AMBAXXATA TA’ MALTA FIT-TURKIJA - ĦIDMA

 12447. L-ONOR. CARMELO MIFSUD BONNICI staqsa lill-Ministru għall-Affarijiet Barranin u Ewropej: Jista’ l-Ministru jgħid x’ħidma saret mill-Ambaxxata ta’ Malta ġewwa t-Turkija tul is-sena li għaddiet?

17/01/2020

  ONOR. EVARIST BARTOLO:  Ninforma lill-Onor. Interpellant li il-hidma tagħna ġewwa t-Turkija tkopri ix-xogħol li sar kemm mill-Ambaxxata ta’ Malta fit-Turkija, kif ukoll il-Konsolat Ġenerali f’Istanbul li jagħmel parti minnha. Matul l-2019 dan ix-xoghol kien jikkonsisti kif gej:

Bilaterali

Is-sena bdiet biż-Żjara Statali li l-E.T. il-President ML Coleiro Preca għamlet fit-Turkija bejn il-22 u l-24 ta’ Jannar.  It-tħejjijiet kienu ilhom sejrin minn ġimgħat qabel.  Iż-żjara kienet maqsuma fi tnejn, jiġifieri f’business forum f’Istanbul li kien organizzat mill-Kamra tal-Kummerċ Maltija u DEIK (Foreign Relations Economic Board Tork), li ħadu sehem fih madwar 50 imprenditur minn Malta u numru ftit ikbar ta’ imprendituri Torok.  Kien hemm ukll Tourism Forum organizzat mill-MTA u DEIK.  F’Istanbul il-President kienet milqugħa mill-Viċi President Tork Fuat OktaI u l-Ministru tat-Turismu Tork.  Erba’ Ministri u Segretarju Parlamentari akkumpanjaw lill-President waqt iż-żjara u uħud minnhom kellhom laqgħat mal-Ministri rispettivi fil-qasam tagħhom.  Jakkumpanjaw lid-Delegazzjoni Presidenzjali kien hemm ukoll uffiċċjali taċ-Ċivil minn diversi Ministeri u entitajiet pubbliċi.  Iż-żjara kompliet f’Ankara fejn, minbarra ċ-Ċerimonjal Statali, tqegħid ta’ kuruna tal-fjuri fil-Mafkar ta’ Ataturk, kien hemm laqgħat mal-E.T. il-President Recep TaIIip Erdoðan, l-iSpeaker BinalI IIldIrIm u mal-Ministru għall-Affarijiet Barranin Mevlüt Çavuþoðlu.  Iż-żjara ntemmet b’konferenza konġunta għall-Istampa u Pranzu Statali. Għan-naħa Maltija, t-tħejjijiet saru kollha mill-Ambaxxata ta’ Malta u l-Konsulat f’Istanbul, li kellhom s-support meħtieġ mit-Taqsima tal-Protokoll tal-Ministeru tagħna kif ukoll l-Uffiċċju tal-President.

Fejn jidħlu relazzjonijiet bilaterali, l-Ambaxxata għamlet u ikkordinat xogħol li kien qiegħed isir bejn Ministeri diversi bil-għan li jitkattru r-relazzjonijiet bejn iż-żewġ pajjiżi.  Fost dawn l-attivitajiet ta’ min isemmi l-MOUs dwar Koperazzjoni fl-oqsma tal-Edukazzjoni, s-Saħħa u Xjenzi Mediċi, tax-Xogħol u l-Kummerċ.  Il-ħidma biex dawn l-MOUs jissarrfu f’benefiċċji għaż-żewġ naħat għadha għaddejja.  Żjara li l-Ministru għall-Ambjent u t-Tibdil fil-Klima għamel f’Ankara biex jipparteċipa f’Konferenza Internazzjonali dwar il-Klima f’Ġunju 2019 kienet il-bidu ta’ inizzjattiva li se tissarraf f’għotja ta’ eluf ta’ siġar mit-Turkija lil Malta biex jitħawlu f’masġar ġdid f’Bengħisa.

l-Ambaxxata, taħt id-direzzjoni tal-Ministeru, kellha ukoll sehem f’taħdidiet biex Malta u t-Turkija jappoġġjaw lil xulxin biex pajjiżhom ikun rappreżentat f’fora internazzjonali f’Aġenziji tan-Nazzjonijiet Magħquda u organiżżazzjonijiet reġjonali.    

L-Ambaxxata ikkordinat mal-Ministeru għall-Affarijiet Barranin Tork biex erba’ diplomatiċi żagħżagħ Maltin jingħataw taħriġ fid-diplomazija fl-Akkademja Diplomatika tat-Turkija.  Dan it-taħriġ hu utili ħafna għad-diplomatiċi żagħżagħ tagħna meta wieħed iqis li qiegħed jingħata f’pajjiż li l-Korp diplomatiku tiegħu hu wieħed mill-akbar fid-dinja.

Fis- 17 ta’ Diċembru 2019 saru konsultazzjonijiet politiċi f’livell tekniku fl-Ankara, fejn ġew diskussi diversi suġġetti, fosthom ir-relazzjonijiet bilaterali bejn Malta u t-Turkija, l-adeżjoni tat-Turkija fl-UE, negozjati għall-ftehimiet pendenti u kandidaturi, u l-pożizzjonijiet taż-żewġ pajjiżi dwar affarijiet reġjonali bħall-LibIa, is-Sirja u l-Proċess tal-Paċi fil-Lvant Nofsani.

Kummerċjali

Mill-aspett kummerċjali u industrijali, l-Ambaxxata laqgħet għandha imprendituri Torok u iddiskutiet magħhom l-ambjent kummerċjali u finanzjaru ta’ pajjiżna u l-potenzjal tiegħu. Uħud minn dawn l-inizjattivi servew biex kumpaniji Torok fis-setturi tal-avjazzjoni u l-moda fetħu fergħat jew irreġistraw sussidjarji tagħhom f’Malta.  F’dan l-istess kuntest, Malta Enterprise, l-MTA u FELTOM sabu l-appoġġ tal-Konsulat  tagħna biex jorganiżżaw attivitajiet ta’ marketing f’Istanbul.  L-Ambaxxata għenet ukoll kumpaniji Maltin ikunu jafu aħjar kumpaniji Torok li magħhom kienu qegħdin jippjanaw biex jagħmlu negozju.

