6628. L-ONOR. CARMELO MIFSUD BONNICI staqsa lill-Ministru għall-Affarijiet Barranin u
Promozzjoni tal-Kummerċ: Jista’ l-Ministru jinforma lill-Kamra x’ħidma u
x’inizzjattivi ttieħdu mill-Ambaxxata tagħna fir-Russja tul dawn l-aħħar tletin
xahar?
25/06/2018
ONOR. CARMELO
ABELA: Ninforma lill-Onor. Interpellant li minkejja
s-sitwazzjoni predominenti fir-reġjun, l-Ambaxxata ta’ Malta f’Moska taħdem bla
waqfien sabiex ir-relazzjonijiet bilaterali bejn Malta u r-Russja jkomplu jiġu
mtejba fuq kull livell u f’diversi oqsma. .
Għaldaqstant, kienu bosta
l-inizzjattivi li din l-Ambaxxata ħadet f’dawn l-aħħar tletin xahar sabiex
tgħolli l-profil ta’ Malta fir-Russja f’oqsma differenti:
- Politiċi;
- Konsolari;
- Promozzjoni ta’ Malta fil-qasam tal-kummerċ u negozju;
- Kultura u Edukazzjoni.
Politika
Mill-aspett politku,
ir-Russja huwa pajjiż importanti ferm, kemm mil-lat bilaterali u kif ukoll
f’ambitu multilaterali. B’hekk, tul dawn l-aħħar tlett snin, l-Ambaxxata żiedet
il-kuntatti tagħha ma’ diversi awtoritiajiet Russi u pparteċipat f’diversi
laqgħat u ‘briefings’ ogranizzati
minn awtoritijiet Russi u Ambaxxati ta’ pajjiżi oħrajn fuq kwistjonijiet li
jikkonċernaw kemm ir-Russja u kif ukoll ir-reġjun.
Inizjattivi politiċi konkreti
f’dan il-perjodu jinkludu fost oħrajn:
Żjarat Uffiċjali:
- Iż-Żjara Uffiċjali f’Moska, mill-eks Ministru għall-Enerġija u-Saħħa, l-Onor. Konrad Mizzi, fis-16
ta’ Settembru 2015;
- Iż-Żjara Uffiċjali mill-Onor. Prim Ministru Joseph
Muscat flimkien mal-eks Viċi Prim
Ministru l-Onor. Louis Grech u l-eks Ministru
għall-Affarijiet Barranin, l-Onor. George W. Vella fil-15 ta’ Novembru 2016;
L-Ambaxxata tat ukoll
assitenza lil dinjitari oħra Maltin li żaru r-Russja f’dawn l-aħħar tletin
xahar sabiex jipparteċipaw f’diversi avvenimenti, fosthom l-Onor. Chris Cardona,
Ministru għall-Ekonomija, Investiment u Intrapriżi Żgħar, l-Onor. Anton Refalo
l-eks Ministru għall-Għawdex, L-Onor. Leo Brincat, l-eks Ministru
għall-Iżvilupp Sostenibbli, l-Ambjent u Tibdil fil-Klima.
F’dawn l-aħħar tletin xahar, ġew iffirmati diversi
Ftehim bilaterali:
- Memorandum
ta’ Ftehim dwar Kooperazzjoni fil-Qasam tas-Saħħa;
- Ftehim dwar ir-Rikonoxximent Reċiproku ta’ Kwalifiki u
l-Lawrji Akkademiċi;
- Memorandum
ta’ Qbil dwar Kooperazzjoni fis-Settur tat-Turiżmu bejn il-Ministeru għat-Turiżmu
tar-Repubblika ta’ Malta u l-Ministeru tal-Kultura tal-Federazzjoni Russa;
- Ftehim bejn il-Fondazzjoni Roscongress
(l-organizzaturi tal-Forum Ekonomiku ta’ San Petroburgu) u Trade Malta.
Konsolari
F’dawn l-aħħar sentejn,
l-Ambaxxata ta’ Malta fir-Russja kienet xhieda ta’ żieda sostanzjali fin-numri
ta’ Maltin li jżuru r-Russja u kif ukoll, ta’ Russi li jżuru Malta. In-numru
ta’ turisti Russi lejn Malta, li kien naqas sostanzjalment wara l-kriżi
tar-Rublu fl-2015 u l-2016, reġa’ qed jiżdied u mill-bidu ta’ Jannar sa’ Ġunju
2018, l-Ambaxxata Maltija fir-Russja ħarġet iktar minn erbat elef viża (skond
il-Visa Management System) għal turisti u studenti (tal-Ingliż) Russi minn
diversi reġjuni.
