1. Drajna
s-sistema. Drajna li dan il-Gvern ma
jieħu ebda responsabbiltà politika għal dak li għaddej ħażin fil-pajjiż. Drajna naraw lilna nfusna fil-proċess li bih
minn skandlu nidħlu għal ieħor, wieħed isbaħ mill-ieħor. Drajna naraw kif xejn ma jmiss lil ħadd. Drajna l-linja li biha, kull min għandu fuqu
l-piż tal-poter, jaħrab minn kollox. Drajna
naraw il-metodu preparat u prattikat li naljenaw lill-poplu sabiex ma jibqax
jara dak li sar żbaljat u ħaqqu kundanna.
Inkredibbli
2. Ngħid iktar
dan għax tul din il-ġimgħa kien verament inkredibbli. Inkredibbli meta tqis li ġurnalisti
rnexxielhom jippreżentaw rapport daqshekk ċar fuq dak li qed jiġri fil-programm
ta’ bejgħ tal-passaporti Maltin.
Inkredibbli kif saret laqgħa li fiha smajna dawk li huma speċjalizzati
fuq din il-linja jiftaħru. Inkredibbli
kemm daħlu u ħarġu politiċi minn ħalqhom.
Inkredibbli aktar li l-messaġġ ta’ dawn in-nies kien li l-politiċi
fil-Gvern Laburista huma tant “ħbieb tagħhom” li jistgħu jagħmlu li jridu
bihom. Inkredibbli verament, meta taħseb
li tant ma hemmx barrieri, u tant hemm kunfidenzi, li ħadd minnhom ma ħasibha
darbtejn biex isemmi lil dak u lill-ieħor qishom qegħdin għandhom u magħhom.
Indikazzjonijiet
3. Dan mhuwiex l-ewwel
skandlu. Anzi, huwa tabella ta’
indikazzjonijiet. Tabella
tal-indikazzjoni ċara li tant hawn aġir żbaljat fil-pajjiż, li hemm
“il-libertà” li tagħmel li trid u taġixxi kif jogħġbok. Hija indikazzjoni ċara li spiċċa l-kontroll u
l-attenzjoni għall-affarijiet. Kontroll
f’dak li huma l-liġijiet tal-pajjiż.
Attenzjoni fit-tmexxija t-tajba.
Il-proċess illum huwa tant gravi li ħadd fil-Gvern Laburista m’għandu
l-kuraġġ li jbiddel ir-rotta.
Indikazzjoni ċara ħafna li tant kollox ħareġ barra mill-id tat-tmexxija
politika li issa hemm rassenjazzjoni.
Nifhmu ferm u ferm iktar għala hemm min irid ikompli jiftaħ il-bieb li
bexxaq biex jitlaq. L-indikazzjonijiet
huma li l-pożizzjoni hija inkontrollabbli u insapportabbli.
Meta ma tistax għalihom = Impunità
4. Huwa ċar li
min qiegħed fil-poter ma jistax iktar għalihom f’kull sens. Ma jistax għalihom għax issa rikbuh u qed
jiġru bih u b’ismu. Passi ma ttiħdux;
kollox baqa’ għaddej, qisu ma huwa xejn.
Diversi dan qed jarawh u qed jibgħatu l-messaġġi ċari tagħhom. Mhumiex akkademiċi, mhumiex piji fl-arja,
imma konkreti. Fil-21 ta’ Settembru,
fl-Indipendenza, smajna dan il-messaġġ: “Ir-responsabbiltà jew il-kontabilità
titlob li t-tmexxija tkun soġġetta għall-iskrutinju u ċ-ċensura
tal-pubbliku. Din ir-responsabbiltà
politika hija l-antidotu għal dak is-sens ta’ impunità li jirredikola
t-tmexxija intiża bħala servizz u d-demokrazija mifhuma bħala espressjoni
tal-ħakma tad-dritt.”
Forza ta’ oppressjoni
5. Il-Partit
Laburista seta’ tela’ fil-Gvern fl-2013 bħala forza ta’ bidla. Seta’ kellu minoranza interna kreattiva. Imma llum, dik il-minoranza interna mietet u
saret, wara ftit snin, forza dominanti tal-poter. L-ideali ntilfu kompletament, u issa hemm
biss il-bżonn li wieħed jibqa’ fil-poter, jaħkem. Il-Gvern tilef il-forza inizjali tiegħu. Illum wasal fejn ma kellux. Qiegħed jimita, minflok, l-agħar forom ta’
kif wieħed imexxi amministrazzjoni f’demokrazija. Qiegħed isir, biċċa biċċa, forza ta’
oppressjoni fuq dawk li, ġejjin minn liema partit ġejjin, iridu s-sewwa.
Lura fil-kuntest
6. Meta terġa’
tisma’ dak li ntqal f’dik l-intervista, tibda tiddubita minnek innifsek. Tibda taħseb li ma seħħitx. Tibda tgħid: imma dan huwa aċċettabbli
fis-soċjetà tagħna? Iktar minn dan,
tifhem li waqt li l-bnedmin fis-soċjetà jifhmu dak li huwa sewwa minn dak li
mhuwiex, huwa evidenti li għal min huwa fil-poter dan mhuwiex. Il-kuxjenza ta’ kull bniedem hemm qegħda,
f’postha. Imma, kif nafu, mhux kulħadd
għandu l-istess livelli ta’ attenzjoni u preparazzjoni. Imma agħar minn hekk, huwa evidenti li
l-Gvern mhux biss qiegħed jarmi kuxjenztu, imma talli qiegħed jagħmel minn
kollox biex il-poplu jitlef tiegħu.
Forsi
7. Forsi wħud
fis-soċjetà semgħu u raw dak li seħħ.
Forsu wħud ħaduha fil-kuntest li hija, u fehmu iktar kemm is-sitwazzjoni
fil-pajjiż marret lura, kemm qegħdin fi stat ħażin. Forsi hemm min qiegħed jistenna li xi ħaġa
ser tiċċaqlaq, u s-sewwa jirbaħ lura l-kmand fil-poter. Forsi ħafna oħrajn qed jistennew bidliet li
ma jiġux. Forsi, iktar minn hekk, hemm
diversi li qed jistennew u jittamaw fl-innoċenza tagħhom. Imma l-verità hija li l-pożizzjoni ser tibqa’
kif inhija, sakemm jaljenawna b’ħaġa oħra.
No comments:
Post a Comment