Kulturali

Mill-aspett kulturali, ta’ min isemmi l-attività interessanti li l-MTA organiżżat f’Koç Museum f’Istanbul fejn il-mistednin kielu ikel li tħejja skont riċetta li nstabet fuq ġifen Ottoman wara li dan kien inħataf mill-kursari Maltin fit-18-il seklu. Għal dan l-avveniment l-MTA kellha s-support tal-Konsulat tagħna f’Istanbul u ta’ Heritage Malta.  Għal Jum Malta, li l-Missjonijiet Diplomatiċi Maltin qegħdin jiċċelebraw annwalment fil-ġimgħa tal-Indipendenza, kemm l-Ambaxxata f’Ankara u l-Konsulat f’Istanbul taw riċevimenti separati għall-okkażjoni.  Għal dawn r-riċevimenti attendew awtoritajiet governattivi, Ambaxxaturi u/jew Konsli, imprendituri u ħbieb. Fil-parti l-kbira, dawn ir-riċevimenti kienu sponsorjati minn kumpaniji torok u entitajiet pubbliċi Maltin. 

Konsolari

Il-Konsulat f’Istanbul kien impennjat bl-ipproċessar ta’ applikazzjonijiet għall-visas, dokumenti ta’ emerġenza u assistenza lil ċittadini Maltin skont il-ħtieġa (ara t-tabella mehmuża). Il-Konslu Ġenerali irrapreżenta lill-pajjiżna f’bosta attivitajiet li saru f’Istanbul. Il-Konsolat ħadem ukoll biex jitkattru relazzjonijiet tajba ma’ business persons Torok l-aktar dawk fis-settur marittimu, kif ukoll ma’ awtoritajiet governattivi bħall-Gvernatur u s-Sindki. L-Ambaxxata għamlet użu wkoll miż-żewġ Konsli Onorarji li pajjiżna għandu f’Izmir u f’AntalIa. Meta jinqala’ il-bżonn, dawn iż-żewġ Konsli Onorarji dejjem sibnihom ta’ għajnuna.

Birth registration / Reġistrazzjoni tat-twelid	2
Marriage / Reġistrazzjoni taż-Żwieġ	1
Citizenship application / Applikazzjoni taċ-Ċittadinanza	0
Power of attorneI / Prokura	In-numru ta’ dokumenti għall-Power of AttorneI li jirċievi l-Konsolat huwa inkluz fin-numru tal-Legalizzazzjonijiet.
Legalisation of documents / Legalizzazzjoni ta’ dokumenti	434
Declaration on oath / Dikjarazzjoni bil-ġurament	0
Passport applications / Applikazzjonijiet tal-passaport	15
EmergencI Travel Documents / Dokumenti ta' Vjaġġar f'Emerġenza maħruġ kemm lil Maltin kif ukoll lil refuġjati	0
Diplomatic passports / Passaporti diplomatiċi	0
Enquiries received on requirements for visa to Malta / Inkjesti li waslu dwar rekwiżiti għal viża għal Malta.	Dawn l-inkjesti jaslu kuljum b’mezzi telefoniċi jew inkella bl-imejl.
Facilitation of visa for Maltese through EmbassI/Għajnuna lil Maltin dwar viżi	Il-Konsolat ma joħroġx viżi Torok għal ċittadini Maltin, iżda meta jkun hemm rikjesta għall-informazzjoni il-Konsolar jidderiġi l-mistoqsija lejn il-paġna tal-Ministeru tal-Affarijiet Barranin tat-Turkija, fejn ikunu jistgħu japplikaw għal e-visa għat-Turkija.
Total Visa Applications processed	5562
VIP Assistance to Maltese Dignitaries	37

Oħrajn

Matul l-2019, l-Ambaxxata u l-Konsulat saħħew il-ħidma tagħhom billi l-Ministeru għoġbu jżid l-iStaff fiż-żewġ postijiet.  Għal sitt xhur, il-Konsulat kien mgħejjun minn First SecretarI li eventwalment ingħaqdet mal-Ambaxxata f’mod permanenti, filwaqt li l-istess Konsulat impjega persuna lokali oħra b’kuntratt temporanju bil-ħsieb li dan isir impieg permanenti.  Ix-xogħol fil-Missjoni Diplomatika tagħna fit-Turkija, kemm f’Ankara u f’istanbul qiegħed jiżdied.  Għalhekk, dan it-tisħieħ fl-iStaff hu mija fil-mija ġustifikat u qiegħed jissarraf f’ħidma sfiqa għal Malta f’pajjiż li għandu potenzjal enormi, li qiegħed jiżviluppa u b’influenza politika qawwija fil-Mediterran u fir-reġjuni tal-madwar.  

L-Ambaxxatur u l-mara tiegħu ħadu sehem ukoll f’bosta attivitajiet semi-uffiċjali bħal riċevimenti mogħtija minn Ambaxxati oħra fil-jiem nazzjonali tagħhom, attivitajiet kulturali, attivitajiet ta’ karita’, kampanji favur l-ambjent u taħwil ta’ siġar u car-free daIs. 

F’Novembru, l-Ambaxxatur u l-Konslu ikkordinaw mal-awtoritajiet Torok u tan-Nunzjatura tal-Vatikan f’Ankara dwar żjara qasira li l-Arċisqof ta’ Malta għamel f’Istanbul.  Ħadna l-okkażjoni biex Mons Arċisqof jagħmel żjara lil Kunvent tas-Sorijiet tal-Karita’ fejn hemm iservu żewġ sorijiet Maltin li jagħtu kenn lill-anzjani irrispettivament mit-twemmin li jħaddnu.

Bħala Ambaxxata ta’ pajjiż membru tal-UE, l-Ambaxxata Maltija tkun impenjata b’mod regolari f’ħidma li d-Delegazzjoni tal-UE fit-Turkija tkun qegħda tagħmel biex tippjana, tippreserva u tiżviluppa r-relazzjonijiet mat-Turkija bħala pajjiż kandidat għas-sħubija.  Din mhix ħidma faċli, għal ħadd.  Tirrekjedi rapportar kontinwu u pariri lill-Ministeru tagħna dwar dak kollu li jkun qiegħed iseħħ f’dan il-pajjiż daqshekk dinamiku.  L-Ambaxxatur jipparteċipa ukoll fi żjarat li d-Delegazzjoni tal-UE tagħmel minn żmien għal żmien f’reġjuni differenti tat-Turkija fejn l-UE tkun qegħda tiffinanzja proġetti li minnhom tibbenefika t-Turkija anki sabiex il-pajjiż jitħejja kemm jista’ ikun għal relazzjonijiet iktar b’saħħithom mal-UE.

Ir-relazzjonijiet bejn l-UE u t-Turkija kien suġġett li tqajjem ukoll fil-Konsultazzjonijiet Politiċi fil-livell ta’ Direttur Ġenerali li saru bejn Malta u t-Turkija fis-17 ta’ Diċembru f’Ankara, fejn kienu diskussi wkoll ir-relazzjonijiet bilaterali, s-sitwazzjoni fis-Sirja, t-tħaffir għal riżorsi naturali madwar Ċipru u s-sitwazzjoni fil-Libja.

