Stennejna ferm aħjar.

1.     Għalkemm fil-pubbliku, bis-soltu mekkaniżmu li bih il-Gvern Laburista preżenti jipprova jimmanipula l-imħuħ, il-messaġġ kien li billi suppost li kull min jiġi elett fl-ewwel sena jdaħħal taxxi ġodda, billi huwa ma daħħalx, allura b’daqshekk il-budget, skont hu, għandu jiġi definit bħala “tajjeb”.  Biss, fortunatament, fis-soċjetà mhux kull persuna temmen dak li ried ibella’ l-Gvern.  Il-maġġoranza fir-realtà, minflok dak li ngħad, stenniet li jkun hemm dokument li fih tiġi mmarkata l-linja politika, il-viżjoni, il-mira li għaliha ser jaħdem tul il-leġislatura li ġejja.  Il-kitba kienet, f’ħafna mumenti, tixbaħ x’kellu jkun l-aħħar budget tal-aħħar leġislatura.  Ġustament ingħad minn diversi li huwa wieħed mingħajr ebda forma ta’ pjan.

L-istess diskors tas-snin ta’ qabel

2.     Ħafna ppretendew li d-diskors ikun fih ferm iktar sens u sustanza milli fil-fatt kellu.  Wieħed kien jistenna, speċjalment meta wieħed jikkonsidra l-għerf ta’ min qraħ, ferm u ferm iktar kwalità.  Għarbiel aqwa ta’ dak li għaddej fl-ekonomija mis-sempliċi l-istess linji ta’ propaganda, li nafu li ma jgħidux il-verità sħiħa.  Mhux biss, imma f’aktar minn tmenin fil-mija tiegħu, il-linja kienet ripetittiva, bħal tas-snin preċedenti.  Smajna l-istess suġġetti li, sena wara sena ta’ din l-amministrazzjoni, ilna nisimgħu f’dan id-diskors annwali bi ftit li xejn ġdid jew progressiv.  Mhux biss, imma biex wieħed jinsulta iktar l-intelliġenza, issemmew ukoll punti li diġà ġew finalizzati tul is-snin li għaddew, bħallikieku għad iridu jsiru.  Smajna bl-istess proġetti li sena wara sena nisimgħu bihom, imma ma jsirux.  Rajna fuq kollox l-istess tal-istess tal-istess.  Ippretendejna ferm aħjar.

Is-suq tal-kera injorat

3.     Hemm diversi setturi li ma smajna xejn dwarhom.  Il-Ministeru tal-Affarijiet Barranin, fost l-oħrajn, kien għal darb’oħra assenti.  Miegħu rajna, minflok, preżenzi ta’ ministeri oħra li l-kontenut dwarhom ma jgħid assolutament xejn ġdid.  Spikkat, fuq kollox, il-biża’ tal-Gvern milli jaffronta ħafna problemi fis-soċjetà li ilna nħossu li qed jakkumulaw tul l-aħħar snin.  Prinċiparjament dik li s-suq tal-kera tad-djar qiegħed joħloq fis-soċjetà tagħna.  Għandna fuq naħa tant permessi ta’ iktar bini ta’ djar, u fuq l-oħra l-kirjiet, flok jonqsu, qed jiżdiedu.  Meta wieħed jaqra dak li ngħad fl-istess diskors isib li l-Gvern ser issa jibda jistudja x’qiegħed jiġri u wara “beħsiebu” joħroġ white paper għal diskussjoni ġenerali.  Sinjal, jekk qabel ma kien hemm bżonn, mill-iktar ċar li ħadd ma jidher li qiegħed iħoss il-karba li hemm hemm barra ta’ diversi persuni li qed jaraw il-kirjiet ta’ fejn jgħixu jiżdiedu b’rati kbar u inkontrollabbli, b’diffikultajiet biex isibu saqaf fuq rashom.  Pożizzjoni mill-iktar kiefra għal dawk li jgħixu, għal xi raġuni jew oħra, waħedhom.

