IL-KALKARA - BAJJA TA’ RINELLA - ĦSARAT IKKAWŻATI BIL-MALTEMP
34072. L-ONOR. CARMELO MIFSUD BONNICI staqsa lill-Ministru għall-Kultura,
l-Artijiet u l-Gvern Lokali: Jista’ l-Ministru jgħid xi ħsarat ġew verifikati
fil-Bajja tar-Rinella fil-Kalkara wara l-aħħar maltempata? Jista’ jgħid ukoll
x’passi diġà ttieħdu u x’passi ser jittieħdu f’dan ir-rigward?
03/02/2026
ONOR. OWEN BONNICI: Ninsab
infurmat mill-Kunsill Lokali Il-Kalkara li, kawża tal-maltempata, il-Bajja ta’
Rinella sofriet ħsara konsiderevoli fit-turġien li jagħtu aċċess għall-bajja,
fil-bankini u fit-triq li ddawwar il-bajja. Numru ta’ ġebel kbir inġema’
fit-triq u ammont sostanzjali ta’ ramel tkaxkar mill-baħar. F’kollaborazzjoni
bejn il-Kunsill Lokali u Infrastructure Malta, tpoġġew barrikati tal-konkos
f’din it-triq biex jingħalaq l-aċċess għall-vetturi fil-parti fejn sfrondat
it-triq. Saru wkoll arranġamenti biex jitpoġġew tabelli sabiex il-pubbliku jiġi
infurmat b’dan u jevita ż-żona. Qed isir assessjar taż-żona biex jiġi stabbilit
l-aħjar mod kif tiġi indirizzata s-sitwazzjoni tal-ħsara fit-triq.
Seduta Numru 440
No comments:
Post a Comment