bżonn tal-attenzjoni għad-dettall f’dak li qiegħed jitwettaq.  Din il-leġislatura, mill-bidu marret kontra u insistiet fis-sakra tal-tqassim, il-klijenteliżmu qawwi u għax baqgħet għaddejja hekk qed tmiss livelli fil-qiegħ li konna ilna ma naraw bħalhom.

8.      Għax ma nemminx li hemm daqshekk disperazzjoni jew neċessità li l-Gvern irid jibgħat barra l-messaġġ li huwa determinat jaqdi lil dawk li minn barra jidhru li huma ta’ ġewwanett.  Din għal ħafna hija iktar stramba meta taħseb li fost dawk li l-aktar li jirreżistu l-poteri varji tal-Istat huma l-liberali l-aktar akkaniti.  Dak li, kif nafu, jidher li kienet is-sejħa u l-ġelu tal-għaqda tal-“Moviment”.  Menti kif qed naraw hawn, dak li huwa suppost imwieled minn xewqat leġittimi ta’ libertà, tul dan iż-żmien qed isir fonti ta’ arroganza.  Estremi, estremi oħrajn iġibu magħhom.

9.      L-effetti diretti huma: l-ewwel, li ħafna qed jaraw il-pajjiż jimxi pass pass lura; it-tieni, li diversi li jimmeritahom qed jinqabżu; it-tielet, li oħrajn li jintgħażlu qed jiġu użati, jinħarqu u jintremew; u r-raba’, li dak li diversi persuni ġenwini ppretendew iseħħ qed jarawh imur il-kontra.  F’dan hija s-saħħa parlamentari u elettorali qawwija li hija l-kaġun.  Kieku kien hemm maġġoranza, imma ta’ inqas, kieku għandna iktar attenzjoni u ferm u ferm inqas arroganza.

Niddefendu l-istituzzjonijiet demokratiċi

1.      Il-poplu dara jisma’ diskorsi dwar kemm aħna demokratiċi jew kemm għandna nkunu aktar hekk.  Biss, il-pajjiż ma jitwassallux biżżejjed li d-demokrazija tiddependi fuq il-parteċipazzjoni ħajja u diretta ta’ dawk li jgħixu fiha.  Speċjalment fil-mod ta’ kif inhija mmexxija.  Hemm fir-realtà diversi istituzzjonijiet u karigi kostituzzjonali li qegħdin għas-servizz tiegħu.  Imma mhuwiex magħruf x’sehem determinanti għandhom u x’għajnuna jistgħu jagħtuna.

2.      L-Uffiċċju tal-Ombudsman huwa proprju wieħed minnhom.  L-Ombudsman huwa d-difensur ta’ dawk li jsibu li l-amministrazzjoni tal-Istat ittrattathom inġustament, naqsithom minn drittijiethom.  Din il-ħidma tista’ titwettaq: l-ewwel, jekk iċ-ċittadin ta’ dawn il-gżejjer jiktiblu bl-ilment tiegħu, inkella dan l-Uffiċċju għandu l-poter li jista’ jwettaq waħdu, fuq l-inizjattiva tiegħu stess.  Tul dawn l-għoxrin sena diversi marru u ħadu risposti.  Sabu difensur u protettur essenzjali f’soċjetà moderna u demokratika bħal tagħna.

3.      Dan kollu jseħħ proprju minħabba żewġ elementi vitali.  L-ewwel, l-użu frekwenti tal-liġi mill-poplu; it-tieni u l-iktar importanti, l-għażla tal-persuna li jokkupa l-kariga ta’ Ombudsman.  Il-passat hawn serviena ta’ suċċess.  Nistgħu llum inħarsu lura u nirreġistraw eżempji varji.  Dan fih innifsu huwa żgur tajjeb, biss ilkoll nafu li biex nibqgħu nimxu ‘l quddiem irridu nassiguraw li l-futur ikun bħall-preżent.