Din iż-żieda m’hijiex biss
riżultat ta’ titjib fis-sitwazzjoni ekonomika fir-Russja, iżda hija wkoll frott
tal-isforzi kontinwi tal-Ambaxxata sabiex tistabilixxi lil Malta bħala
destinazzjoni turistika popolari fost il-popolazzjoni Russa. Sabiex Malta tkun tista’ tikkompeti ma’
destinazzjonijiet turistiċi popolari oħrajn, bħal ngħidu aħna, Spanja u
l-Greċja. Il-Konsolat ta’ Malta f’Moska, flimkien mal-aġenti sussidjarji li
jiffaċilitaw is-servizzi tal-viżas (VFS), ħoloq sistema effettiva li twassal
għall-ħruġ tal-viżas turistiċi f’madwar tlett ijiem, irrespettivament
mill-lokalità tal-applikant.
In-network tal-uffiċji tal-VFS fir-Russja, minn Kaliningrad (Punent)
sa’ Vladivostok (Lvant), qed tiġi użata b’mod effettiv mhux biss għal
iffaċilitar tal-ħruġ tal-viżi, imma wkoll għall-promozzjoni ta’ Malta bħala
destinazzjoni turistika (u studju) f’reġjuni li jinsabu l-bogħod minn
Moska. Dan l-outreachqed isir ukoll permezz ta’ ċirkulazzjoni ta’ materjal
promozzjonali li huwa magħmul speċifikament għall-udjenza Russa.
L-istabbiliment ta’ Konsli
Onorarji fir-reġjuni madwar il-Volga inkluż fir-Repubblika tat-Tatarstan u
dalwaqt anke fis-Siberja (Novosibirsk u Irkutsk) u fl-Urali (Chelyabinsk u
Ekaterinburg) qed jgħin sabiex tiżdied il-viżibilità u l-outreach ta’ Malta fir-Russja u jiġu sostenuti l-isforzi
tal-Ambaxxata sabiex jiżdiedu l-iskambji kummerċjali bejn Malta u r-Russja
f’diversi oqsma. Għaddeja ħidma sabiex
diversi kandidati oħra jiġu proponuti għall-Konsli Onorarji f’reġjuni
ekonomikament importanti fin-Nofsinhar u l-Punent tar-Russja, fejn hemm l-ikbar
konċentrazzjoni ta’ industrija u opportunitajiet ta’ investiment.
F’dawn l-aħħar snin
(mill-2014), l-interess fir-Russja fost ċittadini Maltin ukoll qed jiżdied u
n-numri ta’ Maltin li qed jirrikorru għall-assistenza tal-Ambaxxata
għall-informazzjoni u tagħrif fuq il-pajjiż, kemm fuq tema turistika u
akkademika u kif ukoll kummerċjali, żdied b’mod konsiderevoli. Iż-żieda ta’
skambji kummerċjali bejn Malta u r-Russja hijawkoll riżultat tal-avvenimenti
frekwenti (madwar tlieta fis-sena) li torganizza l-Ambaxxata flimkien
mal-Konsli Onorarji u Kmamar tal-Kummerċ f’diversi reġjuni fir-Russja, li qed
iżidu l-interess reċiproku fl-opportunitajiet kummerċjali li jeżistu fiż-żewġ
Pajjiżi. L-avvenimenti kummerċjali li jmiss huma pjanati f'Tula (Tula Oblast -
501,169 abitant) u Chelyabinsk (Chelyabinsk Oblast - 1,130,132 abitant).
L-Ambaxxata ta’ Malta f’Moska
qed tagħti attenzjoni speċjali lil qasam tal-Edukazzjoni. Fil fatt, in-numru
ta’ skambji bejn studenti Maltin u Russi qed jiżdied b’mod konsiderevoli. Malta tgawdi fama eċċellenti għat-tgħalim
tal-Inġliz u hi l-iktar destinazzjoni popolari (mill-pajjiżi Schengen)
mal-istudenti tal-Ingliż, filwaqt li Universitajiet Russi qed ikomplu jattiraw
studenti Maltin, l-aktar mil-qasam tax-xjenza (mediċinau dentistrija). Riżultat
ta’ dan, l-Ambaxxata hija xhiedawkoll ta’ żieda sostanzjali fl-iskambji bejn
akkademiċiuriċerkaturi Maltin mill-Università ta’ Malta u Russi minn diversi
Universitajiet stabbiliti.