F’Ottubru 2019, l-Ambaxxata mxiet minn fejn kienet fl-istess binja fejn hemm stazzjonata d-Delegazzjoni tal-UE u marret f’post ġdid ikbar fid-daqs u naqra iżjed ċentrali.  Din il-bidla seħħet mingħajr ma kien hemm il-ħtieġa ta’ spejjeż kbar.  Dan ix-xogħol sar b’appoġġ mill-Ministeru. 

Seduta  295

04/02/2020

AMBAXXATA TA’ MALTA FIT-TUNEŻIJA - ĦIDMA

12446. L-ONOR. CARMELO MIFSUD BONNICI staqsa lill-Ministru għall-Affarijiet Barranin u Ewropej: Jista’ l-Ministru jgħid x’ħidma saret mill-Ambaxxata ta’ Malta ġewwa t-Tuneżija tul is-sena li għaddiet?

17/01/2020

  ONOR. EVARIST BARTOLO:  Qed nelenka hawn taht dettalji dwar il-ħidma tal-Ambaxxata tagħna ġewwa t-Tuneżija tul is-sena li għaddiet:

Bilaterali

·              Żjara Statali li l-President Tuneżin wettaq f’Malta bejn il-5 u s-6 ta’ Frar 2019.  Din iż-żjara saret wara stedina tal-President ta’ Malta b’segwitu għal Żjara Uffiċjali li l-President Emeritus ta’ Malta wettqet fit-Tuneżija f’Novembru 2017.

·              Il-ħdax-il laqgħa tal-Kummissjoni Konġunta bejn Malta u t-Tuneżija seħħet fl-4 ta’ Frar 2018.  Iż-żewġ Ministri responsabbli għall-Affarijiet Barranin mexxew sessjoni ta’ Konsultazzjonijiet Politiċi.  Iż-żewġ Ministri ffirmaw il-Minuti Maqbula tal-Kummissjoni Konġunta u erba’ Trattati bilaterali fis-setturi tal-Impjiegi, tal-Anzjani, tat-Tfulija u Programm ta’ Kooperazzjoni fis-settur tal-Kultura.

·              L-Ambaxxata kkoordinat il-parteċipazzjoni tad-delegazzjoni Tuneżina fil-laqgħa tal-Ministri tal-Affarijiet Barranin tal-5+5 li seħħet f’Malta.

·              Bejn l-24 u s-25 ta’ April, l-Onor. Helena Dalli, Ministru għall-Ewropa u għall-Ugwaljanza, żaret Tuneż biex tipparteċipa bħala kelliema fil-Forum dwar l-Ugwaljanza tal-Ġeneru.  Din il-laqgħa tnediet b’kooperazzjoni bejn it-Tuneżija, il-UNDP u UN Women.

·              Matul l-ewwel kwart tas-sena saru preparamenti għall-parteċipazzjoni tad-delegazzjoni Maltija għall-Assemblée des Cents li seħħet f’Tuneż f’Ġunju 2019 bi tħejjija għas-Sommet des Deux Rives – Laqgħa Għolja bejn il-Ministri tal-Affarijiet Barranin tal-Mediterran tal-Punent u djalogu reġjonali ma’ rappreżentanti prominenti  tas-soċjetà ċivili li se seħħet bejn it-23 u l-24 ta’ Ġunju ġewwa Marsilja.  L-Ambaxxata għamlet tħejjijiet għal sessjoni ta’ skambji soċjali bejn id-delegazzjoni Maltija u numru ta’ esponenti Tuneżini li jaħdmu f’setturi simili għal tagħhom.

·              Fis-27 ta’ Lulju L-Eċċellenza Tiegħu George W Vella, il-President ta’ Malta żar it-Tuneżija biex jassisti għall-Funeral Statali tal-President Tuneżin Beji Caid Essebsi. L-Ambaxxata kkordonat din il-viżta. 

·              Saru preparamenti biex tingħata Borża ta’ Studju lil student jew studenta Tuneżin/a biex isegwi/issegwi kors ta’ Master’s Degree fl-Universita’ ta’ Malta.  L-Ambaxxata ikkoordinat l-interviews tal-kandidatipermezz ta’ Skype flimkien mal-Universita’ ta’ Malta. Il-kandidata magħżula bdiet l-istudji tagħha f’Malta f’Settembru 2019.

·              L-Ambaxxata nehdiet Open Day għall-Universita’ ta’ Malta f’Tuneż fis-19 ta’ Settembru 2019.  Ħejjiet ukoll sensiela ta’ laqgħat ma’s stabbilimenti edukattivi li rriżultaw fl-iffirmar ta’ ftehim bejn l-Universita u stabbiliment minnhom bil-għan li studenti Tuneżini ikomplu l-istudji tagħhom Malta. L-Ambaxxata għamlet arranġamenti għal-intervista ma’ esponenti tal-Universita’ fuq stazzjon tar-radju Tuneżin.  L-Ambaxxata qiegħda f’taħditiet mal-MCAST u mal-MCST biex jitfasslu attivitajiet simili.

·              L-Ambaxxata identifkat proġett għal-assistenza fi sptar tat-tfal f’Tuneż. Fuq parir tal-Ambaxxata l-Ministeru għall-Affarijiet Barranin u Ewropej ta’ donazzjoni taħt l-iskema tal-ODA.

·              Il-President Emertuis l-Eċċellenza Tagħha Marie-Louise Coleiro Preca żaret it-Tuneżija fir-rowl ta’ President tal-Eurochild u kellha taħdietet mal-awtoritajiet Tuneżini dwar l-organiżżazzjoni ta’ konferenza dwar it-tfal ġewwa Tuneż fl-2020.  L-Ambaxxata assistiet lill-President Emeritus matul iż-żjara. 

·              L-Ambaxxata kkontribwixxiet għall-Electoral Observation Mission tal-Unjoni Ewropea li segwiet l-elezzjonijiet leġiżlattivi u Presidenzjali f’Ottubru u Novembru 2019.

Kummerċjali

·              L-Ambaxxata ta’ Malta żżomm kuntatt regulari u kontinwu man-negozjanti Maltin preżenti fit-Tuneżija.  L-Ambaxxata tagħti appoġġ b’mod regulari lil dawn l-intrapriżi u tagħmel rappreżentazzjonijiet mal-awtoritajiet Tuneżini b’għan li jiġu riżolti intoppi għall-kummerċ.

·              L-Ambaxxata regularment tirċievi talbiet għall-għajnuna ta’ natura varja minn negozjanti kemm Maltin u kemm Tuneżini li jkunu interessati f’kummerċ bilaterali. Numru ta’ negozjanti Tuneżini żaru Malta biex jesploraw possibbilitajiet ta’ kummerċ bilaterali u inveżtiment wara taħditiet mal-Ambaxxata. 

·              L-Ambaxxata ħadet numru ta’ inizjattivi biex tibni kuntatti ġodda ma’ negozjanti u entitajiet kummerċjali Tuneżini li jistgħu jkunu interessati li jesploraw kuntatti bilaterali ġodda.

