19666. L-ONOR. CARMELO MIFSUD BONNICI staqsa lill- Ministru għall-Ambjent, l-Enerġija u r-Riġenerazzjoni tal-Port il-Kbir: Tista’ l-Ministru tgħid x’xogħlijiet saru, jekk saru, fi Ġnien il-Mediterran, f’Raħal Ġdid matul is-sena 2024 sal-ġurnata li fiha tiġi mwieġba din il-mistoqsija parlamentari?
28/05/2024
ONOR. MIRIAM
DALLI: Ninforma lill-Onor. Interpellant li preżentament
Project Green tieħu ħsieb biex dan il-ġnien jinżabar u jissaqqa’. Ġnien
il-Mediterran, li fih madwar 21,000 metru kwadru u huwa wieħed mill-akbar ġonna
f’Malta, intgħażel bħala wieħed mis-16-il proġett li se jsiru taħt l-iskema
Community Greening Grant.
Il-proġett
għar-riġenerazzjoni tal-ġnien se jilħaq partikolarment mat-18,000 familja li
jabitaw f’distanza ta’ 10 minuti, lill-istudenti tal-MCAST li għandhom aċċess
għall-ġnien permezz tal-pont li nbena riċentament, kif ukoll lill-haddiema li
jaħdmu fiż-żona industrijali ta’ Kordin.
Bħalissa l-ġnien fih nuqqas
ta’ landscaping u faċilitajiet ta’ rikreazzjoni għall-familji. Minbarra li se
jsir tħawwil ta’ diversi siġar u pjanti b’żieda ma’ dawk li diġà hemm, se jiġi
restawrat ġibjun ezistenti u se jinbena ieħor ġdid biex l-ilma li jinħażen
fihom jintuża għat-tisqija tal-ġnien permezz ta’ sistema t’irrigazzjoni
awtomatika li se tiġi introdotta wkoll permezz tal-proġett. Il-passaġġi se
jsiru minn materjal apposta b’sistema li twassal l-ilma għal ġol-ġibjuni. Ser
jiġu installati wkoll numru ta’ pannelli solari u l-enerġija li jiġġeneraw se
tintuża biex jiddawwl il-ġnien.
Il-proġett huwa maħsub biex
itejjeb iż-żoni li jagħtu għall-Punent u l-Majjistral tal-ġnien billi jsiru
passaġġi ġodda għall-aċċess mill-pubbliku. Tul dawn il-passaġġi se jiġu
allokati spazji żgħar bħala picnic areas u se jiġu introdotti wkoll numru ta' żoni
għal-logħob tat-tfal.
Seduta 250
24/06/2024
No comments:
Post a Comment