6627. L-ONOR. CARMELO MIFSUD BONNICI staqsa lill-Ministru għall-Affarijiet Barranin u
Promozzjoni tal-Kummerċ: Jista’ l-Ministru jinforma lill-Kamra x’ħidma u
x’inizzjattivi ttieħdu mill-Ambaxxata tagħna għat-Tuneżija tul dawn l-aħħar
tletin xahar?
25/06/2018
ONOR. CARMELO
ABELA: Ninforma lill-Onor. Interpellant li qabel ma wieħed
janalizza l-ħidma tal-Ambaxxata ta’ Malta fit-Tuneżija huwa importanti li
wieħed jikkunsidra l-kuntest attwali tal-pajjiż. Mill-2011 ‘l hawn t-Tuneżija
għaddiet b’suċċess minn tranżizzjoni demokratika li għal perjodu ħolqu element
ta’ inċertezza u instabbilità. Kellha tilqa’ wkoll għal sfidi ġodda fosthom
dawk tat-terroriżmu. Is-sena 2015 kienet immarkata minn tlett attakki
terroristi li ħallew impatt profond fuq is-soċjetà, fuq l-ekonomija u
b’konsegwenza fuq il-ħidma diplomatika ta’ Malta f’dan il-pajjiż.
Malta, anke fir-rwol tagħha
ta’ Stat Membru tal-Unjoni Ewropea, uriet appoġġ kontinwu għat-Tuneżija u dawn
l-aħħar xhur kienu kkaratterizzati minn attività diplomatika intensiva bi
skambji u viżti regolari u ta’ livell mill-aktar għoli.
Inizzjattivi Politiċi
Żjarat Bilaterali
20 April 2016 - Il-President ta’ Malta attendiet is-seminar
“Promoting Values of Peace and Dialogue”. Matul din iż-żjara, l-President
kellha laqgħat mal-għola awtoritajiet Tuneżini fosthom il-President
tar-Repubblika Tuneżin.
26 Mejju 2016
- Il-Ministru tal-Affarijiet Barranin Tuneżin mexxa viżta uffiċjali f’Malta u
kellu laqgħat mal-għola awtorijatijet Maltin.
25-26 April 2017 Bħala parti mill-programm tal-Prijoritajiet tal-Presidenza
Maltija tal-Kunsill tal-Unjoni Ewropea, f’April tal-2017, l-Ambaxxata ta’ Malta
fit-Tuneżija organizzat laqgħa f’Tuneż tal-Grupp ta’ Ħidma tal-Unjoni Ewropea
kontra t-Terroriżmu (COTER). Din kienet l-ewwel darba li dan il-Grupp iltaqa’
barra minn Brussell u li r-rappreżentanti tal-pajjiżi kollha tal-Unjoni Ewropea
kellhom l-opportunità li jkollhom esperjenza diretta tal-pajjiż li miegħu l-UE
għandha programm intensiv ta’ kooperazzjoni fil-qasam konċernat. Din il-viżta,
li seħħet b’kooperazzjoni mal-awtoritajiet Tuneżini, tat l-opportunità biex
isir skambju diretti dwar il-ħidma u l-progress li twettaq b’kooperazzjoni ma’
memrbri tal-komunità internazzjonali fosthom l-UE wara l-attakki terroristiċi
tal-2015.
7-8 Novembru 2017Bħala parti mill-kommemorazzjoni
tal-ħamsin anniversarji tar-relazzjonijiet diplomatici bejn Malta u t-Tuneżija,
il-President ta’ Malta, fuq stedina tal-President tar-Repubblika Tuneżin,
mexxiet Viżta Uffiċċjali fit-Tuneżija
u kellha laqgħat mal-għola awtorijatijet Tuneżini u mal-komunità Maltija. F’din
il-laqgha l-President kienet akkumpanjata mill-Ministru tal-Affarijet Barranin
u tal-Promozzjoni tal-Kummerċ kif ukoll mill-Ministru ghall-Ekonomija,
Investiment u Intrapriżi Żgħar. Il-President inawgurat Business Forum
Malti-Tuneżin (ara d-dettalji aktar 'l isfel).