Ebda sens ta’ urġenza

4.     Ma hemmx sens ta’ urġenza għal dak li t-tessut soċjali qiegħed iħoss.  Bħal lanqas ma hemm f’dak li qiegħed jiġri fid-dinja tax-xogħol.  Meta fl-istess diskors isir ftaħir ta’ kemm żdiedu l-bnedmin fid-dinja tax-xogħol, ħadd ma huwa jgħid li l-maġġoranza ta’ dan ġejja mhux  minn iktar Maltin u Għawdxin, imma minn persuni li ġejjin minn barra, ħafna drabi b’salarji baxxi.  Il-pagi baqgħu fejn kienu; ma żdidux.  Anqas f’dan ma huwa jingħad li n-nisa li daħlu lura fid-dinja tax-xogħol deħlin f’impjiegi part-time u f’dawk li huma l-iktar ‘l isfel fl-iskala tal-kwalità.  Ħadd ma huwa jara l-impatt ta’ dan, kif anqas ma smajna x’miżuri ġodda qed jinbnew biex dawk li huma fil-kategorija msejħa “NEET”, jiġifieri li la huma jaħdmu, la jistudjaw u lanqas f’xi forma ta’ taħriġ, ser jinġiebu lura.

Paga minima nazzjonali

5.     Tal-mistħija iktar kif, fil-budget, l-ewwel insibu qisu ser isir xi ħaġa issa dwar l-aġġustament, mhux iż-żieda, tal-paga minima nazzjonali.  Id-dokument qisu jagħti x’jifhem lil min semgħu li ser ikun hemm żieda f’daqshekk.  Minflok huwa rappurataġġ ta’ dak li kien ġie qabel maqbul.  Xejn ġdid, u xejn dħul iktar għal din il-klassi tal-proletarjat.  Mhux talli, imma anqas jitwemmen kif Gvern li suppost għandu għal qalbu l-ħaddiema, ħalla lil dawk li qegħdin fl-hekk imsejħa “Community Worker Scheme”, li tant ikkritikajna fl-aħħar leġislatura għall-inġustizzja tal-kundizzjonijiet prekarji tagħhom, sentejn sħaħ wieqfa.  Issa qed jitħabbar li fl-aħħar ser jibdew jieħdu mitejn ewro (€200) oħra fix-xahar.  Jekk il-Gvern irid jindirizza inġustizzja passata verament, għandu jagħti lil dawn in-nies l-arretrati ta’ sentejn.

Ebda miżura fuq il-prekarjat

6.     Anqas fuq il-prekarjat ma smajna xi miżura konkreta.  Jidher ċar li l-Gvern iddeċieda li din jinjoraha.  Il-famuż bord li għamel b’tant pompa sabiex isir il-blacklisting spiċċa falliment kbir.  Ħadd ma jrid jirreaġixxi għalih, u s-sitwazzjoni baqgħet għaddejja.  Għax jekk hemm dan is-surplus kollu li qed jingħad, allura fejn huwa jekk dawn il-punti ma rajnihx b’edba mod.  Il-Gvern, jidher għalhekk ċar ħafna, li nixef mill-ideat.  Tilef anke mill-ħeġġa li jipprova jbiddel sitwazzjonijiet li żviluppaw taħtu.  Dan b’mod mill-iktar ċar fl-edukazzjoni.  Il-bżonn ta’ iktar għalliema, ta’ iktar persuni juri ċar li ma kienx hemm pjanar tajjeb.  Il-fatt li din il-ġimgħa saret, terġa’, sejħa lill-istudenti li għaddejjin fl-istudju tagħhom biex jidħlu huma part-time hija iktar u iktar prova ta’ dan in-nuqqas.  L-MUT qalet kelma jew tnejn dwar dan, però jidher ċar li hija wkoll qed tiġi injorata.

Gvern bla pjan

7.       Dawn huma ftit punti minn dan il-budget li huru kemm dan ma sarx biżżejjed tajjeb biex jaffronta r-realtajiet soċjali u ekonomiċi li żviluppaw b’mod iktar qawwi taħtu.  Sewwa qal il-Kap tal-Oppożizzjoni, Dr Adrian Delia, li dan huwa wieħed bla pjan.  Ser nikkritikawh, però dan ma jfissirx li m’aħniex lesti li noffru l-għajnuna tagħna.  Għax għalkemm id-dawl kien fuqna f’dawn ix-xhur, minn dak li smajna u qrajna jidher li ġewwa l-Gvern hemm inkwiet ieħor ibaqbaq.  Inkwiet minn dak li ma jħallix ideat ġodda jiżviluppaw.  Konna qegħdin nippretendu ferm u ferm aħjar minn dan il-budget, però kuljum nifhmu għala dan ma kienx.