·              Fl-isfond taż-¯jara Statali tal-President tat-Tuneżija f’Malta, fil-5 ta’ Frar 2019,  ġiet organizzata t-tielet sessjoni tal-Business Forum Malti-Tuneżin li seħħ fil-Kamra tal-Kummerċ u tal-Industrija.  Il-ftuħ ġie segwit minn laqgħat bejn intrapriżi u kummerċjanti Maltin u Tuneżini.  

Kulturali 

·              Saru arranġamenti mill-ambaxxata sabiex grupp ta’ kantanti Maltin li għandu numru ta’ segwaċi fit-Tuneżija ta intervista f’rivista kultural lokali.  L-Ambaxxata kienet organizzat kunċert f’Tuneż minn dan il-grupp li kien iffinanzjat mill-Fond għad-Diplomazija Kulturali tal-Ministeru għall-Affarijiet Barranin u Promozzjoni tal-Kummerċ. L-istess Riviżta ppublikat interview ma’ mużikologu u mużicista Malti iehor.

·              Saru arranġamenti mill-ambaxxata biex Mużikolgu u mużiċista Malti ta preżentazzjoni tal-proġett Magna ¯mien ġewwa stabbiliment kulturali f’Tuneż. L-Ambaxxata għamlet arranġamenti għal-interviżta fuq stazzjon tar-radju Tuneżin..  L-Ambaxxata qed tassisti fir-riċerka ta’ dan il-proġett li qed jarkivja l-memorji tal-kommunita’ Maltija li għexet ġewwa Tuneż bejn is-seklu dsatax u s-seklu għoxrin.

·              Saru preparamenti għal sessjoni ta’ skambji soċjali bejn esponenti ewlenin  tal-kultura taż-żewġ pajjiżi li seħħet f’Tuneż f’Ġunju 2019.

Konsolari

Birth registration / Reġistrazzjoni tat-twelid	18
Marriage/ Divorce registration / Reġistrazzjoni taż-¯wieġ / Divorzju
Citizenship application / Applikazzjoni taċ-Ċittadinanza	23
Legalisation of documents / Legalizzazzjoni ta’ dokumenti	5
Passport applications / Applikazzjonijiet tal-passaport	16
Emergency Travel Documents / Dokumenti ta' Vjaġġar f'Emerġenza maħruġ kemm lil Maltin kif ukoll lil refuġjati	3
Enquiries received on requirements for visa to Malta / Inkjesti li waslu dwar rekwiżiti għal viża għal Malta.	Nirċievu mijet ta’ dawn it-tip ta’ mistoqsijiet matul is-sena.

·              F’dan il-perjodu il-konsolat irċieva u pproċessa 482 applikazzjoni għal-viża u ngħatat assistenza lil 5 Maltin biex jirreġistraw it-twelid tagħhom. Irċieva żewġ applikazzjonijiet għal ċittadinanza, applikazzjoni għal Passaport u ngħatat assistenza lil ċittadin Malti li tilef il-passaport waqt btala fit-Tuneżija.  L-Ambaxxata tat assistenza biex persuna Maltija residenti fit-Tuneżija u li mietet Malta tiġi midfuna fit-Tuneżija.

Promozzjoni

·              L-Ambaxxata kkooperat ma’ żewg rivisti biex ġew ippubblikati artikli dwar Malta.

·              Ġiet imnehdija il-Paġna Facebook tal-Ambaxxata.

·              L-Ambaxxata ċċelebrat il-jum nazzjonali fl-20 ta’ Settembru 2019 fl-Lukanda Maltija f’Tuneż. Assistew għal din iċ-ċelebrazzjoni, diplomatiċi residenti f’Tuneż, Ministru u Segretarju tal-Istat Tunezin, il-Maltin residenti f’Tuneż, rappreżentati tas-soċjetà ċivili u ħbieb tal-Ambaxxata.

Seduta  295

04/02/2020

AMBAXXATA TA’ MALTA FL-EMIRATI GĦARAB MAGĦQUDA - ĦIDMA

 12445. L-ONOR. CARMELO MIFSUD BONNICI staqsa lill-Ministru għall-Affarijiet Barranin u Ewropej: Jista’ l-Ministru jgħid x’ħidma saret mill-Ambaxxata ta’ Malta ġewwa l-Emirati Għarab Magħquda tul is-sena li għaddiet?

17/01/2020

  ONOR. EVARIST BARTOLO:  Il-ħidma li saret fl-Ambaxxata tagħna ġewwa l-Emirati Għarab Magħquda matul is-sena li għaddiet kienet kif gej:

Bilaterali

·              Matul is-sena li għaddiet, l-Ambaxxata kompliet issegwi l-proċess tan-negozjar dwar ftehimiet pendenti fosthom:

§             Memorandum ta’ Ftehim dwar ir-Rikonoxximent Reċiproku dwar il-Liċenzji tas-Sewqan;

§             Memorandum ta’ Ftehim fl-Oqsma tal-Edukazzjoni Għolja u Riċerka Xjentifika;

§             Memorandum ta’ Ftehim dwar it-Twaqqif ta’ Kummisjoni Mħallta;

·              L-Ambaxxata assistiet fl-organizzazzjoni taż-żjara tal-, l-Onor. Dr Joseph Muscat, bħala Prim Ministru ta’ Malta, bejn l-14 u s-16 ta’ Marzu 2019. L-Ambaxxata assistiet fl-organizzazzjoni ta’ din iż-żjara, u ħadmet sabiex isiru laqgħat bejn l-Onor. Prim Ministru u uffiċjali tal-Emirati Għarab Magħquda. Waqt din iż-żjara, l-Onor Prim Ministru kellu diversi laqgħat, fosthom mal-Crown Prince tal-Emirati Għarab Magħquda, Sheikh Mohammed bin Zayed Al Nahyan.

·              L-Ambaxxata kellha diversi laqgħat ma’ uffiċjali tal-Ministeru tal-Affarijiet Barranin u Kooperazzjoni Internazzjonali tal-Emirati Għarab Magħquda bl-għan li jissaħħu ir-rabtiet bilaterali bejn iż-żewġ pajjiżi. Waqt dawn il-laqgħat ġew diskussi il-Memoranda ta’ Ftehim li qed jiġu negozjati bejn iż-żewġ pajjiżi, kif ukoll il-possibilita’ ta’ Memoranda oħra li jkomplu jsaħħu r-relazzjonijiet bilaterali. Il-Memorandum dwar il-Rikinoxximent Mutwali dwar il-Liċenzji tas-Sewqan jinsab fi stadju avvanzat u viċin li jiġi iffirmat. Intlaħaq qbil bejn iż-żewġ pajjiżi dwar il-Memorandum fl-Oqsma tal-Edukazzjoni Għolja u Riċerka Xjentifika u il-Memorandum fuq it-Twaqqif ta’ Kummisjoni Mħallta u għaldaqstant dawn iż-żewġ Memoranda huma lesti biex jiġu iffirmati.