Il-Ministru tal-Affarijiet
Barranin u tal-Promozzjoni tal-Kummerc, mexxa Konsultazzjonijiet Politiċi
mal-Ministru tal-Affarijiet Barranin Tuneżin. Fost affarijiet oħra, ġie deċiż
li s-sessjoni li jmiss tal-Kummissjoni Konġunta (Joint Comission) bejn Malta u
t-Tuneżija tinżamm Malta matul l-2018. Iż-żewġ Ministri responsabbli
għall-Affarijiet Barranin iffirmaw ftehim bilaterali dwar it-turiżmu u ftehim
ieħor dwar l-edukazzjoni. Bħalissa l-Ambaxxata qiegħda ssegwi l-proċess biex
tiltaqa' l-Kummissjoni Konġunta.
F’Gunju 2018, l-Ambaxxata
għaddiet stedina mill-President ta’ Malta lill-President tat-Tuneżija biex
imexxi Żjara Statali f’Malta matul l-2018.
Matul is-sena 2017
il-Ministru tal-Kultura Tuneżin attenda konferenza f'Malta u kellu laqgħat
bilaterali mal-Ministru Malti responsabbli għall-Kultura.
Matul l-2017 il-Ministri
Maltin responsabbli għall-Kultura, għall-Edukazzjoni u għall-Intern, attendaw
laqgħat multilaterali li seħħew fit-Tuneżija.
Kummerċ
L-Ambaxxata ta’ Malta żżomm
kuntatt regolari u kontinwu mal-kummerċanti Maltin preżenti fit-Tuneżija.
L-Ambaxxata b’mod regolari tati appoġġ lil dawn l-intrapriżi u tagħmel
rappreżentazzjonijiet mal-awtoritajiet Tuneżini b’għan li jiġu riżolti intoppi
għall-kummerċ.
L-Ambaxxata regolarment
tirċievi talbiet għall-għajnuna ta’ natura varja minn kummċerjanti kemm Maltin
u kemm Tuneżini li jkunu interessanti f’kummerċ bilaterali.
L-Ambaxxata ħadet numru ta’
inizzjattivi biex tibni kuntatti ġodda ma kummerċjanti u entitajiet kummerċjali
Tuneżini li jistgħu jkunu interessanti li jesploraw kuntatti bilaterali ġodda.
Ta’ min isemmi li matul
l-2017 il-kumpanija tal-ajru Maltija l-Air Malta reġgħet bdiet titjiriet
regolari diretti bejn Malta u t-Tuneżija wara waqfa ta’ tmien snin. L-Ambaxxata
għamlet bosta rappreżentazzjonijiet importanti mal-awtoritajiet Tuneżini biex
jiġi faċilitat l-operat ta’dawn it-titjiriet.
Business Forum
Fl-isfond tal-Viżta Uffiċjali
tal-President ta’ Malta fit-Tuneżija, fis-7 ta’ Novembru 2017, l-Ambaxxata b’kooperazzjoni mal-kmamar
tal-kummerċ ta’ Malta u ta’ Tuneż, organizzat Business Forum Malti-Tuneżin. Dan il-forum ġie inawgurat
mill-President ta’ Malta flimkien mal-Prim Ministru Tuneżin fil-preżenza ta’
sitt membri tal-kabinett Tuneżin. Il-ftuħ ġie segwit minn Business to Business Meetings bejn intrapriżi u kummerċjanti Maltin
u Tuneżini.
