1. Għalkemm jidher faċli li nidentifikaw
il-bidliet tagħna ma’ dawk tax-xhur, tal-kalendarju tas-snin, fir-realtà dan
huwa moviment uman li ma jiqafx. Mhux
sempliċement mertu taż-żmien li jrid jgħaddi biex jidher li qegħda tintemm xi
ħaġa biex tinbeda oħra, imma ferm aktar.
Anzi, hemm numru ta’ ċaqliqiet.
Fuq naħa dawk li jħossuhom għaddejjin tajjeb, li jridu jwaqqfu l-arloġġ
u jippreservaw ruħhom. Fuq l-oħra, dawk
li għaddejjin mill-għawġ, li jridu jħaffu l-ħin lejn perjodi inqas iebsa. Fl-oħra, dawk li jagħrfu li ma hemmx qtugħ
definittiv, imma perjodu; proċess li jieħdok u jdaħħlek f’ieħor. Imexxik għax tkun għaddejt mill-kmamar tal-ħajja.
Sejħa lejn l-aħjar
2. Ma tistax taqbeż il-passi li għandek
quddiemek. Trid forsi tagħżel fejn ser
tqiegħed id-direzzjoni interna tiegħek.
Għax il-ħajja tgħaddik mill-prova.
Tgħaddi minn proċess li fih is-sejħa hija lejn li tkun iktar aħjar milli
tkun. Mhux neċessarjament tinduna; anqas
li oħrajn jagħrfu dan. Biss, il-ħajja
għandha dan il-vantaġġ. Tieħdok lejn li
tibdlek, issaħħek, tippurifikak, anke jekk inti stess ma tkun qiegħed tifehm
dan. Għax fuq kull bniedem hemm proċess
ta’ bidla. Proċess ta’ rilevanza, ta’
preparazzjoni u ta’ ħtieġa. B’dak li
titbaskat fil-passat, tipprepara ruħek għall-futur.
Mixja interna
3. Il-bniedem dan jarah u jmissu, iżda mhux
dejjem japprezzah. Daqshekk ieħor iseħħ
f’partit politiku magħmul mill-bnedmin.
Il-passat tiegħu huwa parti mill-preżent u l-futur. Il-mument politiku, ikun xi jkun, ħafna drabi
jkun fih, direttament jew indirettament dan il-proċess intern ta’ bidla. Illum, aħna li aħna proprju minħabba
l-esperjenzi passati tagħna.
Id-deċiżjonijiet tagħna jibbażaw ruħhom fuq dak li għaddejna minnu
qabel. Hemm proċess li jeħodna nippruvaw
inkunu aħjar milli konna. Naġixxu
differentement proprju minħabba dak li ġarrabna jew li rajna lill-oħrajn
iġarrbu. Dan nagħmluh sija għax irridu
nkunu aħjar, sija għax hemm din il-mixja interna lejn il-bidla.
Ġudizzji storiċi
4. Il-Partit Nazzjonalista għandu
għad-dispożizzjoni tiegħu wirt tal-imgħoddi mimli b’esperjenzi umani
varji. Dan huwa f’idejna u mibni
f’persuni li servew fil-politika li, fortunatament, għadhom ħajjin. Patrimonju li naċċettaw ferm iktar. Għax hemm min dan ma jaċċettahx, jew aħjar
jaħseb li biex jafferma ruħu jrid jibgħat il-messaġġ li d-dinja, l-istorja,
il-ħajja, bdew minnu. Li ma hemmx
passat, hemm biss futur. Imma fir-realtà
hemm qabel u hemm wara. Hemm f’dan
il-bżonn li wieħed jaċċetta dan l-istat ta’ fatt u jaħdem fuqu. Ma jarmix dak li inevitabilment għandu
bżonn. Din ir-realtà ma tinħarabx
proprju għax anki għal dawk li jaħsbu, bħal ma kienu jiddikjaraw diversi Faxxisti,
li ser ikun xi forma ta’ ġudizzju storiku li jagħraf ħidmet il-politika passata
tagħhom, xorta huma parti mill-proċess tal-ħajja li jiddistingwi dak li hu
sewwa minn dak li mhuwiex.
Nipproteġu l-ambjent
5. Il-bniedem javvanza. Jista’ jinbidel, jagħraf iktar lilu
nnifsu. Biss, ma jibdilx li azzjonijiet
umani tiegħu jibqgħu jew żbaljati, jew tajba, jew ġusti, jew inġusti. Ngħid iktar dan għax, fl-aħħar snin, id-dinja
qegħda tagħraf dejjem iktar il-bżonn li tipproteġi l-ambjent tagħha. Irridu nagħrfu li b’dak li qiegħed iseħħ
sejrin iktar lura u dak li qed ingawdu preżentement m’aħniex ser ingawduh iktar
fil-futur. L-azzjonijiet,
id-deċiżjonijiet politiċi tagħn f’dan huma vitali li jkunu allinjati biex
nassiguraw is-sewwa.