Mexxej Uniku u Ewropew

1.     F’dawn il-jiem, il-mezzi tax-xandir huma mimlija b’aħbarijiet ta’ dak li hemm għaddej preżentement fil-kontinent Ewropew.  Għalkemm diversi ma jaqblux u jippruvaw jargumentaw il-kontra, il-verità hija li, għal snin twal, il-Ġermanja u Franza ddominaw l-istorja.  F’mumenti kienu għedewwa, f’oħrajn alleati.  Biss, ħadd ma jista’ jħares lejn l-eventi tal-popli Ewropej mingħajr ma jagħraf ħidmiethom.  Ċertament, din ir-realtà hija iktar qawwija llum f’Unjoni Ewropea li anke jekk kibret fil-membri, flok naqqsitilhom fl-importanza iktar żdiditilhom.

2.     L-elezzjonijiet reċenti fiż-żewġ pajjiżi m’għandhomx effett limitat għall-popli rispettivi, imma jimxi iktar ‘il bgħid minn hekk.  L-istabilità politika u ekonomika tagħhom tfisser l-istess għall-oħrajn, aħna nklużi.  Ir-riskji f’dawn iż-żewġ appuntamenti din id-darba kienu ikbar mis-soltu.  Dan għax huwa rikonoxxut li l-movimenti fuq il-lemin estrem ħabtu sew mal-bibien tal-poter, l-iktar minħabba l-kriżi tal-immigrazzjoni irregolari.  Kriżi li, kif nafu aħna, mhix faċli li taffronta.  Nafu li fi Franza, il-Partit Republique en March tal-President il-ġdid Emmanuel Macron żamm lil dak il-pajjiż fil-linja politika Ewropea li tħares ‘il quddiem f’tiġdid demokratiku.  Min qiegħed jaqra l-ktieb reċenti tiegħu ‘Re’evolution’, u min qiegħed isegwih jagħraf iktar li hemm ideat ġodda li qed jitolbu attenzjoni.

3.     Ftit ġimgħat ilu rajna l-elezzjonijiet politiċi ġewwa l-Ġermanja.  Art li mit-Tieni Gwerra Mondjali kellha, u għad għandha sehem fiż-żamma tal-paċi u l-istabilità.  Art li rat f’dan il-perjodu tlett mexxejja demokratiċi nsara li servew lill-pajjiż f’mumenti kruċjali.  L-ewwel Konrad Adenauer mill-1949 sal-1963, it-tieni Helmut Kohl mill-1982 sal-1998, u issa Angela merkel mill-2005 sallum.  It-tlieta ħallew l-impatt tagħhom, u fil-każ ta’ Merkel, għadha.  Mara li għaddejja minn staġun politiku diffiċli.  B’żewġ leġislaturi f’alleanza politika mas-soċjal-demokratiċi u issa b’parlament fejn il-partiti żdiedu aktar mis-soltu.  Biss, irnexxielha żżomm il-Partit Demokratiku Kristjan fuq quddiem anke jekk, kif għidna, il-kumplikazzjonijiet tal-immigrazzjoni irregolari kienu qed jagħtu vantaġġi lill-partit tal-lemin estrem.  Partit li daħal, sfortunatament, wara dawn is-snin kollha f’dak il-parlament.

4.     Dak li ġara tul dawn ix-xhur tas-sajf kellhom, u għad għandhom, l-effett tagħhom.  Huma żgur suġġetti ta’ artikoli oħra għall-futur.  Biss, bil-permess tagħhom, f’dan xtaqt infakkar politiku Kattoliku kbir.  Ilni minn tul l-aħħar xhur irrid infakkar lil Konrad Adenauer, li kien l-ewwel Kanċillier demokratiku fil-Ġermanja maqsuma f’biċċiet wara t-Tieni Gwerra Mondjali.  Din is-sena jaħbat il-ħamsin anniversarju mill-mewt tiegħu, li ġrat fis-16 ta’ April 1967.  Tifhmu, għalhekk, li ilni dawn ix-xhur nipprova nsib il-ħin u l-okkażjoni li nikteb u nfakkru.  Jimmerita din l-attenzjoni għal numru ta’ raġunijiet, fosthom, speċjalment, il-fatt li kien hu li minkejja li kien ġew mill-iżvantaġġ ta’ pajjiż maqsum f’erbgħa, emmen fl-Ewropa ispirata mill-valuri Nsara, magħquda biex tinżamm il-paċi u biex jitkattar il-ġid.  Mhux biss, imma rnexxielu b’diffikultajiet xejn żgħar, iġib lura l-fiduċja tal-alleati biex it-tlett biċċiet li kienu taħt l-Istati Uniti tal-Amerika, Franza u r-Renju Unit jiġu lura f’daqqa u lura indipendenti.