Il-kmamar tal-kummerċ ta’
Malta u ta’ Tuneż organizzaw it-tieni edizzjoni tal-Busines Forum Malti-Tuneżin, f’Malta bejn it-12 u t-13 ta’ Marzu
2018. L-Ambaxxata tat appoġġ loġistiku per eżempju bil-ħrug ta’ viżas.
L-Ambaxxata qiegħda ssegwi
l-kuntatti li seħħew matul iż-żewg edizzjonijiet tal-Business Forum u rċeviet numru ta’ talbiet għall-għajnuna mingħand
kummerċjanti u intrapriżi Maltin li wħud minnhom għamlu żjarat ta’ follow up f’dawn l-aħħar xhur.
Bħalissa, l-Ambaxxata qiegħda
tipprepara għal-viżta f’Malta ta’ numru ta’ Kummerċjanti Tuneżini.
Kultura u Promozzjoni
L-attakki terroristiċi
tal-2015 kellhom impatt sostanzjali fuq il-ħidma tal-Ambaxxata biex tippromovi
kuntatti kulturali bejn iż-żewg pajjiżi. Madanakollu l-Ambaxxata żżomm kuntatt
kontinwu ma’ entitajiet kulturali Tuneżini.
Fi Frar tal-2018 l-Ambaxxata
tat għajnuna lil stazzjon televiżiv Tuneżin li tella produzzjoni dwar
il-komunità Maltija li kienet tgħix fit-Tuneżija fis-sekli dsatax u għoxrin.
F’April 2018 l-Ambaxxata tat
għajnuna lil entità kulturali Maltija li żaret Tuneż biex tipproduċi film dwar il-preżenza Maltija
fit-Tuneżija.
Huwa maħsub li matul l-2018
mużiċisti Maltin jieħdu sehem f’żewġ attivitajiet kulturali f’Tuneż.
Qiegħdin isiru tħejjijiet
biex jixxandar feature fuq Malta
f’riviżta Tuneżina ta’ kwalità għolja fis-sajf 2018.
F’Novembru 2017 l-Ambaxxata
nehdiet stand Maltija fil-bażar
annwali li jorganizza l-Korp Diplomatiku fit-Tuneżija.
L-Ambaxxata tipparteċipa
wkoll f’bosta attivitajiet biex jinġabru fondi għal entitajiet filantropiċi
Tuneżini.
Servizzi Konsulari
- L-Ambaxxata toħroġ l-viżas għal-ċittadini Tuneżini u
ċittadini ta’ pajjiżi terzi li huma residenti fit-Tuneżija. Wara
l-awtorizzazzjoni mis-Central Visa Unit, ċittadini Libjani jkunu jistgħu
japplikaw għall-viża fl-Ambaxxata ta’ Malta f’Tuneż.
- L-Ambaxxata toffri servizzi konsolari (per eżempju
tiġdid ta’ passaporti u reġistrazzjoni ta’ twelid u żwieġ u atti ċivili oħra),
lill-komunità Maltija li tgħix fit-Tuneżija u lill-familjari tagħhom. Toffri
wkoll servizz ta’ legalizzazzjoni ta’ dokumenti.
- L-Ambaxxata tilqa' numru ta’ talbiet ta’ informazzjoni
u applikazzjonijiet għaċ-ċittandinanza l-aktar minn dixxendenti tal-komunità
Maltija li kienet tgħix fit-Tuneżija fis-sekli dsatax u għoxrin.
- Apparti milli toffri servizzi konsulari m’mod regolari
l-Ambaxxata żżomm kuntatt kontinwu mal-komunità Maltija f’Tuneż u ġieli
torganizza laqgħat informali mal-membri.
- Matul dawn l-aħħar snin l-Ambaxxata Maltija tat
assistenza lil ċittadin Malti li kien qed jiskonta sentenza ta’ ħabs f’Tuneż u
wara li ġie meħlus ħargitlu dokument tal-ivvjagar u ffaċilitat ir-ritorn tiegħu
lejn Malta.
Amministrazzjoni
L-Ambaxxata għaddejja minn
proċess biex jiġi identifikat bini ġdid għall-Ambaxxata u l-Konsulat li jkun
aktar sigur u aktar ta’ rappreżentanza xierqa.
Seduta 137
04/07/2018
No comments:
Post a Comment