Laudato Sì 101
6. Punti fil-proċess tal-bidla umana, li
l-istess Papa Franġisku, fl-enċiklika mill-isbaħ tiegħu ‘Laudato Sì’, li però
ċert li diversi ma qrawx, jindika. Fost
il-partijiet varji u mill-iktar interessanti, fil-paragrafu 101 jgħid hekk: “Ma
jiswielna xejn li niddeskrivu s-sintomi, jekk ma nagħrfux l-għerq uman
tal-kriżi ekoloġika. Hemm mod żbaljat ta’ kif nifhmu l-ħajja u l-azzjoni
tal-bniedem, li jeħodha kontra r-realtà sa ma jirvinaha. Għaliex ma nistgħux nieqfu nirriflettu ftit
fuq dan?”
Laudato Sì 232
7. Ikompli l-istess fil-paragrafu 232: “Mhux
kollha kemm aħna msejħin naħdmu b’mod dirett fil-politika, imma fi ħdan
is-soċjetà jwarrdu għadd kbir ta’ għaqdiet li jsemmgħu leħinhom b’riżq il-ġid
komuni, billi jaqbżu għall-ambjent naturali u urban. Ngħidu aħna, jagħtu każ ta’ xi post pubbliku
(binja, funtana, monument abbandunat, pajsaġġ, pjazza), biex iħarsu, jirranġaw,
itejbu jew isebbħu xi ħaġa li hi ta’ kulħadd.
Madwarhom jixxettlu jew jinħolqu mill-ġdid. Hekk komunità tinħeles mill-indifferenza
konsumista. Dan ifisser ukoll inxettlu
identità komuni, storja li jeħtieġ nikkonservawha u ngħadduha”.
Tagħlim soċjali tal-Knisja
8. Dawn huma l-fruntieri l-ġodda tat-tagħlim
soċjali tal-Knisja Kattolika li għal diversi snin servewna ta’ gwida, boxxla u
parti sħiħa mill-ispirazzjoni tal-ħidma politika tagħna. Proprju f’din il-linja deherilna li bħala
Oppożizzjoni li tħares l-interessi ambjentali hija wkoll, li nippreżentaw
mozzjoni partikolari tul din l-ewwel ġimgħa tas-sena dwar l-art fiż-Żonqor,
f’Wied il-Għajn. Din l-art ingħatat,
flimkien ma’ bini ieħor fix-Xatt ta’ Bormla, lill-kumpannija Sadeen Education
Investment Limited u fuqha l-proġett huwa li tinbena sabiex ikun hemm
università. Niftakar li din l-għotja
ġiet kontestata sew. Biss, il-Gvern
webbes rasu u baqa’ għaddej.
Bla ebda sens
9. Illum, wara s-snin, qed naraw li dik li
kellha ġġib 4,000 student mhux jirnexxilha, u għandha tant li għandha biss
15. Seta’ kien hemm intenzjonijiet
tajba, però issa qegħdin naraw li hemm falliment kważi totali. Is-sitwazzjoni nbidlet u għalhekk, bħala pass
loġiku, qed nitolbu bl-użu tar-raġuni bħala forza politika li mhix
konservattiva, li dak li ngħata jittieħed lura.
Dan għal żewġ raġunijiet prinċipali: l-ewwel għax l-art timmerita li
tibqa’ mhux mibnija u li ssir parti mill-Park Nazzjonali tal-Inwadar; u t-tieni
għax ma jagħmel ebda sens ekonomiku li art bħal dik tingħata għal proġett li
diġà falla mill-bidu tiegħu.
Trapass taż-żmien
10. Għax bit-trapass taż-żmien ġie iktar
konfermat li d-deċiżjoni politika li ttieħdet qabel kien fiha nfisha
żbaljata. U jingħad x’jingħad, ebda
ġudizzju storiku ma huwa jew jista’ b’xi mod jiġġustifika dak li sar
ħażin. Is-soltu, fil-ħajja, il-bnedmin
bis-sens u li huma progressivi jaċċettaw dawn il-bidliet fiċ-ċirkostanzi, u
jibdlu l-opinjonijiet tagħhom. Nittamaw
li naraw dan iċ-ċaqliq u li fid-dibattitu parlamentari t-talba leġittima
tal-Oppożizzjoni tiġi aċċettata.
No comments:
Post a Comment