Iż-żieda fin-numri ta’
taċ-ċittadini Maltin li jgħixu u jaħdmu fir-Russja, f’dawk li jivvjaġġaw lejn
ir-Russja u ċittadini Russi li jixtiequ jivvjaġġaw, jgħixu jew jinvestu f’Malta
wassal għal żieda fl-assistenza konsolari li toffri l-Ambaxxata.
F’okkażjonijiet varji, l-Ambaxxata ħadmet flimkien ma awtoritajiet Russi sabiex
issolvi problemi u sitwazzjonijiet varji li ċittadini Maltin jiltaqgħu magħhom
ġewwa ir-Russja. Waqt it-Tazza tad-Dinja 2018, iktar minn 400 ċittadin (skond
il-FIFA) Malti huma pjanati li jżuru r-Russja. L-Ambaxxata ta’ Malta f’Moska
qed taħdem id f’id mal-FIFA, awtoritajiet Russi u anke ma’ missjonijiet
tal-pajjiżi tal-UE fi bliet Russi sabiex toffri kull għajnuna neċessarja.
Promozzjoni ta’ Malta fil-qasam tal-kummerċ u negozju
Sabiex issaħħaħ il-viżibilità
ta’ Malta mat-territorju vast Russu, l-Ambaxxata stabbilixxiet kuntatt ma’
diversi kmamar tal-kummerċ ta’ reġjuni differenti u qed taħdem bi sħieħ
mal-Kamra Federali tal-Kummerċ u l-Industrija u kif ukoll mal-Assoċjazzjoni
tal-Intraprendituri ta’ Moska bil-għan li tikseb kuntatti fil-qasam kummerċjali
u sabiex tkun tista’ tagħti pariri infurmati lil intrapriżi Malti li huma
nteressati fis-suq Russu.
L-aktar inizjattivi
prominenti għall-promozzjoni ta’ kummerċ bejn Malta u r-Russja jinkludu:
i. Forums ta’
Negozju
Mill-2014 l’hawn, l-Ambaxxata
Maltija f’Moska organizzat avvenimenti kummerċjali bħala parti
mill-attivitajiet komemorattivi tal-Jum Nazzjonali ta’ Malta fil-21 ta’
Settembru.
- Fl-24 ta’ Settembru 2015, ġie organizzat avveniment
kummerċjali bil-parteċipazzjoni tal-Onor. Chris Cardona Ministru
għall-Ekonomija, Investient u Intrapriżi Żgħar u diversi intraprendituri Maltin
minn diversi oqsma.
- Fl-20 ta’ Settembru 2016, ġie organizzat avveniment
kummerċjali f’Moska, bil-għan li jesponi il-potenzjal ekonomiku tal-gżira
Għawdixja. L-Onor. Anton Refalo, eks Ministru Għal-Għawdex flimkien
mar-Reprezentatnti mill-Kamra tal-Kummerċ ta’ Għawdex u l-Assoċċjazzjoni
għal-Promozzjoni tat-Turiżmu ta’ Għawdex ipparteċipaw f’dan l-avveniment.
- Fl-20 u 21 ta’ Settembru 2017, ġie organizzat avveniment
kummerċjali fil-Belt ta’ Nizhny Novorgod. Dan il-Forum serva bħala pjattaforma
għal kuntatti bejn negozjanti Maltin u Russi. Madwar 300 parteċipant
mis-setturi tat-turiżmu, l-edukazzjoni u l-investiment kienu preżenti
fil-Forum.
L-Ambbaxata providiet assistenza
sabiex jiġi organizzat business forum
fiċ-Ċentru tal-Kamra Federali tal-Kummerċ u l-Industrija f’Moska bi sħubija ma’
Trade Malta u l-Kamra tal-Kummerċ ta’ Malta, fil-marġni taż-żjara uffiċjali
tal-Prim Ministru Joseph Muscat f’Moska fil-15 ta’ Novembru 2016.