·              L-Ambaxxata għenet fl-organizzazzjoni taż-żjara f’Jannar f’Abu Dhabi tal-Onor. Joe Mizzi, bħala Ministru għall-Enerġija u l-Immaniġġjar tal-Ilma, biex jattendi il-Konferenza annwali tal-IRENA (International Renewable Energy Agency).

·              L-Ambaxxata għenet fl-organizzazzjoni taż-żjara f’Settembru f’Abu Dhabi tal-Onor. Joe Mizzi, Ministru għall-Enerġija u l-Immaniġġjar tal-Ilma, biex jattendi it-24^th World Energy Congress.

·              L-Ambaxxata ikkomunikat mal-aġenziji tal-Pulizija taż-żewġ pajjiżi dwar kompetizzjoni bejn id-dipartimenti SWAT tal-pulizija ta’ diversi pajjiżi li saret f’Abu Dhabi f’Awwissu 2019. Il-Pulizija ta’ Malta eventwalment iddeċidiet li ma tipparteċipax f’din il-kompetizzjoni.

·              L-Ambaxxata għenet fl-organizzazzjoni ta’ laqgħa fil-marġni tal-Assemblea Ġenerali tal-Ġnus Magħquda f’Settembru bejn l-Onor. Carmelo Abela, eks Ministru tal-Affarijiet Barranin u Promozzjoni tal-Kummerċ ta’ Malta, u Sheikh Abdullah Bin Zayed Bin Nahyan, Ministru tal-Affarijiet Barranin u Koperazzjoni Internazzjonali tal-Emirati Għarab Magħquda. Din il-laqgħa eventwalment ġiet ikkanċellata mill-Ministeru tal-Affarijiet Barranin u Promozzjoni tal-Kummerċ ta’ Malta.

·              L-Ambaxxata ipparteċipat f’laqgħat ta’ kull xhar, bejn id-Delegazzjoni tal-Unjoni Ewropea u l-Ambaxxati tal-Pajjiżi Membri tal-Unjoni Ewropea, fejn ġew diskussi avvenimenti relevanti interni u fir-reġjun tal-Golf.

Kummerċjali

·              L-Ambaxxata ħadmet sabiex tiġi organizzata żjara lejn Malta minn uffiċjali għolja tal-Abu Dhabi Fund for Development. Dan sar wara laqgħa fl-Ambaxxata mad-Direttur Ġenerali tal-Abu Dhabi Fund for Development, fejn ġie diskuss l-interess f’investiment sostanzjali f’Malta mill-Abu Dhabi Fund for Development. Din iż-żjara ġiet posposta mill-Abu Dhabi Fund for Development

·              L-Ambaxxata għenet persuni u entitajiet lokali li wrew interess li jinvestu f’Malta, billi tindikalhom l-awtoritajiet pertinenti Maltin li jistgħu jgħinuhom biex jinfetħu kumpaniji f’Malta.

Kulturali

·              L-Ambaxxata ħadet sehem fl-Esibizzjoni “Sheikh Zayed and the Europeans” li ġiet organizzata bejn id-Delegazzjoni tal-Unjoni Ewropea.  F’din l-Esibizzjoni, li  kkommemorat il-100 sena mit-twelid tal-Fundatur tal-Emirati Għarab Magħquda, Sheikh Zayed bin Nahyan, l-Ambaxxati tal-Pajjiżi membri tal-Unjoni Ewropea esebixxew oġġetti u ritratti li jfakkru ir-relazzjoni tagħhom mal-Emirati Għarab Magħquda.

Konsolari

Birth registration / Reġistrazzjoni tat-twelid	1
Citizenship application / Applikazzjoni taċ-Ċittadinanza	2
Power of attorney / Prokura	18
Legalisation of documents / Legalizzazzjoni ta’ dokumenti	151
Declaration on oath / Dikjarazzjoni bil-ġurament	70
Enquiries received on requirements for visa to Malta / Inkjesti li waslu dwar rekwiżiti għal viża għal Malta.	87

·              L-Ambaxxata ipproċessat 3095 il-applikazzjoni ta’ viża għal Malta u għat-territorju tax-Schengen.

·              L-Ambaxxata għenet lil persuni Maltin li talbu l-għajnuna tagħha għal raġunijiet varji ta’ natura konsolari. Fost dawn il-każi, l-Ambaxxata għenet biex instabet persuna ta’ nazzjonalita Maltija li kienet irrapurtata nieqsa f’Abu Dhabi.

Promozzjoni ta’ Malta

·              L-Ambaxxata kellha laqgħat u offriet l-għajnuna tagħha lil istituzzjonijiet edukattivi Maltin li wrew interess li jinġiebu studenti bbażati fl- Emirati Għarab Magħquda biex jistudjaw f’Malta.

·              L-Ambaxxata ħadmet għall-promozzjoni ta’ kandidaturi Maltin għal Instituzzjonijiet Internazzjonali waqt laqgħat ufficjali u waqt avvenimenti soċjali.

Oħrajn

·              L-Ambaxxata offriet l-għajnuna tagħha lill-kontinġent Malti li pparteċipa fl-Olimpjadi Speċjali li saru f’Marzu f’Abu Dhabi. Id-delegazzjoni Maltija kienet immexxija mis-Sinjura Michelle Muscat, u kienet irrappreżentata minn 28 atleta. Il-parteċipazzjoni Maltija kienet ta’ suċċess notevoli u id-delegazzjoni rebħet 40 midalja: 12 tad-deheb, 13 tal-fidda u 15 tal-bronż.

·              L-Ambaxxata ħadmet fuq talba mill-Avukat Ġenerali ta’ Malta għal Assistenza Legali Mutwali mill-Awtoritajiet tal-Ġustizzja tal-Emirati Għarab Magħquda.

·              L-Ambaxxata ipparteċipat fit-18 il-sessjoni tal-Konferenza Ġenerali tal-UNIDO (United Nations Industrial Development Organization) bit-tema “Industry 2030 – Innovate. Connect. Transform our Future” li saret f’Novembru f’Abu Dhabi.

·              L-Ambaxxata ipparteċipat fit-tmien sessjoni tal-Konferenza tal-Istati Membri tal-UNCAC (United Nations Convention against Corruption) li saret f’Diċembru f’Abu Dhabi.

·              L-Ambaxxata irrappurtat lura lill-Ministeru tal-Affarijiet Barranin u Promozzjoni tal-Kummerċ ta’ Malta fuq diversi avvenimenti ta’ interess għal Malta li seħħew fl-Emirati Għarab Magħquda u fir-reġjun tal-Golf u kif dawn jolqtu lil Malta.

·              Rapport dwar l-inklużjoni tal-Emirati Għarab Magħquda fil-lista tal-Ġurisdizzjonijiet Non-Kooperattivi fil-Qasam ta’ Tassazzjoni tal-Unjoni Ewropea.