5.     Kien huwa wkoll li qabad it-triq tar-rikostruzzjoni tal-pajjiż li ġie mkisser u mħarraf, mertu tal-iżbalji politiċi u militari li ttieħdu min-Nażiżmu.  Kif ukoll li fehem l-importanza għal pajjiżu li jkun parti min-North Atlantic Treaty Organisation (NATO).  It-theddida Sovjetika kienet qawwija ħafna u ma setax jissogra.  Dan seħħ prinċipalment minħabba d-doni u t-talenti li kkoltiva tul ħajtu.  Kien tgħallem il-virtujiet tal-puntwalità, l-ordni, il-paċenzja, il-persistenza.  Kien żviluppa mod ta’ kif jgħix, li fih kien jaħrab kull forma ta’ eċċess.  Il-fatt li tgħallem jiddixiplina ruħu daqshekk ġiebu persuna kapaċi taħdem siegħat itwal milli kien jagħmel ħaddieħor, b’inqas sforzi, kapaċi jikkonċentra fit-tul, u li jiffoka fuq il-miri li huwa stess stabilixxa.  Li kapaċi jinnegozja madwar il-mejda b’perseveranza qawwija.

6.     Dan il-mexxej veru, li l-Ġermanja magħquda fl-2003 ivvutat bħala l-aqwa li qatt kellhom, jimmerita attenzjoni tajba anke ġewwa pajjiżna.  Ngħid dan għax kien il-bniedem li spiċċa daħal fil-politika attiva fl-età ta’ 70 sena.  Qabel serva u ra ħafna tul erba’ mumenti tal-Istat.  L-ewwel taħt żmien l-Imperu Tedesk, ‘l hekk imsejjaħ “Kaiserreich”.  It-tieni tul il-perjodu tar-Repubblika ta’ Weimar.  It-tielet waqt iż-żmien tan-Nażiżmu.  Fl-aħħar fi żmien id-demokrazija u l-kostruzzjoni.  Kien f’dan l-aħħar perjodu li ħareġ il-kwalitajiet tiegħu ta’ amministratur u politiku.  Wieħed li ġie fdat proprju għax f’ebda mument ma aċċetta n-Nażiżmu, anzi li tul dak iż-żmien bata sew fih b’persekuzzjoni kbira.  Filwaqt li oħrajn f’din l-età “avvanzata” jħossu li għandhom jirtiraw, huwa spiċċa minflok fil-bidu ta’ ħajja ġdida.

7.     Dan seħħ prinċipalment għax waqt li kienu l-Amerikani li kellhom fiduċja fih u ħaduh magħhom lura bħala Sindku tal-belt ta’ Cologne, appena din ġiet f’idejn l-Ingliżi huwa tneħħa inġustament.  F’dak il-mument partikolari, fit-6 ta’ Ottubru 1945, fl-Ingilterra kien ġie elett il-Partit Laburista, li kien jippreferi s-soċjal demokratiċi Tedeski iktar mill-Kattoliku Adenauer, li kienu kkalkulaw żbaljatament li ma kienx bniedem influwenti u politikament b’saħħtu.  Din id-daqqa ta’ ħarta, flok serviet biex ġiebet fi tmiem, jew qatgħet qalb Adenauer, ġibitu fiċ-ċentru tal-ħidma.  Fehem li jrid jorganizza partit li kien jinvolvi fih siha ‘l-Kattoliċi tradizzjonalment attivi fiż-Zentrum Parti, kif ukoll lill-protestanti.  Dan irnexxielu jagħmlu b’diffikultà, imma b’koperazzjoni ta’ diversi li kienu fehmu li kien hemm bżonn li l-Insara jkunu magħquda kontra t-theddida Marxista.  Proprju mertu kbir tiegħu li rnexxielu jġib din l-għaqda u jwaqqaf dak li għadu sal-ġurnata tallum il-Christlich-Demokratische Union (CDU).

