PAĊENZJA U PERSEVERANZA

1. Aħna u noħorġu minn din il-ġimgħa qaddisa u hekk kif għada t-Tnejn nerġgħu lura għall-ħidma parlamentari, tajjeb li nippreparaw ruħna għal dak li ġej. Irridu naċċettaw illi beda l-‘final countdown’ ta’ din il-leġislatura. Il-pożizzjoni tista’ ma tkunx daqshekk leqqiena għalina, imma ma jfissirx li m’hemmx x’wieħed jista’ jagħmel fiha. Il-politika fiha minn kollox u nafu li kull ġimgħa hija storja differenti minn oħra. Tista’ ssegwi dak li jkun hemm għaddej u tista’ wkoll tibdel. Riħ partikolari jibdel ferm iktar milli naħsbu, dejjem jekk jonfoħ kif għandu. Jiddependi minna kif ukoll mill-Gvern tal-ġurnata.

Pendlu

2. Nitlaq b’dak li għandha tkun ħidmet in-Nisrani fil-politika nazzjonali fi ħdan partit Demokristjan bħal tagħna. Naqbad minn dak li qrajt: “I Cristiani non possono essere solo ascoltatori; devono essere anche “esecutori della parola”, “esecutori dell’opera.” (L-Insara ma jistgħux ikunu biss dawk li jisimgħu, iridu jkunu wkoll dawk li jwettqu l-kelma, dawk li jwettqu l-egħmil.) Dan fit-triq tagħna lejn dik li nagħrfu li hija l-Liġi perfetta tal-libertà, li aħna parti minnha. Dan fl-għarfien ċar li għandna missjoni quddiemna: li nibnu ordni soċjali ġdid u aħjar milli għandna llum. Inħarsu lejn dak li qed ngħixu fil-preżent u l-miri tagħna lejn il-futur. Issa ferm aktar li nafu li aħna ferm ixjeħ milli konna. Issa li ġej il-futur għandna nifhmu aktar li quddiem l-istorja l-ħajja politika hija, fuq ħafna, pendlu.

Dawk li jaħsbu

3. Ċertament, it-tibdiliet ma jsirux bix-xejn, fis-sempliċi xewqa u l-immaġinazzjoni li tista’ tiġri xi ħaġa favur tiegħek. Isiru bi pjan, ħsieb, u fuq kollox proċess ta’ persważjoni. Proċess li bih tikkonvinċi lill-oħrajn li l-proġett politiku tiegħek huwa aħjar, stabbli, u kapaċi jħares lejn dawk l-isfidi li ġejjin għalina. F’dan nittama li ma nilludux ruħna, l-ewwel bil-kunflitti fl-Ukrajna u f’Gaża li ma waqfux u li anzi għaddejjin iktar b’kumplikazzjonijiet oħra; it-tieni bil-ġlied li ħiereġ minħabba t-tariffi ekonomiċi, is-sitwazzjoni għad-dinja soċjo-ekonomika tagħna mhijiex ser tkun nieqsa mill-intoppi. F’dan tibqa’ dejjem il-gwida li dawk li jikkunsidraw li huma b’saħħithom isibu ruħhom dgħajfa, u l-kontra. Fejn ċertament l-umiltà, li qed dejjem issir aktar rari, hija l-gwida u l-kalibru li permezz tiegħu tista’ tiddixxerni sabiex tifhem fejn verament inti sejjer.

Kwistjoni differenti

4. F’dan, ix-xenarju politiku tagħna jitlob aktar eżami paċenzjuż u perseveranti. Infittxu l-verità u għalhekk nieqfu fir-retorika passata u ta’ propaganda faċli li hemm xi diviżjoni nterna u għalhekk ma nistgħux nimxu ’l quddiem. Għalkemm l-opinjonijiet huma neċessarjament abbundanti, dan mhux hemm. M’hemmx “qasma”, jew ġlied, jew gambetti. Ir-raġunijiet għall-pożizzjoni politika naħseb li trid tinstab f’post ieħor. Tiġi minn eżami iktar fid-dettall u fit-tul. Proċess li huwa aktar indikat minn ġeneraliżmi varji. Dak li qed inressqu, nipproponu, u kif il-pajjiż qiegħed jipperċepih huwa l-fil tal-punt li bih trid tibda. Jista’ jkun li l-ideat mhumiex jinżlu tajjeb, jew min qiegħed jiddikjarahom mhuwiex jinżel tajjeb. Imma dmirna huwa li nidentifikaw u nsolvu. Fejn bis-sabar nagħrfu nibdlu l-metodi u l-istrateġiji, u fuq kollox, jekk hemm lok, li wieħed dejjem jieħu pass lura.

Konrad Adenauer

5. F’dan nittama li wħud, bħali, jħarsu u jieħdu eżempju minn dan il-bniedem. Dan il-mexxej politiku li għex bejn l-1876 u li miet fid-19 t’April 1967 ifakkarna biċ-ċar fil-valuri politiċi tal-paċenzja u tal-perseveranza. Dawk li bħala Demokristjan ħaddan u pprattika b’tant ġid. Dak li bata personalment u fit-tul minn idejn il-ħakma dittatorjali tan-Nażiżmu. Dak li lilu ġie fdat il-pajjiż u li mexxieh lura lejn id-demokrazija, l-għaqda u s-saħħa soċjo-ekonomika li llum il-ġurnata nagħrfu ferm aktar. F’dan kien il-bniedem li baqa’ jirreżisti. Baqa’ dak li għandu l-ideat li mexxewh f’ħidmietu. Kien, kif ingħad dwaru, b’dawn il-prinċipji speċjali: “The State owes the individual a space of his own in which he can evolve freely; therefore the basic rights must be invulnerable. And honesty must prevail; if there is one thing Adenauer hated, it was the tendency of totalitarian regimes to lie deliberately to their people.” (L-Istat għandu d-dmir lejn il-bniedem li jiggarantilu dak l-ispazju personali fejn jista’, fil-libertà, jiżviluppa; għaldaqstant id-drittijiet bażiċi tiegħu għandhom ikunu invjolabbli. U l-onestà għandha tirbaħ. Jekk kien hemm ħaġa li Adenauer kien jobgħod kienet dik it-tendenza kontinwa ta’ kull reġim totalitarju li jigdeb lill-poplu.)

Umiltà u Onestà

6. F’dan il-Ħadd speċjali tal-Ħniena Divina marbuta magħna, f’ħafna sens nittama li nagħrfu kemm għandna wirt ta’ prinċipji politiċi sodi. Kemm ukoll dawn mexxewna fis-sewwa qabel. Kemm mexxew oħrajn barra minn xtutna. Kemm għadhom ħajja u preżenti fid-dinja. Kemm m’għandniex bżonn inkunu differenti minn dak li aħna. Fuq kollox, li huma dawk li jitolbu minna, fit-triq tal-umiltà u l-onestà li nkunu paċenzjużi, imma wkoll aktar, perseveranti.