Seduta  295

04/02/2020

AMBAXXATA TA’ MALTA FIS-SAWDI ARABJA - ĦIDMA

12444. L-ONOR. CARMELO MIFSUD BONNICI staqsa lill-Ministru għall-Affarijiet Barranin u Ewropej: Jista’ l-Ministru jgħid x’ħidma saret mill-Ambaxxata ta’ Malta ġewwa s-Sawdi Arabja tul is-sena li għaddiet?

17/01/2020

  ONOR. EVARIST BARTOLO:  Il-ħidma tal-Ambaxxata ta’ Malta ġewwa s-Sawdi Arabja tul is-sena li għaddiet kienet tkopri suggetti varji. Dawn kienu:

Bilaterali

·              Matul l-2019 l-Ambaxxata segwiet il-proċess tan-negozjar dwar ftehim pendenti bejn Malta u l-Arabja Sawdija, fosthom, abbozz ta’ ftehim dwar Ħelsien mill-bżonn ta’ Visa fir-rigward ta’ Passaporti Diplomatiċi, u abbozz ta’ ftehim dwar Garanziji fuq Investiment. Saret ukoll ħidma sabiex l-MoU dwar Kooperazzjoni fil-Qasam tal-Edukazzjoni Għolja u r-Riċerka Xjentifika, iffirmat bejn Malta u l-Arabja Sawdija fl-4 ta’ Mejju 2018, jidħol fis-seħħ. Fil-fatt dan l-MoU daħal fis-seħħ fl-14 ta’ Novembru 2019.

·              L-Ambaxxata ħadmet sabiex l-eks Ministru Carmelo Abela u l-Ministru tal-Istat għall-Affarijiet Barranin tal-Arabja Sawdija, Adel Al Jubeir, ltaqaw f’Brussel fl-4 ta’ Frar 2019 fil-marġni tal-ħames laqgħa tal-Ministri tal-Affarijiet Barranin tal-Unjoni Ewropea u tal-Lega tal-Pajjiżi Għarab. Dan kien żvilupp importanti fir-relazzjonijiet bilaterali fl-2019 fis-sens li l-laqgħa serviet sabiex iż-żewġ naħat jiddiskutu żviluppi reġjonali kif ukoll japprofondixxu l-aspett bilaterali.

·              Fil-perjodu msemmi, l-Ambaxxata ħarġet 87 kommunikazzjonij ufficjali (NVs) lill-Ministeru tal-Affarijiet Barranin tal-Arabja Sawdija, u l-Ambaxxati tal-Baħrejn u Jemen f’Riyadh  dwar diversi aspetti fosthom politici, ekonomiċi, konsulari u amministrattivi. Saru ukoll laqgħat u kuntatti ma’ uffiċjali fil-Ministeru tal-Affarijiet Barranin tal-Arabja Sawdija.

·              Qasam ieħor ta’ ħidma kien dak tal-kandidaturi, fejn saru talbiet għal appoġġ kemm minn naħa ta’ Malta kif ukoll mill-Arabja Sawdija fir-rigward ta’ kandidaturi f‘diversi organizzazjonijiet internazzjonali. L-appoġġ ta’ kandidaturi jista jkun wieħed ta’ reċiproċita’ jew wieħed mingħajr reċiproċita’. Matul is-sena li għaddiet kien hemm ukoll talbiet ta’ appoġġ għall-kandidaturi mill-Ambaxxati tal-Baħrejn u l-Jemen.

Kummerċjali

·              L-Ambaxxata iżżomm kuntatt ma’ Trade Malta sabiex tassisti kumpaniji Maltin interessati fis-suq Sawdi. Dan is-suq għaddej minn fażi interessanti hekk kif l-Arabja Sawdija tinsab f’proċess ta’ riforma sabiex tidiversifka l-ekonomija minn dipendenza fuq is-settur taż-żejt. Matul is-sena, l-Ambaxxata segwiet l-iżvillupi ekonomiċi interni u rrapportat dwar proġetti fl-Arabja Sawdija li jistgħu joffru opportunitajiet ta’ skambji u ta’ kollaborazzjoni bejn Malta u l-Arabja Sawdija. F’dan ir-rigward oqsma innovativi bħal Artificial Intelligence,blockchain, u proġetti kbar fit-turiżmu huma ta’ interess partikulari. Is-settur turistiku fl-Arabja Sawdija sar settur li jipprometti hekk kif l-Arabja Sawdja qiegħda tiftaħ is-suq sabiex tattira turisti lejn dan il-pajjiż. L-Ambaaxxata żammet il-Ministeru informat dwar konferenzi/opportunitajiet kummerċjali fl-Arabja Sawdija u fir-reġjun.

Kulturali

·              L-Ambaxxata tikkordina mad-Delegazzjoni tal-Unjoni Ewrpea f’Riyadh u l-Ministeru f’dan il-qasam bħal esebizzjonijiet, fieri jew iniżjattivi oħra. Flimkien mal-Ambaxxati ta’ Stati Membri oħra tal-Unjoni Ewropea f’Riyadh, l-Ambaxxata ħadet sehem f’avveniment kollettiv fl’ okkazjoni tal-jum Nazzjonali tal-Unjoni. Għal dan l-avveniment intwerew filmati qosra li jirrapreżentaw il-Membri tal-Unjoni fosthom wkoll lil Malta. Il-magazin ‘Leaders’ ippublika artiklu dwar intervista mal-Ambaxxatur Sarsero fil-ħarġa ta’ Awissu 2019 fejn l-Ambaxxatur tkellem dwar l-iżvilupp tar-relażjonijiet bilaterali f’diversi oqsma, dwar l-istorja ta’ Malta u l-patrimonju kbir li ntiret matul iż-żmien, u dwar ir-rabtiet kulturali u lingwistiċi wirt tal-perjodu Islamiku f’Malta.

Konsulari

Birth registration / Reġistrazzjoni tat-twelid	4
Legalisation of documents / Legalizzazzjoni ta’ dokumenti	127
Declaration on oath / Dikjarazzjoni bil-ġurament	1
Passport applications / Applikazzjonijiet tal-passaport	26
Enquiries received on requirements for visa to Malta / Inkjesti li waslu dwar rekwiżiti għal viża għal Malta.	104

·              L-Ambaxxata impenjat ruha biex toffri assistenza konsulari lill-Maltin rigward diversi talbiet għal passaporti, reġistrazzjoni ta’ twelid, u applikazzjonijiet ghal-ċittadinanza Maltija. L-Ambaxxata ipproċessat 674 applikazzjoni għal visa Schengen matul l-2019. L-Ambaxxata ipproċesat ukoll talbiet mill-Ambaxxati tal-Bahrejn u l-Emirati Għarab Magħquda għal-permessi diplomatiċi fir-rigward ta’ titjiriet li jgħaddu minn Malta magħrufa bħala ‘overflights’. Informazzjoni dwar żviluppi interni u reġjonali tinġieb għal-attenzjoni tad-Direttorat Konsulari fi ħdan il-Ministeru biex iservi bħala gwida fir-rigward tal-kumpilazzjoni tal-lista ta’ Pariri għal Vjaġġar. L-informazzjoni f’din il-lista tgħin iċ-ċittadini Maltin ikunu jafu bis-sitwazzjoni tal-pajjiż li beħsiebhom iżuru. Aspett importanti fil-qasam konsolari huwa l-moniteraġġ ta’ zviluppi/inċidenti li jistgħu jaffetwaw is-sigurta tal-Maltin fl-Arabja Sawdija, u f’dan il-kuntest, l-Ambaxxata tikkordina mad-Dipartiment Konsulari tal-Ministeru.

