5424. L-ONOR. CARMELO MIFSUD BONNICI staqsa lill-
Ministru għall-Affarijiet Barranin u Promozzjoni tal-Kummerċ: Jista’ l-Ministru
jinforma lill-Kamra x’ħidma u x’inizjattivi ttieħdu mill-Ambaxxata tagħna
f’Madrid fi Spanja tul dawn l-aħħar tletin xahar?
24/04/2018
ONOR. CARMELO
ABELA: Ninforma lil Onor. Interpellant li :
Ġenerali
Ir-relazzjoni bilaterali bejn
Malta u Spajna huma ferm pożittivi li qegħdin ikomplu jissaħħu. Għaldaqstant,
f’dawn l-aħħar tletin xahar, l-Ambaxxata Maltija f’Madrid ħadmet bla waqfien
sabiex dawn ir-relazzjonijiet ikomplu jiġu pprofonduti.
Konsulari
L-Ambaxxata dejjem kienet
għad-disposizzjoni taċ-ċittadini Maltin li jgħixu fi Spanja u dawk li
jivvjaġġaw lejn Spanja, u ċittadini Spanjoli li jixtiequ jivvjaġġaw lejn Malta
li jeħtieġu xi għajnuna, kemm fuq temi konsolari, kif ukoll temi turistiċi u
kummerċjali.
Ta' min wieħed isemmi li
l-Ambaxxata hija f'kuntatt qarib mal-Assoċjazzjoni ‘Amigos de Malta.Din hija organizzazzjoni li tħaddan fiha Spanjoli
ta’ dixxendenza Maltija residenti f’Valencia. Għal dawn l-aħħar erba' snin,
l-Ambaxxatur ħadem ħafna sabiex jagħti lil din l-Assoċjazzjoni dimensjoni aktar
importanti u jinżamm kuntatt kontinwu. Fi Frar ta’ din is-sena, l-Ambaxxatur
żar ukoll Seville fejn iltaqa’ ukoll ma’ diversi Maltin li jgħixu fir-reġjun
ta’ Andalucia, bħala parti minn avveniment li ġie organizzat mill-Konslu
Onorarju ta’ Malta f'Seville.
Dawn l-aħħar snin,
l-Ambaxxata ħadmet bla waqfien sabiex ittejjeb in-‘network’ tal-Konsli Onorarji Maltin ġewwa Spanja. Mal-wasla tiegħu
ġewwa Spanja, l-Ambaxxatur sab sitwazzjoni fejn il-kosta ta’ 3,000 kilmoteru
fit-tramuntana ta’ Spanja, li hija waħda miż-żoni l-iktar rikki fi Spanja,
kient taqa’ kollha taħt Konslu Onorarju wieħed. Ghal daqs tant l-Ambaxxatur
nieda proċess sabiex din is-sitwazzjoni tiġi rranġata. Fil-fatt, f’Settembru
tal-2017, l-Ambaxxatur żar Oviedo u Vigo fejn infetħu żewġ Konsolati Onorari
Maltin ġodda u qegħdin isiru l-aħħar preparamenti sabiex jinfetaħ Konsolat
Onorarju ġewwa Bilbao. L-Ambaxxata qiegħda ukoll taħdem sabiex tiġi
ffinalizzata l-applikazzjoni għall-Konslu Onorarju ġdid f’Barċellona.
Promozzjoni ta’ Malta
Wieħed mis-setturi li
l-Ambaxxata tagħti importanza speċjali huwa s-settur tal-promozzjoni ta’ Malta.
Għalhekk, l-Ambaxxatur attenda diversi avvenimenti u għamel diskors sabiex
jippromwovi lil pajjiżna, fosthom:
- ‘Lecture’
organizzanata mill-Kulleġġ tal-Inġiniera Ċivili ta’ Spanja u l-Universita’
Ewropea ġewwa Madrid f’Marzu 2016.
- Attivita’ organizzata minn ‘Casa Mediterraneo’ ġewwa Alicante bit-titlu ‘Encounters with Mediterranean Countries’ fit-23-24 ta’ Novembru
2017. Dan l-avveniment kien kompletament iddedikat għall-Malta.
- Avveniment organizzat mill-Kamra tal-Kummerċ
Belġjana-Lussemburgu ġewwa Barċellona fl-14 ta’ Diċembru 2017.
- ‘Lecture’
organizzanata minn ISDE (‘International
Law, Foreign Trade and International Relations’) fid- 9 ta’ Marzu 2018
ġewwa Barċellona.