8.     Minn hemm ikkontesta bħala kap tal-partit, u ġie elett Kanċillier tlett darbiet infila: fl-1953, 1957 u fl-1961.  Wara erbatax-il sena ta’ ħidma, proprju fil-15 ta’ Ottubru 1963, ta’ sebgħa u tmenin sena, irriżenja.  F’dawk is-snin mhux kollox mar kif ried, però l-pedament kien qegħdu f’postu, u kien wieħed sod.  Fundamentali għalih kien it-twemmin tiegħu li l-filosofija Nisranija tal-ħajja għandha tirbaħ fuq il-materjaliżmu sabiex il-punt ċentrali ma jibqax l-Istat, imma jsir il-bniedem.  Għax għall-Insara l-bniedem ħaqqu d-dinjità, fejn id-drittijiet fundamentali tiegħu ma jistgħux jintremew.  Illum, f’dan l-anniversarju għandna lkoll naċċettaw li huwa mertu kbir ta’ dan il-bniedem li għandna l-paċi, l-istabilità fl-Ewropa.  Li ħalla warajh il-prova li n-Nisrani għandu postu fil-politika u li kapaċi jwettaqha b’suċċess kbir.  Adenauer kellu karriera twila ħafna għas-servizz ta’ pajjiżu.

Nhar it-Tnejn se nispjega kif lesti ngħinu lill-Gvern bla pjan - il-Kap tal-Partit Nazzjonalista Adrian Delia

 

Fl-ewwel diskors Parlamentari tiegħu, il-Kap tal-Oppożizzjoni Adrian Delia se jkun qed jispjega kif l-Oppożizzjoni lesta tgħin lill-Gvern li, kif wera fil-Budget ta’ nhar it-Tnejn, m’għandux pjan. Dan qalu l-istess Adrian Delia waqt intervista fuq il-programm Bejn Tnejn fuq Net Television.

Adrian Delia qal li nhar it-Tnejn li ġej se jiġi spjegat il-mod ġdid ta’ kif il-Partit Nazzjonalista se jagħmel il-politika, li ma jkunx biss qed jikritika biex ikun kritika, iżda se jtejjeb il-ħajja tan-nies anke mill-Oppożizzjoni. Il-Kap tal-Oppożizzjoni qal li l-Partit Nazzjonalista se jikritika lill-Gvern mingħajr pjan imma lest li jgħin, għaliex għall-Partit Nazzjonalista, l-ewwel tiġi Malta. 

Il-Kap tal-Partit Nazzjonalista qal li l-Budget ta’ nhar it-Tnejn ikkonferma li s-surplus li jirreferi għalih il-Gvern mhux sejjer fl-investiment għall-futur ta’ pajjiżna. Hu spjega kif dak li kien qed jgħid il-Gvern qabel il-budget ma ġiex rifless fil-budget. Fil-fatt, qal Adrian Delia, filwaqt li l-Gvern prova jagħti l-impressjoni li taħtu ma żdiedx id-dejn, il-verità hi li kemm ilu Gvern Laburista, d-dejn żdied b’elf miljun ewro. Anke dwar is-surplus, Adrian Delia qal li skont il-proġezzjonijiet tal-istess Gvern, dan jidher li qed jonqos.

Dwar il-problema tat-traffiku, Adrian Delia qal li l-Gvern, qabel jgħid li se jonfoq €700 miljun, ma rax kif se jsolvi l-problema tat-traffiku. Hu qal li l-Gvern mhux qed jgħid kemm u xi kwalità ta’ toroq għandu bżonn il-pajjiż, u lanqas mhu jirreferi għall-mezzi tat-trasport li pajjiżna għandu bżonn fil-futur. Hu sostna li l-Gvern lanqas biss qed jirrikonoxxi l-problema. Minn naħa tiegħu, l-Partit Nazzjonalista qiegħed ikun serju, u jinsisti li l-Gvern jinvolvi dawk esperti fl-ippjanar, fosthom inġiniera. “Ejja naraw x’jixraq għas-soluzzjoni tat-trasport f’pajjiżna, u rridu naħdmu fuq pjan komprensiv għal Malta u Għawdex,” qal Adrian Delia.