Promozzjoni ta’ Malta

·              L-Ambaxxata ħadmet sabiex tippromuovi l-ħidma tal-uffiċċju f’Malta magħruf bħala ECLASLO u sabiex tisħaq dwar l-importanza ta’ dan l-uffiċċju, li għandu rwol importanti biex iqarreb l-Unjoni Ewropea u l-Lega tal-Pajjiżi Għarab, kif ukoll iżomm id-djalogu bejn iż-żewġ reġjuni ħaj u attiv.

·              Saret ħidma sabiex informazzjoni dwar ir-rwol tal-IMLI f’Malta, u partikularment dwar applikazzjonijet ghal-programmi f’livell ta’ Masters relatati mal-liġi marittima fi ħdan dan l-Institut, titwassal lill-Awtoritajiet fl-Arabja Sawdija u fil-Bahrejn.

·              Il-promozzjoni ta’ Istituzzjonijiet edukattivi f’Malta kienet ukoll fost il-ħidma tal-Ambaxxata, fejn ingħata parir u informazzjoni relatat mar-regolamenti u kundizzjonijiet fl’Arabja Sawdija f’dan il-qasam. Wieħed irid ukoll isemmi li studenti mill-Arabja Sawdija qegħdin jistudjaw fl’ Universita ta’ Malta, studenti Sawditi jżuru Malta sabiex jitgħallmu l-Ingliż, u tobba fl-Arabja Sawdija jżuru Malta għal eżamijiet fl’ livell ‘post graduate’. F’dawn il-każijiet l-Ambaxxata tipproċessa l-applikażżjonijet għal visas wara l-aċċertamenti neċessarji.

Oħrajn

·              L-Ambaxxata wasslet informazzjoni lill-Awtoritajiet kompetenti fl-Arabja Sawdija, l-Bahrejn u l-Yemen dwar laqgħat f’Malta fosthom l-EU-Arab High-Level Meeting on Disability Rights f’April 2019, fejn delegazzjoni mill-Arabja Sawdija ippartecipat f’din il-laqgħa. L-Ambaxxata sservi ukoll bħala mezz ta’ kommunikazzjoni bejn l-ogħla Awtoritajiet f’Malta u l-Awtorijiet fl’Arabja Sawdija, l-Bahrejn u l-Yemen fir-rigward ta’ messaġġi għall jum nazzjonali, ħatriet ta’ Ministri u bidliet fl’ levell ta’ Kap ta’ Stat.

L-Ambaxxata tiehu sehem fil-laqgħat regolari ta’ kull xahar tal-Unjoni Ewropea fejn jiġu diskussi żviluppi esterni, domestiċi u reġjonali. L-Ambaxata tieħu sehem fil-laqgħat organizzati mid-Delegazzjoni tal-Unjoni Ewropea f’Riyadh ma’ Ministri u uffiċjali Sawditi. F’dan il-kuntest l-Ambaxxata irraportat lill-Ministeru l-andament ta’ dawn l-laqgħat kif ukoll żammet il-Ministeru aġġornat dwar zviluppi ta’ interess politiku, ekonmiku, u soċjali fl-Arabja Sawdija u fir-reġjun. L-aspett tar-rappurtar huwa importanti fil-kuntest ta’ reġjun pjuttost instabbli, mifni b’diversi kriżijiet reġjonali.

Seduta  295

04/02/2020

AMBAXXATA TA’ MALTA FIL-FEDERAZZJONI RUSSA - ĦIDMA

12443. L-ONOR. CARMELO MIFSUD BONNICI staqsa lill-Ministru għall-Affarijiet Barranin u Ewropej: Jista’ l-Ministru jgħid x’ħidma saret mill-Ambaxxata ta’ Malta ġewwa l-Federazzjoni Russa tul is-sena li għaddiet?

17/01/2020

  ONOR. EVARIST BARTOLO:  Nirringrazzja lill-Onor. Interpellant għall-mistoqsija li għamel fuq il-ħidma tal-Ambaxxata ta’ Malta f’ Moska tul is-sena li għaddiet.

Minkejja s-sitwazzjoni predominenti fir-reġjun, l-Ambaxxata ta’ Malta f’Moska taħdem bla waqfien sabiex ir-relazzjonijiet bilaterali bejn iż-żewġ pajjiżi jkomplu jitjiebu f’ għadd ta’ oqsma possibbli.

Għaldaqstant, kienu bosta l-inizzjattivi li din l-Ambaxxata ħadet f’ din l-aħħar sena sabiex tgħolli l-profil ta’ Malta fir-Russja f’ oqsma differenti:

-              Politiċi;

-              Konsolari;

-              Promozzjoni ta’ Malta fil-qasam tal-kummerċ u negozju;

-              Kultura u Edukazzjoni.

Il-hidma li saret mill-Ambaxxata ta’ Malta ġewwa l-Federazzjoni Russa tul is-sena li għaddiet hija kif gej:

Politika

·              Ir-Russja hu pajjiż importanti ħafna fl-iżvilupp politiku, kemm bilateralment kif ukoll multilateralment. Is-sena li għaddiet l-Ambaxxata żiedet il-kuntatti tagħha ma’ ħafna entitajiet u awtoritajiet Russi, kif ukoll ipparteċipat f’ għadd ta’ laqgħat u briefings organizzati mill-ogħla awtoritajiet Russi u Ambaxxati ta’ pajjiżi oħra fuq temi li huma relatati mal-Federazzjoni Russa u r-reġjun

·              Inizjattivi politiċi konkreti f’dan il-perjodu jinkludu fost oħrajn:

-              Iż-Żjara f’ Moska, mill-eks Ministru għall-Affarijiet Barranin u l-Promozzjoni tal-Kummerċ, l-Onor. Carmelo Abela f’ Awwissu 2019

-              Il-parteċipazzjoni tal-ispeaker tal-Kamra tar-Rappreżentanti l-Onor Anġlu Farrugia f’ Forum li ddiskuta l-parlamentariżmu f’ Lulju tal-2019;

·              L-Ambaxxata tat  l-assitenza meħtieġa fiż-żjarat tad-dinjitarji Maltin li żaru r-Russja matul l-2019 sabiex jipparteċipaw f’diversi avvenimenti.