Matul is-snin, l-Ambaxxatur
kellu bosta intervisti ma’ ġurnalisti Spanjoli dwar diversi temi li ġew
ippublikati fuq gazzetti ewlenin, kemm f’Madrid, kif ukoll f’diversi bliet li
l-Ambaxxatur iżur fuq bażi regolari. Fosthom: ma’ rivista Spanjola ‘Sector Ejecutivo’ f’Jannar 2016;
mal-ġurnal ‘La Razon’ f’Settembru
2017; ma’ diversi ġurnali fi Frar tal-2018 waqt iż-żjara ġewwa Seville; u
diversi intervisti ma’ ġurnali prominenti waqt iż-żjara f’ Oviedo u Vigo
f’Settembru 2017. Waqt dawn iż-żjarat, l-Ambaxxatur iltaqa’ ukoll ma’ diversi
Retturi ta’ Universitajiet prominenti sabiex jippromwovi skambu ta’ taħriġ
mal-Universita’ ta’ Malta, kif ukoll ma’ Sindki u personalitajiet mis-settur
tat-turiżmu sabiex dejjem inkomplu nsaħħu l-isem ta’ Malta.
Waħda mill-iktar inizjattivi
importanti li ttieħdet minn din l-Ambaxxata kient il-parteċipazzjoni
fil-programm televiżiv ‘Madrid, la ciudad
de los 100 países’ (Madrid, il-belt ta’ mitt pajjiż). TeleMadrid, wieħed
mill-istazzjonijiet tat-televiżjoni l-iktar importanti fi Spanja, ipproduċiet
programm ġdid sabiex juri l-ħajja ta' Ambaxxaturi barranin u ċittadini
residenti f'Madrid. Malta ġiet magħżula bħala wieħed mill-pajjiżi biex
tipparteċipa f'dan il-programm. Għal daqs tant, fil-ġimgħat li ġejjin ser
jintwera programm ta' 45 minuta li ser ikun iddedikat kompletament għal Malta.
Turiżmu
Is-settur tat-turiżmu ħa
spinta ‘l quddiem f’dawn l-aħħar snin hekk kif żdiedu t-titjiriet diretti bejn
Malta u diversi bliet Spanjoli. L-Ambaxxata kienet strumentali
f’diskussjonijiet sabiex il-kumpanji ‘Ryanair’, ‘Vueling’ u ‘Norwegian
Airlines’ żiedu l-frekwenza tat-titjiriet tagħhom, u kif ukoll li ġew imnedija
titjiriet ġodda bejn Malta u Malaga mill-kumpanija ‘AirMalta’, bejn Malta u
Bilbao mill-kumanija ‘Volotea’ u bejn Malta u Madrid mill-kumpanija ‘Iberia’.
L-Ambaxxata ħadet diversi inizzjativi sabiex tħajjar
studenti Spanjoli jżuru Malta għal korsijiet tal-Ingliż. Dan isir fuq bażi ta’
kuljum meta d-dipartiment konslari jassisti diversi Spanjoli fil-mistoqsijiet
tagħhom dwar dan is-suġġett. Ftit tal-ġimgħat ilu, bil-kollaborazzjoni ma’
FELTOM, l-Ambaxxata żaret skola fejn indirizzat studenti Spanjoli u pprovdiet
l-informazzjoni neċessarja fuq l-istudju tal-Ingliż ġewwa Malta.
Kummerċjali
Fir-rigward ta’
relazzjonijiet kummerċjali, fil-25 ta’ Jannar 2016, l-Ambaxxata, flimkien ma’ Malta Enterprise, organizzat seminar dwar is-settur finanzjarju
f’Malta. Fl-10 ta’ Novembru 2016, flimkien ma’ Malta Enterprise u l-Konslu Onorarju ġewwa Valencia, l-Ambaxxata
assistiet sabiex jittella’ seminar ieħor fuq l-istess tema. Barra minn hekk,
l-Ambaxxata għenet bosta kumpaniji Spanjoli sabiex jespandu l-attivitajiet
tagħhom ġewwa Malta. Fost dawn il-kumpaniji, tajjeb li wieħed isemmi lill-grupp
Spanjol ‘Alsa’ li permezz
tas-sussidjarja tiegħu ‘ALESA’ qiegħed jipprovdi l-ġestjoni sħiħa tat-trasport
pubbliku ġewwa Malta.
L-Ambaxxata għamlet ukoll
kuntatt ma’ bosta kumpaniji tal-kostruzzjoni Spanjoli, sabiex tħeġġiġhom
jespandu x-xogħol tagħhom ġewwa pajjiżna. F’dan ir-rigward, kumpanija ta’
importanza kbira ġewwa Spanja li qiegħda tkabbar il-preżenza tagħha ġewwa Malta
hija ‘San Jose Constructora’.
Għaldaqstant, din l-Ambaxxata ħadmet sabiex tassisti lil din il-kumpanjia
fil-proġett tal-Kappara, li issa wasal fit-tmiem.