Il-Kap tal-Partit Nazzjonalista sostna li l-budget ma jirrikonoxxix ukoll il-problema gravi li teżisti fis-settur tal-edukazzjoni. Hu rrefera għall-kritika tal-MUT għall-budget, kif ukoll għall-wegħdi tal-Gvern li jibni l-iskejjel li diġà kien wiegħed li jibnihom matul is-sena li għaddiet. Adrian Delia qal li l-Gvern għandu jieħu l-edukazzjoni bis-serjetà, u filwaqt li hu tajjeb li jkun hemm inċentiv għal min jagħmel il-PhD, hu żball li l-Gvern qed jinjora l-fatt li bosta żgħażagħ qed jagħżlu li ma jkomplux jistudjaw. 

Fil-konklużjoni tal-intervista, Adrian Delia qal li l-Partit Nazzjonalista lest jgħin biex insibu soluzzjonijiet għall-problemi tat-traffiku, lest jgħin biex tingħata direzzjoni lis-settur tal-edukazzjoni, lest jgħin biex jinstabu oqsma ġodda ta’ investiment, lest jgħin biex in-negozjanti ż-żgħar jingħataw leħen, lest jgħin biex naraw għalfejn il-Gvern nesa’ kompletament lill-bdiewa, lis-sajjieda u l-animal welfare, lest jgħin biex jindirizza l-kriminalità, kif ukoll lest jgħin għaliex il-Partit Nazzjonalista għandu l-ogħla interess, li hu l-ġid komuni tal-Maltin u l-Għawdxin kollha. 

11.10.17​

Fis-settur tal-iskart il-Gvern jrid jagħmel li jrid u ma jridx jispjega d-deċiżjoni tiegħu stess

 

Il-Gvern qed jieħu attitudni ħażina ħafna dwar id-deċiżjoni tiegħu stess li jibni inċineratur, tant li dwarha ma jrid jagħti l-ebda spjegazzjoni fil-pubbliku. Il-Gvern saħanistra ma jridx li l-Ministru tal-Ambjent u l-Kap Eżekuttiv tal-kumpanija WasteServ jidhru quddiem il-Kumitat tal-Parlament dwar l-Ambjent li fih il-maġġoranza tal-membri huma minn naħa tal-Gvern. Lanqas ma jrid li jippubblika d-diversi rapporti li saru matul l-aħħar snin dwar dan is-settur.

Minflok il-Gvern qed jagħżel li jibqa’ jwebbes rasu u jaħrab minn kull opportunità li matulha jista’ jispjega d-deċiżjoni li diġà ħa fis-settur tal-immaniġġjar tal-iskart: dik li jibni inċineratur li bih beħsiebu jaħraq kważi nofs l-iskart kollu ġġenerat f’pajjiżna.

Minkejja dan kollu, l-Oppożizzjoni se tkompli toffri l-id tal-koperazzjoni u turi li lesta tgħin, iżda tistenna li l-Gvern jieqaf jgħaddi lin-nies bi żmien, u għal darba jaġixxi ta’ Gvern serju li jieħu d-deċiżjonijiet fl-aħjar interess tal-poplu Malti u Għawdxi kollu u ma jibqax jibża’ jispjega d-deċiżjoni li diġà ħa.

Għalhekk l-Oppożizzjoni bir-raġun tistaqsi: minn xiex qed jibża’ l-Gvern?

Karol Aquilina

Kelliem għall-Ambjent, l-Iżvilupp Sostenibbli u t-Tibdil fil-Klima

12.10.17​

Il-Partit Nazzjonalista lest jgħin lill-Gvern bla pjan biex ma jkomplix iżarma l-Kunsilli Lokali

L-Oppożizzjoni Nazzjonalista lesta li tgħin lill-Gvern li tant kemm m’għandux pjan, li qed iżarma l-Kunsilli Lokali. L-aħbar żvelata llum minn The Times of Malta tikkonferma li l-Gvern m’għandu ebda pjan għall-Kunsilli Lokali f’pajjiżna. Dan qaluh il-Kelliema għat-Trasport, l-Infrastruttura u l-Proġetti Kapitali Marthese Portelli u l-Kelliem għall-Kunsilli Lokali Robert Cutajar waqt konferenza tal-aħbarijiet.

