1.
F’dan il-Partit,
mill-istorja tiegħu, ftit kienu l-mumenti meta ma kienx hemm politiċi li
kellhom ideat tajba. L-esperjenza turi
li l-mexxejja tagħna ma waqfux iħarsu ‘l quddiem. Ma konnix il-partit li jrid jippreserva u
jwaqqaf il-proċess soċjali u ekonomiku.
Biss, wisq inqas ma konna dawk li lesti nżarmaw, jew inkissru, dak li
jkun qiegħed jaħdem. Ippruvajna ntejbu,
nagħmlu aqwa dak li għandna, mingħajr ma noħonquh.
2.
Imma lkoll għandna
nirrealizzaw li, fil-politika, il-ħsieb mhuwiex biżżejjed. Irid jingħad u jinqasam fil-pubbliku, kif
ukoll miegħu. L-ideat tajba tista’
żżommhom f’moħħok, però jekk inti fis-servizz tal-oħrajn, tagħmel tajjeb li
tgħidhom. Anzi, huwa d-dmir tiegħek,
f’isem it-trasparenza u l-akkontabilità li twettaq dan, u regolarment.
3.
Ftit jiem ilu fakkarna
l-anniversarju mill-mewt ta’ Norberto Bobbio, li miet fid-9 ta’ Jannar 2004. Mistoqsi x’jaħseb li hija d-demokrazija,
it-tweġiba tiegħu kienet li l-element essenzjali jibqa’, f’kull sistema, li
d-deċiżjonijiet jittieħdu bil-parteċipazzjoni ta’ kemm jista’ jkun
persuni. Meta dawn ikunu meħuda minn
wieħed għall-oħrajn, jew minn ftit, il-pożizzjoni tinbidel.
4.
F’dan, il-Partit
Nazzjonalista kellu, għal żmien twil, gazzetti biex jikkomunika. Għal żmien kienu l-uniku mezz veru li kellu
biex isemma’ leħnu. Biex jinforma
lill-oħrajn bl-ideat tiegħu, jaqblu miegħu jew le. Punti ta’ kjarezza u, fl-istess ħin, ta’
preżenza politika b’saħħitha. Però, mhux
dejjem ħa ħsieb jagħtihom l-importanza li għandu, u li ħaqqhom.
5.
Jekk inħarsu lura lejn
dawn l-aħħar snin irridu nammettu li dħalna fil-proċess li bih, jekk għandek
tikteb artiklu tajjeb trid tagħmlu f’gazzetti oħra, mhux tal-Partit. Mhux biss.
Dħalna fil-kultura li l-kredibilità tal-aħbar tonqos jekk toħroġ fil-mezzi
tal-komunikazzjoni tagħna, jew aħjar, li tiġi emmnuta jekk tidher f’mezzi
oħra. Fuq dan irridu naċċettaw li,
quddiem din il-pożizzjoni, il-Partit Laburista m’aċċettax dan l-istat ta’ fatt,
ħadem u rnexxielu jirbħu.
6.
Quddiem dan, tul dawn
l-aħħar snin, minkejja li kellna għad-dispożizzjoni tagħna mezzi varji, irridu
nirreġistraw li bqajna fl-istess livelli li konna. Il-persentaġġi tal-udjenza ma żdidux; anqas
il-bejgħ tal-gazzetti tagħna. F’dan hemm
il-kuntrast li minkejja lli kellna messaġġi ta’ sustanza, xorta m’għamilniex
kampanji tajba sabiex inżiduhom.
7.
Bqajna kif għadna
preżentement, niddependu fuq l-oħrajn.
Mhux biss, imma rridu naċċettaw li qed, iktar u iktar naħdmu f’ambjent
politiku fejn il-vuċi tal-Partit Nazzjonalista hija maħnuqa, għax dawn il-mezzi
l-oħra huma maħkuma direttament, jew indirettament, mill-vuċi u dominanza
tal-Gvern. Minn dir-realtà, minn din
il-verità ma nistgħux naħirbu. Nistgħu
biss nirreaġixxu għaliha.
8.
Jekk irridu nkunu vuċi
lura fis-soċjetà li hija waħda li tibda tinstema’ l-ewwel, u wara, skont dak li
jingħad tingħata fiduċja u kredibilità, irridu nibdew mill-ġdid. Mill-ġdid, fis-sempliċità li naslu mal-poplu
billi iktar persuni jisimgħu dak li ngħidu fuq il-mezzi tagħna, u iktar jixtru
regolarment il-gazzetti tagħna.
9.
Ma hemmx dubju li f’dan,
kien pass tajjeb li ġie maħtur Pierre Portelli, bniedem li għandu esperjenza
soda, sabiex imexxi dawn il-mezzi u jieħu fuqu r-responsabbiltà ta’ dan. Però ma jistax ikun waħdu. Mhux ser jirnexxilu jasal fejn kapaċi jwassal
il-messaġġ tal-Partit jekk ma jsibx u koll l-għajnuna tagħna, li nipparteċipaw
attivament u politikament f’dan il-Partit Nazzjonalista.
10. Huwa ċar li l-messaġġ tagħna jrid jasal.
Huwa daqshekk ieħor ċar li, biex dan jasal, irridu nisimgħu iktar
il-mezzi tagħna u nixtru u nqassmu l-gazzetti tagħna. Nappella biex iktar persuni ta’ rieda tajba
jingħaqdu f’dan. Hekk biss nistgħu niġu
kunsidrati lura bħala rilevanti għall-poplu.
Hekk niksbu kredibilità, fiduċja u kunsens fl-ideat tajba li
nħaddnu. Hekk nifhmu li l-ħajja politika
tal-Partit tiddependi proprju minn dan.
No comments:
Post a Comment