F’dawn l-aħħar xhur,
l-Ambaxxata ħadmet ukoll bla waqfien sabiex tippromwovi l-proġett tas-Suq
tal-Belt ma’ kumpanji Spanjoli. Fil-fatt, kumpanija Spanjola qiegħda tmexxi
żewġ ristoranti prominenti ġewwa s-Suq fejn qiegħda tippromwovi l-kċina
Spanjola.
Barra minn hekk, l-Ambaxxatur
iltaqa’ ma’ diversi kumpaniji Spanjoli fis-settur tan-navigazzjoni marittima,
sabiex inkomplu nippromwovu l-bandiera Maltija. Fil-fatt, l-Ambaxxata ta’ spiss
tirċievi talbiet għall-informazzjoni dwar din is-suġġett, u li għal daqs tant
l-Ambaxxata tiżgura jingħataw l-għajnuna meħtieġa.
Attivitajiet imtella’
mill-Ambaxxata
Ta’ kull sena, l-Ambaxxata
Maltija f’Madrid torganizza attivita’ sabiex tikkommomera l-Jum Nazzjonali ta’
Malta fil-21 ta’ Settembru. Għaldaqstant, f’dawn l-aħħar tletin xahar, ġew
organizzati żewġ ‘luncheons’ fejn
kienu mistiedna bosta Ambaxxaturi akkreditati għal Spanja, Maltin li jgħixu
Spanja, u kif ukoll diversi personalitajiet Spanjoli mis-setturi
tal-Industrija, il-Kultura, in-Negozju u l-Kummerċ ta’ importanza għal
pajjiżna.
Barra minn hekk, fl-24 ta’
Novembru 2016, l-Ambaxxata organizzat ‘EUHoMs
Luncheon’ fejn laqqat lill-Ambaxxaturi ta’ Membri Stati tal-Unjoni Ewropea.
Din hija użanza tal-Membri Stati f’Madrid fejn kull xahar, fuq bażi ta’ rotazzjoni,
jiġu mlaqqa’ l-Ambaxxaturi kollha tal-Unjoni Ewropea sabiex jiddiskutu temi
kurrenti u jaqsmu l-opinjoniiet tagħhom b’mod iktar liberu.
Il-Presidenza Maltija
tal-Kunsill tal-Unjoni Ewropea.
F’dawn l-aħħar tletin xahar,
l-Ambaxxata f’Madrid, bħal bosta Ambaxxati, Ministeri u entitajiet oħra
tal-Gvern, kienet iffukata fuq il-Presidenza Maltija tal-Kunsill tal-Unjoni
Ewropea.
Apparti mix-xogħol relatat
mal-presidenza tal-laqgħat informattivi li jsiru kull xahar bil-kollaborazzjoni
mal-Ministeru tal-Affarrijiet Barranin Spanjol u diversi Ministeri oħra (bħal
per eżempju, ECOFIN, FAC, GAC, AGRIFISH u EPSCO), l-Ambaxxata assistiet
lill-Ministeru għall-Affarijiet Ewropej Malti sabiex jiġi mtella’ il-kunċert ‘Valletta International Baroque Ensemble’
(VIBE) li sar fit-12 ta’ Mejju 2017 ġewwa il-‘Basilica de San Miguel’ f’Madrid.
F’Jannar 2017, l-Ambaxxatur
kien il-kelliem mistieden waqt Working
Breakfast organizzat minn INCIPE (International
Affairs and Foreign Policy Institute) sabiex jitkellem dwar metodi kif
l-Unjoni Ewropea tersaq iktar viċin taċ-cittadini tagħha.
Barra minn hekk, fit-23 ta’
Frar 2017, l-Ambaxxata organizzat ‘EUHoMs
Luncheon’ sabiex tikkommomera l-Presidenza Maltija. Il-mistieden speċjali
ta’ dan l-avveniment kien is- Segretarju tal-Istat għall-Affarijiet tal-Unjoni
Eqropea, fi ħdan il-Ministeru tal-Affarijiet Barranin u Kooperazzjoni ta’
Spanja.
Żjarat Uffiċjali
Tajjeb ukoll li wieħed isemmi
l-assistenza li l-Ambaxxata pprovdiet lil diversi dinjitarji Maltin li żaru
Spanja f’dawn l-aħħar tletin xahar, fosthom: l-Eċċelenza Tagħha s-Sinjura Marie
Louise Coleiro Preca, President ta’ Malta, l-Onor. Prim Ministru Joseph Muscat,
il-Viċi Prim Ministru u Ministru għas-Saħħa l-Onor. Chris Fearne, u l-Onor.
Edward Zammit Lewis (ex-Ministru għat-Turiżmu).
Seduta 109
08/05/2018
No comments:
Post a Comment