·              Apparti hekk, ta’ min isemmi li f’ Ġunju tas-sena l-oħra seħħew il-konsultazzjonijiet politiċi f’ Moska. Għal dawn it-taħdidiet, uffiċjali għolja mill-Ministeru għall-Affarijiet Barranin kienu f’ Moska, flimkien mal-Ambaxxatur Malti f’ Moska.

Konsolari

Birth registration / Reġistrazzjoni tat-twelid	7
Citizenship application / Applikazzjoni taċ-Ċittadinanza	3
Legalisation of documents / Legalizzazzjoni ta’ dokumenti	115
Declaration on oath / Dikjarazzjoni bil-ġurament	2
Passport applications / Applikazzjonijiet tal-passaport	63
Emergency Travel Documents / Dokumenti ta' Vjaġġar f'Emerġenza maħruġ kemm lil Maltin kif ukoll lil refuġjati	1

·              F’ din l-aħħar sena l-Ambaxxata ta’ Malta fir-Russja kienet xhieda ta’ żieda sostanzjali fin-numri ta’ Maltin li jżuru ir-Russja u kif ukoll, ta’ Russi li jżuru Malta.  In-numru ta’ turisti Russi lejn Malta, li kien naqas sostanzjalment wara il-kriżi tar-Rublu fl-2015 u l-2016, reġa’ qed jiżdied. Matul l-2019, il-Konsulat Malti f’ Moska ħareġ ‘il fuq minn tmint elef Viża (skont il-Visa Management System). Dawn kienu Viżas li primarjament kienu għall-skopijiet ta’ turiżmu, kif ukoll għall-studenti Russi li xtaqu jistudjaw f’ Malta. L-applikanti għall-Viżas kienu ġejjin minn diversi reġjuni fil-Federazzjoni Russa.

·              Iż-żieda fil-viżas mhux biss dovut għall-iżvilupp pożittiv fl-ekonomija Russa, imma wkoll riżultat tax-xogħol kontinwu tal-Ambaxxata u l-Konsulat biex tippromwovi lil Malta bħala destinazzjoni eċċellenti turistika. Is-suq Russu huwa miġbud biex iżur pajjiżi Mediterranji għall-btajjel, bħal Greċja, Ċipru, it-Turkija, Spanja u t-Tuneżija. Dawn huma wħud mill-kompetituri tagħna ewlenin fejn jidħol it-turiżmu.

·              Il-Konsolat ta’ Malta f’Moska, flimkien ma’ l-aġenti sussidjarji li jiffaċilitaw is-servizzi tal-viżas (VFS), ħoloq sistema effettiva li twassal għall-ħrug tal-viżas turistiċi f’madwar tlett ijiem, irrespettivament mill-lokalita’ tal-applikant.

·              Il-Konsli Onorarji f’ xi bliet Russi wkoll jaħdmu bla heda biex jippromwovu lil Malta u jattiraw iktar turisti lejn gżiritna. Matul l-2019 saru għadd t’ attivitajiet, speċjalment mill-Konslu Onorarju f’ Nizhniy Novgorod fejn sar il-promozzjoni ta’ Malta.

Promozzjoni ta’ Malta fil-qasam tal-kummerċ u negozju

·              L-Ambaxxatur Malti f’ Moska kompla bil-ħidma tiegħu biex jippromwovi lil Malta bħala pajjiż eċċellenti għall-investiment. Is-sanzzjonijiet imponuti fuq ir-Russja fl-2014 servew ta’ xkiel biex ikun hemm iktar titjib f’ dan il-qassam. Minkejja dan l-Ambaxxatur, u uffiċjali oħra mill-ambaxxata ta’ spiss jattendu fieri u attivitajiet dwar negozju u kummerċ. Mhux darba jew tnejn li l-Ambaxxatur Malti ta intervisti fuq rivisiti, gazzetti u stazzjonijiet televiżivi stabbiliti Russi dwar Malta bħala pajjiż ideali biex tinvesti fih.

·              Għadd ta’ negozjanti Maltin qed jiġu mħajra biex jinvestu fir-Russja. Fil-qasam tal-ospitalità Malta diġa sabet sieqa, b’ lukanda ewlenija f’ San Pietruburgu. F’ oqsma oħra huwa mistenni li jkun hemm titjib sostanzjali fiż-żmien li ġej.

Kultura u Edukazzjoni

·              F’ suq bħal dak Russu, ma jistax jonqos li nsemmu il-qasam kulturali u edukattiv. Ir-Russja hu pajjiż għani ferm fejn tidħol edukazzjoni u kultura. Matul l-2019, l-Ambaxxata stabbiliet kuntatti b’ saħħithom mal-librerija għal Letteratura Barranija. Tant hu hekk, li matul iż-żjara tal-Onor. Carmelo Abela, il-Ministru żar il-librerija u għall-ewwel darba ppreżenta kotba bil-Malti miktuba minn awturi Maltin. Illum għandna l-unur ngħidu li f’ din il-librerija prestiġjuża wieħed isib kotba bil-Malti. L-ambaxxata bħalissa għaddejja bl-isforzi tagħha biex tkompli ssaħħaħ l-attività tagħha ma’ din il-librerija fl-2019.

·              L-Ambaxxata tagħna f’ Moska, ibbenifikat mill-Fond tad-Diplomazija Kulturali f’ April 2019 fejn il-kitarrista Simon Schembri ta kunċert fit-Tsaritsyno. Mhux hekk biss, imma kellu wkoll l-opportunità li jagħti masterclasses lil studenti Russi. Fl-2019 ġiet inawgurata wkoll l-eżibizzjoni tal-pittura ta’ Katrina l-Kbira, b’ kollaborazzjoni ma’ Heritage Malta. Il-pittura ġiet eżebita fit-Tsaritsyno u laqgħet numru konsiderovoli ta’ viżitaturi. L-orkestra Filarmonika ta’ Malta kienet f’ Moska wkoll fl-2019, flimkien mat-tenur ta’ fama mondjali Joseph Calleja

·              Fil-kamp edukattiv l-Ambaxxata qed tiskopri oqsma fejn jista’ jkun hemm iktar skambji, fosthom fil-qasam tat-taħriġ fl-ispazju.  Fl-2019, kien hemm ukoll kuntatti mal-Akkademja Diplomatika, u l-MGIMO.

·              Bħalissa hemm għadd ta’ ftehim bejn iż-żewġ pajjiżi li għad iridu jiġu maqbula u ffirmati fiż-żmien li ġej. Dawn huma ftehim fl-oqsma tal-isport, iż-żgħażagħ, il-kultura u l-kummerċ.

Seduta  295

04/02/2020