4.      Huwa għalhekk illum determinanti għas-sistema demokratika tagħna li jkun hemm ferm iktar programmi fuq ix-xandir li jispjegaw ċar ħidmet dan l-Uffiċċju.  Għax huwa, l-ewwel, fih innifsu tajjeb li wieħed ikun jaf u jiġi infurmat; u t-tieni, għax l-Istat għandu dover li jinforma lill-poplu.  Nafu, għalkemm hemm min qed jaħrab minnu, li l-Gvern għandu d-dmir li jinfurmah, mhux biss fuq dan l-Uffiċċju imma fuq dak kollu li huwa għaddej.

5.      Proprju fuq dan il-punt, l-istess Ombudsman reċentement ippubblika ktieb mill-iktar interessanti bit-titolu “The State’s duty to Inform”.  Wieħed li jista’ jinkiseb b’xejn.  Wieħed li huwa miktub b’messaġġ dirett u ċar għal kull min, f’xi żmien, jokkupa karigi kostituzzjonali.  Dak li f’isem il-verità, it-trasparenza u l-akkontabilità jrid jittieħed bis-serjetà u jiġi mwettaq id-dmir tal-Gvern li jinforma.  Għax salv ftit kwistjonijiet il-Gvern, kull wieħed, għandu d-dmir fundamentali li jinforma lill-poplu b’dak li għandu f’idejh, dak li huwa għaddej u dak li seħħ.  Ħadd ma huwa ogħla mill-Kostituzzjoni, mid-demokrazija u mill-poplu li jista’ jimmaġina f’xi rokna ta’ rasu li għandu d-dritt li ma jinfurmaw jew li jiddeċiedi hu fuq x’hiex għandu jinforma.

6.  Nafu lkoll li preżentement pajjiżna għandu magna demokratika tajba li però tiddependi ħafna fuq kif tiġi użata.  Nafu wkoll li l-preżent u l-futur tagħna jiddependu fuq kemm jirnexxielna ma mmorrux lura u li anzi nimxu ‘l quddiem billi  nsaħħu u nipperfezzjonaw dak li għandna.

7.      Parti essenzjali minn dan huwa marbut ma’ min jiġi magħżul biex jokkupa l-kariga ta’ Ombudsman.  L-Uffiċċju f’dawn l-aħħar għaxar snin kompla jitmexxa b’indipendenza assoluta, b’integrità, b’dinjità u fid-direzzjoni l-ġusta mill-Prim Imħallef Emeritu Dr Joseph Said Pullicino.  Kien hu li assigura li l-istima u l-fiduċja tal-poplu ma jonqsux, anzi jiżdiedu.

8.      Biss, issa li huwa wasal fi tmiem il-kariga, dan għalhekk ifisser li l-pajjiż irid imur għall-għażla tal-Ombudsman il-ġdid.  Quddiem il-fatt li hawn min huwa maħtur f’pożizzjonijiet kostituzzjonali li ma huwiex jimxi bir-reqqa, il-poplu qiegħed jippretendi li dan isir bir-reqqa.  Jintgħażel persuna oħra li jkun kapaċi jimxi fl-istess direzzjoni bħal ta’ qablu.  Dan sabiex id-demokrazija tagħna ma tmurx lura u l-poplu ma jitlifx minn difensur li tant għandu bżonnu f’kull żmien, iktar u iktar illum b’dak li huwa għaddej.

MINISTERU GĦALL-INTERN U S-SIGURTÀ NAZZJONALI - KAROZZI.

 

22291. L-ONOR. LUCIANO BUSUTTIL staqsa lill-Ministru għall-Intern u s-Sigurtà Nazzjonali: Jista’ l-Ministru jgħid jekk il-karozza uffiċjali li kien juża l-Ministru bejn l-1 ta’ Jannar 2008 u t-8 ta’ Marzu 2013 kenitx tinkera jew kenitx mixtrija mill-Gvern? Jista’ jgħid ta’ liema mudell kienet il-karozza? Jista’ jgħid x’kienet l-ispiża xahar, xahar matul l-istess perjodu f’każ li kienet mikrija? Jista’ jgħid kemm kienet l-ispiża f’każ li l-karozza kienet inxtrat mill-Gvern u meta nxtrat? Jista’ jgħid x’kienu l-ispejjeż fuq xogħlijiet ta’ tiswijiet li saru fuq din l-istess karozza matul l-istess perjodu? Jista’ jgħid kemm kienet l-ispiża fuq kiri ta’ karozzi li ntużaw minflok il-karozza uffiċjali matul l-istess perjodu? Jista’ jgħid x’kienet l-ispiża u kemm intuża petrol jew diesel bejn l-1 ta’ Jannar 2008 u t-8 ta’ Marzu 2013, xahar b’xahar b’mod separat, għall-karozza/i li għamel użu minnhom il-Ministru?