Marthese Portelli qalet li issa li l-Gvern iddeċieda li joħloq Aġenzija ġdida biex tamministra x-xogħol fuq it-toroq f’pajjiżna, l-Oppożizzjoni se tinsisti li filwaqt li x-xogħol jiġi amministrat mill-aġenzija, d-deċiżjonijiet dwar liema toroq għandhom isiru jittieħdu mill-Kunsilli Lokali.

Marthese Portelli qalet li l-Partit Nazzjonalista lest jgħin lill-Gvern, fost l-oħrajn, billi jinsisti li:

• l-ħaddiema ta’ Transport Malta li diġà jaħdmu f’dan is-settur u li għandhom l-esperjenza f’dan is-settur, jingħataw l-opportunità li jaħdmu f’din l-Aġenzija;
• l-kuntratturi Maltin kollha għandhom kollha jingħataw l-istess opportunità biex jipparteċipaw f’dan il-proġett;
• jekk il-Gvern jiddeċiedi li jġib esperti barranin, dawn għandhom jaħdmu id f’id ma’ dawk Maltin;
• l-Kunsilli Lokali mhux biss ikunu kkonsultati dwar id-deċiżjonijiet, iżda d-deċiżjonijiet dwar liema toroq isiru u meta jsiru, jittieħdu mal-Kunsilli Lokali.

Mar​these Portelli sostniet li l-Partit Nazzjonalista lest jgħin lill-Gvern li m’għandux pjan ta’ kif se jagħmel it-toroq ta’ pajjiżna, iżda dan għandu jsir f’kuntest u parti minn pjan strateġiku u fit-tul ta’ kif wieħed jindirizza l-akbar sfida li qed jaffaċċja l-poplu Malti u Għawdxi - dik tat-traffiku. Id-deċiżjoni tal-Gvern li jonfoq €700 miljun fit-toroq ta’ pajjiżna, filwaqt li għandha ttejjeb il-kundizzjonijiet tat-toroq, mhix se tnaqqas it-traffiku mit-toroq Maltin u Għawdxin. 

Minn naħa tiegħu, Robert Cutajar spjega kif il-Gvern Laburista tant m’għandux pjan li qabad u ddeċieda waħdu - f’kamra magħluqa - li jżarma l-Kunsilli Lokali u jieħu minn idejhom il-poter li għandhom illum. Robert Cutajar qal li l-Partit Nazzjonalista mhux se jħalli lill-Gvern jgħaddi bħal romblu minn fuq is-Sindki, Viċi Sindki u Kunsillieri Maltin u Għawdxin, iżda se jkun it-tarka tagħhom. 

Hu staqsa għaliex il-Gvern irid jaqbad u jiddeċiedi hu liema toroq għandhom isiru u meta jsiru? Robert Cutajar qal li l-Partit Nazzjonalista qed jinsisti li l-Oppożizzjoni se tibqa’ tinsisti li deċiżjonijiet fuq il-pjan ta’ ħidma u ż-żmien ta’ meta jsiru t-toroq, jibqgħu jsiru mill-Kunsilli Lokali, li huma l-aktar viċin ir-residenti fil-lokalitajiet. 

Robert Cutajar temm jgħid li l-Partit Nazzjonalista dejjem ħadem favur is-sussidjarjetà u jibqa’ jemmen f’dan il-kunċett, anke fid-dawl tar-riforma tal-Kunsilli Lokali li l-Gvern ilu jitkellem dwarha iżda għadu qatt ma kkonsulta dwarha. Il-Partit Nazzjonalista lest jgħin anke f’din ir-riforma. Robert Cutajar sostna li l-Gvern għandu jaħdem biex isaħħaħ il-Kunsilli Lokali u mhux iżarmahom. Madanakollu, temm jgħid Robert Cutajar, hu ċar li l-Gvern m’għandux pjan u jaqbad u jiddeċiedi skont dak li jfettilu. 

12.10.17