1. Kollox jibda minn min itella’ miegħek fuq
il-vapur politiku li tmexxi. Hemm
lezzjonijiet passati li hemm min jimmapina li jmissu lill-oħrajn, iżda mhux
lilu. La darba l-baħrin jiġu magħżula
mill-poplu, il-kaptan isalpa b’dak li miegħu għandu abbord. Diversi drabi, l-għażla fil-partiti ssir għax
in-nies ikunu konvinti imma dan l-aħħar, sforz il-mewġ kummerċjali li laħaq lil
kulħadd, il-bilanċ qiegħed issa jmur għal dawk lijidhru iktar popolari minn
dawk li huma suppost inqas minn hekk.
Kull kaptan, kull partit irid jagħmel l-għażliet tiegħu. Wara, fuq il-baħar isarraf dak li qiegħed
il-ġudizzju tiegħu għalih. Verament
fl-aħħar elezzjoni, il-lezzjonijiet kienu iktar evidenti fuq l-importanza ta’
dik l-għażla u veru wkoll li min illum qiegħed fil-Gvern iddefinixxa ruħu li
huwa moviment, mentri kif jidhru l-affarijiet, qiegħed jaġixxi ta’ partit.
2. Ngħid dan fuq żewġ temi li qabdu ftit
iktar l-attenzjoni ġenerali tul dawn l-aħħar sebat’ijiem. Taħlit fis-suġġetti li però huma marbuta
mal-istess direzzjoni politika. Żewġ
mewġiet ta’ gravità laħqu u xarrbu sew lill-membri tal-partit fil-Gvern. L-ewwel, il-kwistjoni tas-sentenza tal-Qorti
Ewropea dwar is-sajd, u t-tieni l-kwistjoni Marlene Farrugia, li laħqet f’dik
tal-ambjent. It-tnejn ħarġu fil-beraħ li
ma hemmx ippjanar minn qabel, u wisq inqas preparazzjoni għal dak li ser
iseħħ. Waħda hija irreparabbli u l-oħra
tista’, b’ħafna kliem ħelu u tqanżiħ, tittieħed lura. It-tnejn huma però ta’ ħsara kbira
lit-tmexxija preżenti tal-pajjiż tagħna
L-effetti tagħhom it-tnejn diġà bdew jakkumulaw u l-konsegwenzi ma huma
żgħar xejn.
3. Għamel sewwa d-deputat tagħna Toni Bezzina
li tul il-ġimgħa qabeż għas-sajjieda Maltin u Għawdxin. Għax ma għandux jiġi permess li sajjieda oħra
jidħlu jistagħdu fl-ibħra territorjali tagħna.
Fejn qatt kienet li aħna nippermettu li ħaddieħor jidħol fuq dak li
ġġilidna biex jibqa’ tagħna? Gvern
preċedenti, bid-difetti kollha tiegħu, qatt ma ħalla dan isir u kien
viġilanti. Kellu l-uffiċċju tiegħu ġewwa
Brussell jaħdem id f’id ma’ dawk ta’ pajjiżna tajjeb ħafna. Illum jidher li xi ħaġa ġrat, u dak li ħadd
ma kien jistenna jew jippretendi li jsir seħħ.
Tlifna telfa kbira u ma nafx kemm hija reparabbli. Kif nafu diġà, is-sajjied li jaqla’ ħobżu
mis-sajd sab ruħu f’diffikultà u saħansitra kellu wkoll fil-passat assistenza
tal-forzi tal-ordni miegħu. Issa dak li
rreżistejna aħna ġie bi dritt taħt dan il-Gvern. Jidher li dak li “jisma’” m’huwiex jinduna li
hawn ħafna tgergir fuq dan u milli jidher
l-affarijiet ser jikbru iktar. Is-snanar
ta’ pajjiżna issa tħalltu ma’ dawk ta’ oħrajn fl-ibħriet nazzjonali tagħna u
dak huwa perikoluż doppjament.
L-interess nazzjonali, li qabel tant konna niġu akkużati li ma nieħdux
ħsiebu issa fil-fatt, ippermettuli ngħid li qed naraw min verament weħel
fis-sunnara.
4. Dan ma kienx biżżejjed. It-Tlieta beda jberraq fejn kien jidher li ma
hemmx maltemp. Il-kwistjoni tal-liġi
l-ġdida li tibni u tifred l-Awtorità tal-Ambjent u tisseparaha minn dik
tal-Ippjanar ilha biex tibda dieħla fil-port.