08/01/2016

  ONOR. CARMELO ABELA:  Ninforma lill-Onor. Interpellant li ninsab infurmat li bejn l-1 ta’ Jannar 2008 u t-8 ta’ Marzu 2013 inxtrat karozza bill-mudell Citroen C5 għall valur ta’ € 29, 480.55. Ninfurmah li matul is-sena 2009 u is-sena 2011 saru żewġ kirjiet rispettivament, li ntużaw minflok il-karozza uffiċjali. Il-kirja fix-xahar ta’ Novembru 2009 kienet tammonta għal € 80 filwaqt li l-kirja ta’ Lulju 2011 kienet tammonta € 1,416.

L-ispejjeż fuq xogħlijiet ta’ tiswijiet matul l-istess perjodu kienu mqassma kif ġej, filwaqt li L-ispiża totali għall-petrol kienet tammonta €11,441, qed npoġġi fuq il-mejda tal-Kamra breakdown tal-fuel li ntuża.

2008 - € 3,443.95

2009 - € 3,236.18

2010 - €1,754.44

2011 – €2,084.01

2012 - €2,751.79

Seduta  351

01/02/2016

Sakemm ma jdurx ir-riħ.

1. Ftit jiem ilu smajt il-Prim Ministru Taljan Matteo Renzi f’wieħed mid-diskorsi tiegħu jgħid “Siamo I piu’ bravi del mondo”. Kien u għadu interessanti mhux tant jekk dak li kien qed jgħid huwiex minnu jew le, imma għala ħass illi għandu jiddikjara dan. Qawwa zgur il-qalb għal uħud però naħseb li rnexxilu forsi ukoll fl-eżaġerazzjoni li jiġbed l-attenzjoni lejn il-fatt li fil-pajjiż u l-poplu ġar tagħna għandhom ħafna biex jużaw u jiddistingwu rwieħhom. Għax fit-triq tal-ħajja u f’dik politika issib min jipprova jċekken u jmaqdar dak li verament hu.

2. Pajjiżna għandu huwa ukoll biex jiftaħar. Iċ-ċokon tiegħu huwa kumpensat bil-kwalità tal-ħajja u l-kultura li wiret minn ta’ qablu. Hemm min jifhem dan il-patrimonju x’inhuwa u hemm min le. Hemm min irid joqgħod attent sabiex ma jixxellifx u ma jintilifx u hemm min sfortunatament le. Daqskemm nistgħu nidwu fl-isbuħija tagħna daqshekk ieħor ma ftit għawg kollox dlonk jitbiel. L-rwiefen tal-ħajja mhux dejjem huma dawk li nipprevedu għalhekk huwa dejjem għaqli li wieħed jibni ħitan tas-sejjieħ bi bnedmin ta’ sustanza.

3. Jingħad x’jingħad, pajjiżna għadu sa ċertu punt igawdi mit-tajjeb li ġieħ mill-passat. Biss daqshekk ieħor huwa minnu li l-eventi ta’ dawn l-aħħar gimgħatejn ma nistgħux ngħidu li żiedu fil-piż tal-kalatura. Minn meta ħareg l-aħħar rapport tal-Awditur Ġenerali. Minn meta diversi fil-poplu ta’ dawn l-gżejjer u dawk ta’ barra minnu bdew jaqraw u jifluh, l-istampa bdiet tinbidel - ikun xi jkun l-argument politiku. Tkun xi tkun l-attività, t-tgħannieq, ċ-ċapċip u l-ftaħir, dak li hemm miktub illi seħħ ma jibdluhx. Id-dell twaddab fuq il-klassi politika u fuq il-pajjiż kollu.