Matul dawn l-aħħar xhur,
l-Ambaxxata ppartecipat f’diversi edizzjonijiet ta’ St Petersburg International Economic Forum (SPIEF) u ir-Russian Investment Forum fil-Belt ta’
Sochi biex tompli tesplora opportunijiet ekonomiċi t’interess għal Malta.
ii. Żjarat fir-Reġjuni
Bħala parti mil-isforzji ta’ outreach
u viżibilà’, matul dawn l-aħħar xhur, l-Ambaxxatur żar numru ta’ bliet
f’reġjuni Russi, fosthom f’San Petroburgu, Sochi, Kazan, Nizhny Novogord,
Vladimir, Yaroslav, Suzdal u oħrjan. L-aġenda waqt dawn iż-żjarat, apparti li
tikludi laqgħat ma’ rappreżentanti reġjonali, tinkludi wkoll numru ta’ laqgħat
mal-Kmamar tal-Kummerċ prominenti fir-reġjun, Universtajiet, u kif ukoll
diversi assoċjazzjonijiet mis-settur tat-turiżmu. . Rapreżentanti mil-Awtorità
Maltija għat-Turiżmu, l-Air Malta u diversi kumpaniji Maltin oħrajn
jipparteċipaw f’dawn iż-żjarat b’mod regolari.
iii. Ħidma oħra
L-Ambaxxata ta’ Malta f’Moska
kienet strumentali wkoll fl-organizzazzjoni ta’ għadd ta’ żjarat ta’
delegazzjonijiet kummerċjali minn Malta u mir-Russja bil-għan li jkun hemm żieda
fl-iskambji kummerċjali.
Barra minn hekk, fuq bażi
regolari, l-Ambaxxatur jiltaqa’ ma’ diversi kumpaniji Russi minn setturi
differenti li għandhom interessant li jinvestu f’Malta. L-Ambaxxata tiffaċilita wkoll kuntatti mal-awtoritajiet Maltin u tassigura li dawn il-kumpaniji jingħataw l-għajnuna u
l-informazzjoni meħtieġa.
Kultura u Edukazzjoni
Il-promozzjoni ta’ Malta
fis-setturi kulturali u tal-edukazzjoni permezz ta’ avvenimenti varji hija
waħda mill-prioritajiet ewlenin tal-Ambaxxata ta’ Malta f’Moska.
Highlights
riċenti minn dawn l-avvenimenti jinkludu:
2017:
Kunċert minn mużicisti Maltin
mill-Orkestra Filarmonika li seħħ ġewwa teatru storiku f’Moska;
Kunċert li jimmarka il-ħamsin
sena anniversarju mit-twaqqif ta’ relazzjonijiet bilaterali bejn Malta u
r-Russja mill-vionilista Malti Carmine Lauri, flimkien ma’ mużiċisti Maltin
mill-Orkestra Filarmonika u mużiċisti Russi mit-Teatru Marinsky ta’ San
Petroburgu;
Matul l-2017, ġew stabbiliti
kuntatti ma’ diversi Universitaijiet, fosthom, l-Università tal-Pedagoloġija
f’Nizhny Novgorod fejn ġew diskussi possibilitajiet sabiex titwaqqaf akkademja
tat-Tagħlim tal-Musika Russo-Maltija ġewwa Malta li jkollha l-potenzjal tattira
studenti internazzjonali.
2018: Parteċipazzjoni
regolari fil-laqgħa ta’ esperti fil-qasam tal-kultura tal-pajjiżi tal-UE fejn
ġie preżentat il-programm ta’ avvenimenti matul il-V18 li jinkludu
kooperazzjoni ma artisti stabilliti Russi. Dawn l-avvenimenti jinkludu: il-Malta International Music Festival u Russian
Masters (li saru f’Marzu) u Tchaikovsky’s Fifth Symphony (li sar f’Mejju).
Diskussjonijiet mar-Russja
għaddejjin wkoll fil-qasam tal-wirt storiku u restawr tal-arti bejn iċ-Ċentru
tal-Konservazzjoni tal-Arti Grabar u Heritage
Malta fejn qed tiġi kkunsidrata il-possibiltà ta’ skambji bejn esperti
Maltin u Russi f’dan il-qasam.
Fl-avvenimenti kulturali
msemmija hawn fuq, l-Ambaxxata ħadmet mhux biss sabiex tesponi t-talent
artistiku Malti fir-Russja, imma wkoll sabiex tippromwovi produtturi Maltin
tal-ikel u xorb (fosthom inbid u prodotti artiġjanali) li xtaqu li l-prodotti
tagħhom jkunu esposti ma’ udjenza Russa. Minn sena għal sena, in-numru ta’
intrapriżi Maltin li huma interessati fis-suq Russu żdied b’mod konsiderevoli u
f’kull avveniment, l-Ambaxxata tassigura li toffri prodott ġenwinament Malti.
F’April 2018, l-Ambaxxata tat
assistenza u kuntatti ma’ diversi producers
stabbiliti lill-Kummissarju Malti għal-Film waqt iż-żjara tiegħu fir-Russja.
Seduta 137
04/07/2018
No comments:
Post a Comment