Fl-aħħar, fl-istadju ta’ kumitat fejn l-artikoli tal-liġi jiġu eżaminati
biċċa biċċa, bdejna naraw dak li ma konniex naħsbu li ser nisimgħu. Marthese Portelli u Ryan Callus bdew iduru
dawn l-artikoli b’diliġenza u attenzjoni eċċellenti. Intervjeniet fil-proċess id-deputata, li sa
dak il-ħin kienet għadha laburista, Marlene Farrugia. Għamlet il-pożizzjoni tagħha ċara ħafna,
forsi ferm iktar milli l-istess Gvern kien ippreparat għalih. Fid-dibattitu li segwa dwar x’sehem u
x’pożizzjoni għandhom jokkupaw l-għaqdiet ambjentalisti f’din l-Awtorità
jidher, minn dak li smajt, li id il-ministru kienet diġà marbuta
b’pożizzjonijiet li ġew meħuda f’Kastilja.
Dak li kien qiegħed jingħad mit-tlett deputati parlamentari għall-ġid tal-poplu
ma bediex jingħata widen. Diversi drabi,
il-messaġġ wasal li ma kienx hemm iktar x’jingħad. Il-bieb tal-kabina kien magħluq u l-baħrin
riedu jew jaċċettaw, inkella jaqbżu b’kemm għandhom saħħa l-baħar.
5. Ix-xena, minkejja l-kameras kollha li għandna,
żdiedet fid-drammaċità tagħha. Iktar ma
l-Gvern “kollu widnejn” webbes rasu, iktar kibret il-korla fost il-baħrin. Ma kenitx proprju xena mill-“Mutiny on the
Bounty” imma resqet viċin hekk kif il-baħri abbord, Marlene Farrugia, kitbet
l-ittra u l-editt tar-riżenja, dak il-ħin stess u għaddietha lill-kaptan li
kien għadu kif ġie jispezzjona l-iżvolġiment tal-“battalja”. Kien ċar mill-bidu li xi ħadd kien daħal
ġewwa xibka. Fil-bidu deher li l-baħri
daħal f’tal-kaptan. Ftit wara, bħal ma
jsostnu dawk li jafu bl-istorja tal-vapur “Bounty”, il-kejl inbidel. Min-naħa l-oħra fhimna li kien diġà ċar x’ser
jiġri u kull naħa kienet diġà qegħdet il-pożizzjoni ċara quddiem l-oħra. Ħadd ma fehem li dan kien biss ta’ ċumm bumm,
imma kienu ċertiminn dak li kienu ser jagħmlu.
Min ikun b’saħħtu fin-numri mhux dejjem jifhem li ma jkunx hekk
fl-argument. Mhux biss, imma hemm ħafna
fis-soċjetà li jżommu u jsostnu dawk li huma minn taħt fuq dawk li jidhru li
huma prepotenti minn fuq.
6. Hu x’inhu, jidher ċar li l-Gvern kien
iddeċieda li l-baħri Farrugia jiddeċiedi – jew jagħmel li jrid il-kaptan,
inkella jħallas is-suppost konsegwenzi.
L-ordni, ma hemmx dubju, huwa neċessarju u l-membri ta’ kull partit,
mhux neċessarjament moviment, jafu li hemm linja li jridu jsegwu. Biss almenu, meta dan isir, l-argument irid
ikun ċar u tajjeb. Hawn, bir-rispett,
kellha raġun biex tbiegħ Farrugia. Mhux
biss, imma issa nfetaħ xenarju ġdid li m’huwiex faċli fejn ser imur. Id-deputat indipendenti għandu saħħa ikbar
ladarba jiġi elett milli kellu qatt qabel.
Il-pożizzjoni tiegħu hija iktar formidabbli barra mill-moviment milli
ġewwa fih. Għandu dritt jitkellem fuq
kull mozzjoni, fuq kull ministeru, fuq kull abbozz, f’kull kumitat, huwa
x’inhuwa. Diġà hemm numru ta’ “preċedenti”
li naħseb li huma tapit aħmar nadif nadif li tista’ tgħaddi minn fuqu. Iktar u iktar meta xwabel imdendla fuq rasha
ma għandhiex. Diġà ħadet deċiżjoni fuq
l-elezzjoni ġenerali li ġejja. Meta tqis
kollox tara li kien hemm żelqa kbira fil-wilġa.
7. Fejn sejrin ħadd ma jaf. Hemm min kiber fl-indipendenza u fil-libertà
u hemm min naqas fin-numri tal-maġġoranza.
Biss jidher iktar ċar li min għandu r-responsabbiltà tal-bastiment irid
iġib lura l-ordni. L-ordni għall-baħħara
fl-ibħra nazzjonali u sovrana Maltin u ordni abbord. Jekk dan ma jsirx malajr,
il-komplikazzjonijiet jikbru b’rapidità ferm iktar milli jaħseb. F’dan, aħna fl-oppożizzjoni ma nistgħux
nagħmlu ħafna. Nistgħu fuq naħa
nassiguraw bil-mezzi li għandna li l-affarijiet isiru sewwa, u fuq l-oħra
nniżżlu li l-Gvern f’din il-ġimgħa weħel fis-sunnara u żelaq fil-wilġa.
No comments:
Post a Comment