4. Ħafna ġejjin minn liema naħa tal-faċċata politika stqarrew pubblikament jew fil-privat li ma jixirqilniex hekk bħala stat. Il-komposizzjoni tal-eżekuttiv hija bla dubju f’idejn il-Prim Ministru.  Huwa jaħtar u huwa għandu jneħħi. Proprju fuq dan kien hemm min esprima li kien hemm bilanċ fin-numri kbar li jikkomponu s-siġġijiet tal-ministri u s-segretarji parlamentari - bejn dawk li kellhom esperjenza politika passata, bejn dawk li ġew mis-settur privat huma ukoll bi snin fuqhom u oħrajn li daħlu għall-ewwel darba.  Jidher, minn dak li rajna, li din it-taħlita m’hix qedha proprju tirnexxi.

5. F’ċertu sens, il-vanġelu ta’ matul il-ġimgħa dwar fejn waqgħet iż-żerriegħa reġgħet ġabet lura dan il-ħsieb. Minn dak li seħħ, il-poplu fit-triq qiegħed iħoss li t-tmexxija tilfet jew tellfulha t-triq tagħha. Dawk li deheru bħala li huma appostli primi ma baqgħux fuq l-linja tas-sewwa mentri oħrajn li kien hemm min qiegħed jibgħat il-messaġġ li wasal il-mument li jitilqu, qegħdin minflok  fit-taħwid li hemm jipprovaw iġibu xi forma ta’ ordni. Jingħad x’jingħad hemm konfuzjoni u nuqqasijiet li issa ġejjin biċċa biċċa għad-dawl tax-xemx.

6. Is-sitwazzjoni ma tistax tissolva b’forom ta’ artifiċjalitajiet politiċi. Il-poplu tant ra quddiemu li issa iktar minn qabel kapaċi jifli u jifhem x’hemm wara d-diskors li qiegħed jingħad. Fil-qosor, hemm issa kriżi politika qawwija. Hemm min qiegħed fil-Gvern li qiegħed jifhem dan u narawh jipprova jidritta. Hemm minflok min ma huwa jifhem xejn. Għax ħafna jinjoraw li kien hemm u għad hemm ċerti regoli ta’ propaganda li għal pajjiżna ma jgħoddux. F’dan il-każ, hawn kolonja b’saħħitha tad-dixxendenti adottivi tal-appostlu veru San Tumas.

7. Ngħid dan kollu għax nemmen iktar minn Renzi li aħna poplu fost dawk li nikkonsidrah mal-aqwa  fid-dinja. Nemmen li fiċ-ċokon tagħna irridu però niġġieldu għal dan aktar minn ħaddiehor. Trid tissielet kontra l-kurrent tal-istaġnar żbaljat tal-għażżien klijentelizmu u miegħu oħtu l-maħmuga korruzzjoni. Dak li ġara hawn ġie żgur irrappurtat u nnutat minn diversi kapitali Ewropej oħra.  Għalhekk nikteb fuq dan għax il-mument huwa iktar delikat mis-soltu.  Dan għax ġejjin fuqna attivitajiet meta d-dawl ser jkun iktar fuqna minn qabel li jitlob li ċerti miżuri jittieħdu.

8. Ftit xhur ohra u nibdew l-presidenza ta’ pajjiżna fl-Unjoni Ewropeja, ftit wara u għandna l-Belt Kapitali tagħna ċċelebrata bħala dik tal-kultura għas-sena 2018. Żewġ mumenti li minnhom nistgħu nieħdu inkella nitilfu bil-kbir. Il-valur tagħna jista jiżdied u jsalva dak li għaddej minnu. Jista ukoll jekk jibqa għaddej fl-istess direzzjoni, jitilfu.

9. Pajjiż żgħir ftit ikollu okkazzjonijiet għad-disposizzjonijiet tiegħu u jekk ma jisfrutthomx kif għandu, ma jiġuhx lura.  Dak li ġej ser jilħaqna. Għalhekk jekk ma jinbidlux l-pożizzjonijiet, u malajr, allura ser nitilfu. Jekk ma jdurx ir-riħ, għall-agħar ser inmorru. Ha jifhem min għandu jifhem .